Khaici masa khat:
---------------------
Sangmang te zom a Zogam leh Zomi te tungah itna tawh Lungdamna Gospel thupha hongpuak Rev. Dr. Pum Za Thang Tombing hi a, kum 1976 in Zogam Gospel thupha puakdingin kum 1976 in Haiciin khuapan kiman kha hi. Azintunna pen Rev. Muana Khuptong te ( Portland -USA) inn hi a, apa in limtakin zin nado hi.

Cikha leh Tonzang ah kipuak:
-----------------------------------
Haiciin pan akimat khit ciangin Cikha ah kipuak in, tuapanin Tonzang ah kipuak suak hi. Tonzang ah Thonginnpi sungah kikoih in, tua laitakin Zampi pan Sia Hausiam hong paisuk vingveng in Tonzanga Sia Haudal pa in tavuan na la hi. Sia Sumdo in zong immigration officer pa tungah vapai in hong tankhia uh hi.

Zogam khanlawhna pu nih kici:
-------------------------------------
Zogam ah missionary te kum 1899 pan hong kipan in anunung pen 1950 pawlpi in amau gam ciat uh ah naciah uh hi. Tua khitzawh missionary lah hong pai theilo in ei leh ei upna tawh kalsuan toto in i om a, lawki lah tam mahmah Christian zong lah khangto mahmah laitakin upna thu leh upzia thu limtakin akitelna dingin Pasian in anuaia Siate nih hongzang phadeuh hi.
(1) Rev. Dr. Pum Za Thang ( India )
(2) Rev. Dr. Hau Lian Kham ( Myanmar)
Kum 1975 khitciangin " Na piangthak hiam " kicih tang tang theihna dingin Siate nih in itna tawh Gospel thu khaici hongpuak uh hi. Sangmang te gen Lungdamna Gospel thu hong zomto uh a, mipi teltheih ding leh nuntakna kikhel theihna dingin Message thulu pen " Na piang thak hiam ? Zeisu honpa leh Topa in na sanghiam ? cih hong hita hi.

Zogam Khanlawhna pu adamlai tungah thupha dawhna omding:
----------------------------------------------------------------------------
Hong nusiasa Rev. Dr. Hau Lian Kham guh pen Yangon panin Tedim ah kum 2022 November kha sungin kipua to in, kiphum hi. Adamlai Rev. Dr. Pum Za Thang pen Haiciin khua ah Dec 10,2022 sungin sam in ama tungah Zogambup aitangin thupha dawhna neidingin geelna om hi. Hih vision pen Rev.Niang Go Man tungpan in abeisa kum 2 lai in Topa hopihna kician takin hongtunga , tun akisem thei pan ding hong suak hi.

Banghang in thupha dawhna kibawl?
-------------------------------------------
Amimal tungah thupha dawhna akibawl nuam hilo in, Pasian sawl Lungdamna Gospel thu hongpuak pa pen Pasian sawl ahih manin Pasian kiang leh Pasian tungah ibawlnop thupha te pen ama tungah akibawl ding ahihi. Akimu theilo Pasian a it taktak ten akimu thei ama anasem te it in thupha bawl nuam uh cihna ahihi.

Tha kingah mahmah ciat :
-------------------------------
Dec 10,2022 ni in Topa tungah thupha dawhna in Topa sawlpa tungah thupha dawhna leh ama kiangpan thupha piakna kineisak ding a, Haiciin khua bup leitung kiuli a om khempeuh in tha kingah mahmah ciat hi. Mimal kim in hanciam in piakkhiatna kibawl ziahziah a, lungkim huai mahmah hi. Akihel kha khempeuh pen Leitungbup Zomi te adingin mapang bangin kangaihsun hi, banghang hiam cih leh Rev. Dr. Pum Za Thang Zogam bup adingin Lungdamna Gospel thupha hongpuak pa ahihi.

