Ka lawp zawh sawtzo ahih manin
ka hun lem neih masak pen ah Kelsa lei ning, huan ning, ka kham teek in
ne ning cih ka ngaihsunsun hi. Ahi zongin hun lem neih ding a baih het
kei hi. Kelsa hilo a dang duhna tawh Kelsa lunggulhna kibanglo hi. Kelsa
pen a limna ciil tiuteu a, muinam veuveu ahih manin i gong hong sukha
mahmah hi. Ci sawh leng a alna tawh a sa limna tawh kituak mahmah a,
zasan thak siuhseuh sawh lai dingin a thuksak pian dingin anthul leh
mehthuk khah lai leng a limna kimangngilh ngeilo hi. Sa dang a lunggulh
hileng inn kiangah zong kilei thei dinga, super market ah zong om lel
ahih manin a lei zong baihzaw deuh hi.
Kelsa
linlian bang pen India te sumbuk ah kizuakte lim deuhse hi. India gam
pan hong pai bang
hileh lim khol diak a, ahi zongin tuhun ciang Australia leh New Zealand
pan zong hong pai tamzawta hi kici hi. Zogam ah Kel tampipi kikhawi
thei ding himah leh singkung lopa kiphuk mangin kihal mai gawpgawp ahih
manin a kikhawi theih ding zah kikhawilo hi. Guah zuzu ahih kei leh
Zogam pen gam hal nuam, mei khusak nuam khut ling kauhkauh tam tuak kasa
hi. Tedim ka zin in Tedim khuanawl ka dak phei leh Siangsawnte khua
zong kitung phei nailo in dainawl cik nangawn meikatna sul na om to
tiptep hi. Sil meng na tam mahmah a, Kel an dingin bel hoih bilbel ding
hi. Ahi zongin Kel gamta muh ding omlo leuleu hi. Siangsawnte in Zawng,
Sakuh leh Vasa a khawite uh simloh ganhing muh ding zong a om pak kei
hi. Pu Pau Cin Hau mualsuang gei a singkung tunga vasa tuangte lah a
lengtheilo vive hi a, a lim vive hi in, Zomi Vaphual nupa bang a tuan
zawzen hangin a nungtalopi ahi hi.
Kelsa bang mangngilh dek liangin lampial dektak hang
e!
Gam
khangto a nasep ziate ka ngaihsut ciang khatveivei pen gim leh kinawhna
tawh nitum mai kasa hi. Kisit ding, kiencik ding, audit hong pai ding,
inspection om ding, etc cih hi tawntung mawk! Kum bei manlo nihvei bang
kisit, kiencik lawmlawm cih bel nasem manlo in a hoih, a kilawm ding sem
mengmeng un cih tawh kibang hi. Tua manin a nasem taktak pen midang hi
a, a en dingte hong pai ciang a et ding uh a vaisai pawl mi dang khat
hileuleu hi. Tua bang vai teng tawh ka buai mahmah laitak ahih manin
Zomi Paunak ah 'mittang kia leh zong kitawm manlo ding' a cih bang un
kua phawkpihloh kei khom in ka buai mahmah hi.
Tua
banga ka buai kawmkal ah tuni nitak lam hun awng ngah baih zenzen, 6:05
P.M. in ciah khia thei in hong lemzaw deuh ahih manin nawhsa a Little
India delh in ka tai pah vingveng hi. Hun sawtpi pan ka lungsim a omsa -
Kelsa lei ding, anthul tawh, alu tawh, lothang leh zasan, sing
leh aisan tawh deihtak nuai dingin limtaka huan ding ciin ka gilkial
lam zong phawk manlo in ka diangsuk saisai hi. A mun ka tun tak leh
sumbuk tamzaw na kikhak a, zingciang Good Friday (Zeisu Sihni) adingin
mite kigingkhol in vai nei ciat uh hiding cih ka theisiam pah hi. Kei
zong kikhop, hunzat ding vai neilo bilbel ka hih manin a pusuak thei ka
hi hi. Zingciang hileh bel kikhop om leuleu in vai kihau leuleu ahih
manin ka man kei ding hi. Vak kawnkawn in ka upmawhna teng ka zong
pheiphei hi. Nidang pekpek a ka leina ngei khat ah na omlo bek hilo in a
sumbuk teng na kikhak hi. Cihna ding theilo in ka paina lah gamla, ka
hun lah tampi bei khin, ka tha lah gimta, ka deih lah mulo...aibang
songa le...
