Tonzang sanginnpi

Tonzang Sanginnpi Lungzuanhuai na en kik nuam hiam

Tonzang Sanginnpi C Lim

Tonzang Sanginnpi lui pen C lim a kilam pen a en kik nuam te a ding lungzuan huai peuhmah ei

Tonzang Jubilee Laibupi

Tonzang Jubilee Laibu laimai ( pages ) 150 na sim nop leh

SOLKHA TANG NUAI AH TEDIM KHUAPI - 1


Zomi lasiam Lia Cingsan leh Taang Pauno te in Zogam khuapi Tedim hoihna siamtakin la tawh sa in a awih ziaiziaina uh ka neu laiin cassette ah kikhumte ka ngai zel a, cik ciangin kei zong ka tung tam aw ciin ka lungsim ah ka ngaihsun thei zel hi. Topa in hunpha hong bawlsak in leitungbup Zomi Kipawlna Global Zomi Alliance (GZA) khawmpi a 2veina March 13-17, 2014 sungin kei zong Tedim ka va tung thei hi. Ka upmawh sangin na thupi zaw a, ka muhsawm dan sangin na nasia zaw hi. Tuma kum 50 hun tawh a teh te in a gen uh ciang a thupi ding zah in a thupilo ahihna gen den uh a, kei, tuma kum 50 hun mu khalo pa adingin a thupina a kibang ahi hi. 

Ka tun nitak pan ka ciah kik nitak dong Lengtong Pauno lungsim kuai mah kei lungsim kuai hong hi a, tung Solkha tang silsial nuai ah khuapi sung kigal muh ziziai in khuagal Valvum leh Thangdung te kimu ziziai in etlawm mahmah a, khuapi sunga Zolia leh Zotaang nun nuam zil a vak hialhialte lah nuamsa in kuadang englo uh ahih manin ka thulu dingin 'Solkha tang nuai ah Tedim khuapi' cih kong teel hi. Kei zong 'Sen leh kik thei' in hileng ut mah sing ka ciphial hi... hong telsiam un, lungsim no suak hanhan hiven...

1. Singapore pan Tedim ni khat in tungsuak

(a). Pai Utlua:Tuma in kuateng ni khat in Singapore pan Tedim a tung diam ka thei kei a, kei ka hih leh ka khatvei ka paina ahih manin tun kal ding ngaklah lua in lampi ah lambang manlo liangin zingsang nai 9:00 pan kipat nitak nai 8:00 in ka tung hi. Lengtong Kam Khen in Taang Kam Khen ahih laia a gen, "Dam pai theilo in taai lianga ka ciahna thu" cih la a phuahna bang ka phawk zawzen hi. Kei pen taai liangin a ciah ka himawk hi:(http://www.youtube.com/watch?v=pFVADYli9ho) 

Thei bang sen a zu bang ka momlai in
Ka nu'n luai sung hong vei diaidiaina tual, 
Ka vangkhuatual hong zuan kik ing,
Mim bang pianna Dimtui vangkhua 
Kil bang khanna lenna singta gam lei
Ka vangkhuatual hong zuan kik ing. 
 
Aw! sulhei khau bang ciah ding ka taai,
Nunnop dang sinlai ah am keng
Ka vangkhuatual hong zuan kik ing
Mim bang pianna Dimtui vangkhua 
Kil bang khanna lenna singta gam lei
Ka vangkhuatual hong zuankik ing


Topa hoihna hang bek hi. 