Lungkimna:
---------------
Topa in hibangin thupha zawi nahoih semthei dingin ngaihsutna vision thak leh mission thak Rev. Niang Go Man tungtawn in hong suahsak manin ilungdam mahmah hi. A vaihawm khempeuh , asem khempeuh, apia khempeuh leh thupi asa khempeuh tungah Zogam leh Zomi bup tunga Gospel tawh hongtawn khawm thupha khempeuh Topan hongtungsak tahen.

Lungdamna leh lunggulhna tawh,

Rev. Dr. Pau Khan Khai
Director
Zosiam Gospel Ministry
Louisville, Kentucky
Dec 7,2022. 

 

Shared by>>>Zosiam Gospel Ministry

Read More

A ( 8 ) VEINA ZOMI SIAMSIN MEDICAL TRIP TAULENG KHUA VAI

A ( 8) Veina Zomi Siamsin Medical Trip Tauleng khua vai Lungdampihna leh Lunghihmawhna:

Tutungin Zomi Siamsim Medical Trip pen Tauleng khuading cih honggen uh ciangin kalungdam mahmah a, thungetna leh akisam bangin ma kapanpih khak manin ka lungdam mahmah hi.

Siamsin khangno te zong Topan hong ompih in mimal 60 kim bek paithei ding acih kimlai Pasian hehpihna tawh mimal 126 bang hongpha thei in, Tauleng khangno ahuhding a pai mimal 30 teng tawh agawm in Khangno mimal 156 bang akihel thei hongsuak uh hi.

Lungdamna :
1- Tauleng khua kisat zawh kum 103 sungah Siamsin min tawh khatvei mipil hizah akikaih khopna ahih manin kalungdam mahmah hi.

2- Tauleng khuanu khuapa ten zong atunga ngaihsutna sangin thangah mahmah zaw uh ahih manin pawlpi 3 omtengin biakinn tek khak cip in April 13-16,2018 sungteng khuazangbupi in kikhopna neihpih uh hi.

3- Neklehdawn kisam teng pen USA a Tauleng innkuan leh Kalaymyo Tauleng innkuan panin hanciam phadeuh uh a, thangah mahmah ciat uh hi.Bawngkhat, Lawikhat leh vokkhat tawh pilna khaici tuhna Khuazang mintawh kinei thei hi.

4- Siamsin te ading akisam Medical vai leh TA tuamtuam ding pen ZIUSA , ZBCA-USA, ZCC Louisville , Minister Paulun, akipan Kalaymyo Zomi , Tedimmyo Zomi, Tonzangmyo Zomi leh mimal pawlkhat in panpih uh hi. Nakpi takin nulepa ten tha kipia mahmah hi.

5- Zatui zaha bek hilo in khantohna ding tuamtuam naupang ahizongin, nupi papi ahizongin thapiakna tuamtuam nei thei uh a, Tauleng khua leh akim apam pan hongpai khempeuh in thangah in lungkim mahmah uh hi.

6- Siavuan Siamah te zong kimtakin kikai khawm thei uh hi.

7- Cina mi 459 leh ha akilak mimal 135 pha hi.

8- April 15 ni Sunday zingsang in zong America panin thapiakna leh lungdamkohna thutomno genna kanei thei a, ka lungkim mahmah hi.

9- Siamsin nasepna tawh kisai in Siamsin Advisor khat kahih man bek hilo in Zomi te khantohna ding lunggulh mahmah kahih manin nakpi takin thapia leh thangah ka hihi.

ZRA kamuhzia:

ZRA pen Zomi te adingin khat bekbek ineih sunsun gamleh mimal hudingin imuan leh isuan kipawlna khat hi in akua mapeuh in thapia in ikalsuan pih mahmah ding zong athupi ahihi. Zomi te adingin Zomi kisam ahih manin ZRA pen i deih a i deih kei zongin ipanpih hamtang ding ahihi. Laisiangtho tawi in kiciamna abawl Zomi galkap te ahih manin paihtheih omlo in thungetna tawh panpih dingin kangaihsun den hi.

