A ( 8 ) VEINA ZOMI SIAMSIN MEDICAL TRIP TAULENG KHUA VAI

A ( 8) Veina Zomi Siamsin Medical Trip Tauleng khua vai Lungdampihna leh Lunghihmawhna:

Tutungin Zomi Siamsim Medical Trip pen Tauleng khuading cih honggen uh ciangin kalungdam mahmah a, thungetna leh akisam bangin ma kapanpih khak manin ka lungdam mahmah hi.

Siamsin khangno te zong Topan hong ompih in mimal 60 kim bek paithei ding acih kimlai Pasian hehpihna tawh mimal 126 bang hongpha thei in, Tauleng khangno ahuhding a pai mimal 30 teng tawh agawm in Khangno mimal 156 bang akihel thei hongsuak uh hi.

Lungdamna :
1- Tauleng khua kisat zawh kum 103 sungah Siamsin min tawh khatvei mipil hizah akikaih khopna ahih manin kalungdam mahmah hi.

2- Tauleng khuanu khuapa ten zong atunga ngaihsutna sangin thangah mahmah zaw uh ahih manin pawlpi 3 omtengin biakinn tek khak cip in April 13-16,2018 sungteng khuazangbupi in kikhopna neihpih uh hi.

3- Neklehdawn kisam teng pen USA a Tauleng innkuan leh Kalaymyo Tauleng innkuan panin hanciam phadeuh uh a, thangah mahmah ciat uh hi.Bawngkhat, Lawikhat leh vokkhat tawh pilna khaici tuhna Khuazang mintawh kinei thei hi.

4- Siamsin te ading akisam Medical vai leh TA tuamtuam ding pen ZIUSA , ZBCA-USA, ZCC Louisville , Minister Paulun, akipan Kalaymyo Zomi , Tedimmyo Zomi, Tonzangmyo Zomi leh mimal pawlkhat in panpih uh hi. Nakpi takin nulepa ten tha kipia mahmah hi.

5- Zatui zaha bek hilo in khantohna ding tuamtuam naupang ahizongin, nupi papi ahizongin thapiakna tuamtuam nei thei uh a, Tauleng khua leh akim apam pan hongpai khempeuh in thangah in lungkim mahmah uh hi.

6- Siavuan Siamah te zong kimtakin kikai khawm thei uh hi.

7- Cina mi 459 leh ha akilak mimal 135 pha hi.

8- April 15 ni Sunday zingsang in zong America panin thapiakna leh lungdamkohna thutomno genna kanei thei a, ka lungkim mahmah hi.

9- Siamsin nasepna tawh kisai in Siamsin Advisor khat kahih man bek hilo in Zomi te khantohna ding lunggulh mahmah kahih manin nakpi takin thapia leh thangah ka hihi.

ZRA kamuhzia:

ZRA pen Zomi te adingin khat bekbek ineih sunsun gamleh mimal hudingin imuan leh isuan kipawlna khat hi in akua mapeuh in thapia in ikalsuan pih mahmah ding zong athupi ahihi. Zomi te adingin Zomi kisam ahih manin ZRA pen i deih a i deih kei zongin ipanpih hamtang ding ahihi. Laisiangtho tawi in kiciamna abawl Zomi galkap te ahih manin paihtheih omlo in thungetna tawh panpih dingin kangaihsun den hi.

Tutung ZRA nasepdan thanem kasa hi.

Tutungin Tauleng khua ah ZRA in amuhnop pa uh Pa Kimtuang kaikhia ziau lo in khuasunga Zomi Siamsin te adingin lungnop lohna aom sak sese uh pen lamdang kasa hi, Tauleng khua adingin CNA leh Kawl galkap te thumvei bang akikap nasa mun ahih manin hong pilvang deuh leh hoih dingin kangaihsun hi. Makai pi te in tangval thautawi te limtakin makaih zawh mahmah kei leh mailam ah Zomi te adingin maban hoihlo hongsuak thei ding hi. A nasep uh man kha mahdinga, ahizongin asepzia uh pilvang lo deuh kasa hi. Pilvang zek kisam dingin ka um hi. 
Mimal vai leh Siamsin vai khensiam kul hi.