Zomi khempeuh a huam kipawlna GZA in tukum khawmpi a 2-veina nei ding, a mun dingin Tedim kiteel hi cih GZA Associate Secretary Rev. Dr. Go Chin Zam in hong zinlai Singapore khuapi Zomi Innkuan kikhopna ah hong gen ciangin ka lungsim kiu khat ah ka hawh utna hong lian mahmah a, ahi zongin nasepna pan a khuan kingah ding hiam cih kigen theilo ahih manin ka utna nangawn ka gen ngam kei hi. Kikhop tawp ciangin Zomi Innkuan Singapore makaite tawh niangtui dawn khawm in ka tutkhawmpih uh ciangin Sia Zambawi in, "Nong pai kei uh leh Zomi khawmpi a thupi ding zah in thupizolo ding hi. Noteng pen Zomi te in hong kilamen in, hong pai thei kim hile uh cin Zomi te thangahdan kibanglo ding hi," ciin kamsiam leh cihtakpi tawh hong gen in, a pai thei khempeuh pai dingin hong zawn a, "Na nasep uh na taan lawh phial uh zongin paitaak ding hi, bang hang hiam cih leh Zomite hong lametna lianlua hi ka cihnopna hi," ciin hong gen phapha hi. Pai theihlohna ding vai lianzaw ahih manin Tedim hawh utna tawh Zomi khawmpi siim utna tawh hong lian mahmah ahih manin 'duh mahmah napi cilphul bek valhvalh phot' a cih bang un ka utthu ka genkhia ngam kei a, pai thei dingin zong lamet ka pia ngam kei hi. Singapore pan a ciah ding nitak bang Singapore Zomi sung pan bangzah pai thei ding, ciah thei ding cih kicianlo lua ahih manin Siapa bang a heh phial, khasia phial tam aw ka ci hi. Zomi te ki itna leh kihuaina, kilunggulhna leh kingaihna tua zah himawk a, minam a hong bawlpa in ITNA lungsim kicing tak hong guan ahihna kilangin minam hampha i hihna kilang mahmah hi. 

(b). Leave Ngah Ngawngawta: March 10 niin ka leave hong kipia pan a, GZA khawmpi lah March 13 a kipan ding ahi hi. Vanleng tutphah lei dingin ka zon bubu leh tutphah a tawm mante na om nawn mello a lak loh ding lah leave kingah khinta vet si. Leave hong pia veve dingin tuma pek in hong pia lo a kici nuam phial hi. Ahi zongin Topa deihna hi ding hi ciin ka lungsim ka nuamsak hi. Vanleng tutphah khat lei in, ka ciahna ding tutphah pen Singapore pan tam manlua ahih manin Sia Zambawi kiangah nong huh kul ding hi ciin ka ngen maita hi. Aman USD 280 tawh hong ngahsak a, tua pen a tawm man pen ahi hi. Tuma kha khat hun in kila hileh tuazah in ciah leh kuan a kileithei ding ahi hi! Kei etna ah USD 1447 sang bel tawm man zaw pekpek hileuleu hi!! 

March 13 zingsang nai 7:30 in Zomi Innkuan Singapore Vice-President Pa Dal Do Langh in Changi Airport, Singapore ah hong kha a, Coffee leh Bread Toast leh Aktui Tangnih hong nekpih khit ciangin thungetna hong neihsak a, lungnuam takin Jetstar vanleng sungah lut dingin a sung ka tum hi. Departure gate 35 na ka lut ciangin ka van teng hong etsak uh a, ka lungsim ah, "Eh! A pai ding takpi lah ka hita a leh!" ciin ka phawk saan hi. Hampha sam ing ei, halleluijah :)

Ka lut khit bek tak un vanleng nungakte in ka kawng ka ngak uh hiam cih hong encik uh a, tua khit ciang vanleng a lengkhia dingin a lenkhiatna mun zuan a, a gin hong ngaih deuhdeuh in, vanleng hat tai deuhdeuh a, thakhat thu in vantung lam ah kikhawhto in i taw hong zang huaihuai a, huih lak ah a kileng diaidiai in Tedim gam lungsim ah hong suak hiaihiai a, 'koi bang gam ahi tam aw, koi bang khuamual ah a kisuak tam aw' cih ngaihsutna hong lian semsem a, tun mengmeng ding bek kingaihsun hita mai hi. Tuni tunkim ni ahih manin lawmte tu bangin Tedim khuanawl ah tung ziahziah ding uh cih bang kingaihsun kha in i tun hun ding i ngaklah dan kigen zo lo hi. 

Tutna hawm vanleng nungakte zong amau tutna mun ciat ah simbu sa pang bangin tu khikhu uh a, kuamah pau ging omlo in ka dai khipkhep uh hi.  

A sawtlo in nek ding hong kizuak a, Zomi makaite in zing niangtui hong dawnpih khin ahih manin ka gilvah a, bangmah ka lei kei hi. Jetstar pen tutphah tawm man ahih manin nek leh dawn hong kipia lo a, i duh leh sum tawh lei kul hi. Ka mai a laibu leh kawlgam thukizakna New Light of Myanmar (English) ka lakte ka sim leh ka ihmut hong suak a, ka lusu kha hi. Ka khanlawh ciang ka taklam tohlet ah khuadak leh Tuipi leh mualpi kikhenna san ka tung uh a, a sawtlo in Zangkong tungin Mingaladon International Airport ah ka tu uh hi; kawlgam nai 10:25am lian hi. 

