SOLKHA TANG NUAI AH TEDIM KHUAPI - 4

Zingsang nai 4 hong sat ciangin ka tawl hong dam mahmahta hiding hiven ka khanglo ta a, ka lu phong in ka khuadak leh innvang kawm pan khuavak in hong taan ciciai hi. Thoto in ka pusuah leh innkatau nuai ah zusa ham zakzak khawng kiza in huansung ah thawhbat kung nuai khawngah lei lengthe na khuang ciaiciai a, hong lungzuanhuai mahmah hi. Kauphe leh leigi te na ham selsel in huansunga nahtang kung phunga ui giakte zong na kigit litlit in khuavak taktakta hi cih kimu cian deuhdeuh hi. Golkhadi gah a kici kung keu kai neunaute kimu cian deuhdeuh in innkatau kiu ah hong po to singmehthuk zong a min leh a puam kitel sitsetta a, thangmual dawn ah zingni hong suak ding bangin nizung hong kikap singseng hi. Huihvot nung hiauhiau den ahih manin ka mai ka phiat pah nuam kei a, ka khuadakdak phot hi. Leitung hoihna en a ka khuadak kawikawi laitak in Pa Lian zong hong thoto in 'kisap' ka nei hong sa hiding hiven anbuk lam ah hong tuaksuk bubu in tuilum hong suanga, a sawtlo in 'tuilum tawh na mai phiat aw' ciin keupi dim nih tak tuilum hong lui keihkaih hi. Kei bel a tuivotsa a tui a khoihlo hilo in leitung hoihna mu nuam a khuadak leh zingsang huihvot nung hiauhiau iplah a innkatau tunga kiveivei ka hi hi. 

Avocado a kung ah lo: Avocado kung golpi nih tuibem gei ah na po a, ni mual ah hong suak mahmah ding hita cih ciangin a gahte zong kimu bilbel ahih manin a kung tungah kahto a va lawh ding ka lawp mahmah hi. Ahi zongin a neite in a phaltam aw ciin ka kisuanglah pian a, "Pa Lian, hua thawhbatte kilo leh a nek theih ding hiam?" ciin ka dot leh, "A min teng bel a nuai ah kia in a kunga te bel a min nailote hi," hong ci a, tua leh ka puak dingin pum li khawng lo nuam sing e ka cih leh na deihzahzah lo aw, a kung bel ngot mahmah ahi maw, kitan baih mahmah hi hong ci hi. Singkung bel kikah mun bilbel ahih manin kei hong khoh ding leh khohlo ding bel ka theih lamtak na hi bilbel in ka kahto pah saisai hi. Ka kahtoh khit ciang Singapore ah ka Khangno makai uh Lia Muangnu in hong galmuh in, "Dr. Cin, kidawm aw, a kung sang ah kah ken maw, a kung kitan baih mahmah hi aw," ciin hong otsan a, tua kawmkawm in maan hong zaih ziahziah na himawk hi (Singapore tunkik ciang a maanzaihte mu pan)! Thawhbat pum 4 lo in a nuai ah akia a min, a kinethei pah pum 3 tawh a vekpi in pum 7 ka tawi neinai a, ka mainul bang singteh keu bang zihziah bek hi. Pum khat niangtui tawh meh pah in, a dangteng zinglam ciang kiallap (breakfast) dingin ka siit a, ka lawmte in kuamah in zingsang khuavot ah hong duhpih mello mawk uh hi. 

Tedim ah kiallap a lim mahmah pen 'Iciakuai' akici khat ahi hi. Moh a keu a kikang hi a, Sen te gen Yuthio cih pan kila sawn kammal ahi hi. A khiatna pen 'ngasa tawn' cihna hi. Moh pen ngasa tawn tawh kibang ahih manin 'ngasa banga kikang moh' cihna hi (fish shaped fried bread). A lim diakna pen sathau nellua lo ahih man hi. A taktak in Tedim ah mawngphali thau tawh kikanga, Sen gam te ah vok thau tawh kikang zaw ahih man hi. Vok thau tawh kikang leh a khin ciang gaw pahpah hi. 

