ZIUSA

Zomi Community USA is founded in 2005 with the love and concerns for the Zomis around the world, especially for those who are in the Unted States of America. It is formed by the Zomi Communities which are from different City and State. 

Zomi Community USA can be called/named in its abbreviation "ZIUSA" which stands for "Zomi Innkuan United States of America" written in the language of the Zomis' dialect. Zomi Community is registered in the name of "Zomi Innkuan USA" which is incorporated in the State of Oklahoma and exempt from Federal Income Tax as a Public Charity of Section 501 (C) 3.  

With the effort of our volunteer expert and qualified leaders, there are thirty six Zomi Communities under the umbrella of Zomi Community USA.  

The zeal and the love for the Zomis never stop. It always encourages all the Zomis to love and to maintain  Zomis' cultures, the Zomis' tradition, Zomis' dialect in the daily life. It also promotes them at all times.

Every year there are annual conference in which all the communities join and share all the activities held in each local community. 



In Zomi dialects

Zomi Innkuan USA kipawlna’ Ngimna Bulpite anuai a bang ahi hi.

1.     United States of America gam sung a om Zomi-te sung ah kikhualna, kipumkhatna leh kipanpihna akhan semsem theihna ding,

2.     United States of America gam sung a om Zomi-te’ khua leh tui tawh kisai khantohna ding vaite leh Zomi taanggpi taangta buppi tawh kisai phattuamna ding vaite pankhop theihna ding,

3.     Zomi-te in minam kician, minam picing semsem dinmun khat atun’ zawhna dingin kipawlkhawm in vaihawmkhop theihna ding. 

Zomi Innkuan USA Tangthu

Thu kipatna 

Zomi Innkuan USA kipawlna in United States of America gam sung, mun tuamtuam a om Zomi-te’ khua leh tui kipawlnate (Community Organizations) ahi, Zomi Innkuan kipawlna tuamtuamte a kigawmkhopna phungpi ahi hi.

A masa in, Florida Zomi Innkuan (USA) kipawlna in, kipawlna a phuh zawh uh, kum (5) acin’nna pawipi pen March 27, 2005 ni in, hong bawlsawm uh a, mun tuamtuam a om, Zomi Innkuan kipawlna makai khempeuh, pawi siim dingin hong sam uhhi. Pawi siimkawm in, US gam sung ah, gambup ahuam, Zomi kipawlna khat phuh zawhna ding kikupna neih dingin thu hong sung uhhi. Florida Zomi Innkuan (USA) kipawlna in ahong sapna leh thusunte kisang thei a, pawi siim ding leh, thukikupna akah dingin, mun tuamtuam pan Zomi-te Florida kizuanciat hi.

Zomi Innkuan kipawlna (6) pan makaite leh tangmite, March 26, 2005 ni in, Florida State, Hollywood khuapi ah kikaikhawm in, “A masa pen Zomi Innkuan Khawmpi” kibawl a, Khawmpi akah khempeuh thukimna tawh Zomi Innkuan USA kipawlna akiphut ahi hi. March 27, 2005 ni in Zomi Innkuan USA phuhna thu kitaangkokhia hi. Zomi Innkuan kipawlna teng pen; Florida Zomi Innkuan (USA), Zomi Innkuan Oklahoma, Zomi Innkuan DC, Appalachian Zomi Innkuan, Chicago Zomi Innkuan leh Portland Zomi Innkuan kipawlnate ahi hi.

Maban Kalsuanna, Khawmpi leh Kivaipuakzia

March ~ August, 2005

March 27, 2005 ni in Zomi Innkuan USA kipawlna a kiphuh zawh ciangin Kipawlna in Thukhunpi kician khat a neih masiah Kipawlna a makai dingin Kipawlna in ahuam Zomi Innkuan kipawlna tuamtuam pan President leh Secretary panmunlen teng mimal vekpi (12) tawh Executive Committee khat kiphut a, innteek Florida Zomi Innkuan kipawlna pan Presdient Pa Gin Za Pau leh Secretary Pa Kam Sian Lian in Zomi Innkuan USA kipawlna ahzong President leh Secretary panmunte alen dingin kikipsak hi. Executive Committee in Kipawlna Thukhunpi ding khat ahong gelhna dingin thu kipia hi.

