ZOGAM SALPHA MUALSUANG HON NA

Tuni zingsang nai 8:00 in YPA han, New Lamka ah Zogam Salpha 
Pu Danny Mang Khan Khup (Suantak) leh Pu Thang Len Piang 
(Thangnawk) te' mualsuang honna nei hang.
Azahtak huai ulian tampi, minam makaite leh 
it leh ngaih ahi thei teng hong kihel thei hi

Lungdam Kohna

Hih mualsuangte bawlna ding in hong gimpih hong tawlpih ban ah
ahun manphate uh hong pia khempeuhte' tung ah lungdam hi.

Sum mahmah tawh hong panpih Pu Nang Khan Suan (Canada), 

Pu Steven Thang Suan Mang (USA), Pu Gin Pian Khup (USA), 

Pu Thomas Thang Lian Piang (USA) leh akuama peuh' tungah 

lungdam mahmah hi.

Pakkual hong pia ZRO/ZRA te, ADC pu leh pite, ZOLLS te, ZYA te,

ZWAte, ban ah US,Kawlpi, leh Tedim pan pakkual hong piate ban 

ah adangdang pakkual hong piate' tung ah lungdam mahmah hi.

Mangpha khakna lai hong khak ZSYO tung ah lungdam mahmah hi.

An hong vaksak ban ah a inn hong zangsak Pi Mangnu (Pu Thang Lian Pau' zi)' 

tung ah zong lungdam mahmah hi.

Tedim pan a hong zuito Cin Lian Khai' tung ah zong lungdam mahmah hi.

Vekpi vekpi tung ah lungdam mahmah hi. Video hoihtak kila ahih man in
asawt lo in a video zong enkha ding in ki lam en hang.

Lungdam
Mung Laan Thang
Tawmvei
Zogam

Read More

Jerusalem Vai ( Pu Pu Thang )

Jerusalem Vai ! 

Tulaitak leitungbup thukizakna tuamtuamte en lehang Jerusalem thu bekbek ahi hi. American President Donald Trump in Jerusalem pen Israel te’ khuapi in ka pomsak ta uh hi cih thu ong tangkona pan a hihthu in leitung alok hita hi. Zomi sung ah zong ki gen zeelzuul in thu thei nuam pawl khat in abang hang a hih zah a kibuaipih hiam ? Tua Israel te’ khuapi ding American in va ciapteh sak theih om mawk ding hiam ? Cih thute alung himawh pawl khat om ih hih man in atom thei pen in ka khuak bat zah kong suut ding hi.

A Tangthu

Jerusalem i tangthu bel sau mahmah ding a tuateng ih suut deetduut tadih kei ding hi. Ih theihsa ciat mah bang in Israel te’n Zeisu suahma pek in gam anei nawnlo uh ahi hi. Zeisu’ suahma BC 146 kum lai pek a kipan Rome ukna nuai tungkhin uh hi. AD 70 kum in Rome galkap mang Titus te’n Jerusalem biakinn asuksiat ban ah Jerusalem khuapi mahmah haltum uh hi. Mi 20,000 val bang si hi.
Roman empire abei khit teh Ottoman empire ong thahat mahmah a tulaitak a Israel gam teng Ottoman empire khutnuai ah om hi. Ottoman empire akiat kuan teh British empire ong hat mahmah leuleu hi. Hitler in Israel te alom atang in cikziat huai tak in athah gawp mawk ciang in leitung in Israel te (tulaitak a Rohingya te dan a) hehpih lua ahih man in Israel te gam khat vaihawm sak ding ngaihsutna ong piangkhia hi. British te’n hih thu ah bawmta sem phadiak hi. Tua bang teng tawh Jerusalem pen UNO i khutnuai a koih ding in 1947 kum in ki khentat hi.