Tutunga thupiang pen Pa Kim Tuang tawh kisai hi-in athupiang' nitakin USA pan ka lungnuamlo ahih manin Phone tawh Kimtuang kahopih pah a, Siamsim makai te zong limtakin kahopih pah hi. Siamsim Advisor hihna leh Tauleng khua makai khat hihna tawh gawm in athu avai khempeuh ka kan kawikawi a, limtakin kahopih a, mimal in dot theih ding teng leh kuptheih ding teng limtakin ka kum thei hi.Thusia apian lohding leh Zomi te i ki pumkhatna asiat khak ding lung hihmawhna tawh ahopih kahihi. Thupiang vai tawh kisai in ZRA te dotnop pen Pa Kimtuang bek hi in, adangte adingin sepdan asiam loh manun launa leh patauhna hongsuak kha ahih lam ka theih cian caingin ka tawl hongdam zaw deuh hi. Thu khempeuh ahoih lam manawh ta danin kangaihsut laitakin Social media te ah thuthak dan khat in hong kikhah kawikawi kamuh ciangin ka lungnuam lo hi. Kimtuang tawh phone a kakiho laitakin " Sia aw Siamsin vai tawh kisai lo hi kei mimal vaibek hi " hongci ahih manin kangaihsut dan khat hong kilamdang kik hi. A tungin Siamsin buppi abawlsia leh anawngkai sak danin ngaihsun kahih manin ka lung hong naumhetlo a ahizongin athu limtakin kakan kan teh Kimtuang mimal vai a amuhnopna uh om ahih manin Siamsin adingin ngaihsut hongnuam kik kasa hi. Siamsin lui Siamsin thak adingin nahoihsepna ah hibang thu piang pen asialam cilbawl in ahoihlam ding ngaihsun a, imainawt zawkding ahihi. Siamsin lam pan zong Phone ah ikiho na tungtawn in athu daisa abang pen mutkuang kikkik lo ding hihang cih hongthum nuam ing.

Zomi te kipumkhat in mainawt loh phamawh hi.

Rev. Dr. Martin Luther King in athugenna ah, " Na lentheih nawnkei leh tai in, na taitheih nawnkei leh pai in, na pai theih nawnkei leh awmtal in " ci hi. Zomi te kitelkhial leng tawm mahmah ihih manin hawmcing lo luading hihang. Pankhop kul mahmah zaw ding hi.

Tuhun pen :
1- Sepkhop hun hi.
2- Nekkhop hun hi.
3- Puakkhop hun hi.
4- Mainawt khop hun hi.
5- Geelkhop hun hi.
6- Kitelsiam zel hun ahihi.
7- Lungdamkoh khop hun ahihi.
8- Mawh kimaisak hun ahihi.
9- Khat leh khat tha kipiak hun ahihi.
10- Zomi hihna Identity limtakin kep hun ahihi.

Mother Teresa thugen thupi sa ing:

1- Ka sisan pen Albanian ka hihi.

2- Ka gammi hihna pen Indian hi.

3- Topa hongsapna pen Leitungbup ading ahihi.

4- Ka lungtang khempeuh Zeisu ading ahihi.

I manphatna kibanglo taleh manpha kimciat hihang:

Siamsin te khangto leh Zomi te akhangto hidinga, Zomi galkap te khangto leh Zomi te adingin midangten hongsimmawh theilo ding hizel ahih manin kitelsiam a, khat leh khat ma ipan khopding thupi mahmah ding hi.

HIh thupen Tauleng khua a thupiang ahih manin tu a kipan in itna tawh hongdaisak sawm un.

Siamsin Medical Trip Tauleng khua a pen Lawhcing mahmah ahih manin thanemna dingin ngaihsun kei ni.

Lungsim tawng pan,

Rev. Pau Khan Khai.
President- Zosiam Ministry.
Advisor - Kawlgambup Zomi Siamsin Kipawlna.
April 19,2018.

Read More

A KHANGTO MINAM - REV. PAU KHAN KHAI

              A KHANGTO MINAM

Gelh:Rev.Pau Khan Khai

Leitung na khempeuh tulthei  mualthei  mah  ta leh, lei  pian

Mapek a hong itna tuni  ciang a khel ngeilo  Topa min ih phat masa

Hi. Leitung mun tuamtuam a om Zomi khempeuh in a khangto leh

Thupha ngah minam i suah theih na dingin  hih a nuai a thu 4 teng

Lungngai khawm dih ni.

