Ka lai nasepna a nuai-a bang hi:-
Sia H. Gin En Cin ( Dr. ngah nailo )
Tedim sakollamah tan 5-10 ka kah hun sungin ka pano Pa Vungh
Ngaih Thangte innah ka om a, amau zong innsap hi-in, Pu Langh Za
Kham ( Rev. Go Lian Thang' pa ) leh Rev. Khup Khen Thang ( Sia H. Gin En
Cin' upa ) te inn nuai sap kawikawi uh hi. Tua inn tegel pen kimaingat in
motor lamgei tuak ahi hi. Rev. Khup Khen Thangte innah Sia H. Gin En
Cinte om a, " Pa Cin, Pa Cin " ka ci uh hi. Zolai kum 30 bang a zunzunpa
ahih bangin lai semsem, laibu bawlbawl a, ka huh zelzel uh hi. Zolai
Simbu mah hi-in, Stencil a kikhen Gestetner tawh kipei laidal hi-in, a
khep leh a gawmtuah ( binding ) ka seppih thei uh hi.
Nitha pek 8/- hong pia in hong cial thei zel a, laikhepzia a
laizang kitangsak ding cihte hong hilhin, zong ka siam pah lel uh hi.
Keima lai sep hun hong tun ciangin tua bang ngeei a, laikhet, laipei,
laidal khep leh gawmtuah vive ahi manin a siamsa ka suak uh hi. Hi
bang zia tawh tawlpi khat lai ka sem a, ka nung ngaihsut ciang a
haksatna, a buaihuaina teng a nopna khat peuh hong lehsuah zaw
bilbel hi. Sia H. Gin En Cin ( GEC ) pen ka lai nasepna i khaici masa pen
khatin ka ngaihsun a, ama' tungah ka lungdam hi.
Sia Khoi Lam Thang
Zomi Baptist Theological Seminary, Falam ah 1982-1986 ka kah
hun sungin Sia Khoi Lam tawh kum 2 sung ka kithuah kha hi. Ka lutcil in
amah kum 3 na hi-in, lupna kizomin ka lumkhawm ngei hi. Amah pen
tu a tan a tung ding mahin omin, sunsung Siate hilh teng tel khin ahih
manin nitakin laisim tanghtangh ngei khollo hi. Laivuanna-ah lah khatna,
nihna ngah den hi. Diploma kah hi pan napi, Magazine ah manglai tawh
article gelh thei a, Falam kamin NANG LO CUN cih laibu bawl zo hi. Sia
Thang Ngin tangthu " A GUALZO PEN KHUAVAK " min tawh bawlzo hi.
Dr. Chum Awi in lai nasem dingin sawlmun mahmah ahih manin
FBA laikhetna ( press ) ah a lawm Vungh Ling Thang tawh na semsem uh
a, siktang ( ) ahih main khutbuan khebuan neinai sa in hong tung
zel uh hi. Hihte hang mahin amah zong lai uuk laikin hi-in ka um a, kei
zong amau sepzia, uukzia, ka muh ka ettehna tawh lai uuk, laikin
kipan hi-in ka ki-um a, ama' tungah ka lungdam hi.
Zomi Baptist Theological Seminary ( ZTC-CCIT )
Sang in kumsim in Magazine bawl zel a, article gelh dingin
Siaten hong sawk zel hi. Gelh ngeilo ka hih manin ka kihta mahmah a,
1983 kumin a masa pen ka gelh hi. Sangkah sungin 3 ka gelh hi. Gelh
bek hilo laibu in kibawlin ka sem ngeingai zel uh a, laibu a suah ciang
zuak ngeingai in, khot zawh loh teng Tedim ah zuak dingin, Sm. Don
Ngaih Vung tawh hong kisawl ngei a, ka zuak khin zo hi.
Lai Siangtho sangkah sung hi banga hong pantah Dr. Chum Awi
leh Siate tungah ka lungdam mahmah a, a nung ciang lai ka uukna, ka
kinna zong amau' hong pattahna teng hi-in ka um hi.
Hi bang teng hangin Sangkah sung mahin laibu thupi kasa lua a,
nget theih bang ngen, lei theih bang lei, khop theih bangin ka
khawmkhawm hi. Silh leh ten dinga ka leisa puannante nangawn zuak
kik in, laibu ka leina zen hi. Bang laibu cih omlo muh bangbang ka
khawm a, sangtuah in Bizu 1 ka nei ta hi.