Jerusalem Ngahkikna

1948 kum in Israel in suahtakna hong tangko khiat ciang in akiim apaam a muslim gam teng in phallo uh ahih man in gal kido pah ziahziah uh hi. 1949 kum in Israel leh Jordan in Jerusalem khuapi phel hawm ding cih thukimna tawh kikapna khawl uh hi. Israel in Jerusalem i nitumna lam ngah a Jordan in nisuahna lam ngah hi. 1967 kum ciang in Egypt, Syria, Jordan, Iraq, Lebanon te makai in Israel simh huan in tuipi sung ah khia ding in ahan ciam uh hang in alamdang tak in Pasian in Israel te panpih ahih man in ni 6 sung in Israel in zo gawpmang hi. Jerusalem nisuahna lam zong Israel in lakikta hi. UN in bel Jerusalem khuapi pen ama’ a mah in ciamteh lai veve hi. 1980 kum ciang in Israel in Jerusalem pen Israel khuapi in ong tangko khiat ciang in UN in sang zolo hi. UN Security Council in Leitung Thukhun Palsat ci’n nakpi tak in Israel mawhsak hi. Tua Israel i tangkona langpanna in gam tuamtuam in a gamzum (embassy) te uh Jerusalem pan in Tel Aviv ah tuahpah ziahziah uh hi. US in zong tuah hi. Anu nung penpen Costa Rica leh El Salvador gamte’n zong 2006 kum in a gamzum uh tuah khin ta hi.

Jerusalem Khuapi Vai

American kumpi suaknuam tampi in vote a zon uh ciang un hih Jerusalem vai paulap den uh hi. 1995 kum in US Innpi in American gamzum pen Tel Aviv pan Jerusalem ah khin ding in kipsak khin hi. Ahi zong in kumpi kah masasa in Gam Bitna paulam in kha 6 cin sial in tua thukhun aki sepkhiat lohna ding in khinto den uh hi. Clinton, Bush, Obama te’n na khinto ngiatngiat uh hi. Ahi zong in Pu Do Nang in tua pen khinto nawnlo in akipsak miau ta ahi hi.

Israel Khuapi US tawh kisai hiam ?

Jerusalem pen Israel te’n akhuapi vua angaihsut det mah uh hi. Ahi zong in, atung a ih gensa mah bang in, 1980 kum a Israel te’ thu tangkona hang in kuamah in Jerusalem pen Israel khuapi in angaihsut saklo ahi hi. Tu in US in Israel te’ deihna apanpih ahita uh hi. US te’ hang a khuapi kilaih hilo a Israel te’ kipsaksa thu kuamah in apom loh hang tu’n America in a pomta ahi hi. Than Shwe in kawlgam khuapi ding in Naypyitaw aphuat pen kuamah in anial loh hang gamzumte Zangkong ah om veve hi. Israel ta pen mi khempeuh in nial in a gamzum teng uh Tel Aviv ah atuah hiau uh ahi hi. Tu in US in Tel Aviv pan in a gamzum uh Jerusalem ah atuah ding uh ahita hi.

Jerusalem Biakinnpi Om Lai

Pu Do Nang in a campaign lai in agen lak ah Jerusalem Biakinnpi lam ding zong gen hi. Tua ong lam takpi leh bel peello galpi thumna piang hamtang ding hi.
Hih biakinnpi mun pen Piancil 22 a Abraham in atapa neih sun ahi Isaac meihal biakna ah apiaksawmna mun hi. BC 930 kiim a kumpi Solomon in biakinnpi alamna mun hi. Babylon empire hun in Nebuchadnezzer in tuapen susia hi. Ezra te'n Persia empire hun in Jerusalem biakinnpi lamkik uh hi. Roman empire hun AD 70 kum in Ezra te' lam pen Zawmah galkap mang Titus in susia leuleu hi. AD 700 kum kiim in Muslim te'n lam kik uh a tuni dong kip lai hi. Muslim te'n bel Abramham in meihal biakna ah apiaksawm pen Isaac hikei in Ishmael hi ci uh. Jerusalem pen kapu kapa te un khua ul sisan tawh alamsa uh hi ci uh. Amau bel Jerusalem pen Palestine in suahtakna angah ciang a Palestine khuapi ding a angaihsut uh hi. Pu Do Nang' khentatna bel vaisah mahmah lai inteh.

Gengen leng tamlua in cin tutung hizah tawh khawl phot ni.
Lungdam

Genkhialh a om leh ngaidam

Mung Laan Thang
(Zangkong)

Read More

Ni Lamdang Khat

Zomi tading in ni thupi pawlkhat a om hang in Ni Lamdang tam hetlo hi.  October 24 ni pen Ni Lamdang khat ahi hi. Bhh cih leh ;

1. Zomi minsel party khat ih neih sun ahi ZNC/ZCD party    suahni pen October 24 ni hi. Tukum (2017 kum) 
October 24 ni in kum 29 cingding hita hi.