Tutung ZRA nasepdan thanem kasa hi.

Tutungin Tauleng khua ah ZRA in amuhnop pa uh Pa Kimtuang kaikhia ziau lo in khuasunga Zomi Siamsin te adingin lungnop lohna aom sak sese uh pen lamdang kasa hi, Tauleng khua adingin CNA leh Kawl galkap te thumvei bang akikap nasa mun ahih manin hong pilvang deuh leh hoih dingin kangaihsun hi. Makai pi te in tangval thautawi te limtakin makaih zawh mahmah kei leh mailam ah Zomi te adingin maban hoihlo hongsuak thei ding hi. A nasep uh man kha mahdinga, ahizongin asepzia uh pilvang lo deuh kasa hi. Pilvang zek kisam dingin ka um hi. 
Mimal vai leh Siamsin vai khensiam kul hi.

Tutunga thupiang pen Pa Kim Tuang tawh kisai hi-in athupiang' nitakin USA pan ka lungnuamlo ahih manin Phone tawh Kimtuang kahopih pah a, Siamsim makai te zong limtakin kahopih pah hi. Siamsim Advisor hihna leh Tauleng khua makai khat hihna tawh gawm in athu avai khempeuh ka kan kawikawi a, limtakin kahopih a, mimal in dot theih ding teng leh kuptheih ding teng limtakin ka kum thei hi.Thusia apian lohding leh Zomi te i ki pumkhatna asiat khak ding lung hihmawhna tawh ahopih kahihi. Thupiang vai tawh kisai in ZRA te dotnop pen Pa Kimtuang bek hi in, adangte adingin sepdan asiam loh manun launa leh patauhna hongsuak kha ahih lam ka theih cian caingin ka tawl hongdam zaw deuh hi. Thu khempeuh ahoih lam manawh ta danin kangaihsut laitakin Social media te ah thuthak dan khat in hong kikhah kawikawi kamuh ciangin ka lungnuam lo hi. Kimtuang tawh phone a kakiho laitakin " Sia aw Siamsin vai tawh kisai lo hi kei mimal vaibek hi " hongci ahih manin kangaihsut dan khat hong kilamdang kik hi. A tungin Siamsin buppi abawlsia leh anawngkai sak danin ngaihsun kahih manin ka lung hong naumhetlo a ahizongin athu limtakin kakan kan teh Kimtuang mimal vai a amuhnopna uh om ahih manin Siamsin adingin ngaihsut hongnuam kik kasa hi. Siamsin lui Siamsin thak adingin nahoihsepna ah hibang thu piang pen asialam cilbawl in ahoihlam ding ngaihsun a, imainawt zawkding ahihi. Siamsin lam pan zong Phone ah ikiho na tungtawn in athu daisa abang pen mutkuang kikkik lo ding hihang cih hongthum nuam ing.

Zomi te kipumkhat in mainawt loh phamawh hi.

Rev. Dr. Martin Luther King in athugenna ah, " Na lentheih nawnkei leh tai in, na taitheih nawnkei leh pai in, na pai theih nawnkei leh awmtal in " ci hi. Zomi te kitelkhial leng tawm mahmah ihih manin hawmcing lo luading hihang. Pankhop kul mahmah zaw ding hi.

Tuhun pen :
1- Sepkhop hun hi.
2- Nekkhop hun hi.
3- Puakkhop hun hi.
4- Mainawt khop hun hi.
5- Geelkhop hun hi.
6- Kitelsiam zel hun ahihi.
7- Lungdamkoh khop hun ahihi.
8- Mawh kimaisak hun ahihi.
9- Khat leh khat tha kipiak hun ahihi.
10- Zomi hihna Identity limtakin kep hun ahihi.

Mother Teresa thugen thupi sa ing:

1- Ka sisan pen Albanian ka hihi.

2- Ka gammi hihna pen Indian hi.

3- Topa hongsapna pen Leitungbup ading ahihi.

4- Ka lungtang khempeuh Zeisu ading ahihi.

