Kum li khawng a pha pan naupangno ithuai mahmah khat a nunote' inn ah Sani leh Nipi sung sawm giak hi. A nuno leh a pano ngai mahmah ahih manin nuamsa mahmah hi. A nunote in zong ta lah nei lian nai lo uh ahih manin ngekbawl mahmah uh a, a inn-a a ute a naute tawh a om henhan uh sangin kingekbawl zaw ahih manin nuamsa mahmah hi. Kimawlna "game" tuamtuam khawng kimawlmawl-in nitum khuamial lam nangawn phawk kha lo liang hi.
Lup hun hong tung ta hi. A nuno in a lup nading inndei (khan) khat sung ah lupna a nuam mahmah-in bawlsak hi. Laisiangtho tangthu khat simpih-in khim hi. A ihmut zong suak pian diaidiai tham ta hi. Tua ciangin nuno in mei sukmitsakin, puanza hoihtak seh a "goodnight kiss" a piak khit teh, "Nuamtak ihmu in aw, zingsang teh kikhawm dingin, tua khit teh "mall" ah hong vakpih ning ei, ci-in vaikhak hi.
Tua khit deuh ciangin a nuno in bang a ci peuhmah hiam, a ihmu thei hiam, cih a lungnuam lo ahih manin a kongkhak tawm khat hong khiankhian-in va vil kik hi. A naupang na ihmu het lo mawkin na kidik damdam-in ka kap niainuai mawk hi.
"A bangci na hia, ke'n a ihmu khin ding hong sa hi ve'ng?" a cih leh,
"Kei khuamial sung ah lau hi ve'ng. Khuamial lua hi ve'n" ci-in dawng kik hi.
"Na inn vuah zong khuamial sung/lak mah a na lup den hi lo maw! Na ihmut ding teh na nu in mei hong sukmitsak den ve," a cih leh,
"Tua bel Kei' khuamial hi ve'n" a cih kawmin kidik kik damdam leuleu hi.
Ama' khuamial? Ama' khuamial cih bang om ahi tam mataw! Ama' khuamial lauhuai lo-in a nunote' khuamial lauhuai deuh ahi tam! Kibang lo hi'n teh mataw! Kilamdang zek ahi dia?
Ama' khan/inndei sung ah khua a mial zenzen hangin koimun ah bangteng om cih a lotngat luatsa hi. A kimawlpih den naumilimte a koihna thei mahmah a, a sawt nai lo khat-a a nu in a leisak vompino lim khat bang zong a tutsakna mun thei sinsen hi. Tua lo a van neihte zong a omna mun a lotngah luatsa hi-in khua a mial hangin a lungsim-in seh thei hi. Khua a vak cianga a omna mun mah vuah khua a mial hangin om ding uh cih thei hi. A khan/inndei sung ngiat pen a gamtattatna mun ahih manin ama' khan/inndei hi mai a, tua sung ah khua a mial ciangin zong "ama' khuamial" hi mai hi!
Guai aw, ei zong tua naupang tawh kibang kisa lo na hi uh maw? I nuntakna ah dahna kahna zong nawk tek hang. Lungkham mangbatna zong phukha tek hang. Lunglen khuangaihna zong sin kha ngei tek hang. Haksatna leh gentheihna zong a thuak kha lo kuamah om lo hi hang. Ahi zongin thu-um Pasian' tate i hih manin tua "i khualmialte" sung mah ah i Topa' maitang en-in gualzo den zel hi hang. "Sihna lim guam sung na ngawn" i "nawk hangin siatna" i "kihta kei hi." Banghang hiam cih leh, Amah ei tawh hong om khawm ngiat hi. "A molhtum leh a ciangkhut in hong lungmuangsak hi" (Late 23). Topa om peuh leh khuamial i cihte zong, tua naupang in ama' khan/inndei sunga khuamial a kihtak loh bangin, ei zong kihta lo-in gualzo den hi hang.
Ih Topa pen khuavak laitaka hong ompih Topa ahih mahbangin khualmial hun cianga zong hong nusia ngei lo Topa ahihna i thei hi. Ama'n hong nusia ngei lo-in hong ompih den hi (Matt. 28:20; Heb. 13:5). Isarel mite tung (Thuhilhkikna 31:6) leh Joshua tung ah a kamciam (Joshua 1:5) bangin eite zong hong kamciam khin hi.
"Ei' khuamial" bel kihta kei hang e maw! Banghang hiam cih leh, tua khuamial i cihte sung mah ah i Topa Zeisu Khazih in hong ompih-in hong nusia ngei peuhmah lo ahih manin khuamial a cihte nangawn i kihtak loh "ei khuamail" hong suak mai hi.
A pongpongin, a peuhmah-in, a limlim a himhim-in, i Topa hong om nak leh khuamial i cihte zong khuavak a suak hi mai lo ahi hiam? Ama' omna ah khuamial cih bang om lo a, Ama' mai ah khuamial leh khuavak i cihte a kibang hi!
Tua ahih leh i nuntakna ah i Topa in hong ompih lohna mun leh hong ompih loh hun a om peuhmah hiam leh? Om lo hi. Tua ahih manin i lau nading thu om lo hi. I kihtak ding om lo hi. Khazih sunga Pasian hong itna tawh hong khen zo ding na khat beek om lopi-in e, ci lo maw? "Khrist hong itna panin eite kua in hong khenkhia zo ding hiam? Lungmanna, haksatna, bawlsiatna, kialna, silh ding kisapna, lauhuaina, namsaute in hong khenkhia zo ding ahi hiam?" (Romans 8:35, ZIV).
Launa ding om kei! Kihtak ding om kei. Amah um-in muang ni. Hong nusia ngei lo hi. Hong paisan ngei lo hi. Hong ompih den hi.
Topa aw, hong muang kha kei pahpah ung! Hong muang nuam ung. Upna muanna hong guan in.
"Hong um/muang mah ing, Kong up/muanlohna hong huh in" (I believe; help my unbelief!)-Mark 9:24.
Sia Zam Khat Kham
https://www.facebook.com/zamkhatkham
0 coment�rios:
Post a Comment