August, 2005 ~ January 2006 

Haksatna tuamtuam hangin Executive Committee in Kipawlna Thukhunpi gelh ding tawh kisai maban pan zolo ahih manin, August 20, 2005 ni in Tulsa khuapi ah Zomi Innkuan USA kipawlna (thukin) Khawmpi khat kibawl a, Kipawlna maban ah apang dingin makai panmunlen (7) apha Executive Committee athak khat kiteelpha hi. Makaipi dingin TaangGo Sawm Khup kiteel a, Thusapi dingin Tg. Dong Khan Khup kiteel hi. Teelcing Executive Committee in 2005 kum beima in Kipawlna Thukhunpi ahong gelhna dingun thu kipia hi.

Teelcing Executive Committee in Thukhunpi gelh hong kipan a, US gam sung a om Zomi mipil misiam, khuanu khuapa mimal (40) val tawh, Thukhunpi tawh kisai Thudotpi Pawl khat hongseh uhhi. Thudotpite thusunna, hilhcianna leh Zomi Innkuan USA kipawlna Makaite hanciamna tawh, 2005 kum beima in, Thukhunpi ahaam khat kigelh zo hi. Tua Thukhunpi ahaam pen US gam sung a om Zomi khempeuh (atamzaw) in a sim theih dingin, kihawmkhia a, ngaihsutna kikaikhawm hi.

2006~2007

January 14, 2006 ni in Chicago khuapi ah Kipawlna Thukhunpi kipsakna Khawmpi kibawl a, Executive Committee in agelh Thukhunpi tawh kisai kikupna, puahphatnate a kibawlkhit ciangin Khawmpi akah atam zaw thukimna tawh kikipsak hi. Thukhunpi zui-in Kipawlna maban ah ma pang dingin makai panmunlen (7) apha Executive Committee khat teelkhia in, Kipawlna buppi tawh kisai thu anei dingin Zomi Innkuan kipawlna tuamtuam pan Makaipite leh Tangmite tawh akilam Board of Directors pawl khat kidingsak hi. Presdient panmun alen ding Pa Ngo Cin Thawng kiteel a, General Secretary panmun alen dingin TaangGo Sawm Khup kiteel hi. Board Chairman dingin Tg. Thang Do Hang kiteel a, Board Secretary dingin Tg. Zam Sian Khai kiteel hi. 

2007~2008

June 9, 2007 ni in Tulsa khuapi ah Kipawlna Kumcin Khawmpi kibawl a, Thukhunpi zui-in Executive Committee athak khat kiteel hi. Presdient panmun alen ding Dr. Chin Do Kham kiteel a, General Secretary panmun alen dingin Tg. Vung Lian Mang kiteel hi. Board Chairman dingin Rev. Thawng Khan Cin kiteel a, Board Secretary dingin Tg. Dong Khan Khup kiteel hi. 

2008~2009

September 20, 2008 ni in Tulsa khuapi ah Kipawlna Kumcin Khawmpi kibawl a, Thukhunpi sung a Kivaipuakzia puahpha in Board of Directors pawl khatbek tawh Kipawlna kimakaih dingin kikhensat hi. Khawmpi sung pan makai panmunlen (7) teelbeh in, Zomi Innkuan kipawlna (8) pan Makaipi teng tawh kigawmkhawm a, Board of Directors pawl khat sung ah pankhop dingin kikhensat hi. Executive Committee atuam in kidingsaklo hi. Kipawlna President leh Board Chairman panmun alen dingin Dr. Chin Do Kham kiteel a, General Secretary panmun alen dingin Pa Go Sawm Khup kiteel hi. Board Member vekpi (15) pha hi. Hih Khawmpi sung ah Kipawlna Kumcin Khawmpi pen July 4 Holiday hun sung a bawl dingin kikhensat hi. 

2009~2011

July 4, 2009 ni in Tulsa khuapi ah Kipawlna Kumcin Khawmpi kibawl a, 2008 Kumcin Khawmpi sung a kikhensat Kipawlna Kivaipuakzia pen kizang theilo ahih manin Thukhunpi sung a kikhung bangin Executive Committee leh Board of Directors pawl tawh kalsuan dingin kikhensat hi. Board of Directors pawl sung ah teelcing Executive Committee panmunlen teng leh Zomi Innkuan kipawlna tuamtuam pan Tangmite a kihel dingin kithukim hi. Board of Directors pawl pen Executive Committee in makaih a, President in Board Chairman sem in, General Secretary in Board Secretary a sem dingin kikipsak hi.