I manphatna kibanglo taleh manpha kimciat hihang:

Siamsin te khangto leh Zomi te akhangto hidinga, Zomi galkap te khangto leh Zomi te adingin midangten hongsimmawh theilo ding hizel ahih manin kitelsiam a, khat leh khat ma ipan khopding thupi mahmah ding hi.

HIh thupen Tauleng khua a thupiang ahih manin tu a kipan in itna tawh hongdaisak sawm un.

Siamsin Medical Trip Tauleng khua a pen Lawhcing mahmah ahih manin thanemna dingin ngaihsun kei ni.

Lungsim tawng pan,

Rev. Pau Khan Khai.
President- Zosiam Ministry.
Advisor - Kawlgambup Zomi Siamsin Kipawlna.
April 19,2018.

Read More

A KHANGTO MINAM - REV. PAU KHAN KHAI

              A KHANGTO MINAM

Gelh:Rev.Pau Khan Khai

Leitung na khempeuh tulthei  mualthei  mah  ta leh, lei  pian

Mapek a hong itna tuni  ciang a khel ngeilo  Topa min ih phat masa

Hi. Leitung mun tuamtuam a om Zomi khempeuh in a khangto leh

Thupha ngah minam i suah theih na dingin  hih a nuai a thu 4 teng

Lungngai khawm dih ni.

1.Kha mangthang veimi hi ding

2.Mi mangthang veimi hi ding

3.Mi pau thei in eipau a zangmi hi ding

4.Mi ngeina theiin ei ngeina akem mi hiding hi.

1. Kha Mangthang Vei Mi Hiding

Veina omlo in lawhcinna  lianpi kingah theilo hi. Nasep khat

Peuhpeuh ah i gualzawh nadingin veina leh lainatna kisam masa

Hi. Kha mangthang veina in mi khempeuh huam a, kua mi tuam cih

Omlo in mi khempeuh kihel hi. Kha mangthang veina tawh a omna

Gam nusia-in a kuankhia mi pawlkhatte pen America panin

Kawlgam ah Adoniram Judson, England panin India gamah William

Carey , Scotland panin Africa gamah David Living Stonete ahi

Hi. Kha mangthang nasepna ah i lawhcin nadingin  lutang maw,

Sisan maw, khitui maw, khua-ul maw, neihsa maw, cih bangin a

Nam tuamtuamin tuh kul hi. Tua ahih manin Zomite’n Topa maitang

I muh theih nadingin a masa penin Kha mangthang a veimi i suah

Nadingin thungen ciat ni.

2. Mi Mangthang Vei Mi Hiding

Kha mangthang veina in mi khempeuh  a ding  hi  a, mi

Mangthang veina pen Zomite a ding  ahi  hi. Zomi hong  vei dingin

Mundang gamdang panin mi hong pai  ding hamsa ta ahih manin

Ei leh ei kivei ding Topa’n hong lunggulh ta hi. Mi namdang tungah

Veina neih zong a thu mahmah hi a, ei  mi  ei  sa te veina pen ih

Mawhpuak ahi  hi. Nasepna  taktak  alim akhum nadingin  Lai

Siangtho gen bangin “ Jerusalem pan ” Sawl.1:8 cih kammal pen a

Etlawm mahmah thu khat ahi hi. Gentehna in CBA zum nasemte in

Mi mangthang veina tawh 1981 kum pawlin Mizoram a Zomite

Tungah nasep hong kipan a tu in Pasian hehpihna  hangin biakna

Kipawlna bucing khat hong suak ta uh  hi. Hun khat lai in midangte

Vei a hih hangin tu in midangte a veithei dingin hong  omta uh hi.

Zomite’n a beisa in sum leh pilna bek i zong a mailam ah mi mahmah

I kizon ding thupi ding hi. CBA te veina tawh Mizoram a Zomite in

Biakinn hoih mahmah te tawh Topa  a  phat  theih mah  bangin

Kawlgam mun tuamtuam a  om  Zomite in zong  ZBCM te veina tawh

Nasepna hangin  Mandalay , Mogoke, Lashio, Hpakant, Maishu,

Yangon leh Maymyo te ah Zo pau tawh Topa min phat  ziahziah 

Thei ta uh hi. Nang mi vei ding maw? Mi’n nang hong vei ding?

