REV. SIAN CIN THANG(1944-2020)
“..kei hong pahtawite ka pahtawi ding...." 1Samuel 2:30b
LUNGDAM KOHNA
Ka Pa uh Rev. Sian Cin Thang a nuntak sung tawntung, ama nasem ding in hong zatsak i-biak Pasian tung lungdam thu ka ko masa uh hi.
A pumpi cidamloh a kipan thungetna tawh ahi zongin, nek le dawn, sum le pai, tha leh hun tawh ahi zongin, anai a gamla pan in hong panpih, tha hong pia Christ sung ah sanggam u leh nau te, Pastor te, Pawl-pi tuamtuam te tungah lungdam kong ko uhhi. A diakdiak in, International Christian Centre Yangon, Assembly of God Tonzang, Zomi Mission Church Melbourne Pawlpite tungah genzawh loh in ka lungdam uh hi.
Australia gam ah hong tun aa kipan, zato vai khempeuh ah a pil a siam na sit het lo aa, itna tawh hong vansak leh hong kepsak den Dr Judith Niang & Pa Mang Za Mung te innkuan tung ah hi ta leh, Melbourne khua sung aa om zato kibawlna khempeuh aa Siavuan Siamah te tung ah lungdam mahmah ung.
19 May 2020 ni in leitung nuntakna zo in tawntung inn ah hong ciahsan a kipan ko kia lungzuang khuangai in hong omsak hetlo in, hun haksa kawmkal pan in inn hong pha aa hong tutpih hong hehnem mimal kim tung ah lungdam mahmah ung. Nisim in hehnepna hun hong bawl sak Zomi Mission Church pawlpi leh pawlpi mite, Victoria Chin Baptist Church, Shalom, Melbourne Agape Baptist Church, Zomi Baptist Church Melbourne te, Yangon a om kanau Siambawi te tungtawn in ongpha ong hopih akua mapeuh te tungah zong genzawh loh in lungdam ung.
Nu Esther Vungkok Suantak (India) in zong a sia pa a it na leh a zahtak na tawh puan laisan khat leh puandum khat tawh si hong tuam ahihman in lungdam mahmah ung. Han mualsuang hong sik USA gam aa om, ka nuno uh Nu Dam Ngaih Lian leh a tate teng, Nu Cing San kim te innkuan, Nu Zen Lun Dim te innkuan, Pa Pau Lian Nun te innkuan, Tg Suan Mun Mang, Pa Pau Sian Tung, Pa Thang Biak Siam, Tg Za Mang Muan te tungah lungdam mahmah ung.
Ka Pa uh hong nusiat khit akipan tuni dong, itna leh veina tawh thu hong ngetsak, thupha hong paih, innphual zang hong sik te, nek leh dawn sum leh paai tawh itna hong lakte, gamsung gampua tuipi gal khat pan na ngawn in hong vei hong lainatpih khempeuh te tung ah lungdam mahmah ung. Ka Pa uh nong itsak na te hang un lungdam in angtang mahmah ung. Nat hun dah hun in, ko mah tawh kibang aa nong dahpih nong puakpih na te uh leh na sup na bai na te khempeuh uh Topa Pasian in thupha tawh hong thukkik sak ta hen.
— A innkuanpihte
REV.SIAN CIN THANG
Pasian in mi-aa hong bawl ma-in, i pianzia ding na gelkhol hi. Pasian khuaikhau khunsa lam i zuih nak leh a gelna a tangtun’ dongin tavuan hong la hi. Tonzang khua a teeng Pa Thang Cin Kham (Sukte) leh Nu Cing Za Lun (Sukte) te a tanu 5 leh tapa 4 in a neu lai-un na nusia/ sihsan uh hi. Suan-le-khak neihloh ding na sa in, “Tapa khat nong piak kik leh nang hong ap nung,” ci-in Pasian kiangah na ngen uh hi. Nu-le-pa’ thungetna Pasian in na dawng in, 1944 kum August 12 Sani 8:00 a.m. in ka nu sung pan ka suak a, Pasian min tap in Sian Cin Thang hong phuak uh hi.