Zingsang Khuasung Vakna: Thawhbat ka lawh laitak in thangmual dawn ah zingni hong suak suk sesa a, hong kap suk veva pah hi. Nisuak tung e cilo in zong lum pah hithit a, zan khuamial teng bei khin zo in nithak nuamtak hong mu sak hi. Ko zong zing niangtui leh kiallap ka nek khit phet un Pa Lian tawh kithawi in GZA Khawmpi a niangtui hawpna lap dingin ka diangto pah uh a, ka pai kawm un khuasung lamdung teng leh lamkabom teng ka vak kawikawi phot uh hi. Tonsim leh Tonzang lampi kituahna san ka tun laitak un Tonsim lam pan mawtaw nih hong tungto lutlut a, van a dimlet in hong kisuan to neinai a, Zomi numeite bek van dimlet pua nuam kasak leh Zomi te mawtaw te zong van a dimlet vive mah a pua na himawk uh hi. Van dimlet lo peuhmah puaktak a salo, sep vet gina takin a sem minam Zomi te hi hang cih hong phawksak hi. 

Mawtaw tawh kipelh khin lian cih ciang ka pai suksuk uh leh lam kawi veilam ah ka kihei phei uh a, mualpang ah guam thukpi na om in a taw pek a lui pen Tuithang Gun a kici pen hi a, a gal lam pen Gun Gal a cihcih uh ana hi mawk hi. Haimual lam paina hi in, tua mawtaw lampi zuisuak leng Ciau ah, Tonsim ah a kitung ding ahi hi. Mualtung pan ka daksuk uh a, Gawng Khua kimu thei a, Lailo kimu thei in a dangte bel khuamei kaaita ahih manin a gamla khuate kimu nawnlo hi. Ka tunma uh nipi masa lai in ZIS Secy Pa Khup Khawm Mung te na tung uh a, amau khuamei kai nailo hi ci uh hi. Ko bel ka nuai vua Gawng gama po gua phung leh Lailo khua lutna mawtaw lampi khawng bek ka mu thei uh hi. Mualpang lah kham hihiai bek hi in Pa Lian kiangah, Aizawl hileh inn lamna dingin deihsi unteh, kham sa hetlo ding uh hiven maw, ka ci hi. Gawng te huandai pan panto leng lampi tawh kitang ahih ciang bel inn dawl 30 bang hikhin ngel ding ahih ciang innmun hoih mahmah kici ding hi. Ahi zongin Tedim ah bel innmun ding tamlai ahih manin tuate inn lam theih dingin zong kituat nailo hiding dan hi. 

A sak ah ka paitoh uh leh Rev. Thang Van Lian sepna leh a biakinn, a zum leh a huang kitungto in, a sak ah paito leuleu leng GZA Khawmpi neihna FBBC&S ahi pah hi. Sia Thang Van Lian pen Korea pan Lai Siangtho sang man hi in Zomi sungah Pasian it, thu thei, kiva leh kizen, tangzang taka sepna peuh ah a kileh ziauziau khat hi in, GZA Khawmpi sungah zong Hunzeek leh tangzang thuah in a tavuan a zo mahmah khat ahi hi. Amah banga minam leh Pasian a it, a khangham nailo makai a kineih pen Zomi te hampha mahmah hang. Amah leh Sianu Dr. Cing Pum Neam bang khangno zaw deuh kiva leh tangzang a diang thei Zomi makai i neihte khamuanhuai mahmah hi. 

Leitung Level a Ban Zomi Makaite: Gen pan kha vet ka hih manin zomsuak vet leng. Rev. Dr. Do Suan Mung, Principal and Founder of Faith Baptist Bible College and Seminary, Tedim; Rev. Dr. Go Chin Zam, National Director, Operation Mobilization, Myanmar; Rev. Dr. Gin Khan Khual, General Secretary, Zomi Baptist Convention of Myanmar cihte tutung GZA Khawmpi a 2veina ah hun leh vai khempeuh hong makaih uh pen nakpi takin hamphat huai hi. Ka cihna ah, amau pen leitung level in a diang setset leh leitung level ah nasemte hi in thu leh la vik dan, hunzat dan leh vaisai dan, kampau, mukpau leh zin leh leng hopih dan, makaihdan leh kihei dan, gel dan leh sepsuah dan, mawhpuah nasep hawm dan leh tavuan lak dan, a tuamtuam...tuate khempeuh ah 'hici zaw deuh hen' cih ding om vetlo in zo sitset uh ahih manin Zomi hih nuam ngaungau hi. Leitung level a sem vive te hong makaih ahih mah bangin leitung level ah gamtang mite hong zin in hong siim uh hileh zong kisuanna ding omvetlo, patauhna ding om vetlo, kiphatnsak nading bel hikei ahih theilua hingiat hang cih ka gen ngam hi. English ci leh lah lau lo, Kawlpau ci leh lah 'piah-ta-na masihbu' hi. Laphuakpa in, "Zomi laukha pallun ding hi" cih la sungah 'Kawlgam leh leimong dongin' Zomi te pallun ding hi cih pen a kisasa bek hilo in a takpi in a kizangzang, a kizeekzeekta ahi hi. Zomi a hong bawl Pasian min phat hang. 