1.Kha mangthang veimi hi ding

2.Mi mangthang veimi hi ding

3.Mi pau thei in eipau a zangmi hi ding

4.Mi ngeina theiin ei ngeina akem mi hiding hi.

1. Kha Mangthang Vei Mi Hiding

Veina omlo in lawhcinna  lianpi kingah theilo hi. Nasep khat

Peuhpeuh ah i gualzawh nadingin veina leh lainatna kisam masa

Hi. Kha mangthang veina in mi khempeuh huam a, kua mi tuam cih

Omlo in mi khempeuh kihel hi. Kha mangthang veina tawh a omna

Gam nusia-in a kuankhia mi pawlkhatte pen America panin

Kawlgam ah Adoniram Judson, England panin India gamah William

Carey , Scotland panin Africa gamah David Living Stonete ahi

Hi. Kha mangthang nasepna ah i lawhcin nadingin  lutang maw,

Sisan maw, khitui maw, khua-ul maw, neihsa maw, cih bangin a

Nam tuamtuamin tuh kul hi. Tua ahih manin Zomite’n Topa maitang

I muh theih nadingin a masa penin Kha mangthang a veimi i suah

Nadingin thungen ciat ni.

2. Mi Mangthang Vei Mi Hiding

Kha mangthang veina in mi khempeuh  a ding  hi  a, mi

Mangthang veina pen Zomite a ding  ahi  hi. Zomi hong  vei dingin

Mundang gamdang panin mi hong pai  ding hamsa ta ahih manin

Ei leh ei kivei ding Topa’n hong lunggulh ta hi. Mi namdang tungah

Veina neih zong a thu mahmah hi a, ei  mi  ei  sa te veina pen ih

Mawhpuak ahi  hi. Nasepna  taktak  alim akhum nadingin  Lai

Siangtho gen bangin “ Jerusalem pan ” Sawl.1:8 cih kammal pen a

Etlawm mahmah thu khat ahi hi. Gentehna in CBA zum nasemte in

Mi mangthang veina tawh 1981 kum pawlin Mizoram a Zomite

Tungah nasep hong kipan a tu in Pasian hehpihna  hangin biakna

Kipawlna bucing khat hong suak ta uh  hi. Hun khat lai in midangte

Vei a hih hangin tu in midangte a veithei dingin hong  omta uh hi.

Zomite’n a beisa in sum leh pilna bek i zong a mailam ah mi mahmah

I kizon ding thupi ding hi. CBA te veina tawh Mizoram a Zomite in

Biakinn hoih mahmah te tawh Topa  a  phat  theih mah  bangin

Kawlgam mun tuamtuam a  om  Zomite in zong  ZBCM te veina tawh

Nasepna hangin  Mandalay , Mogoke, Lashio, Hpakant, Maishu,

Yangon leh Maymyo te ah Zo pau tawh Topa min phat  ziahziah 

Thei ta uh hi. Nang mi vei ding maw? Mi’n nang hong vei ding?

3. Mipau Thei-in Ei Pau Azang Mi Hiding

Mipau theihna pen pilna hi  a, eipau  theihlohna pen haina

Bek hiloin, hing manna ahi hi. Minam khat  hihna pen pau kitheihna

Hi a, ahi zongin pau kithei khempeuh minam khat bel hikhin tuan

Lo hi. Koikoi ah i om zongin ih pau i theih kei leh minam dangte’n

Hong thupi sim theilo ding hi. Banghanghiam cih leh Pasian in pau

Nam tuamtuam hong zatsak pen eipau tektawh amah ih phat ding

Hong deih na hi. Biakna pen ut dandan in kilaih thei a, ahi zongin

Zomi hihna pen ut dandan in  kilaih thei lo hi.

Leitung ah mikangte  thupi  ahih manin  kimang pau  ki thupi

Sak hi. Ei Zomite zong khangtoin  thupi mahmah lehang mailam

Ciangin minam dangte in eipau hong sin lel ding uh hi.

4. Mi Ngeina Thei-in Ei Ngeina A Kem Hiding

Leitungah minam kimin  ngeina neitek  uh hi. Zomite’

Ngeinate pen hoih thei mahmah a, ahi zongin nidang in ih pu ih

Pate in dawi tawh na zangh khawmin a dawi a zong ih zatpih pawl

Khat om ahih manin tuhun ciangin ei ngeina pipi zong dawi a sa in

Ih zat loh bang hong om thei hi. Dawi a ih zatsakteng zatloh ding

Hi bek a, ei ngeina teng hoihtakin ih zat leh ih kep ding hi zaw hi.