Laigui zom pasal 5 leh numei 7 sung pan ka u Nu Niang Khan Man (Bo Kam Cin Hang’ zi) leh Nu Hau Khaw Ciin (Pa Gin Khan Do’ zi) tawh ka thum un Pasian in khangui kizom thei dingin hong siam hi.
1975 May 1 ni-in Tonzang khua Pa Cin Za Suan (Samte) leh Nu Tun Zen (Tungdim) te tanu a lina Nu Zam Suan Niang tawh pumkhat suahna ka nei uh hi. Topa Pasian in tanu 2 leh tapa 4, tu 11, hong pia hi.
1. Nu Lun Hau Man – Pa Pau Mang
2. Nu Zen Lam Cing – Pa Nathan Porter
3. Pa Kham Sian Piang – Nu Siannu Niangsianlian
4. Pa Suan Neih Sang – Nu Ciin Sian Huai
5. Pa Sian Nun Siam – Nu Cing Zeel Niang
6. Pa Hang Muan Lian – Nu Niang San Nuam
Tuteng min
1. Kim Nianghoihkim Sukte
2. Benjamin Thanbiakmung Sukte
3. Liana Nianglawhcing Porter
4. Alexander Thangpiantung Porter
5. Niang Kop Zo
6. Samuel Thanggenkim Sukte
7. Isaac Thangtuantang Zathang
8. David Khamittuang Sukte
9. Zam Sianlen Sukte
10. Grace Niangteelciin Sukte
11. Lia Huaikhatcingh Zathang
KUMPI NASEPNA
Nasep zong dingin 1961 November 21 ni in Falam Menzi Pu Thawng Cin Thangte inn ka tung hi. 26-3-1962 ni-in Menzi zumah lai-at neu ka ngah hi. 1963 January kha in Kawlpi aa Chin Divisional Security and Administrative zumah attach in ka om hi. 1966 kum in Khamtung myodaw Falam pan Hakha ah kikhin in ka zui hi. 1968 in UDC (Lai-at pi) ka ngah hi. 1972 kum in Tonzang myo-uk zumah ka kikhin hi.
Zum nasep sungin Credit Co-op Society Chairman, Township Election Committee Secretary tavuante ka sem hi. 1987 September 14 ni-in kumpi nasepna pan pension ka la hi.
INNSUNG NUNTAKNA AH TUAHKHAK THUHAKSA
1985 December 5 (Thursday 7:30pm) in Tonzang ka innpi uh meikang hi. Ka tung ua silhle-teen teng longal neih-le-lam khempeuh nai khat sungin vut-le-vai suak hi. A zingciang phalvak in tho in, u Dono (Pa Gin Khan Do) leh ka zi Suan Niang tawh innmun ah va pai-in vut sungah khukdin sa in thu ka va ngen uh hi. Ka thunget sungun Topa in nih vei hong lawng hi. I thuak haksatnate in i teci panna khaktan zo lo bek hilo in, hong muibun sak zaw ding (Phil 1:12). Cana mopawi ah lengtui limte a bei teh, a limpente tawh maa- ahial bangin, thu-um mite, i teek khit dongin gah pha semsem ding cih khamuanna John 2:11 ka ngah hi.