GZA Khawmpi Local Committee te lah leitung level a gamtang leh siamna, theihna a kicing leh a kum tampi a sem siamsa hi uh a, a nungthuapte lah leitung level a gamtangte mah hikik in, a 'maimailo' vive hi in, Zomi te Pasian in hong lamsang kasa hi. Rev. Dr. Thuam Khan Thang, Principal, Bethel Bible College, Tedim hi a, mikang mivom tawh kikhawl kithuza nasemkhawm hi in sangsia laihilh siam leh vaihawm thuzek siam khat ahih manin amau makaihna tawh Khawmpi hong nuam mahmah hi. Siapa pen thupulak bek ciang hong nuisak ziahziah bek hilo in amah teekteek tawh mimal in kiho leng zong hong lungtai sak thapai khat ahi hi. Tua zaha mite lungdamna ding leh lungsim thei mi hi a, i kisap leh i thadimna ding, lungtaina ding a thei khat ahi hi. Amah tawh a semkhawm Dr. Cingkok leh Rev. Thang Van Lian, Rev. Nang Lian kap te lah khangno zaw leh thazangzaw ahih man un lah ngaihsun zo, lah sem manlang thei, lah diangzo, lah kiva hi uh a, khangno lamte tawh kizop zong a siamte ahi uh hi. A dang khempeuh zong kiho diamdiam in nasem khawm diamdiam uh a, tutung pen 'politics hilo, minam vai hi' cih ahih mah bangin Zomi leh minam adingin limtak in a pang vive ahi uh hi. 

Tua banga hawmthawh huai vetvetlo makaite in hong makaih uh khawmpi pen nakpi tak in nuam a, annek na mun ah min a khum bekbek 420 a val hangin patau deksuai lo uh hi. Khawmpi ah kihel khempeuh min khumlo (anne lo, anvak kullo) tawh mihing tul khat val bang a kipha den pen mipi hilo in makai vive kihi hi. Khua lam pan makai, pawlpi ah makai, khuasung ah makai, kipawlna ah makai semte vive ahi hi. Mipi nautang khawmpi sim pen kigen nailo hiphot hi. 

Tua banga makai muanhuaite in Zomi hong makaih pen zuih taak, zuih ngam huai hi. Kawlgam level bek hilo, Asia level hilo, leitung level hi uh hi. Tua ahih manin makaite hong makaihna pen up ngam huai hi, khiallo ding uh hi, pil uh hi, thei uh hi. Leitung level in a muan, a suan, a thudotte uh guai Kawlgam khuapi ah zong a tualbual tumteng ngaplo pawl in thupisimlo in om kha kei ni. A pilte gelsa, a ngaihsutsa uh sem in zui in a sepna uh nungthuap leng ei zong a pil, a siam, a thei, a semsuah kisuak lel ding hi. Tua pen Zomi te in lunghiang het kei ni. I makaite muanhuai hi. 

A kigen nai vetlo, gen zong a kul vetlo, a hikhin luasa GZA President Rev. Dr. S. Pau Khan En te, HE Bishop Felix Lian Khen Thang te, Rev. Dr. JM Ngul Khan Pau te pen leitung level in thudotpi leh policy gelpih dingin a zatte uh hi a, a kammal khat uh zong lei a kia nawnlo te hi. Mite in a kam khat gen uh pen sum tampi, tha tampi tawh a lei uh, a cial uh ahi hi. 

Tua manin Zomi ah kigawm ni hong cih uh pen a upmawh thu uh a gen uh hilo a, a tel sitset uh, a muh kilkel uh, a hoihpen ding nang leh kei leh Zomi nam bup adingin hong gen uh, hong pulak uh, sem dinga hong deihsak uh, i maban, i suahtakna ding, i khantohna ding, i khuasuahna ding thu leh nasep tavuan ahi hi. Tua ahih manin lunghiang kei ni, Zomi i hihna angtang in pulak in genkhiakhia ni. 

PS: Tutung GZA Khawmpi ah zong 'Zomi' cih nading ah 'eimi' a ci kha a om leh sum kigaam pahpah hi. Eimi omlo a, Zomi bek om hi cih a kigen nopna hi. 

Gentehna in, "Eimi te pen pil mahmah hang" cilo ding; "Zomi te pen pil mahmah hang" ci zaw ding. 

"Eimi khat leh Kawlte khat kikhawl" cilo ding; "Zomi khat leh Kawlte khat kikhawl" ci zaw ding.