Kipawlna in ahuam Zomi Innkuan kipawlna khempeuh in Board Member dingin Tangmi a tawm pen (1)-ta puak ding a, Pawlmi mimal (100) aphak simin Tangmi (1)-ta kibehlap thei dingin kikhensat hi. Tangmi khat apuak peuhmah in Kipawlna tawh kizopna in Pawlsum/kumsum (Member Dues) kum khat in ($100) khiat dingin kithukim hi. Executive Committee panmunlente septan pen kum (2) dingin kikhensat a, Makai khat in Executive Committee panmun khat ah Term (2) val sem theilo ding hi ci-in kikhensat hi. Hih Kivaipuakzia pen Thukhunpi sung ah kheel nailo a, Term khat sung sin dingin kithukim hi.

Tutung kiteelna ah, President panmun alen dingin, Dr. Chin Do Kham kiteelkik a, General Secretary panmun alen dingin Pa Go Sawm Khup kiteelkik hi. Kiteelpi sung panin Executive Committee Member (9) kiteelkhia hi. 

Kum (5) Cin’na Pawi (2010)

2009 Kumcin Khawmpi sung a thukhensatna zui-in Executive Committee panmunlente septan pen kum (2) in ahih manin, 2010 Khawmpi sung ah Kiteelpi kibawllo a, Khawmpi hun tuamtuamte nuamtak in kizeek thei hi. 2010 kum pen Zomi Innkuan USA kipawlna a kiphuh zawh kum (5) a cin’ kum ahih manin, 2010 Khawmpi hun sung ah Kipawlna Kum (5) Cin’na Pawi kibawl thei hi. 

2010 Khawmpi a innteek dingin Chicago Zomi Innkuan kipawlna leh Zomi Innkuan Columbus kipawlnate lungdam huai takin hong kithawi uh a, bawlung kimawlna bawlna dingin a lemtaang zawna mun ahi Zomi Innkuan Columbus pawl Khawmpi innteek dingin kiteel hi. Innteek Zomi Innkuan Columbus kipawlna Pawlmi pen aneu alian, mima (70) kiimbek pha uh a, pawisiim mipi pen, mimal (600) val kipha ahih manin, innteekte zindo zawhna pen, thu lamdangpi khat ahi hi. Innteekte numai naupang khempeuh, ihmu manloliang in, zindo, anhuan, anvaak, akisam vai khempeuh hawmzo uh ahih manin, pawisiim khempeuh in, thupi kisa mahmah a, minam a itna uh leh, a thusiamna uh, a kipiakkhiat zawhna uh kizahtak mahmah hi.

Kipawlna Kum (5) Cin’na Pawi sung ah, a khatvei na, Zomi Concert USA lasak pawi, Zomi Idol USA lasak kidemna leh ZoLia & ZoTaang kiteelna leh Zomi Innkuan USA Cup kituhna bawling kidemna kibawl hi. 

Zomi Concert USA lasak pawi a la asa dingin Kawl gam pan Zomi lasiam a minthang, Thawnkham, Pauno leh Cingsan-te kisam a, Thawnkham bekin Visa kician takin hong ngahin, Pawipi ah lasakna hong nei thei hi. US a om Zomi-te tangthu a, Zogam panin lasa dingin kisam a, US gam sung teng ah la sa kawikawi a hong zinzo pen Thawnkham bek ompan ahih manin, ama hong zinna hangin, Zomi-te sung ah lungkimna kingah mahmah hi. Tuaban ah, US ah sangkahpak dingin ahong zin, lasiam Sangpi zong, Pawipi sung ah hong kihel thei a, mipi in tha kingahbeh mahmah hi. 

Zomi Concert Committee, Zomi Idol Committee, ZoLia & ZoTaang Committee, Sports Committee cihbangin, maka tanu kiseh in, aciangciang ah, ma kipang a, kilawhcing mahmah hi.

2011~2013

Zomi Innkuan USA kipawlna, 2011 Kumcin Khawmpi pen Ngeina Dante zui-in, July 2~3, 2011 ni (July 4th Week-end) sung tengin, Atlanta Zomi Innkuan kipawlna innteekna tawh, Georgia State, Atlanta khuapi, Clarkston Community Hall leh Zomi Laizom Christian Fellowship biak-inn ah lawhcing takin kibawl hi.