Kelsa
lei lo a ciahkik ding lah ka thangpai in ka tha bei pammaih sa. Ahi
zongin cihna ding dang om tuanlo. Bangbang hileh Kelsa a om kei leh zong
Bawngsa beek lei ning e, ciin ka kivialvial kawikawi hi. Bawngsa zuakna
zong ka
mu tuan kei hi. Ansai ah anne zong mi na tawm mahmah in mihing na kiam
mahmah himawk hi. Ciah kawma lamgei a alu leh mehthuk khawng lei a inn
ah ci tawh huan lel ding cih bang ka ngaihsun khin hi. Ka ciah khiatna
ding kongvang mu pak lo in ka tai kawikawi leh a kiu khat ah Ngasa
zuakna khat na om a, tua ah ngasa lei ding ciin ka naih phei hi. Lamet
hetloh in ngasa zuakna gei ah KELSA na kizuak a, amau zong ciah nuam in a
vante uh na seng pianpianta uh hi. Delh phei pah in, "Khawl un, ka lei
nop tua Kelsa hi," ciin ka otsan pah hi. Ka aw dan khat a zak uh ciangin
hong hek phei a, a sa zuak mi nihte ki-en in lamdang sak mel mahmah in
hong en uh hi. Hehpihna tawh Kelsa hong leisak un, ka cih ciangin
Singapore ngeina bangin van lei dingte deihna sem masa hamtang ding, ahi
thei tan ah (customer's rights) cih pen na tel peuhmah uh ahih manin
hong atsak daidai a, Kelsa Kg.1 tawh inn lam ka zuan thei hi!!
Inn
ciah ding ciangin gil kial
pian ahih manin 'kiallap nihna' ciin Puri ka ne leuleu hi. Tua panin
cil zong hong man zaw deuhta ahih manin inn lam nawhsa a delh in Kelsa
ka huan saisai hi. Zan kim ma a nek man ding ciin ka cooker neih India
Cooker Litre 3 tawh Kelsa pawlkhat huan in ka buhsih ding zong ka huan
kawmkawm pah hi. Channel 5 News hong bei kuankuan ciang sa huanna Cooker
zong a gindan hong kikhek a, a phit cianga huih hong lengkhia pen
innsung khempeuh zeel in hong namtui viauviauta ahih manin gilkialsak
hanhan hi. Tua ahih manin ka News et zong a tawp tan en manlo ding bang
phial in Cooker sin hon a, a sunga muinam leng veuveu pen sikkeupi
dimdima hawp ziahziah ka utta hi...
A
khin zong ngak man nawnlo in a sat lai mah in cooker tui tawh buak vot
pak in a sin ka honga, thakhat thu a sa gim namtui cooker sung pana hong
lengkhia leh ka nak kituak bilbel ahih manin buhsih thuk pah, zasan lui
pah, anthul tui lui pah in annekna dohkang gei ah tutphah
sang tungah tu to in Topa tungah 'nisim nek ding hong piak mana lungdam
ko in' AMEN ka cih khit ciangin lungdam takin ka ne pah saisai hi.
Zankim naihta mah leh gilkial bel kithuakzo a, Kelsa gim in kamsung a
tun ding bel ka nawhpai sak pian hi :). Lungdam maitai taka gil dim
phitphet a ka nek khit ciangin ka nekna kuang bang seng kik ding ka
thadah phialta hi.
I duh mahmah
an i nek khak khawng, i lunggulh mahmah singgah i nek khak khawng, i ut
mahmah nasep khat i sep khak khawng pen mihing hihna ah a nuam mahmah
ahi hi. I muhnop mahmah mihing khat mu kaan lai leng leitung pen a tua
teng khempeuh ah belh hiam cih dingin a nuam, a angtanhuai, a
hamphathuai, a lungdamhuai ahi hi.
Na
duh khat kidek ken, a val lua ding bel kidawm in. Na deih khat lei
ngamlo in kidek den ken, na deih nuam nawn hetloh hun hong tung kha ding
hi. Na muhnop mahmah mite tawh kimu mengmeng in a ziakai hun om thei
hi. Na khempeuh
in a hun nei a, a hunlapa hih ding leh a hun zui a sep ding a manpha
ahi hi. Leitung nuntakna i cih lah tawntung ding hilo a, themvei sung
hong hiding hi. Tua ahih manin na hoih na sepnop leh sem mengmeng in, na
painopna mun leh gam, khua leh veng a om leh zin mengmeng in. Hun leh
tui luang in hong ngaklo in na paipai a, i lap kei leh hong kheng
mengmeng lel hi.
Hun lap, deih lap, deih nei hi ciat dingin Topa in hong siamta hen.
Kelsa bel tawm omlai...
Hau Za Cin
Phuitong Liim
Jesus
was angry enough to purge the temple, hungry enough to eat raw grain,
distraught enough to weep in public, fun loving enough to be called a
drunkard, winsome enough to attract kids, weary enough to sleep in a
storm-bounced boat, poor enough to sleep on dirt and borrow a coin for a
sermon illustration, radical enough to get kicked out of town,
responsible enough to care for his mother, tempted enough to know the
smell of Satan, and fearful enough to sweat blood.
He is able to run to the cry of those who are being tempted and tested and tried.
Hebrews 2:18 (AMP)
Whatever you are facing, He knows how you feel.
