Sia Zam Khat Kham
Inn pan gamla simsim ah college kah dinga kuankhia ding tangvalno khat thu ka za kha ngei hi. Tua ni zingsang annek ma thungetna ah a pa in ama ading thungetsak khin hi. A paina peuh ah Pasian in a kepsak nading, pilna a zonna ah a lawhcin nading—a pa' thungetna kicing mahmah hi.
Inn pan paikhia taktak dinga a kithawi dingin a pa in thu pawlkhat hilh lai ding cih lam-en a, a kigingsa-in om hi. A pa in bangmah gen beh nawn lo-in a tapa liangko tungah a khut taklam nga-in a maitang itna tawh et ngiungeu-in, " Kua ta na hi hiam cih kiphawk den in," ci-in kam vaikhak hi.
A pa in tuateng bek hi lo-in thu pawlkkhat genbeh zek leh a hoih tam? Um kei mawk ing! Tua tangvalno pa in tua zingsanga a pa' kammal a khantawnin mangngilh lo hi. Na khatpeuh a hih ding ciang, thu khatpeuh a khensat ding ciangain a pa' kammal phawk den hi. "Kua ta hi mawk ka hi hiam? Hih na hih bangin hih leng a kilawm ding hiam? Hih vai hih bangin semin bawl leng a kilawm ding hiam?"
Eite zong i pa' inn pan a gamla sim zek-a khualzin-a om Vantunga om i pa' tate i hi hi. "Eite, Pasian tate cih-a i om nadingin Pasian in eite tunga hong sunleet itna lian mahmah si! Ei lah tua mah i hi hi. Leitung in eite hong theih lohna amah a theih loh hang ahi hi," ci-in sawltak John in hong hilh hi (I John 3:1, ZIV).
Hi takpi hi ve'n! Eite Pasian' tate hi takpi hi ve hang! Lamdang lua hi, hong hehpihna! Piandang lua hi, hong itna! cihcih ding sim loh om kei mataw!
I pa in lai hong khaknate sung ah, Laisiangtho sung ah, eite kua tate i hi hiam cih i kiphawk ding hong hilh den hi. "Ahang in, hun khat lai-in note khuamial na hi uh a, ahi hangin tu-in Topa sungah khuavak na hi uh hi. Khuavak tate bangi na nungta un" (Ephesians 5:8, ZIV) ci-in hong hilh hi. I Topa ngiat in, "Tua mahbangin na gamtatna hoihte uh a muh ciangin vantunga om na Pa uh a phat nadingun na khuavak uh mite mai ah na tangsak un," ci-in hong hilh ngiat hi (Matt. 5:16).
I Pa' inn tawh a kigamla zek hih leitung ah i nuntak sungin bangci bangin i gamta hiam? Vantung a i Pa' "tate" bangin i nungta hiam? I gamta hiam? Kua' ta i hi hiam cih i kiphawk den hiam?
Leitunga i innkuan min a dai ding i deih peuhmah kei hi. I nu i pa' min a dai ding zong i kidawm mahmah hi. "Tua' ta, tua' ta hi veh aw" ci-a mite' muk-pik ding zong ki-ut tuan lo tek sam hi. Innkuan min leh nu leh pate' min a khual lo taktak mi tam het lo hi; a tuaci lo mite lah a mi bang het lo hi mai ding hi.
I sangkahna ah, i kimawlna ah, i vaksuk i vaktohna ah, inn ah gam ah, koikoi ah i om zongin i hihna phawk ni—vantunga i Pa' tate i hi hi. "Children of of God-tekna theou) ci-a hong kiciamtehte hi zen hi hang! Vantung leitung na khempeuh a bawl a siam Pa, a nei a kem Pa, "Pa aw" a ci theite hi hang. Tua Pasian' tate hi zen hi hang!
Zeisu Khazih i upna tawh Pasian' tate i hih manin tua Pasian innkuan sunga om mite' pianzia leh zatziate zong i nuntakna ah a kimuh theih ding thupi mahmah ding hi. Itna cihte, hehpihna cihte, mawhna kimaisakna cihte, khat leh khat kithuak siamna cihte, thumanna cihte, cihtakna cihte!
Leitunga nu leh pate' tate in a pianna uh a nu leh a pate lam khat teiiteii maw, "vunhawk phial-in maw" a sut hamtang mah bangun, Zeisu Khazih upna tungtawna Pasian ta ahi eite in zong i Pa Pasian leh i Honpa leh i Upa Zeisu i sutna a om buang hiam? Koi mun ah i sun hiam? Mite'n sun hong sa uh hiam? Hong mu thei uh hiam? Midangte tawh i kilamdanna limlim a om peuhmah maw leh? Kua u sun hiam? Kua ta na hi hiam cih na kiphawk den hiam?
Ni simin, Khasiangtho vangliatna tawh, Zeisu Khazih a sun semsem dingin hong kilam-en hi gige hi. Ni kum leh tu kum i kilamdan zekna a om hiam? A beisa kum sawm lai peuh tawh i kibangbang mawk hiam? Leitung nate peuh thupisa semsem mai a midangte tawh i kilamdan mel kei leh bel dahhuai mahmah ding hi. Kua ta na hi hiam cih na kiphawk den hiam? A it thei zaw, a hehpih thei zaw, a lungduai zaw, a migi zaw, a thuman zaw, a thutak zaw, a muanhuai zaw a siangtho zaw dingin Pasian in hong deih hi.
Kua na i hi hiam cih i kiphawk den ding thupi mahmah ding hi. Kei leh kei a kithuhilh hi'ng, nang zong Pasian in tua bang dingin hong deih lam na kiphawk in. Topa'n thupha hong pia hen!
Sia Zam Khat Kham
fb:https://www.facebook.com/zamkhatkham
0 coment�rios:
Post a Comment