Ngeina nei napi a ih theih kei leh ahing mang kisuak thei hi. Ih

Ngeinate zang thei a, ngeina puante silhthei a ngeina ante ne thei

A, ngeina lai te ih sim theih pen ngeina ah suahtakna ( independent )

Angah ih suak hi.

Tua ahih manin koi mun ah omta leng Pasian phawk a, ih

Ngeina tuamtuamte  leh imi isate a puah azun zo kim ciat dingin

Topa in thupha hong pia ta hen. Topa’n a khangto minam hong

Suaksak ta hen.

[ Hih thului pen ZOMKA:Sept-Oct,2004 sunga

 Rev. Pau Khan Khai ZBCM.AGS in minam a veina

 Tungtawn in a thusuah, a kiteikhia kik ahi hi. ]

Read More

ZOMI LEH CIHTAKNA - COLONEL H.KAM PUM (Rtd)

 

Photo credit@Zomidc

                                 ZOMI  LEH  CIHTAKNA

Gelh: Colonel H. Kam Pum (Rtd)

Zomi Minampi khat hi:

Kawlgam sung minamte lakpan Zomite minam dang

Tawh a kihel lo minam siangtho pen ( the purest race/tribe)

Hi. Dr.Sithu Vum Kho Hau in ci hi.  Kawlte  pen Pyu minam

Leh Meiteite, Mivomte tawh a kihel minam hi cih Mikang tangthu

Kan Harvey in ci hi. Kawl  kumpi  masa a cih Anawrahta in zi

Panchykalyani  a  cih nu  zong khammite Paletwa lam a  i

Behte’n ci hi. Leng Tong Hoih  i pasal Ava mangpa na ci uh hi;

Kua bel tak hi ding  i  telcian  kei hi. Kyanzittha zi  masa

Thambula a cihnu Yaw te  hi a, a tapapa min Rajakuma   hi-in

Rakokku sak  diak a  Yesagyo khuapi a milim biakna  innpi

Lampa ahi  hi. Narapatehsithu  in  Asho-Chin  numei Ma Saw

(Maurice Collis in “She Was A Queen” ci-in  laibu khat na gelh

hi) zi-in na nei a, a meel  hoih sa lua, ciimlua  ahih  manin

Kumpi  thum takin  zipi  thudotpi in na nei uh hi. Hih thute hangin

Zomite kawl kumpite sunghte, pute i hi a, Kawl  kumpite

Zomite maakte, tute  ahi  hi. Mindon Min, Thibaw Minte pata

Hun aa, ah suan a muan belh uh Yaw Atunwin U Po Hlaing

Leh Kinwin Mingyite Zomite ahi uh hi. Kum 1950  kiim  a

Kawlgam  kisiatgawp  sung a Vungyichohpipa a  muanpi  Pu

Mang Tung Nung ahi hi.

Photo credit@Zomidc

Galhang Zomite:

Leitung  khempeuh ah kizeelin  na zo un ci-in  Pasian

In mihingte hong sawl  bangmah in Zomite  Ciimnuai  pan

Kipanin Khamtung gamtaakpi  teng na saatkham in, Cinghpi,

Saipi, huumpi, sahang, kamkei cih  gamsa lian gamsa hangte

Na zo bek loin na keilum na ne mang uh hi. Japan  galpi ma

In Gawmual singtungah heisamte a khe vei diahdiah om uh

Hi ci hi. Zomite khazihmi i suah  ciangin  pheisam  zong taai

Mang siat uh hi. Galkhuahang delh nunung pen (Lamzang)

Pu Khual Za Cin hi ding ka um hi. A mawtaw  Sezang khua-khungah

Kisia a, tupi khat pua in a khe tawh Tedim a ciah lamah Galkhuahang

In man zolo hi. A tupi puak singlamteh  sa a man ngam lo hi ding hi.

Tedim, Falam, Khalkhate Khazihmi a tamzaw  a kisuak ciangin

Khamtunggam saklam a dawi teng Khamtung khanglam ah taai suk

Uh hi hong nusiasa (Lt. Colonel). Pu Kim Ngin in ci hi. Tua dawite

Hong kileh kik nuamin hong ensim giaugiau hi; i kidop i hangsan kuul ding hi.