"Eimi nungak te melhoih thei mahmah" cilo ding; "Zolia te/Zomi nungakte melhoih thei mahmah" cizaw ding....

Tua bang teng ka ngaihsut kawmkawm in ka to paipai uh leh kikhopna phual ka tung uh a, tanu Zolia te in niangtui leh moh ka khut vuah hong pia pah lian uh hi. Ko zong lungdam taka dawn kawmkawm in khua tuamtuam pan hong pai Zomi makai pawlkhat tawh ka kiholim kawmkawm uh hi...

(zop lai ding)

Hau Za Cin

Phuitong Liim

www.hauzacin.blogspot.com

 

He Knows How You Feel

Jesus was angry enough to purge the temple, hungry enough to eat raw grain, distraught enough to weep in public, fun loving enough to be called a drunkard, winsome enough to attract kids, weary enough to sleep in a storm-bounced boat, poor enough to sleep on dirt and borrow a coin for a sermon illustration, radical enough to get kicked out of town, responsible enough to care for his mother, tempted enough to know the smell of Satan, and fearful enough to sweat blood.

 

He is able to run to the cry of those who are being tempted and tested and tried.

Hebrews 2:18 (AMP)

 

Whatever you are facing, He knows how you feel.

Read More

SOLKHA TANG NUAI AH TEDIM KHUAPI - 3

Ka giahna dingin Phuitong Liim (Cherry Hotel hisam e) hong na laksak khin uh hi ciin Zomi Music Uplift Society General Secretary Rev. Suan Khan Lian in kikhop tawp lian leh kikhopna Faih Baptist Bible College and Seminary kong mai Solkha taang singseng nuai ah hong gen a, ka lungsim takin 'kei ka Zomi pih te it a hong zin hi ing a Zomi inn ah tunglo a Hotel ah hong tungsak ding maw' cih khat hong suak dihdih hi. Ahi zongin makaite cih bangbang mang ding ciin ka khentat hi. Tua mah bangin a kigelsa ah pai dingin ka kithawi pianpian uh hi. Ka ut bang taktak hileh Zomi inn mah ah tung ding, mei khawng khul zihziah dingin mei gei khawngah tu dingin meikhu nam tawh zanpuan nuai ah lut kheukheu ding cih khawng ka ut dan ahi hi. Khankhiatna teng mah lungsim ah thaam lai ahih manin mikang dana zinbuk (hotel) a va tun seisai ding ka dah simsim hi. 

Thangmual dawn pan hong suak tung Solkha zong vanlai zang san tungta ahih manin vak sesa in hong kapsuk a, phim kia leh zong kimu thei ding cih zah phial a taang in sanginn gei a Phuitong kung pote lah huihkhi in sem in a teh kising ging hiauhiau a, huih lah vot in siang hiauhiau ahih manin tawldam in tangval lai a nungak hel khit inn lam ciah ding innpua ah kingakkhawm tawh kibang sim mahmah hi. Khangno lungsim hong suak kik in 'sen leh kik thei leng maw' cih nop huai mai hi. Lia leh taang te kikhop tawp a ciah dinga kiton hialhialte khawng khangkhat nuntak ah a hampha uh himai veh e maw ciin ka ngaihsunta mai hi. 

Tua laitak in Zomi Innkuan Singapore (ZIS) pan GZA tawh kizopna lam khempeuh ah palai nasep hong sepsak makai Pa Hang Khan Lian hong pusuak a, ko a pusuak masate kiang lam hong neh in hong hopih a, "GZA makaite in zingciang ei ZIS te hun khat hong pia in Zosuan Tuailai Khawmpi a muhkhiat thute genna hun leh GZA Khawmpi sunga minam ading ngaihsutna hong sungkhia dingin hong lamen uh in, i kiho, i tutkhop kul ding hi," ciin hong gen a, "tun paisuk ni in ka inn vuah niangtui dawn kawm ni," ciin hong gel pah hi. "Kei ka giahna ding makaite in Phuitong Zinbuk lam ah hong ci ve uh e, ka gen kul phot diam?" ka cih leh "Zomi lasiam Sia T.S. Khai te na tungsak le uh hizaw lo diam, amau kilawmzaw e, nang bel ko kianga giak dinga kong cihsa hi," hong cih ciangin, "Nuvei, ka lungsim hong thei hilecin kilawm si e," ka cipah hi. Ahang bel zinbuk ah giak ding sangin Zomi te inn teekteek mah ah giak nuam hamtang ka hih man hi. 