PASIAN THUSUNGAH HONG PANTAH MASATE
Ka neu tung panin ka pa’n innkuan kikhop hong makaih aa, nitak sialin Lai Siangtho simna leh thungetna ka nei den uh hi. Lupna tungaa ka pa hong gen Mawsi, Zawtah thute ka sungah nungta lai hi. Sunday School Sia Pa Tun Khaw Nang leh Pa Gin Khan Nangte hong gen, David le Jonathan ki-itna, David in Goliath a zawhnate ka mitkha ah tuang lai hi. Pasian Kammal ka lunggulhna khaici hong tuh, Tonzang Tuiphum Pawlpi Sia Thawng Khaw Nang hi. Lai Siangtho Lui leh Thak bu minteng Manglai, Kawllai leh Zolai in hong lotngah sak hi. Lai Siangtho Thak bu a gelhte min, Pasian Thukham 10, Izip gam gimna lianpi 10, Nungzui 12-te min, Zakoh minte, Mazih minte leh Lai Siangtho khawk ka lotngahte pen Pasian Kammal theihtelna ding khuambul hong suak hi. Gamtat- luheekna lam ah Sia Thang Za Kam hong pattahna in tampi hong suii-pha hi. Mangngilh loh ding thu 3 leh paihkhiat ding thu 7-te in tuni-a Pasian Kammal ka lungngaih dan tampi hong huh hi. Kha pilna taw dingin Sia Thang Za Kam’ pattahna nuai ah 1959- pan 1968 dong ka om hi.
Falam le Hakha ka om lai in Rev Stephen Hre Kio leh Rev David Van Bikte tung pan in Kha Siangtho lunggulh theihna khaici khat ka ngah hi. Sia Hre Kio in tangthu tomno khat tawh thu konghonna nei den aa Nipi zing hunpi a zat in ka lungsim hong vut mahmah hi. Amah bangin mipi mai aa Pasian thugen dingin ka kibulh thapai hi. Sia Van Bik in Zomite khuak pen, Kawlte, Mangte sangin mawlzaw hetlo hong cih in ka tuntunna ah sunglam khamuanna hong guan hi. 1972 November kha in ICB Sia Tun Za Kap in Tonzang a Zato Siavuan Pau Cin En inn ah nitak thum sung Gupkhiatna thu hong hilh hi. Gupna ngahlo ka hihna kitel in, piangthak lote’n Kha Siangtho ngah theilo ding hi, cih hih thu nih ka phawk khia hi. Tua ni pan an ne zo lo, tuidawn zolo zah in pianthakna ka lunggulh hi. Gamdang gupna thugen Siate laikhak pah in ka pianthak nading thunget ka cial hi. Gupna thu tawh kisai laite kasim kawm in, antang zel in thu ka ngen den hi. 1974 kum in Falam gam Suntha khua kamsang numei khat kiangah gupna thu taw dingin Tonzang pan ka pai dil-del hi.
Tedim ka pai sial in Sia Hau Lian Kham leh Sia Tun Za Kapte kiangah zong pianthakna ding thunget ka dawh den hi. Kum 3 sung lungkia lo ka zon gupna 1975 November 16 ni-in Tonzang aa Sia Hau Lian Kham’ cialpina pan Jesu Sisan sungaa mawhmai sa ka hihna kitel in ka lungdam mah mah hi. Ka sungah Kha Siangtho teeng takpi cih khamuanna pen 1976 kum kipat tung lamin, Lamka Convention Pawlpi Sia Neng Za Khup Tonzang aa cialpina ah John 6:37 tungtawn in ka ngah hi. Ka lunggulh Kha Siangtho nasepna among man thei ta ka hih manin lawppi in ka lawp hi.
1977 kum March kha sungin, Tonzang ah Rev Myo Chit leh Siamah Ciang Za Dim-te’ cialpi bawl sungin Kha Siangtho sunga kibaptaizna leh kamtuampauna ka ngah hi. Tua kum December kha in Gamlai, Tedim, Thuklai le Lophei lam gospel ka pai hi. Tedim ka tam sungin nitak khat ka lup khit phetin ka khansung dim in khuavak hong tang pempam hi. Lamen lopi in Kha Siangtho sathau nilhna ka ngah hi. A zan nihna ka lupna tunglian mahah a zannitak aa bangin Kha sathau nilhna ka ngah beh hi. Thuklai ah zan khat mah Tedim a bangin Kha sathau nilhna ka ngah leu leu hi. Bang bang tuak ta leng lungkialo a, Pasian hong piak tavuan zawhna ding pen Kha Sathau nilhna ahih lam ka tel mahmah hi.