Khawmpi ah ZIUSA kipawlna sung a kihel Zomi Innkuan kipawlna (12) panin Makaite leh Tangmite hong kah uh a, Zomi Innkuan kipawlna (5) in Khawmpi thukimpihna thu hong puak hi. Zomi Innkuan kipawlna a om nailohna mun tuamtuam panin zong muan leh suan Zomi makaite hong kahthei uhhi. Khawmpi sung a thu kikupna hun sung khempeuh ah thu kum thei mimal vekpi (70) val kiphaden a, US gam sung mun tuamtuam panin zin leh leeng mimal (50) val hong kah hi. US gam sung a om Zomi-te tangthu ah Zomi thukum thei mimal atam pen kikaikhawm a, thu kikupna a lianpen dingin kiciamteh hi.

Hih Khawmpi sung ah donghu vai tawh kisai in, US gam leitang tung ah sihna atuak, luangman (Life Insurance) aneilo, a luangpham ding leh a vui ding kipawlna kician khatpeuh ahihkei leh, pawlpi thahat khatpeuh aneilo, Zomi khat peuhpeuh pen ZIUSA kipawlna in ahi theizah in a luangpham in vuibawl dingin kikhensat hi.

Khawmpi sung ah Kiteelpi zong kibawl a, ZIUSA kipawlna 2011~2013 kum sung Executive Committee panmunlen dingin Makaipi (9) kiteel hi. President panmun alen dingin Pa Go Sawm Khup kiteel a, General Secretary panmun alen dingin Dr. Do Khan Khup kiteel hi.

Zomi Khawmpi USA 2012

Zomi Innkuan USA kipawlna, Board of Directors pawl thukimna bangin, 2012 Kumcin Khawmpi pen “Zomi Khawmpi USA 2012” min phuak in, July 6~8, 2013 (Friday~Sunday) ni sung teng, Tulsa khuapi ah, Zomi Innkuan Oklahoma kipawlna innteekna tawh kibawl hi.

Zomi Khawmpi 2012 sung ah Zomi Concert USA lasak pawi, Zomi Idol USA lasak kidemna, ZoLia & ZoTaang kiteelna, Zomi Innkuan USA Cup kituhna bawlung kidemna leh Zomi Forum holimna pawite kibawl hi. US gam sung a, Zomi-te tangthu ah, pawi namkim lian pen a kibawl kum hi a, pawisiim teng ban-ah, US gambup bek hilo, leitung muntuam gamtuam a om Zomi khempeuh in hong lunglut mahmah uhhi. Lasak pawi, lasak kidemna, meelhoih kiteelna, bawlung kidemna hunte Online ah Live WebCast kibawl ahih manin, leitung mun khempeuh pan hong kisiim zihziah hi. 

Pawi siim dingin, khual panin, zin leh leeng mimal (1,000) kiim hong kuan ahih manin, US gam a Zomi-te tangthu ah Zomi a tam pen a kikaihkhopna hong suak hi. Innteek khua leh tui sung ah Zomi mimal (2,000) val a om hi in, pawi namkim a kibawl hangin, a munmun ah Zomi-te kidim zihziah hi. 

Zomi Khawmpi USA Zinmangpi dingin, Zomi-te Minam Makaipipa, Pu Chin Sian Thang kisam a, cidam takin, Pawi hong siim in, thugenna, thukikupna sung ah thuhilhnate kicing takin hong neizo hi. Zomi Innkuan USA kipawlna in Pu Chin Sian Thang pen “Zomi National Freedom Award” pahtawina pia ah, sumtang $1,200 kizuisak hi.

Lasakna, Lasak kidemna, Bawlung kidwmna, Meelhoih kidemna khempeuh ah, US gambup panin, Zomi-te hong kuan in, hong kidem uh ahih manin, picing mahmah in, thupi mahmah hi.

Innteek Zomi Innkuan Oklahoma kipawlna inzong, asiamtawp un, zin do in, annek tuidawn kicing takin ahong vaak uhban ah, innlum lolum ah limtak in zintungsak zo uhhi. Pawimun kician mahmah khat in, Zomi-te’ neihsa sinsen, Full Gospel Assembly pawlpi biak-inn, nuamtak in kizang thei ahih manin, pawlpi lawhcingtuam mahmah hi.