Zomi a hong bawl Pasian ka phat a, Zomi ngeina bangin Zomi inn mah ah ka tung nuam tentan sese hi. Ka lunggulh giugiau Topa in hong lemsak a, ka lungdam mahmah hi. Singapore pan Tedim dong ka tun theihna a hang pen Topa hong gelsakna hang hi a, Zomi a it Pu Suan Pau te deihsakna zong ahi hi. Tuate khempeuh Topa theihsa Topa gelsa program sungah a kihelsa hi cih ka tel hi. I minam hong bawlpa nakpi takin phattak mah si e maw! 

Zintunna lam ah: Pa Lian leh Pa Pau Khan Khup tawh, lawm leh gual hong zui ka van hong khaisakte tawh Pa Lian te inn lam zuanin ka paisuk uh a, khataang nuam lua mahmah ahih manin meivak det zong kul seselo hi. Vuikhu kipal kha hiam cih zong kien manlo in khuasunga mi vak damdam te kimu a, kikhopna pan inn lam zuana ciahte zong a honhon in kizui diamdiam uh hi. India lam tawh kibanglo ka sakna khat om: kikhop tawp ciang mite gamlum vengvunga mi kiko, awng baba cihte kiza lo hi! Mite na polite mahmah uh, na gamta siam mahmah uh hi. 

Tedim Road lamdung ah mawtaw tai zuahzuah lah om mello ahih manin lamzikpi pen kikhawm tawp mipi te in a honhon in zui damdam a, suakta takin kikhin diamdiam uh hi. Holim kawmkawm a ka pai laitak uh Car Gate kitunga, Zotaang Bus Ticket Counter kitung in Tonzang leh Champhai lamka bom ka tun laitak un 'inn tungta hang ei' hong ci ziau uh a, ka giahna ding uh a tung ka hi ziau uh hi. FBBC&S pan minit 10 zong kipai manlo hi. Tedim khuapi sung khataang nuam lua mahmah lai taleh khialah pipi in innsung ka lut loh phamawh hita a, khatvei khapi ento kik velval in ka mit dim tak ka etkhit ciangin zinglam ciang hong am mahmah si nung maw, ciin ka lutsan hi. 

Kongkhak ka hon uh ciang singpek hoih mahmah tawh kibawl hi a, inn zong singpek vive kidawh hi in, inn umna zong singpek vive hi a, 'hau kei ung' cici tale uh inn singpek vive tawh a lamzote leitungah mizawng om ngeilo ahih manin mineizo khat bel hi peuhmah hi cih kitheipah hi. Ka lunggulh tinten Zomi te inn ah tung ding ka cih pen hong tangtungta a, ka lungdamna bel kuamah kiang ka gen ngam kei hi; ahang pen makaite in na za kha le uh kisuanlah huai pian ding ahih manin :). Inn sung pen Zomi inn ngeina taktak hi a, kidei diudeu in lupna dei mun li bangah om in ka giahna ding lupna khat bek a omna nuamtak ah muaiza (blanket, puanlum, bawngek puan i cihte) silh thum tak na kiciang venvan a, zan ciang vot mahmah hiding hiven maw ciin ka ngaihsun pah hi. A taktak in bel vot lua hetlo in silh nih bek ka zanga, a val pen midang hong giak a om ding leh hawm ding ciin ka siit hi. Puansilh ding kicing zihziah a om pen neulai khawnga zanpuan puanza khat zawnga phalbi ka do tawh ka teh ciang ka pi in 'hausa no hi uhteh' hong cihcihte himai lo ka hiam ka ci hi. Ka pi Nem Za Awi pen Cingpikot khua pan ahih manin a sanggamte kiang a zin ciang zanpuan lum theilua in 'hausano kibang' ci thei zel hi. Kei bel ka pite khua ka tun nailoh hang (mai lam ah tun sawm lai) 'hausano' khat ka bang takpi hi. Ka pi sanggampa Pu Khai Do Thang zong Singlei ah teeng in tun bel hong nusia khinta a, a damlai in Singlei vot mahmah taleh ka pite a zin ciang zanpuan lum thei mahmah hihtuak hi. Zomi te ki itna leh kideihsakna tawh zinte puansilh lumtak in kithuah a, nuamtak in tawldam takin ki giaksak, ki ihmusak a ngeina hi; hihte khawng hi Zomi hih a nop ngaungauna!