LUNGDAMNA THU TECI PANNA
Ka pianthak ni-a kipan teci pang loin ka om thei nawn kei hi. Tonzang ah ka om lai, Khatvei khuaveng hausa khat zu kamnam sa in ka zum ah hong pai hi. Topa hoihna teci ka pan mawkmawk leh hong piangthak in, tu dong Pasian nasem khat suak hi. Hun ka ngah ciangin Tonzang gam sung, Tedim gam sungah teci ka pang kawikawi hi. Falam, Haka, Thantlang khuapite ah Topa’n ka ma hong honsak hi. Kawlpi, Tamu, Monywa, Mandalay, Mogoke, Taungyi, Lashio, Kengtung, Tachileik, Pathein, Mawlamyaing, Pan-an, Myitkyina-te ah Pasian in ama gam kek nasepna ah gam hong kek pih hi. Aizawl, Imphal, Lamka-te ah hong tonpih khitteh, tuipi gal ahi Thailand, Australia, New Zealand, Philippine, Korea, Singapore, Malaysia dong ah teci pang dingin hong puak hi.
LAI SIANGTHO SANGKAHNA
1977 kum in Tedim pan khe tawh Tonzang ka ciah lam in Lai Siangtho sang kah ding ka sung pan hong kilo hi. Ahi zong ka awlmawh ngaihsut lua nai kei phot hi. Tua leh 1987 kum in hong kikuantawh kik hi. 1988 kum in Sia Do Dal tawh Yangon, Seikkan Thar Street a Hotel khat ah antang in zankhuavak thungetna ka nei khawm uh hi. Ka thunget laitak in, “Ka ta aw, Australia ah kong puak ding hi,” cih Topa aw ka za hi. Pasian in Ama kammal a tangtun’ dongin tavuan hong la hi. 1990 January kha in Australia gam Melbourne khuapi ka tung hi. Lighthouse College of Ministries ah, 1991 in Diploma in Ministry ngah in, 1993 kum in Harvest Bible College pan Bachelor of Biblical Studies ka zo hi. Philippines gam Baguio khua Asia Pacific Theological Seminary ah sangkah zom suak in 1995 in Master of Arts in Ministry ka zo hi. Topa gelna bangin hong tangtung toto hi.
PASIAN NASEPNA A KA KIHELNATE
- 1973-1976 - Tonzang Tuiphum Pawlpi Upa (Secretry)
- 1977-1986 - Tonzang AG Pawlpi upa.
- 1987-1989 - Tonzang AG Pawlpi Asistant Pastor
- 1992-1993 - Australia gam Calvary Christian Fellowship, Assistant Home Cell Cordinator
- 1995 September - 1998 March -Evangel Bible College, Academic Dean - National Director, International Correspondence Institute
- 1996 February - Singapore Hagai Institute ah tentan kah.
- 1996 July 4 ni pan- Kawlgam Khanlawhna Thungetna Revival Fire International Prayer Centre phuanin ka makaih hi.
- 1997 August 17 Sunday ni-in - Yangon ah International Christian Centre (AG) kipanin Senior Pastor ka sem hi.
- 1998 September 18 in -Yangon ah Faith Bible Training Centre hongin Siapi tavuan ka la hi. (2006 September kha in Sya David Thang Khen Sing tungah tavuan ka ap hi).
2006 kum ka lungtang operation bawl khit a kipan, ka lungsim zahin na ka sem zo nawn kei hi. Hanciamin sem teitei leng Pasian minthang lo zaw ding, cih ka kiphawk hi. Pasian tungah a sun a zanin thu ka ngen ngen hi.
