PRO MUNDO AWARD SANG DING NU SUNG
THU MASA
Tukum Baylor University (Texas, USA) in Nu Sung tungah “Pro Mundo Medal of Service” pahtawina pia ding cih thu ka na gal zak a, lungdampih mahmah ing.
Pro Mundo cih ciangin Latin kam hi a, “Leitung Ading” cihna hi in, Award deihna ahihleh “Topa min tawh leitung ading na hoih a semte” cihna hi.
Hih Award pen Baylor University panin sang man khinte, a pilsinna uh tawh kizui-in na hoih sem takpi, bek tham loin, Global Impact nei takpi ci-in a ciaptehte uh tungah a kipia hi a, thuneu hi hethet lo hi. Tua banah, hih Award a sang masa pen zong Nu Sung mah hong hi pah sawnsawn ahihmanin angtang diak hi hang.
NU SUNG THU TAWMKHAT
Nu Sung pen Phamsa Rev. Khai Za Dal leh Nu Ram Iang ii tanu neu pen hi a, tu-in UNICEF (Myanmar) ah Child Protection Officer a sep laitak hi.
2012 kumin Baylor University panin Master of Social Work na man a, MSW sungah zong ama bulkan zawk deuh pen, “Naupang leh Innkuan” thu hi.
Pilsinna pen Kawlgam mah panin na kipan to a, India leh Singapore-te ah zong pilna zongin na pai kawikawi hi. MSW a man khit nung, leh UNICEF ah zong nasep kician a neih khit nungin zong, 2022 kumin Haifa University (Jerusalem) panin MA (in Child Development) hong zo leuleu hi. Hua lai pek panin tuni dong mah, “Naupang leh Innkuan” thute mah bulphuhin thusinna pia koikoi hi.
Mimal leh NGO tungtawnin na hoih a sep tuamtuamte pen Baylor University in thupi sa ahihmanin kum 12 khit ciangin hih bang pahtawina hong piaksak uh hi mawk a, lungdamhuai leh angtanhuai lua hi. Gen kizom in…
NU SUNG ETTEHHUAI KA SAKNA
1. Dam Sung Pilna Hanciam Sawm:
Nu Sung in pen, “Pilna zon pen hun ciangtan om lo. I nuntak sung mah i zon ding leh i behlap tohtoh ding hi” ci ngiat hi (Lifelong learner i cihte). Khantoh nopna lungsim a nei den khat leh ama pilna siamna midangte hopsawn ding a thasial ngei lo mi khat ahihna pen thupi sa ing.
2. A Pilsinte Gam Ading Zangkik Takpi
Ut hi zen leh, mi pawlkhat danin sang man khit phet Kawlgam ah ciahkik ding peuhmah ngaihsun nawn loin US ah omsuak suak theih nading gelin kipei keei ding hi.
Ahizongin Pasian a zahtakna leh Kawlgam a veina ngiat tawh sang a man phetin hong ciahkik takpi a, sanglai (application form) ah a kiciamna om bangin gam ading na hoih tampi hong sem takpi hi. “Phualva bang ciampel kei ni” cih la a sak pen zong nuntakpih takpi kici thei ding hi.
“Topa in a thupha tampi kei hong pia zo. Ken ka mipihte ading bang thupha bawlkik thei ding ka hiam?” cih pen kei ka ki-apna hi, ci hi. Tua a ki-apna tungtawnin a nasepte Topa’n theihpih hi ding hiven, tu-in amau sangte mah zangin US ah Award thupi mahmah khat a sang dingin kisamkik ngiat hi zen mawk hi.
3. A Nasepna Pen Pulpit Bangin Ngaihsun:
Tu-a a nasepna pen leitung vai bekin mi tampi in a ngaihsut zenzen hang, Nu Sung in ahihleh tua mun pen ama pulpit bangin ngaihsun a, tua munah citak tak leh muanhuai takin Topa ading na sem hi.
“Hih ka nasep pen khasum san nading bek a ka sep hi lo, ka calling hi. Topa in kei hong koihna mun ahih manin lungsim takpi tawh ka sem den hi” ci ngiat hi. “Topa Jesu zong Social Worker mah nana hi. Aman kha thu bek sem lo-in lungsim leh pumpi ading zong nasem khat ahihmanin amah ka etteh pen hi” ci hi.
Ei khangno sungah a ettehhuai mahmah Topa’n hong piak ka lungdamna lian hi. Topa’n a tanu hong zatsak semsem lai ta hen. Hallelujah!
0 Comments