3. Mipau Thei-in Ei Pau Azang Mi Hiding

Mipau theihna pen pilna hi  a, eipau  theihlohna pen haina

Bek hiloin, hing manna ahi hi. Minam khat  hihna pen pau kitheihna

Hi a, ahi zongin pau kithei khempeuh minam khat bel hikhin tuan

Lo hi. Koikoi ah i om zongin ih pau i theih kei leh minam dangte’n

Hong thupi sim theilo ding hi. Banghanghiam cih leh Pasian in pau

Nam tuamtuam hong zatsak pen eipau tektawh amah ih phat ding

Hong deih na hi. Biakna pen ut dandan in kilaih thei a, ahi zongin

Zomi hihna pen ut dandan in  kilaih thei lo hi.

Leitung ah mikangte  thupi  ahih manin  kimang pau  ki thupi

Sak hi. Ei Zomite zong khangtoin  thupi mahmah lehang mailam

Ciangin minam dangte in eipau hong sin lel ding uh hi.

4. Mi Ngeina Thei-in Ei Ngeina A Kem Hiding

Leitungah minam kimin  ngeina neitek  uh hi. Zomite’

Ngeinate pen hoih thei mahmah a, ahi zongin nidang in ih pu ih

Pate in dawi tawh na zangh khawmin a dawi a zong ih zatpih pawl

Khat om ahih manin tuhun ciangin ei ngeina pipi zong dawi a sa in

Ih zat loh bang hong om thei hi. Dawi a ih zatsakteng zatloh ding

Hi bek a, ei ngeina teng hoihtakin ih zat leh ih kep ding hi zaw hi.

Ngeina nei napi a ih theih kei leh ahing mang kisuak thei hi. Ih

Ngeinate zang thei a, ngeina puante silhthei a ngeina ante ne thei

A, ngeina lai te ih sim theih pen ngeina ah suahtakna ( independent )

Angah ih suak hi.

Tua ahih manin koi mun ah omta leng Pasian phawk a, ih

Ngeina tuamtuamte  leh imi isate a puah azun zo kim ciat dingin

Topa in thupha hong pia ta hen. Topa’n a khangto minam hong

Suaksak ta hen.

[ Hih thului pen ZOMKA:Sept-Oct,2004 sunga

 Rev. Pau Khan Khai ZBCM.AGS in minam a veina

 Tungtawn in a thusuah, a kiteikhia kik ahi hi. ]

Read More

TAULENG KHUABUP IN LUNGDAMBAWL PAWIPI BAWLKHAWM DING

Tauleng khuazangbup in Carol singing leh Christmas pawipi te khuazangbup ( Tuiphum , RC leh AG ) teng kigawm in zangkhawmding cih khentatna nei uhhi. Khuazang bup aitangin USA pan Pa Nang Khan Khai te innkuan in ankuangluina neidingin geelna nei uh hi.

Hihbangin Pawlpi kim kipawlkhawm a, Lungdambawl pawipi leh zanvahna khempeuh kipawlkhop theihna pen Tauleng khua kisat zawh kum 101 sungah akhatveina ahihi.

Sunday kikhop bel tamvei pitak khuazangbup in akizang khawm denden ahihi.
Late 133.
Lungdamna lianpi tawh.

Sia.Pau Khai
Dec 20.

Read More

REV.DR.CHIN DO KHAM'S MEMORIAL SERVICE AH THUGEN NA TE! ( 2013 )

Evan.Langh Do Khup aka Sia.DO Khup
Rev.Dr.Dam Suan Mung aka Sia. Mungtawng ( NSL )
Rev.Pau Khan Khai aka Sia. Pau Khai

Read More