2009 kumin Rev Dr Kham Khen Mang (Mangno) te innkuan ICC Pawlpi-ah hong lut uh ciangin khut kilenin Pasian’ lenggah huanah ka semkhawm uh hi. Ka vangik tampi hong zang tuam pah hi. Sun khat ka thungetna-ah Sia Mangno pen Pasian in ngimna khat tawh hong puak lam Kha Siangtho in hong theisak hi. Sia Mangno ka hopih pah a, amah zong Pasian zahtak mahmah mi khat ahih manin thungen ngen phot ni, hong ci hi. ICC Pawlpi-a dingin Pasian’ gelsa bangin 2-9-2012 Sunday ni-in ICC Pawlpi leh ka tavuan buppi Rev Dr Kham Khen Mang’ tungah ka ap hi. Sia Mangno tung tawnin Topa minthanna hong kilang a, 27-3-2016 Sunday in ICC Biakinn thak honna ka nei uh hi.
KA TUAHKHAK PASIAN NALAMDANG SEPNATE
Ka pa pen Zolai Sia hi a, Tonzang Zolai Tan 4 ah ama nungzui-in 1951 in tan khat ka sin hi. 1958 March kha tan Sagih laivuanna ah lamet lohpi-in ka kia hi. Thungen leng ong ding cih ka lamen giu-giau hi. Thu ka nget khit teh tan 7 a zosa khat bangin kei-le-kei ka kimu hi. Tudong ka mitkha ah ka telsinsen lai hi. Tua leh nitak khat ka lupkhit un, lawm Suan Khan’ ka inn uah hong pai in hong phong hi. “Lawm aw, Tedim Vuandok zum ah tan 7 zo sazian tuni-in kisuang kik in, ei gel zong tan 7 zo hi hang,” ci-in maitai sa-in hong gen hi. Tua hun in Tedim Sub-division tan 7 laivuanna Tedim SHS bekah om hi. Laivuan kik lo aa, tan 7 zo pa ka suak hi. Hipen kum 14 ka phak aa, nalamdang ka muh masak ahi hi.
Ka nalamdang muh a nihna zong sang vai mah ahi hi. 1958 tan 7 ka zawh ciangin June kha in Tedim SHS ah tan 8 ka zom hi. 1961 tan 10 result out ciangin, lai zo dinga kilamen kimlai ka kia mawk hi. Lungneu sa-in Tedim pan Tonzang ah khe tawh ka ciah hi. Tuuklai, guahnuai meinuai-a ka pai kawmin ka lungsimah thu khat hong kilo hi. Germany gam Convent a sangkah numei khat lai kia a, an tangin thu a nget leh Pasian in zo kik sak hi, cih Joyful Vanguard Journal a kigelh ka simkhak thu ka phawk hi. Germanyte’ Pasian, keima Pasian mah hi. Keizong ngen leng tukum mah in zo lel ning. Pawlpi leh CE khangno kikhopna ah thupulakna nei ning (Teci pang cih kammal eipau-a om nailo) ci-in ka tan 10 zawhna teci pangin ka mitkha-ah ka kimu mu hi. Tuni dong ka mitkha-ah ka muthei lai hi. Tua ni-in lampi-ah sagih vei bang khukdinin thungetna ka nei hi. Inn ka tun ciangin ka pa’n ngakhuk na to hi. Nisim in ngakhuk ading suang nawn kawmin gam sungah thu ka ngen den hi. Sani ni khatin Zomi Taangko Thukizakna hong tung a, tua sungah “Tu kum Matric laivuanna ki-en pha ding,” cih laigual ka muh teh lungdam lua-in tan 10 zosa bangin ka kituat pah a, sun tawntung thu ka ngenngen hi (lungdam ko cih kammal eipau-a om nailo). A sawtlo-in result hong out in tan 10 ka zo takpi hi. Laivuan kik lo-a tan 10 zo pa ka suak hi. Hih pen kum 17 ka phak a, nalamdang ka muh nihveina ahi hi.