Zing ann zan nai 10:30 ciang ne ziahziah: Singapore pan zingsang niangtui hawp khin in pai in Zangkong ah hawhna ding khat nei ka hih manin ka vak leh ann ne manlo in hong dawnte zong annekpih manlo in Kawlpi ka paisuak kul a, vanleng lap ciamciam in ka vanleng sung ka lutsuak a, zing ann ne manlo in vanleng sungah ah niangtui leh moh them bek hong kihawm ahih manin Zomi te in 'ann' i cih buhsih leh meh ka ne man kei hi. Kawlpi ka tun ciangin zong nawhsa a Tedim zuana pai ding ka hih manin ann bakna ding hun omlo a, Tedim ka tun ciang zong kikhop tawh kituak to linlian ahih manin kikhop tawp ciang anne ding ciin ka kithawi uh leh tanu ten ann teng khempeuh na seng khin man uh ahih manin ka zin ah ann ka delhsuak vet hi. 

Zo-ak ngiat, Zohuan ngiat a kihuan, a tui leh a ha duh zahzah nek ding hong kilui a, buhsih leh ci-al tawh hong hong kigual diudeu ahih manin ka nek masak ding bang theilo liangin ka nui sim hiuhiau hi. Zomi te kideihsakna leh ki itna pen hizah a thuk leh manpha hi a, Zomi ka it mana gam hitana gamla ah ka hun, ka tha, ka sum ka pai bei a ka delh vangvang pen ka kisik het kei a, Zomi pen zuun taak, puah taak, kep taak hi ciin ka mu semsem a, sep semsem ding ahihna zong ka tel semsem hi. Gilvah kingkeng in ann ka nek khit uh ciangin khamval tampi omlai a, gaih zawhloh ann leh meh hong kilui himawk a, zindo siam in mite it dan siam uh ka sa a, sisan laigui zawngkhawm Zomi ka hih ka angtang vanvan hi. 

Gennop tuamtuam gen in ka holim uh leh ka theihloh kal un zankim hong khengval pah a, 'omkhawm lai leng nuam lai, hunte'n hong khengta' cih la bangin ka am mahmah uh hang zan hong sawt hiaihiai in khuavak hong nai mahmah ta a, utlo pipi in kikhen hong kulta a, hong dawnte leh hong lenglate tawh 'mangpha' kikhak in ko mau zalna laikhun dawhtam ciat zuan dingin ka kikhen phot uh hi. 

Zal Mangpha Manta Ding: Zomi te khuapi Tedim ah ka giah cilna ding ahih manin lup ding ka lawp mahmah hi. Ka annek khit ciang ka gim ka tawlna zong ka phawk kei a, ka ihmut zong a suak lua kei hi. Ahi zongin zingsang khuavak ciang vai thupi tak nei ka hih manun ka tawldam uh hoih hi. Sialtang tui tawh ka mai phiat dingin innkatau ah ka pusuah leh Tonsim lam tung Solkha tum ding in hong sawi kap hihiai a, Valvum khua lam pak ziaizuai in kapto ahih manin gamkang meikhu te leh gamkang meikuangte kimu ziziai hi. Innkatau gei a Singmehthuk leh Avocado (thawhbat) kungte zong huihvot in na sem sialsial a, kiling sialsial in na awn diamdiam uh hi. Sialtang tuivot tawh ka mai ka phiat khit ciangin Singapore pan ka puak ka mainul leithak tawh ka nul keu a, huihvot in ka mai hong mut selsel ahih manin a keu hanhan tawh kibangin phalbi lai mai keu ding tawh kibang phial hi. Ahi zongin phalbi leh Christmas in hong kheng zawh sawtpi hita ahih manin mai puakkham ding cih  bang ka patau vetkei hi. Phelkhai sunga tuikeu lamsak keukeu in ka mainul taangban ah ka khai a, inntung lam kahtohna kahlei ah puak liapliap in ka sik penglep deudeu hi. Kongkhak ah ka phanat suah in innsungah ka khe guak tawh ka lut a, ka silh ding zanpuan nih thuap in a nuai ah ka kitholhsuk a, ka khekhuan taw a meivak hong koihsak uh sumit in Topa tungah 'lungdam' ka koh khit ciangin ka lu lukhap tungah ngasuk in tawldam taka zal mangpha man dingin ka mit ka si hiaihiai hi. 

Zingsang ciang Thangmual dawn pan zing ni hong suak silsel ding cihte ka ngaihsutsut kawm in ka zalna laikhun tung ah ka ihmu diaidiaita hi... 

(zop lai ding)

 

Hau Za Cin

Phuitong Liim

www.hauzacin.blogspot.com

 

He Knows How You Feel

Jesus was angry enough to purge the temple, hungry enough to eat raw grain, distraught enough to weep in public, fun loving enough to be called a drunkard, winsome enough to attract kids, weary enough to sleep in a storm-bounced boat, poor enough to sleep on dirt and borrow a coin for a sermon illustration, radical enough to get kicked out of town, responsible enough to care for his mother, tempted enough to know the smell of Satan, and fearful enough to sweat blood.