Tahan Awging ( 1979 October )
Tahan pawlpi ah ka sepma in Tahan Awging ah nihvei thumvei
ka gelh ngei hi. Awging Committee member teng in, hunbit Editor sem
dingin hong kum ngei hi. Pasian' nasem nuam a sangkah, Gamlai khawk
a sem ka hih manin lem theilo hi. 1987 May pan Tahan ah ka sep
ciangin Editor tawh ka thuah pah a, 1987 - 2006 dong sep leh gelh thuah
tavuan buplak ka hi hi. A dalgol, a bugol, a bu neu .... cih bangin a nam
tuamtuam tawh ka bawl toto uh hi.
Gimpih mahmah, buaipih mahmah hita leng, hih in lai uukna,
lai kinna, tampi hong guanin, lai nasempa hong suaksak hi. A kigelhsa
thute ka nunget ciangin manpha ka sa mahmah a, ka lungdam kik san
hi. Ahi zongin laimai 16, 20, 25 cih bang ahih manin bu 300 , 500 , 1000
kihawm ta leh laibu cihtaaklo ( booklet ) ahihna tawh laihawm mah
suak veve hi. Awging Committee teng tungah ka lungdam hi.
Sia Vum Khat Pau ( Rev. ngah nailo )
Tedim ah tan 5 - 10 ka kahpih ka lawm khat hi-in , Tahan ka tun
teh pawlpi mi na hi hi. Amah B.A ong khumnuai a Sangsia sem hi-in,
gilsung damlo ahih manin Lai Siangtho sangkah dingin ka zola, Sponsor
ka zonsak hi. B.D hong zo a, nasem khawm, ka suak uh hi. MIT sang a
kah sungin ciimnuai khuavak a phuan laibu pawl pawl ahi hi. Tawlkhat
sung lai tawh na ka semkhawm uh a, Bulletin, Pawlpi makai khutzat,
Gupna Ni, ....cih te hong bawlpihin, bawlzia, sepzia ...... hong hilhhilh
hi. Ama' pattahna hanga hizah sem zo ka hi hi. Ama' tung ka lungdam
hi.
Rev. Simon Pau Khan En ( Dr. ngah nailo )
1988 November kipat lamin zato lum dingin Yangon ka tung a,
Sia Ennote inn mah bulphuh in, zato ka lup tungin, Sia Enno in,
" Thawngno aw, tawlpi khat sung zato lum ding i hih manin, lai
tampi tak na gelhgelh inla, thu tampitak na geelgeel dih in, " hong ci
hi.
Kei zong Sia Enno' hong thugen ka nial mawkmawk a,
" Sia Enno aw, lai i cih bel pilna tawh kisai veh aw, ei pilna
siamna neilo ta dingin haksa veh aw,"
ka ci kha vial mawk hi. Sia Enno in, hong dawngkik leuleu a,
lai-uuk laikin tam lo ahih manin sem peuh leng amasa pen, a madawk
pen mah kihi lel ding hi. Tua ci ngaihsut loin na hanciam dih in, " hong
ci hi. Thu zong hong ngetsak a,
" Topa na tapa thawngno, na ihmut na lusuk kal a piang natna
thuak hilo hi. Na muh tanga piang natna thuak hi. Deihna, cihnopna
nei loin piangsak kei niteh. Hih a zato lupna zong Na kammal a sinna
Lai Siangtho sang hisak in la, Nang a dinga na tathiamna suangtat
hisak in, " ci-in thu hong ngetsak hi.
Ama cih bangin kumkhat val zato lup sungin lai ka gelhgelh a,
bu tampi ka dim hi. Ka nung etkik teh manpha kasa mahmah hi. Hi
banga lai ka kinna, ka uukna, ka sep zawhna teng ka lungngaih kik
ciang Sia Enno hong hanthotna, hong thungetsakna hang mah hi ding
hi, ci-in ka ngaihsun a, ama' tungah ka lungdam mahmah hi.
Holim, Gupna Ni, ... tuamtuam
1990 January bei kuanin Tahan Area Khangno kumcin kikhop
Munlai ah om a, Area khangno min tawh laihawm khat neih ding lunggulh
in ka pulak hi. Kithukim ahih manin a min kiphuak a, Tg. Tual Za Mang'
gen kipsakin HOLIM kici hi. Hawm masakna ah " Kumpipa za a luah
ding Khangno " cih gelhin Editor zong ka sum suaksuak phial hi. Area
Youth OB in tavuan la diak a, kum 10 vilvel kizom hi. Hawm masak a
dal hi-in a nung ciangin laibu neu lim ahi hi. Ka nunget ciang manpha
kasa mahmah a, lai nasep kipattahna khat mahin ka mu a, ka lungdam hi.