Mandalay a Kawl  kumpi innpi Mikang Galkapte’n a laak lai in

Kigual diudeu in khuang leh phiit tumin na la uh hi. Khamtung hong

Sim toh ciangin galkap  tul val, thaupi, thauno, guai-an  puak, a nung a

Maa zom  ding  galkap tampi tawh 1889 kumin hong kuanto uh a,

Tawmvei  sung kilelh bawl a, 1892 kum ciangin  a myo-ukpa suamsakin

Kilehdo leuleu  hi. Inn leh lo khempeuh ong haalcipsak a, numei

Naupangte gen’theihna hangin  kilelh bawl a, tua a kipan Zomite pen

Mikang (British) kumpite muan penin i om bilbel  hi. Thautawi kumpi

Nasem dingin a  muan pen  minam khat  i suak hi. Tua nangawn

Mikangte kheltatin, Tedim paltante a deekah, Falamte a luzangah,

Khalkhate a taltung-ah tuktum tum sak  velval a, galte’n a gaalmuh

Nangawnin kihta tuam uh hi.

Col H. Kam Pum' mimal tangthu nasim nop leh >>>Zomi DC

Japan  Galpi  hong  bei  in, Mikangte  khutnuai  pan  kawlgam

Suahtaakna a kingah  ciangin (independence pen Pa Lam Za Hang in

A thukituah-na sungah “lo deen peek inn deen peek” ci hi)tualgal

Tuamtuam hong piang a, Zomi galkapte hang hi kei leh kawl kumpi

Tawmvei sung a bei ding ahi hi. Vuangyichohpa bangin a inncing dingin

Zomi galkapte bek muang hi. Insein kikapna ah Zomi a si ( 1951 Matkha

14 dong) 346 pha ta zen hi. Tual gal ngaatna khempeuhah  Zomi

Batalen do lohna  omlo  hi. Hong nusiasa Lt.Colonel R.Zam Khan

Thang uk 5th Burma  Regiment in kawmanit galte khut  sung pan

Lashio, Kengtung leh Mongyawng khuapite huu hi (Kei zong Kengtung

Leh Mongyawng huutnah a madawkin ka kihel hi). Kawlgam sung

Tualgal dona, pan galhaan’ minphatna Aung San Thuriya ngah khat,

Thiha Thura ngah 4, Thura ngah 39, galhangmin kiciamteh 182 om

A, a kiciamteh kha lo zong  om  lai ding hi. Midangte  bangin a muutsiam

A zawikaisiam hi lehang tuna sangin  zong tamzaw ding hi.

Zomite a Bo a Mang Suak:

Galkidona  in  leitungah  khantohna  manlangsak  tuam  hi tangthu

Kante’n a cih  bangmah in Leitung Galpi  khatna leh Nihna ciangin

Zomite zong i mit  hong vaaktuama, Sangmang Khup  i Zolai hong

Bawlsak  hong sinsak  tungtawnin 1951 Matkha 14 dong Zomi a bo a

Mang suak hi bang i om hi:1.A. 1. Sc. ong bo suak-2;1. 1.Sc. kum

Khatna ong a bo suak-1; tan sawm  ong a bo suak-8, tan 9 ong-7, tan

8 ong-10; tan 7 ong-27;tan 6 ong 18 tan 5 ong 13; tan 4 ong-261;

RSM ( Warrant Officer Grade 1) pan bo suak-2, WO II pan bo suak-5

Santhum pan bo suak 8 leh lai tan kician lo a bo suak-18( ta  zen in ah )

I om hi. Hih bangin Mikangpau -----” I don’t know my zezum….”cih bek

Theite zong a bo a mang suaklam i phawk ciangin laisin kihanciam a

Tua zui in Zomi a bo a mang suak:- Major-Feneral 1; Colonel 11;

Lt.Col.37’ Major 43;Captain leh Leutenant 153 ( a kithei lo om lai

Ding ). 1990 kum pan 1998 dong B.A. leh a tungsiah laitan ong Tedim

Gamsung  1775; Tonzang gamsung 384  (Zanggam sung leh mundang

A kitheilo zong om lai ding hi). Leitung thu nate  thu pilna lamah Zomite

Cihtakna hi a, tu zong  gamsung gampua  ah Zomi siamsin a tula za i

Om hi.