 

He is able to run to the cry of those who are being tempted and tested and tried.

Hebrews 2:18 (AMP)

 

Whatever you are facing, He knows how you feel.

Read More

SOLKHA TANG NUAI AH TEDIM KHUAPI - 2

Singapore pan ka dinkhiat dingin angkawi Cingpi leh ZIS Vice President in hong kha a, tun ahih leh Myanmar Football League ah CEO khat leh Lai Siangtho sanginn ah Principal khat in hong kha ahih manin ka khamuang mahmah a, ka zin khak loh ding bang ka dah phial hi. Ka zin kik ciang ka muamkhum puak taang in laibu puak ding thupizaw ta ding cih ka lungsim ah hong om mahmah hi. Zomi te mailam ding i khualna in inn lam ciah ciangin Lai Siangtho sanginn ading, pilna sanginn adingin cih bangin a manpha leh go cing ding laibute kipuak zo leng manpha zaw kaan ding hi cih ka phawk hi. 

Kawlpi Cidam in Tung: Gelsa bangin Zangkong pan in Kawlpi cidam in kitunga, Mandalay ah vanlengtui thun sung bek mah minute 15 khawng kikhawl a, kilengto suak pah ahih manin a hun maan in kitung thei hi. Kawlgam vanlengte zong a hun maan mahmahta himawk hi! 

Kei hong dawn dingin Zomi khangno makaite leh Rev. Kathawn zong Kawlpi vanlentual ah na om uh a, Zomi hih mah nuam ngaungau hi. Ka zin sim in uipi vai tung banga lut khualkhual cih omlo in mipi hong tangsak dingin ka Zomi pihte in hong dawn den ahih manin tua mahmah Zomi a ka pian hampha ka kisakna khat hi. Ka paitoh suakna ding leh Tedim ka tunna ding khempeuh gelsa in na koih uh a, hong tonpih ding leh hong buaipih ding zong na koih khin uh hi. Khattang in omlo in hong vaan ding zong hong kigelsak cih ka theih ciang kei leltak hizah a hong kibawl ciin ka lungdam luat manin ka nehno phial mai hi. Zomi te Vaphual bang ki itna kiam deklo hi cih ka mu hi. 

Zangkong pan lah vanleng sungah Zomi mihau Pu Suan Pau tawh tuang khawm kha in lam tawntungah ka holim thei uh a, amah bel mipil leh mithupi in om in kiniamkhiat takin hong hopih hiathiat a, ken Sia Pau zong cilo in Zongeina danin 'Pa Pau aw' ciin ka sam a, aman zong naupang khat e hong ci lo in 'Sia Cin aw' ciin hong sam ngeungeu hi. Mipilte tawh kikhawl leng ei pawl pen a kiphasak tawh kibang dekdek in kiniamkhiat mahmah, kamsiam mahmah kisam sam semsem hi. Mi a pil, a hauh semsem leh a kiniamkhiat semsem, maingap a baih semsem na himawk ei, guai! 

Pu Pau tawh ka holimlim uh leh amah pen inn lam vai kinawh khat a om mana ciah hi in Kawlpi ah khawllo ding Tedim ciahsuak ding nahi phawphot in, "Sia Cin aw, nang zong Tedim tungsuak nuam na hihleh ka mawtaw ah hong tuangin," hong ci a, Khangluite in 'nunglam sabah' acih bangin 'lamet loh hamphatna' hi a, "Aw" lah cipah ngam samlo in, "Nang zong hong zui ding hau nicia," ka cih leh, "Awng hi," hong ci a, kei zong lungdam takin ka sang a, ka zui pah hi. Zomi sungah min nei mi thupi hibang tawh kikhawl kha ding cih ka ngaihsut ciang hampha leh angtang kisa in ka tuang pah hi. 

Kawlpi pan ka pai ding uh ciangin Sia Pau in, "Sia Cin, nang a mai ah hong tu o," hong ci a, "Hilo e, nang ading hi, tua tutna pen," ciin ka nial hi. Ahih hangin nial zolo ka hih manin ka tu a, aman ka tuanna uh mawtaw hong hawl ziahziah in Kawlpi khuasung ka kheng pah uh hi. Kum 60 valta, ka pa khangual ding khat in mawtaw hong hawl cih pen ka koiteng hiam hong nuamlo sim a, kei man hong hawlzaw ning ka cih ding lah ka mawtaw hilo ahih manin ka kisuanglah pian hi. Nitum, khuazing mateng aman hong hawl ziahziah ahih manin Sia Pau mawtaw hawl ah a tuangkha ka hi sawnsawn a, hampha leh angtang ka kisa mahmah hi. 