Tua banah 1990 panin nipi simin Gupna Ni, biakinn mai pan ka
hawmsak a, dal 150 hi-in, a sunga thu teng kaikhawmin, ka gelh banah
a sum ding zongin amawkna in ka hawm hi. Tua banah Khristian nuntakna
tawh kisai Muvanlai Tha, Innkuan tawh kisai - Vangam Malep, Gamthak
tawh kisai - Makedonia Sapna ... cihte zong gelhin a mawkna mahin ka
hawm zel hi. Sep leh geel thuah ka hih manin sauvei ka zomsuak zo kei
hi. 1990 January panin zong Pawlpi Bulletin panin tuni dong mah a
sem suak phial ka hi hi.
2005 January panin numeite laptoh nadingin PAAKNAMTUI cih
khasim laimai 8 ta ko nupa min tawh ka hawm uh a, manpha kisa
mahmah hita leh ka zomsuak zo kei a , kum 2 sung bek ka hawm zo hi.
Ahi zongin 2013 May sungin Pa Than Za Nang' tate in , pianna Nu Dim
Piang phawkna tawh PAAKNAMTUI min pua in, laibu bawl ding hong
ngen a, numei thu bekbek laimai 130 val ka bawlsak hi.
Laibu bawl ka huh, ka bawlsak pongpong tawm nawn khollo
dingin ka um hi. Laibu bawl sang Lai nasem ka hizaw hi.
Pa Kham Zen ( Yangon )
Pa Zen pen Zolai a it, a uuk mahmah , zong a siam mahmah
khat hi-in, laihawm khempeuh ah article hoih nono a puak zo, a suaksak
zo den khat ahi. Ka lai nasepzia hong muh ciang nasepzia tampi hong
hilh hi.
(a) Laigelh teh ciimtak lo a, 3 vei 4 vei gelh kikik ding
( b) Vial tampitak mah en kikkik, sit kikkik ding
(c) Laibu bawl sim a tawm pen bu 10 ta kem den ding
(d) Editorial gelhzia .... cihte hong hilh hi.
Pa Zen hong hilh thute laibu ka bawl ciang maan ka sakna , hi
kasakna tam mahmah a, ka nuntakpih ka zuih thu tam mahmah hi. Tua
manin ama' tungah nakpitakin ka lungdam hi.
Sep kipat leh min phuahna
Ka laihawmsa leh ka laibu bawl tampi tungah sep kipat 1990 ka
ci khin hi. Ahi zongin article gelh kipat 1983 hi-in, kum 30 cing hi. Ka
nak sep pen ka damloh pan hi deuh ahih manin 1988 October 17 ka
kipsak zaw a, kum 25 a cingta hi. Bulphuh " Beihun neilo, Lai Nasepna "
Thna. 12:12 hi.
1988 pan lai ka sepsep hang min phuah ka nei se kei a, 1997
Vandaitui inn ka neih ciangin min tapin " Vamdaitui Lai Nasepna " ka
ci hi. 2010 November Cope Centennial Jubilee ciangin , lai hong
phuatsak Cope min tapin " Cope Lai nasepna : Cope Literature Ministry "
ci lengcih ka lung ngai a, laibu pawlkhat ah zong ka gelh khin hi.
2013 August sungin Prof. Dr. C Thang Za Tuam kiang hih thu ka gen leh,
Cope lai nasep kum 100 a cing ta hi, kum 25 cih phingphing kilawm lo
hi; Vandaitui mah cisuak in, hong cih ciang hisa kik in, " Vandaitui Lai
Nasepna: Vandaitui Literature Ministry ( VLM ) " mah kipsakin, ka khel
nawn kei ding hi.
Khantawn Pawlpi ( Life member )
Pasian' na ka sep kum 10 cin ( 1.4.1999 ) in ka laibu bawl 20 pha
a, laibu tam bawl pen cih pahtawina ka ngah ni ( 18.4.1999 ) in zong bu
30 val bek mah hi. Pasian' nasep kum 15 a cin ( 1.4.2001 ) in bu 50
cinga, tua ni-in Khantawn Pawlmi 50 kipsakna nei-in Card zong ka pia
a, laibu bawlsim bu 1 ta piak ding ka ciam hi. A si a mang tam, gamdang
om tam, kizopna haksa ahih mann a zom suak zolo ka suak mai hi. Ahi
zongin laikin lai uuk deuhte bel ka theihneih veve hi.