1987 February kha in Sia A Sein (Lin Sein Lian) tawh gospel paina Lashio ah Mizote Pu Thang Hrima (89) thunget sak dingin hong sam uh hi. A kha paikhia khin a, a ci bel tawm na lum lai hi. “Topa aw, gupna thu genpih nuam ung. Nithum hong nungta sak kik in,” ci-in thu ka ngen uh hi. Topa’n ka thungetna uh hong dawnga, a kha hong lut kik in khua hong phawk kik hi. Sia A Sein in gupna thu kikuppih pah hi. Gupkhiatna leh cidamna hong ngah khawm hi. Hih nalamdang en ding a hong paite khempeuh Sia A Sein in gupna thu genpih in Jesu sangthei mi nisimin kibehlap hi.
1995 January kha in Philippines gam San Fernando khua aa Pastor Conrado pawlpi mi khat thungetsak ding hong sam uh hi. Topa Kha in lawngin, dam siang ing, ci-in lam in hong diang hi. A maikaal sungin Manila cancer zato-ah va kilak kik a, Siavuante’n damsiang cih letmat pia uh hi.
2013 December kha in Australia Knox Private Hospital ah ka kilak hi. Cardiologist pa in ka lungtang sihui neu 2 bing hi, ci-in urgent operation bawlpah dingin hong sawl hi. AUD 20,000 (Dollar tul 20) ka maipak nang theilo in Yangon General Hospital ah 2014 April kha-in ka kilak hi. Lungtang Siavuannu in, ‘Sihui neu nih bingin urgent operation na bawl pak keh zekai thei niteh,’ hong ci hi.
22-4-2014 ni-in Yangon Zatopi-ah Siavuante’n lungtang operation hong bawl uh hi. Nai lang sung khit ciangin Siavuanpinu’n, “Uncle aw, na lungtang sihui bingte koilam kidenna ai tam? Sihui thak vive na om veh ee,” ci-in lamdang sa mahmah uh hi. Hihpen thungetna tungtawna Pasian nalamdang sepna mah ahi hi.
Australia ka tun ciangun 8-6-2017 ni-in Australia Box Hill Hospital a Cardiologist pa in hong sam a, “Na lungtang sung sit ding a kilawm mun khempeuh na en phapha ung. Khatvei zong natna a bang ngeilo lungtang thak a nei hi teh,” ci-in hong gen a, amah zong hong lungdam mahmah hi.
2016 May kha in ka tupa maithak en dingin Malaysia-ah ka nupa-un ka pai uh hi. Ka tapa Hang Muan Lian-te innkuan’ 16-6-2016 ni-in Malaysia a Aussie Embassy ah lut uh hi. Consular nu in, “Na pate koi-ah om hiam, mu nuam ing,” a cih ciangin phone hong sam pah uh a, ko zong ka pai uh hi. Consular nu’n Melbourne a ka sangkahna leh New Zealand gam ka zinna thu tawm hong dot khit teh, “Na tate tawh Australia ah na omkhop ding uh hong deihsak ing. Monday ni-in Medical checkup na bawlpah un,” hong ci hi. Embassy te’n a kisam ding khempeuh hong bawlsakin 15-12-2016 ni-in Australia leitang ka tung uh hi.
Mihingin ka pian ma-a kipan ka nu-le-pa in Pasian tungah hong ap mah bangin Topa’n ka nuntakna hong zanga, ka nuntak sung tawntung Ama’ na sep ding leh minthang sak ding ka lunggulh leh ka ki-apna ahi hi.
Rev Sian Cin Thang Melbourne, Australia. 19/6/2017
(NB: Gospel Assembly of God, Tonzang Ruby Jubilee Magazine (1977 - 2017) sungah Rev Sian Cin Thang in a gelh ama thute ahi hi).
