TULAI GAMVAI HUIHNUNZIA ET NA - BOB Tuangpi

Tunai gamsung kumpite kalsuanzia leh mualmi makai tuamtuamte sulnung i et ciangin gamvai kikalhna leh kimawlnate igamsung mailam ahoihzaw ah kalsuannopna leh mailam igam koici bangin kivaipuak ding cih thute leh nisim gamthu ah kidemna avui atang ban ah thuneem tawh kikalh tuakna (political game of hard power & soft power) tawh alang tuak ah Kawlgam gamthu ahawlpite (key players) aki vik ziahziah laitak uh ahihi. Tua gamthu ahawlpi pen lompi ( group 5) pha hi. Tulaitak gambup uknaza asem NLD kumpi, gambup galkap mangpipa pawl galkapte, mualmi gamthu sem party te, mualmi thautawi NCA sign thuh khin pawl leh NCA sign thuh nailo pawl cih bang teng ahuampi in kikhen thei hi.

NLD Kumpi Leh Galkap Sungvai
2015 Gambup kiteelpi khit zawh NLD in gambup uknaza kici (political power khempeuh ahi, executive power, legislative power, judiciary power) khempeuh lenkhinta hi. NLD in ama ngimna leh mungtuppi ahi gambup thukhunpi pen Democracy ngeina tawh kilamh ding leh galkapte pen gamthu pan anungkikna ding (Democratic Federal Constitution & Militatary barrack) cihte kiteelpima pekin atangkona leh pawlzotna (Election Campaign Message) ahihi. Tua bang ngimna leh mungtuppi NLD in aneihna sungah atupna atangtunna dingin gambup innpi (Union Assembly) ah ahih theih zah tawh lampi azon hangin 2008 gambup thukhun laih zawh nading leh vatpaih nang lampi omtheilo cih tel tatak ta hi. Tua ahih manin hih 2008 gambup thukhunpi(2008 constitution) alaih zawh nadingin, Aung San Suu Kyi leh NLD kumpi in abeisa USDP kumpi leh Thein Sein maban ahi, gambup kilemna khawmpi (Union Peace Conference) siksanin ZOMI CONGRESS FOR DEMOCRACY in apatkhia 21st Century Panglong tawh gawmkhawm kikin (Union Peace Conference - 21st Century Panglong) cih tawh kibelpawlna gam tatak tawh gam kilamh kik nang ngaihsutna tawh 2008 thukhunpi laihzawh nading hih 21st Century siksanin Gambup Innpi khengvalin lampi azon laitak ahihi.

Galkap lamte mungtuppi ahih leh NLD tawh kilehbulhin 2008 thukhunpi akip semsem nadingin gambup innpi (Union Assembly) tungtawn leh apua lam pan 2008 thukhunpi asusia dingte hepkhiat ding leh vatpaih ding ama mungtuppi ahihi. Bang hang hiam cih leh hih 2008 thukhunpi pen galkap ta' dia ahuihdikna (oxygen) leh gamthu ah thuneihna akhahsuah lohna ding uh (Constitutional legitimate power of Tatmadaw) ahih ban ah amau hamphatna (military interest) ahih manin, sih leh hinin dal ding cih pen amau'lampi sialna (Strategy) ngiat ahih teh amau'nasep sem suak ding uh hi.

Mualmi Agualzo Party te Dinmun

Abeisa 2015 gambup kiteelpi khit ah hong kah agualzo mualmi party ahunkhop khat om himah ta leh mualmite' pawlbawl loh hangin NLD in kumpi dingzo ahih manin, Gambup Innpi (Union Assembly) ah ama ettheih mello leh alang teng NLD in meetang (vote) khaina tawh zawhthawh bawl pianin gambup innpi ah siapi sem ahih manin mualmi MP te' dinmun leh adangte' panlakna muibunzo nailo hi. NLD kumpi in atamzaw tha tawh nopnehna (tyranny of majority) tawh kalsuan mawk ahih manin, "ken sem leeng apiang thu hi (ငါလုပ္ရင္ ဘာမဆိုျဖစ္တယ္)" cih tawh apai tak teh mualmite muanna leh lametna tampi hong satkham kisa mahmah hi. Ahizongin, Kawlgam gamthu ah mualmi party te lo tawh muibun zolo ding uh hi. Mualmi party te'dinmun mailam ah hong hoih toto ding hi.

Mualmi Thautawi NCA Sign Thuh leh NCA Sign Thuhlote

Thautawi lakpanin NCA sign thuh pawl leh NCA sign thuhlo pawl nih pha uh hi. NCA sign thuhte pen abeisa Thein Sein kumpi tawh kihosiam leh gamthu ki-ukna ah kibelpawlna gam tatak lamh nading vai ah gamthu lungmuanna tatak leh thukimna kamciam a omma in amau'lametna khat tek tawh NCA sign thuh uh hi, kici thei hi. Tua leh NCA sign thuhlo pawl bel Federal Constitution vai akician kamciam leh gamthu kikup nang lampi a om mateng khauhtakin ading pawl uh ahihi. Thautawi khempeuh lakah athahat teng in NCA thukimna (Nationwide Ceasefire Agreement) neinailo uh ahih manin, NLD kumpi ngimna ahi NCA siksanin 2008 thukhunpi laihna ding kamkup toh ding pen alampi kiciannailo suak hi. Atatak in bel galkapte in NCA thautawi khempeuh in sign a thuh ding uh deih mello zaw hi. Tutung NCA sign thuhlo pawl in Pangsangh khuapi, Wa gam ah athukimna vuah NCA sign thuh ding sangin lampi thak zong ding cih thugingte in gamvai tampi hong kikhelsak ding hi. Tua kikal ah khau kisuhna nasia semsem leh gamvai huihnunzia kikhel lai ding hi.