Kumcin Khawmpi Thukikupna zong, July 7, 2012 ni in, lawhcing takin kibawl a, thukikupna akah kipawlcing mahmah hi. Zomi Innkuan USA kipawlna mailam maban kalsuanna ding kicing takin kikupna kineizo hi. Tu kum pen kiteel kum hilo ahih manin, Kipawlna Makaite in kum khat amakaihlai ding ahi hi.

2013 Zomi Nam Ni

Zomi Innkuan Oklahoma kipawlna in Tulsa khuapi ah, Zomi Nam Ni pahtawina pawipi limci takin bawl uh a, tua mun ah, Zomi Innkuan USA kipawlna min tawh, Zomi-te sung pan Ph.D. Degree angahthak Zomi-te pahtawina, US gam sung a om Zomi-te pahtawina hunte kizang thei hi.

Kumpi leh UN tawh kizopna

Zomi Innkuan USA kipawlna in July 1, 2009 ni in, US kumpi, Department of the Treasury khut nuai a, Internal Revenue Service thuneite tung ah, Non-profit Organization pawl, Public Charity pawl hihna ID 26-4145898 tawh ciaptehna kingah hi.

Zomi Innkuan USA kipawlna in, UN kipawlna khutnuai, ECOSOC sung a, Civil Society pawl dinmun kingen a, 2009 kum in Observer Status kingah hi. 2013 kum Jun kha sungin Consultative Status dinmun kingen a, kumkik ciangin a gah kithei ding hi.

2013 Kumcin Khawmpi leh Zolai Kum 100 Pawi 

Zomi Innkuan USA kipawlna in, ngeina bangin, 2013 kum July 4th Week-end sungin Kumcin Khawmpi a kibawl ding ahi hi. Tu kum pen, Executive Committee panmunlen kiteel kum ahih manin, Kiteelpi tawh kithuah ding hi.

2013 kum pen Sangmang Cope Topa in Zolai ahong bawlsak zawh kum (100) acin’ kum ahih manin, Zomi Innkuan USA kipawlna min tawh, Zolai Kum 100 Pawi zong kibawlkhawm ding hi.

Thukhupna

Zomi Innkuan USA kipawlna pen Zomi buppi sung ah Civil Society ahihkei leh Community Organization alian pen ahi hi. 2013 kum in, Zomi Innkuan USA kipawlna a kiphuh zawh kum (8) acingta hi a, tu ciangciang, Zomi Innkuan USA kipawlna Ngimna Bulpite lawhcing takin a kikalsuan zo ahi hi.

Zomi Innkuan USA kipawlna’ Ngimna Bulpite anuai a bang ahi hi.

1.     United States of America gam sung a om Zomi-te sung ah kikhualna, kipumkhatna leh kipanpihna akhan semsem theihna ding,

2.     United States of America gam sung a om Zomi-te’ khua leh tui tawh kisai khantohna ding vaite leh Zomi taanggpi taangta buppi tawh kisai phattuamna ding vaite pankhop theihna ding,

3.     Zomi-te in minam kician, minam picing semsem dinmun khat atun’ zawhna dingin kipawlkhawm in vaihawmkhop theihna ding.

Zomi-te in minam kician, minam picing semsem dinmun khat atun’ zawhna dingin, ngeina lam, lai lam, Minam Itna lam, kipawlkhop theihna lamte ah kician takin ma kipangzo hi. Zogam sung ah zong, hih Ngimnate atangztun zawhna dingin, tuipi galkai Zomi-te hihna tawh maban limtak in kipangzo a, kilawhcing mahmah hi. Minam kician khat hihna a kip semsemna dingin, minam min “Zomi” kipsakna leh phungvuhna tawh, Zomi buppi etteh takcing dingin, kikalsuan zo hi. 

Zomi Innkuan USA kipawlna pen tuipi galkaai Zomi-te’ khua leh tui kipawlna phungpi ahihmah bangin, tuipi gal khat ah Zomi sisan tak khat ahin’ laitak Zomi Innkuan USA kipawlna pen kip takin a din’ tawntung ding kisam a, Zomi-te in minam kician khat, minam picing khat hihna a kilangsak tawntung dingin kipawlkhawm a pankhop tawntung ding thupi hi. 

Thupuak;

Pa Go Sawm Khup 

President

Zomi Innkuan USA

2013 Kumcin Khawmpi

Tulsa, Oklahoma, USA

July 6, 2013

Lakna:zomicommunityusa.org