Updated: May 20, 2020
Rev.Sian Cin Thang tawh Hun Nunung Bawl Na: Part 1
Rev.Sian Cin Thang tawh Hun Nunung Bawlna:Part 2
****************************************************************************************************************************
SIAN ANGLAI AH
REV. SIAN CIN THANG
“Do Khup aw, Australia gamah lungdamna thu a gen dingin Topa’ Kha Siangtho in nang hong tel ahih manin Passport bawl dingin Yangon hong pai mengmeng in.
Khazih sungah; Rev. Sian Cin Thang”
1997 kumin lai nong khak hi Passport nangawn nei nailo ka hih manin Passport vai a kipan visa vai a vekpi-in nong vaansak hi.
12.5.1998 ni in Malaysia khuapi Kualalumpur i tung uh a, Pasian hehpihna Mint Hotel thakah zan li a khong a giah theih nading hamphatna i ngah sawnsawn hi. Ka suah zawh 5 star Hotel ah ka giah cilna ahi hi. Malaysia ah Zomi tam nailo ahih manin a omsunsun ten hong na ngai mahmah uh ahih manin nuam i sa mahmah hi.
Malaysia panin 14 May 1998 (Saturday) ni-in Australia khuapi khat ahi, Melbourne i tung hi. Mikangte lakah thu i gen a, nangh kam nong phensak hi. “Huhna hong ngen lo ding hing” cih tawh thu pan den ka hih manin nong pakta mahmah hi. Mikangte zong Topa’ Kha in khel ahih manin khitui naptui tawh hong ki-ap ciat uh hi.
Minit 15 bek hun hong pia pawlpite kiangah Topa’ Kha hong kibua ahih manin hun khempeuh eigel-in i ngah khin ziau a, i ciah ciangin i zintunna dongah pawlkhat in hong delh uh hi. Pasian thu kikumin i zanhak dektak hi. “Do Khup aw, hih gamah kum li sangkahin om ing, mikangte pen mi nungdelh liang ding a ut hetlote ahih manin hih pen Pasian nasepna lamdang ahi hi” nong ci hi.
Tuu (belam) hong gawh innkuan khat kiangah sa i nek ciangin tem leh sikkeuka ka tawidan manlo ahih manin ka at zo mahmah kei a, kei hong en tuan se loin “Na temta na ziat lamah tawi zaw le cin” ci-in nong pantah a nong maizumsak kei hi.
1998 June 22 ni-in i ciah kik a, computer lah lei zolo ihih manin laikhetna (type writer) a lui a neute khat ka puak leh airport panin hong puasak nuam lo uh ahih manin kei nong gupna-in thuneite tawh na kisel gawp a, hehngawh pianin airport ninbung gei-ah i nusia ziau hi. Vanleng a len madeuhin thuneite khat in khai geigei-in hong pia kik ahih manin lamdang i sa mahmah hi. Tua tawh Zomite tangthu ah a mang ngei nawnlo ding “Hauhna leh Khansauna Thusim” kici laibu kigelh hi. Nong buaipihna manpha mahmah hi.
I kithuah hun sungin kong gensiat nading mahmah omlo zah dongin na cihtakna, na kuhkalnate leh na upna a khauhzia ka mu khia hi.
1998 hun lai-in visa haksa mahmah a, nang hong deihsakna tungtawnin Pasian in Australia visa hong ngahsak ahih manin tua passport tawh Japan gam lut nading hong baih tuam mahmah a, “Ngaih Angali Ah leh Ngaih Anglai Mah” video-te hong piang khia hi. Tuni dong gam tampi Topa in hong tunpih hi.
ICC pawlpi panin zong ko innkuan huhna sum nong khak zel uh hi. I taten zong hong it uh ahih manin “Pa Khup aw” ci-in tuni dong ka kisapnate hong huh zel uh hi.
“Hong ngai mahmah ung, U Thangno aw, Pa kiangah kimu kik ni maw”
Pasalte ngeina minsial tangin la hong phuah ing ei.