Silver Jubilee Phawkna
Pasian' nasep kum 25 cin' ( 1 .4. 2011 ) lungdamkohna tawh
Tonzang gam, Mualkawi Tuiphum adingin laibusaal (library ) khat ka
phuan a, a min Cope Library ka ci uh hi. Laibu nam 100 val ka kholsak
khin hi. Mailamah mun 2, 3 phuat ding ka geel lai hi.
Van neihna
1988 - 1994 dong laidal laikung lobuang laikhetna cihte ka nei
zo het kei hi. Biakinn ah om ka hih bangin pawlpi laikhetna mah zangin
ka khenkhen hi.
1995 March Yangon zato kilak ding ka pai a, Pa Kam Za Pau ( U
Kampau - tun Australia ) vaihawmpihna tawh laikhetna neu, a vom leh
a san kihelh, Ks. 3000/- tawh ka lei thei hi.
Tua banah Pa Vial Khan Kimte nupa deihsakna tawh mite hong
piak (love gift) teng gawmin laikhetna a kang, a malneu khat Gandamar
sai pan Ks. 10,000/- tawh ka lei uh hi. Tua pen a nuai-
a teng hong letsong ( love gift ) pan ka lei hi.
(1) Pa Cin Sian Pau ( USA ) 40900/-
(2) Pa Ngo Nang ( Yangon ) 10000/-
(3) Pa Jimmy Tuang Khan Dal ( Yangon ) 10000/-
(4) Pa Ngin Khaw Thang ( Yangon ) 10000/-
Inn tun teh a koihna kuang Ks. 7000/- tawh ka bawlsak a, tuni
dong ka limzat mahmah hi. A neu nihte zat nang tamlo ahih manin ka
lei masak pen Singtang vakte ka zuak a, a kang pen Sia Thang Kem
Mung (Munlai) ka letsong hi. Amah Jaweh Sia hi-in naibawl a, damlo
tampi naibawl hong hilhsak hi.
2000 kumin Pa Mang Go Thang in Computer bucing khat hong
guan a, tua zawh a sawt loin Rev. Dr. G K Nang in ama' zatlai Computer
bucing khat mah hong pia in, 2010 kumin Sm. Dal Cing (Germany) in
Laptop Computer thak khat mah hong letsong hi. Keima ginat loh kicin
lohna hang zat ding zahin a zang zolo zaw ka hi hi.
Tua banah Yangon a Pa Ngin Za Thang mah tawh kizom in ,
laikhetna kisamte vaihawmsak, leisakin mal 30 val Zogam , India gam
ah ka zuak, ka puak to zo uh hi.
Laitei (Translator)
2001 April pan Pa Sian Za Dal (Tahan AG) hunlang laitei in ka
zang a, Manglai pan Zolai ah ka teitei sak hi. (a) Laikhetna no khat
kemsak, (b) laidal laikung pia, (c) laimai khat Ks. 100 guai (d)
Copy nih ta bawl .... hi danin bu tampi ka letkhia zo uh a, tun bookform
in om ziahziah hi. Ama damloh manin kizom suak zolo hi.
Laibu zuakna
2007 April 1st pan laibu zuakna sai khat Tahan a Pa Go Thawngte
inn maiah ka hong a, vandang lak beh zawh lohna, innsap tam luatna
hangin July ciangin ka khawlkik hi. Tedim ah Pa Kam San, Pa Dong San,
Tonzangah Rev. Cin Do Piang, Sakollam ah Sm. Niang Man, TBC zumah
Nu Hau ... cihte ka mimal zuaksak a, ZCLS ah bel ka zuaksak ngitnget
hi.
Sponsor
Sumlepai neilopi laibu hizah ka bawlzawhna pen sumlepai hong
leitawi, hong sik a om zelzel man hi. Amaute tungah ka lungdam hi. Pa
Suan Cin Thang, Pa Kam Za Kham, Rev. S. Pau Khan En, Rev. Dr. Go
Chin Zam, Pa Neng Khan Pau, Pa Kap Khen Pau, Nu Goih Za Niang, Ko Tin
Zaw, Bo Cin Pau, Nu Cingh Kam, Rev. Dam Suan Mung, Pa Pum Kam,
Rev. Awn Za Dal, Pa Ngul Do Tuang, Rev. Dr. Cin Do Kham, Pa Ngul Cin
... cihte ahi hi. Theih khialh, helloh a om leh hong maisak un.
Nang huhna tawh hih ciang kong tung
Huhna mualsuang hiah phut ing.
"Topa ka nuntak sungin
Laibu 1000 a bawlzo dingin
hong siam in," Amen.
0 Comments