2. October 24 ni pen UNO ni hi. Hih ni in UN Charter (UNO thukhun) akikipsak ni hi.

3. ZRO' makaih ahi Thautawi Kipawlna nam 8 te' kigawm khopna ahi UPF (United Peoples' Front) te India kumpi tawh October 24 ni in kihona nei ding uh hi. Pawlpi tuamtuam in thungetna tawh a panpihna ding in ZRO in tukha 20 ni in mipi' tung ah cialna nei hi.

ZCD Birthday
Tukum ZCD birthday pen ZCD makaite' omna ahi Naypyitaw ah October 24 ni in kawlgam ulian pawlkhat tawh kibawl ding hi. Hih pawi ah kihel ding in ZCD GSpu Pu Gin Kam Lian leh Pu Pau Lun Ming Thang te'n itna ngaihna takpi hong sam uh ahih man in lungdam in ka angtang mahmah hi. Ahi zong in gelkholhsa vai tampi leh gelkholhloh vai tampi om ahih man in ut mahmah tase leng ka paithei kei hi.
Mai 2018 kum ciang in ZNC/ZCD kum 30 cingta ding ahih man in tua kum 30 cin pawi khiatna neitak leh thupi tak in ih bawlzawh ding thupi ngaihsut huai kasa hi.

UPF Vai
UPF leh India kumpi te' kihona hong thupi mahmah khading hi. ZRO in thupi ngaihsut lua ahih man in mipi te'n thungetna tawh hih kihona apanpihna ding in angen liang uh ahi hi.

Hih kihona pen a 4 veina hita a lungluthuai tektek hi. UPF, India kumpi leh Manipur kumpi tuateng 3 kimu tuah ding ahi hi. UPF in Manipur state sung pan in India thukhun Article 244A bulphuh in State thak khat angetsawm uh ahi hi.
Hih dinmun tan tunna ding pen a kum 10 val bang asawt ahi hi. 

ZRA leh India galkapte 2005 kum lai pekpan in kikap loh tuak ding in langnih thukimna na neithei uh a tua pan abanban in ong pai toto a tu a tan atungta ahi hi.
Zosuan sung ah Mizoram state khat om khin a Pasian' thukimpihna a om leh asawt lo in Manipur state sung pan Zosuan te'n State khat ih ngah ding hi. Mizoram state tawh aleitang kizom ahi hi. Tua state tegel tawh leitang kizom ahi kawlgam sung pan Zomi State khat ngahlai le hang bangzah ta in Zomite ih maban limci ding hiam ?

Gamlimte aki laihlaih hilel a, tulaitak a ih muh ih neih gamlimte zong ki laihlaih lai lel ding hi. Spain gam pan Catalonia gam thak hong piang khia henla Iraq gam pan Kurdistan gamthak hong piang leh tua husa in 2011 kum a Arab Spring dan mah in leitungbup lawh mahmah ding hi. Gam thak tampi piankhiat lawh ding hi.

October 24 ni pen Ni Lamdang bek hilo in Zomite' tangthu ah ni thupi khat hong suak ding hi. Pasian um Zomi te'n ih Pasian pom teetaa ding hihang. Leitung gamlim akikhelsak thei pen Pasian bekmah ahi hi. Hallelujah !

Sian aw lum bang hong sung in.

Note' itna sung ah

(Mung Laan Thang)

Zangkong

___________________
UPF Sung ah akigawm thautawite

Kuki Revolutionary Army (KRA), Kuki National Front (KNF), United Kuki Liberation Front (UKLF), Kuki Liberation Army (KLA-UPF), Zomi Revolutionary Army (ZRA), Kuki National Front (S), Hmar Peoples’ Conference/ Democratic (HPC-D) and Zou Defence Volunteers (ZDV-UPF).