(a) Zin laihen teng, khaubang sut pih, ka ciin ngalliam, Thang aw ee.
(b) Pupa phaksap, tuizum tual ah, zinleng bibang, zial hang ee.
(a) Sian min theibang, i lawh ni’n ee, zinmang dambang, tau hi ee.
(b) Na nuaciang ah, Sawn leh von ten, Sian min lo lai, ding hi ee.
(a) Mubang na ngaih, Lun Jesu tawh, sunni bang tang, den ta ding a,
nung sulhei lo, ding aw ee.
(b) Lengvan tualah, Lun Jesu tawh, hanzai tawi cing, ding aw ee.
Nong it nong pattah;
Rev. Sian Cin Thang ka phawkna (atom khe mahmah in) by Dr.Zam Bawi
- 1982 laipawl in Upna tawh kalsuan na, Mukgah, KST ah ki phumna ii thupit nate honghilh hi. Leitung mi minthang te’ thu honggen zelzel a, zaknop ka sa mahmah hi. Laisiangtho pen KJV zanghzaw a, ka engkhe mahmah hi.
- Tonzang pan ko khua ah hongpai ciang, innvak thunget na ah kazui zelzel a, Sia Thangno, Upa Dai Dal, Upa Kham Do Pau ten cina thunget a neih uhciang zaknop phial mawk hi. Satan tai giapgiap lel uhhi.
- 1988 Evangel Bible College (EBC-Yangon) hong kikhakteh India lam ah sangkah ding in ka ki tulmawh mahmah a, Sia Thangno kiang ah ka teci panna English in hong at sak in ci-in ka cial hi. Zolai in ka at -a, English in thakhat thu in hong kuisuk ziau a, tudong mah ka lotngah lai hi.
- India lam ah sangkah ding hong lemloh ciang, Yangon ka paikik a 1989 in Full Gospel ah Pasian nasep (peon) tawh ka kipan hi. Yangon hongpaiciang hongvakpih kawikawi hi. A zintun na Lt.Col. Thawngbawi te inn, Hmawbi ah Major Luah Cin, Siama Ciang Za Dim tekiang bang ah hunbawl ciang Guitor tumkhawng in hongsawl in innteek tebang in hong it mahmah uhhi. Tua hunlai la a kisa diakpen, “Hong lungdam’ sakman ka kipak hi”, “KST hong lungdam sak”, “Itna khahkhia in”…cihpian tepawl hi-a, key tamlua lo aihman in lempeuhmah hi.
- Gamdang paiding a kithawi Sia Thangno, Sia Go Nang (AMC-Kalemyo), Sia Sian Thang (Adelaide), Sia Mangpu (YCC) te tawh ka kithuah uhciang’ gamdang painop na keizong honglawh uhhi. Sia Go Nang in passport siauhna ding New Zealand pan lai hongkhak a, tuatawh kasiauhleh 1990 kum in passport kangah thei pah hi.
- Sia Thangno in Yangon ah International Christian Centre (ICC) leh LST sang thupi mahmah tawh Pasian nasepna ah lawhcing tak in sem hi. Khatvei Senior Pastor dinmun pan “step down” ding cih honggen-a, lamdang kasa mahmah hi. Cidam lai, lungsim siangtak a hibang kipiak pen thupi kasa mahmah hi. Senior pastor ahihnawn lohhang in a sepding khiamtuan lo in, a huu a beidong Pasian na sem hi. Panmun (Position) pen hum tee-ta selo ahihman in ka zahtak mahmah hi.
- Hong pilbawl in thukhawng hongkuppih tangtang hi. Mentoring asiam lua mahmah nahimawk.
- 2019 April kha a Melbourne zato ah ih kimuh pen a nunung hong hiziau mawk ei.
- Kongphalnai loh uhhang, hongdawnding tampi mah na om inciai.
Mangpha.
0 coment�rios:
Post a Comment