(c). Zangkong Tungta:Vanleng sung pan ka pusuak lian leh Tg. Dal Sian Bul in ka nung pan hong delh a, "Dr. Hau Za Cin na hi hiam?" ciin hong dong a, "Himah ing, bangci hong theih na hi hiam?" ka cih leh, "Nong ciah ding ka lawm Hau Mung te in hong gen hi." "Aw, himaw. Ka lungdam si e. Hiah muamkhum bawm khat hong puak ing ei," ciin ka lungdam luat manin ka muamkhum puak bawm khat ka pia hi. Zomi hi banga hong kimuhpih ka angtang mahmah hi. Zomi hih mah nuam ngaungau e!  

Vanleng tung pan ka pusuak leh immigration ah zong nidang sangin nakpi takin manlang zawta ahih manin kei hong dawn Pa Do Khan Khup, CEO, Chin United Football Club leh Rev. Dr. Nang Sawm Piang, Principal, Tedim Theological College te bangin hong mu manlo in Arrival kong khak ka pusuak hi. Lawmte in hong dawnlo ahi tam ciin ka khuadak laitak Pa Andrew Khai leh a zi Nu Josefina tawh a tate nih tawh ka kimu uh a, amau a dawn Andrew naunu kiangah phone zat ding ka ngen man liang hi. Ka phone ma un Sia Khup hong pusuak in hong mu a, lungdam takin ka khutlet uh hi. Ka tun hun ding kisehsa pen 10:40am hi napi ko pen 10:25am in tung ka hih manun lawmte in a hunciam ngakin na tu uh a, kipelh kha pak ahi hi. Kawlgam ah zong vanleng pen ziakai nawnlo in a hun ma in tungzaw ta hi. Gam khangtota cihna hi. 

Sia Khup mawtaw tawh tai pah vengveng in khuasungah meltheihte damlo khat vehin ka kileh kik pah vingveng uh a, sun nai 1:30pm a Kawlpi zuana lengto ding KBZ Airline ka delh uh hi. 

(d). Kawlpi Zuan Ding Hita: Nitak nai 1:30 a leng ding vanleng KBZ ngak in ka khawl laitak un Tedim ah ciahto ding Pu Suan Pau, Sakollam tawh ka kimu kha uh hi. Amah pen khatvei kimu ngei ka hih manin a mel ka thei pah hi. Ahi zongin aman hong theilo ahih manin ka kigen hi. Tuisik khawng dawn khawm in ka ngak uh hi. Tua laitak in Word of Hope Senior Pastor Rev. Suan Za Pau leh a zi Siamah Sangpui hong tung uh a, "Sia Do Kham zi leh tate hong tung ding a dawn ding hi ung," ciin hong gen uh hi. Siamah Sangpui pen Zomi lasiam lak ah Pasian phatna la vive a sa hi in phatna leh biakna late a siam mahmah ahi hi. Japan ka hawh lai in Zomi Christian Fellowship, Tokyo ah kimu khin ka hih manun ka kimuh uh ciang ka kithei pah uh hi. Zomi te vanlengtual ah kileh ziahziah, kituah ziahziah cih ka muh ciang Zomi lasiam Kapno lasak, "Topa laptoh Zomite" cih hong phawksak a, Topa hoihna ka phat hi. 

A hun hong cingin vanleng kongkhak kihong a, ko hong pua ding Bus zong kongkhak ah hong kidawhta ahih manin vanleng lam zuanin ka lutphei uh a, kei hong kha Sia Khup leh Sia Piang te tawh khut kivan in ka kikhen uh a, Zogam khuapi lam zuan dingin vanleng sung ka manawhta hi. 

(zop lai ding)


 
Hau Za Cin
Phuitong Liim
 
Jesus was angry enough to purge the temple, hungry enough to eat raw grain, distraught enough to weep in public, fun loving enough to be called a drunkard, winsome enough to attract kids, weary enough to sleep in a storm-bounced boat, poor enough to sleep on dirt and borrow a coin for a sermon illustration, radical enough to get kicked out of town, responsible enough to care for his mother, tempted enough to know the smell of Satan, and fearful enough to sweat blood.
 
He is able to run to the cry of those who are being tempted and tested and tried.
Hebrews 2:18 (AMP)
 
Whatever you are facing, He knows how you feel.