Read More

TS.KHAI VEH NA - Pu Pu Thang

2017 kum January kha ni 10 ni nitak nai 8:00 pm in Zogam la kungpu TS
Khai kava veh thei uh hi. US pan hong ciahpak ahi Zomi Innkuan OKC lutangpi
Pu Khaipi te nupa  tawh kava veh uh hi.
Upmawh sang na zawmzaw ahih man in kagen ding ka thei pak kei aa
dingkawmsa in ka en hi. Pu Khaipi bel agei ah tusuk hi.
Hong en gega ahih man in akhoite' kiang ah "Thangboi hi naci o alung a
noptuam khak leh" kaci hi. Hong enen lai hi. Pu Khaipi in "Thangboi hi ei.
Kei leilum Khaipi hi'ng" ci hi. A maipuak tawm hong kikhel hi.

Pu Khaipi in asangkah lai vua a bawlung suihna khawng uh agen teh a aw
hong suak in hong nui hi. Tuakhit teh akhut hong khak ahih man in akhut ka let leh "Thangboi ka  kyay zuu shin (ေက်းဇူးရွင္) nong phak nuam siing e" ci'n hong kapkhia
dapdap hi. (Bang hang in kyay zuu shin in hong ciamteh hiam bel kathei kei hi. Ka

huhzawh luatna zong ka thei kei hi. Ahi zong in tuabang aa hong ciapteh pen
ka khan sung in ka angtan mahmah thu khat hong suak hi.)

"Kap peuhmah kei o. Zomi te'n nang' tung ah leiba tampi hong nei ung
ei. Tangthu tampi gelh cei. Kum tulkhat nungta leng zong nang' gelhzah gelh
zokei nung ei." Ka cih khit teh apum tung ah ka khut nga in thu kangetna ah:

"Santuipi aphelkhap Pasian, suangtum sung pan tui aphulsak Pasian,
Hezekiah ii nungtakna akhatsak Pasian in hih na tapa' nuntakna nong
khatsakna ding in sihna pan hong tankhia Topa Zeisu' Min tawh kong ngen hi"
Ka cih leh nakpi takpi "Amen" hongcih kazak teh ka tha hong dimtuam
hi. Bhh cih leh TS Khai ih cih pen:

- amah leh amah Taang Thang Sian Khai kici ngiat hi. ZOMUS member card bawl
  ka kipat lai un na tuaci khum in hong cingiat hi.
  Acih ding mah hi. Salai leh Taang buai kipatna ama' tungtawn pan ahi
  hi. Mite' valhtum ding a ut ngiatlo Zogam Taangpaal ahi hi.

- "Zogam vontawi taangpaal kahi, kei ka dual ngeilo ... Zogam leitang
   ngahkik mateng khawllo e" cihla phuak in Tahan ah asak leh kawl thukan te'n
   zandelh pah hi.

- Lamka ah "Burma mi" cih thulu tawh mat athuak ciang in:
  "Vang khualai ah melma Burma te ci'n, henkol taang ing laizomte'
  vangkhua lai ah. Lai ah na sa'ng henkol suutding omlo lai ah. Nuih ciam in
  hong lello aw pianpih na laizom hi'ng". Cihla hong phuak khia hi.

- Zomite' bil leh kam ah aluai den ding ahi "Tun sung khat pan piang hi
   ngeingei hang e" cih la aphuak pa hi.

- 2006 kum bul lam in US aa Sia Khai Pau' ii huhna tawh Zangkong ah VCD
  khat zaih ding aa hong paisuk kim lai "Zomi te'n VCD gina nei nailo ih hih
  teh ZOMUS min in bawl mai ni" ci'n kagen uh ciang in thakhat in hong thukim
  lian hi. Zola Live Recording ih neih masak pen hong hipah hi. Ama' aituam
  ding kimlai minam itna tawh avek in belhei ngam hi.

  TS Khai tawh kisai suut ding tam mahmah lai hi. Pasian' la aphuahte
  suut khop tam mahmah lai hi.

 
"Khual zin hong tungphet hong pai kahi. Hong pailai ning ei" cih vaikhak in
  zato pan ka ciahsan phot uh hi.

 Pasian in anuntakna hong khatsakna ding in thunget kul lai ding hi.

  Tutung tu aa zah ciphot ni. Lai nong simsak lungdam ing.

Mung Laan Thang
Zangkong

Read More