Galkaplam a bo a mang bek tham lohin  ki-ukna  lam zong a hi

Bangin Zomi - 1998 kum dong Mangpi-Manglai-Mangneu i suak hi:-

(ABC zui in) - Ministru of Agriculture and Irrigation ah 9; Ministry of

Education  ah 14;Ministry of Cooperatives ah 3;Ministry of Electrical

Power ah 3; Ministry of Foreign Affairs ah 7; Ministry of Forestry ah 7;

Ministry of Health ah 25; Ministry of Industry ah 2; Ministry of Live-

Stock & Fisheries ah 5; Ministry of Mines ah 4; Ministry of National

Planning , Economic Development, Ministry of Commerce ah 4;

Ministry of Home Affairs (General Administration)ah 14; Office of attorney

And Supreme Court ah 14; Ministry of Social Welfare ah 3; cih leh a

Kiciamteh kha lo om lai…...cih bangin Mikangte bek Mangkang hi nawnlo

Zomite zong mangvom mangsan i suak tazen hi. I suak lai ding hi.

Biaknalam Zomite Cihtakna:

Dawi  tuamtuam  leh pusa pasa (ancester worship) i biak lai-

In siampite bekin  phuisam thei hi. Khazih biakna  (Christianity) hun

Ciangin Pasian thu-um mi khempeuh in a Tapa Topa Zeisu min suangin

Akua mapeuh in Laisiangtho kammal tawh phuisam  khuan i ngah hi.

Tua Pasian kammal  a sin B.Th,. M.Div ong bang zah pha zo cih a

Kithei lo ahi ta zongin Zomite LST sinna sang Kawlgam bupah 13

Val (Yangon bekah 70 val) om zo a, kiphuan thuah lailai dingin a kiging

Tampi om lai hi. Thangyaite  Pa Thang Za Kang (Retired Township

Nursing officer) in koi  pan a top aitam leitung vantung thu-ah

Doctorate degree ngahsa (Ph.D;D.Min;D.Th;D.D) 91, a ngah dek leh a

Sin lai 11 (theih loh zong om lai zeel ding) ki om zo hi ci hi. Topa Zeisu

Nungzuite bangmah in LST Sang kah ngei lopi a Topa tawh a

Tonkhawm manin khamangthang manziahziahna-ah a lusu thuum

Mite a khanglo sak ziahziah zong tampi ki-om hi. Beeltung muut ah

Kiza nawn loin crusade leh  revival aw bek kham-tungah  kiza hi.

Kawlgam sungah kizeel a, dawite patau sak uh hi. Mikanggam, mivom

Nangawn ah Zomite’n LST va sin in, na hilh in, Pawlpi Sia

Nangawn va simin, Mikang Mivom khanlawhna ding zong va hih uh

Hi. Zomite cihtakna tampi sung pan hi teng tawh phasak ni.

Thukhupna:

Mundang gamdang pilna siamna hauhna maanna eng tuan,

Duhgawh tuan loin kha nuntak pumpi nuntakna ding Zogamah kha-an

Pumpi-an khamna ding hauhna ding a zong a sem kenkante Zomi

Citak penpente ci-in ka tuat hi. Tua zomah, koi-ah koi-ah a teeng sum

Leh paai a zong zongin a muh sunsun pilna siamna sum leh paai a

Huh zawh zah tawh a minamte a panpihte Zomi citak nihna in ka tuat

Hi. Zomi citak liailiaite i suahna dingin Pasian hong piak i pil i siamnate,

I neih i lamte tawh Khazih gam leh Zominam aading i piakzawh i

Panpih zaw semsem ciat nadingin hanciam ciat ni.

                                          Colonel H. Kam Pum (Rtd)

( Hih thu gelhpa in Galkap a sepna pan a tawlngak khit ciangin Pasian

Nasep kipan kika, kum 69 pha zo hi. LST sinna ah a Master degree

Thumvei pahtawina ngah khin a, kum 75 a phak ma-in Reverend

Dr.Colonel Haunung Kam Pum suak nuam lai-in hanciamsan laitak)

NB:Hih thului pen 2005 kum a ki gelh hi.

Read More