Chin National Poltical Dialogue Vai

Abeisa Nay Pyi Taw khuapi ah amasa pen 21st Century Panglong Khawmpi Aungust31-Sep4, 2016 sung kibawl khinta hi. Tua khawmpi kibawl theih nadingin tanu sem ding State Counsellor in Union Peace Dialogue Joint Committee phuanin hih sung ah agualzo party te leh thautawite'taangmi honkhat in tanu kiseh hi. ZCD pan zong Pu Zam Za Mung kihel hi. Amasa 21st Century Panglong Khawmpi kipatma pekin ZCD in 21st Century Panglong Khawmpi ah thusun dingvai mipi tawh kimuh kholhna leh kamkupna neihkul hi cih khensatna a om khit teh Chin State Buppi huamin kipawlna leh gamthu party teng avekpi kisamin, " Chin Statewide Consultation For 21st Century Panglong Conference" ci-in kamkupna nasiatakin The Orchid Hotel, Yangon Khuapi ah kineihpihin tua kamkupna ngaihsut lakna pan akingah thukimna khempeuh Zomi Congress for Democracy in amasa pen 21st Century Panglong Khawmpi ah laipi phahna leh thugenna Chin State Bup taangin kinei khin ta hi. C tawh ading kipawlnate adiakin party pawlkhat te kisam napi hong pailoh uh pen C paulapin kilem nang leh kithutuahna Chin State sung ah a otot uh hangin alungsimtawng vuah tua thute teeng hetlo cihna kilangh khinta hi.

Tupanin 2019 dong 21st Century Panglong khawmpi (5) vei kibawllai ding hi. Kumkhat (2) ta kibawlsawmin khaguk halta hiding hi. 2019 anunung penin gambup thukimna (Union Accord) ngah zawh nang geelna ahihi. Tutung (2) veina 21st Century Panglong khit teh ahunzui-in Chin Statewide Consultation ZCD makai-in mipi ngaihsut lakna leh kamkupna kinei toto lai ding hi.

Hih Chin Statewide Consultation For 21st Century Panglong pen Chin State ai-awih sung ah akibawl ngei lakah amasa bel leh vekpi kihel pen (all inclusive) zongh hi aa, kipawlna leh gamthu party (CSOs & Political Parties) 100% ah 95% kihel hi. Political party lakah CLD leh CNDP bek kihello hi. CSOs lam pan Southern Chin State lam pan bang hong limkah mahmah uh in Zomi Kipawlna teng bel akimphial ahihi.

CNF Makaih Chin National Political Dialogue Zomi Minpua Kipawlnate Kahhuai/ Kahhuailo?

Gamthu kamnal ah "National" cih in thu tampi gen hi. Tutung CNF te'bawlsawm ah National mai ah Chin cih kammal om ahih manin, Chin akiciminam kuamah om kei ta leh inunglam pan hong kiminphuahna (a given name from our back) tawh alungkim mahmahte'makaihna pawi ahihi. CNF in Chin State bup taangmi hi ung ci-in maipha angahna lel ding uh pawibawl pakna (ဟန္ျပ) zongh ahihi.

CNF pen gambup galkap makaipi Snr.Gen. Min Aung Hlaing in zong thautawi kipawlna ding nangawnin santaak asakloh hin Aung Min in athuumsak keei teh NCA sign thuhna ah akihelkha bek hi aa gamthu ah vaang (no political dignity) neilo hi. Mipi teelcing zongh hilo hi. ZCD pen mipi taangpi taangta in makai dingin ateelcing gamthu tangthu nei leh vaangnei (နိုင္ငံေရးသိကၡာ) Kawlgambup ah anei party khat ahihi.

I kipawlna min bang Zomi min pua lialua-in CNF nuai ah ivalutlut mawk leh bel 1947 kum Panglong Khawmpi in Chin tawh ipute in sign ana thuh khit uh leh Kawlgam suahtakna ngah khit Chin Special Division lai ikhialhsa teng mah akhial zel ding ihihi. Midangte'ong minphuahna ah a aangtang mahmah pupa'sisan alangpangte ihihkhak leh ipupate'kha in aomomna vuah akhitui uh na luangluang ding hi. ZOMI minsel kipawlna limlim leh ZOMI te va kahloh ding ahoih pen ahihi. Akahte sapna ngahte ahih leh amau'khensatna hiding hi. Ahizongin akihelte bel "ui in a luaksa nekik" acih tawh kibang ding aa, mailam ZOMI tangthu ah gam leh minam zuak ZOMI khang tangthu zumhuaisak (အမ်ိုးသစၶာေဖာက္ သမိုင္းတရားခံ) te atheihloh kalun asuak gige uh hiding hi.

Agelh : Bob Tuangpi