A etteh huai leh a ithuai Rev.Dr.Cin Do Kham By Khup Mung

Sia Do Kham in upmawh loh pi-in hong nawtsiat vat ciangin a kuamah
tekin kilaitang na mahmah hi.Zomi khempeuh lungsim khoih kha mahmah
hi.Banghang in mite in hih zah in it a hi tam ci-in ka ngaih sunsun
aa,hampha kasa mahmah hi.Kei zong a mah tawh ci le sa in kaki naina
lah omlo,tua zah aa a ki khawl ngeilo hi na pi ingh in na ka sa mahmah
hi.Mite in banghang in it hi ding hiam? cih ka theikei aa,ken ka itna
leh thupi sa in pammaih kasakna a hang ka pulaak nuam hi.Ni dang in
bel Sia Do Kham pen AG te makai khat leh Mangpau siam cih ciangin ka
ngaih sun hi.Ken a mah ka theih mahmah hang a man kei theihzah in hong
thei khollo ding hi.Theih bel hong theisam hi.Thupi kasakna..

1. Khatvei Kawlgam hong ciah khat in a mah tawh kimu nuam
in Ph ka hopih leh hong tel khollo ding napi hoihtak in honghopih in a
mantheih hun ding hong change pah aa tua hun mah in ka pai uh leh hun
man mahmah hi.A mah ka kimuh pih nopna thu " TBC-Y Biakinn lamna ding
huhna ngen dingin ka Siate khat US paisak ding ka vaihawm laitak uh hi
aa,Visa a ngah khak leh US ah nang hong manawh ding hi.. nong huh kul
ding hi ci-in huhna ngen in tua laitak aa President Pa Vial Khan Mang
tawh a pai ka hi uh hi.A man hong dawng pah lian in hongpai ciangin
hong contact hen ken na na makaih ding hing" hong cipah hi.AG sia bek
na hilo in Pasian nasem taktak hi ci-in thupi kasa mahmah hi.( Ih
neulawm te na ngawn cithei leh huhna va ngenleeng hopih hak mahmah leh
hong huh dingpen haksa sa thei mahmah hi.Sia Do Kham pen mihuh nuam
taktak in ka mu hi.) Visa ngahlo mawk ka hih manun hong huhnop hang
hong huh kha lo hi.Etteh huai sa ingh.


2. Kawlgam hong ciah nunung in ka sia te mah un Biakinn
vai mahin US pai ding ka vaihawm hun uh tawh kituak kha leuleu hi.Visa
vai ah Sia Do Kham in hong huh thei ding cih up na kinei a hih manin
huhna ngen dingin kei tavuan hong kipia leuleu hi.A man lah leh a buai
luat lam thei ka hih manin ph hopih ding haksa ka sa mahmah hi.thumvei
bang ka kithawi a ka hopih ngam pak kei hi.Hopih loh phamawh a hih
manin ka hopih hi.A man hong dawng pahin "Bangvai hiam?meeting kabawl
laitak uh hi." ci-in kamnem tak tawh hong dawng hi.Hong set kik ning
ci-in phone ka khia hi.Meeting manta in teh ci-in ka up mawh ciangin
ka hopih kik leh nitaak nai 10 in ka zin ah hongpai un man thei ning
hong ci hi.Nai 10 kapai uh leh na omlian in ka gen nop teng ka gen
hi.Kamsawi leh neu-et na kam cih zang het lo in hong huh ding hing
hong cipah hi.(Eimi pawlkhat ten huhna hong piak hang mangngilh pakloh
ding vom ciuciau ding kammal khat peuh hong beleng thei hi.)Minam vai
ka va kuppih khak leh lawmpa hong lawp lua mawkin kiciah pak theilo
hi.Minam a vei mahmah na hi mawk hi.Hong huh takpi in a ma hang in sum
zong tampi kingah hi.

Sia Do Kham zah aa thupi kasak leh nasia kasak mah
Saipimualte khat om aa tua pen a naupa Sia Vum Nang hi.A mah pen Siapa
tawh a ki lehbulh lian hi aa,zong gi phalo,awtol pian sawnsawn hi.A
gitloh mahmah hangin thupi kasakna...

1. Japan ah a om lai-in Tedim Zato pi ah puanza hon
khat pia ngei hi.Etteh huai hi.


2. CNF te in Saizang ah mi(4) a thah lai-in Japan
panin mi 1 teh tul 10 ta tawh sigal hi.(Tua hun lai-in Saizang ah sih
gaalna 200 kiim hi aa,500 pen a tam mahmah hi).


3. Khat vei niang tuisai ah ka tut khop uh leh nang
na tapa MC kah kong lungdam pihna ci-in Ks.50,000 hong pia mawk hi.A
mah zong sum tampi a pu hi khollo hi.(Sangsap kisam aa,leitawi ka
muhzawh loh laitak hi sawnsawn in ka lungdam pha diak hi.)


4. Khatvei FGA ah ka kikhop uh leh nupi khat kiangah
kikhop tuah teh kimu ni ci -in,ki khop man teh va pai tingteng in tul
5 lai pawl khat va pia pongmawk hi.(Tua nupi nu pen a mi-in a
kitheihpih mahmah khat hi aa,ci le sa in a kinaina a om kilkel lo
hi.Nuntakna a haksa mahmah nupi khat hi.).


5. Yangon hong pai ciangin Zozum ah Zogam puah
ding,khua khempeuh motor lam tung sak ding,Lamto set lei ding ci-in
gengen hi.Ka lungsim sungah nakam tawl lelsi ka cih simsim leh tun a
laikhin hi sawnsawn hi.Kuakuan bangbang a gen zongin hih te unau pen
Pasian zong itsa ingh,minam zong itsa ingh.Kambek hilo in a nuntaakna
uh tawh lakkhia sa ingh.Etteh huai sa ingh.

Khup Mung!