Tonzang sanginnpi

Tonzang Sanginnpi Lungzuanhuai na en kik nuam hiam

Tonzang Sanginnpi C Lim

Tonzang Sanginnpi lui pen C lim a kilam pen a en kik nuam te a ding lungzuan huai peuhmah ei

Tonzang Jubilee Laibupi

Tonzang Jubilee Laibu laimai ( pages ) 150 na sim nop leh

KHUA DO PAWI


USA a om Zomi makai ten October 10,2015 ni in Khuado pawi a ni ki bangin bawl khawm leng cih tawh hong makaih in,nong vai hawm theih man un lungdam in zahtakna kong pia hi.Zomi te ki thutuak a khut khattawi khekhat khai a ih om theihna ding na deih na uh hi ding ci-in ka na sang hi.
Ihpu ihpa te pen lokho vive hi in,khuahun zui leh lokhawh,singpuak hun tawh ki zui in pawi na bawl uh a, Ei bel US ah Dollar ngah na ding na sem in Christian vive Ih hih man Ih bawldan ki bang lo kha ding ding hi.Kua ma hong sawl hi lo na pi mite gena ka zak ahi lo,ka muhkhak ihpu ihpa te bawl zia thu pawl khat kong gen nuam mawk mawk hi.
Ahau,azawng,Apil,ahai cih khen tuam na om het lo in mi khempeuh ki hel a ihpu ihpa ten a bawl uh PAWI nam nih om a, (1) Sialsawm/Lawm annek leh (2) Khuado pawi ahihi.
1. Sialsawm/ Lawman nek
Hih pawi pen lokho mi ten khaici (Vaimim,tang,buh cih te) leii ah atuh khit uh April kha kim pawlah bawl uh a, Beh lehphung,u leh nau kipawkkhawmdiak in,a thalloh,a innpi te inn uh zang in,vok/ gango uh a,inn kuan an nek khopna in na zang uh hi.Khuabup ki pawl in Tualbiak na nei uh a,Tual Siampi pan gango in tua gan si tawh Biak na pia in guahzu a,an a po kim na ding,ci dam na ding,huihsi,guahsia om lo a, an alak theihna ding cih phuisam in biakpiak na an Tualbiak na mu ah,apai Tual upa te bek in ne uh hi,Inn ah puakding ki phallo a.saval a om leh mi sa tawm in nesak liang uh
hi.
2.Khuado pawi
Khuado pawi pen,khua khempeuh ah ahun kituak in bawl thei lo uh hi.Bang hang hiam cih leh Vaimim leh Taang a ciing om a,buh ciing a om ban ah Simlo leh Zolo kho cih bang in om ahih man in tuktun hun ki tuak lo hi.Khuado pawi pen anlak khit,Khai kaihkhop khit huna ki bawl ahihi.Tu hunteh inn kuankim ki ut a,Vaimim leh tang a ciing ten zong buhlak khit,mundang a sang kah sang naupang te ngak uh a,October sang khak hun sungah Khuado pawi a ki bawl ahihi.
Khuado pawi ah pen u leh nau meltheih cih hi tuan lo in,a ki thutuak zaw deuh teng,lokhawh na ah kilawm/Lawm kikai in nuam kisa le uh a mau teng mah ki pawl in Khuado pawi ah ki pawl lel uh hi.Sawmgiak ci uh ah mi cithei deuh te sumtawngah tausang Kham/Ham zong kici kidawh in tua mun ah tangval te vagiak khawm uh a,a mau teng mah sun lo khawhna ah kilawm/law thawt a ci zong om in a mau teng mah kipawl in a Sawmgiak na mun uh ah Khuado pawi bawlkhawm thei uh hi.A hunpen anlak khit,kumlui bei ta kumthak hong tung cih dan in ngaih sun uh a,tu hundan leh kumkhat sung Topan hong om pih,hong gualzawh pih lung dam koh biakpiak na luini cih dan ahihi.Khuado late ah kumlui kha a,kumthak dawn cih Dan in zong ngaih sun uh hi.
Khuado pawi bawldan pen khua khat leh khua khat ki bang lo hi.Kei muhkhak danah,Vok/gan go uh a,an nek khop na bek in zang lo uh a,Sawm tangval ten gamsung singtung ah akai ngalthen/ngaltun khuaibu te zongin zan khuamial teh vala uh a,a Sawmgiahna munah singtawn sang thei thei phutin tua sing dawn ah a muh zahzah uh Khuado hun ma in suang uh hi.Khuado hunteh tua khuaibu te meitawh hal uh a, khuaibu sung a om khuaino te huan in tangsih tawh ki meh in lim kisa mahmah hi.
Khuado pawi hunsung ah hunlem pen nitak hunkhat gel uh a,khuanawl pan ,khuaila,khuaivaitung ki neih in,gamkuan nungak,tangval te lam 2 ta bang kihal in hong ciah uh a,meilah/Meisel hong de uh hi.Khuang,Zam,Daktal,Sialki leh phit tum in a lamsa in khua sung honglut ma un,khuamual ah nupi ten Zozu khum mahmah khaihsa thawl sungah thun in vai dawn uh a,zu natulh in pawlkhat ten tukpak tot sak hi.Khuado pawi bawl na inn ahih kei leh Khuai ai a om leh Khuai ai te inn ah vai dawn te tawh lamsa in hong tung uh a, Khuado la,khuaila sa in lamvui in zanthapai gual nuam uh hi.Khuai ai cih pen misi a om teh vuipah lo in sawt pipi koih uh ahih man tho ten bawk a,khuai aileng khuai hong pai in tho te hong ne pahpah cih up na a neih man uh hi a,man takpi hi.
Ihpu ihpa ten dawi thu na um uh hi.Dawi min lo ngamlo uh a,dawi tawh kisai agen uh teh ahi zong dawi min alawh uh teh khuazing peuh ci uh hi.Khuado cih pen ih ten na khua ado hi loin dawi te a do a hi uh hi.khua cih pen Ngal khua hang,khuasia meide,khua lei uikai,ka inn sung uh khuazing,khuasia peuh na ci uh hi.Mizo te bang in,khuavangin,khuavang chhinchiahna cih khawng na zang uh hi.Tua ahih man in kumlui bei kumthak hong tung ta,ci in nitak hunlem pen khat gel in dawi na hawl khia uh hi.Kau hawl ki ci hi.Inn sung bemkawmpan aki pan singkhuah,tuga heiga te tawh sat in dawi hawl khia ziahziah uh hi.Inn sung pan sang kil ah,sang kil pan in lim bikhalap ah,in ka ah sialkong dong ah not khia in deng gawpin thua lawn uh hi."Dawi aw ciah in kau aw ciah in na khua na tui zong in,na zun na ek nam sia hi" ci uh hi.
Ih Khuado pawi ah makai te hong makaih na bang zui in ei mah leh ei mah ki sittel a Ih mawh na Ih khialna mah tawh Jesus zuan in,gualnop na bek hi lo Topa san theih biakpiak na ih suah sak theih ding Thupi ka sa hi.Ihpu ihpa ten Khuang,Zam,Daktal,dakbu,phit leh sial ki te a kituak tak in tum a,Khuang tumpa ki hekzia,khekhai zia leh lamdan,tawn dan mipi ten azuih mah bang in ei zong Pasian zia makai te zia a zui siam kim ding in Topan thupha hong pia ta hen ci in Khuado thupha kong paih hi.


Evan Suum Do Thang
Founder& Director
Agape Revival Ministry

10/10/2015
Saturday