Cidam in pai zel in Taingen ka khen deuh uh ciangin khua hong zing ciaiciai a, Zolengthe te hong khuang ciaiciai in Pengpelep vasate zong a giahna ding uh panin hong ham ciaiciai a, "Pengpelep, pengpelep" ciin ham ziahziah uh hi. Ko lah nawh tai semsem in ka tunna ding uh ka zuan vangvang uh hi. Munkhat lamto ka tun uh ciang mawtaw kisia khat na om a, a tuangte pen SkyNet TV bawlte Zangkong pan Tedim ah hong zin ahi uh hi. A mawtaw uh kisia ahih manin na khawl uh hi. Ka mawtaw hawl uh Sia Pau upa tapa Pa Ginpu kiangah, "hong huh in" ci uh ahih manin aman zong mawtaw khawlsak in, "bangci a?" ciin a dot leh amau zong a siatna theilo uh hi. Pa Ginpu in, en en in a upmawhna khat a dawt leh mawtaw hong nungta thei pah lian hi. Tua mawtaw pen Japan mawtaw hi a, Japan lai vive tawh kiat hi. "Nang Japan lai sim thei na hiam?" ka cih leh "Sim thei keng". "Tua leh nang a siatna thei na hiam?" ka cih leh, "Thei tuan kei ing, ahih hang ka upmawhna khat om in, tua san ka dawt leh a dawtkha hi ing," ci hi. Zomi te in deihtak i ngaihsut pen ngaihsun khiallo hi hang.  Zomi te in limtak i et pen a hoihlohna pan a hoihna ding kimu thei hi. Zomite khuak pil hi. Zomi khuak in a bat lah omlo hi. Zomi hih nuam ngaungau liang hi. Zangkong pek pan hong paite theihloh pen Zomi khuak in olno takin minit khat sungin thei ziau, solve ziau hi. Zomite 'neda mahohbu'! 

Tedim Tung Taktakta: Khuamial sungah mawtaw meivak tawh kitai ziahziah a, Sezang khua kitung in, Tedim kigalmuh a, a sawtlo in Leilum khua kitungsuk in, tua pan zan nai 8:00 ciangin Faith Baptist Bible College, Tedim ah GZA Khawmpi a 2veina vaimuak kikhop ka lap to lian uh hi. Sia Suan Pau te in FBBC kongkhak ciang mawtaw tawh hong khato a, kongkhak ah Sia Rev. Suan Khan Lian, Taanglungtup, ZOMUS Central Committee Secretary leh Siamah Dr. Cing Pum Neam, GZA Khawmpi Organizing Secretary te in hong na muak pah in ka vanteng inn sungah hong domlut sak uh a, kei zong mipi kikhopna sungah ka lutsuak pah hi. Maitang kilahna na nei khin lian uh a, ka lut hong mu Rev. Dr. Go Chin Zam, Associate Gen Secy, GZA in hong muh ciangin, "A lem hiam?" hong cihna in a khutpi tungto sakin hong lak a, ken zong, "lem mah ei" cihna in ka khutpi tungto sak in ka lak kik hi. Tua ciang maitai takin hong nui a, a sawtlo in kei zong maitang lahna hong nei hi. "Tuni in Singapore pan hong tungsuak Zomi Innkuan Singapore President Dr. Hau Za Cin eite lak ah hong tungta hi; hong ding henla, amah muakna in khut beng ziahziah ni," hong cih ciangin kei zong lungdam maitak takin ka dingto a, mipi hong muakna thupi kasa a, ka angtang mahmah hi. Zomi hih mah nuam ngaungau ei, guai. 

Sia Rev. Dr. Do Suan Mung, General Secretary, GZA in nasia tak in "Pilna" thu hong gen in, pilna a kisapna thu, pilna i neih loh a phatmawhna thu, pilna i zat theih kei leh a neilo tawh kibatna thu, pilna neih khempeuh i beilawh zongin zon ding ahihna thu, a pil gamte hau in a hai gamte zawnga, a hau gamte zong a pil gam a hihna thu, cih bangin kicing takin pilna a manphatna leh pilna  neih huai na thu hong gen hi. Pilna nei napi a zanglo mite pen hau mahmah napi a zawng gamtat mahmahte omzia ahihna khawng hong gen ciangin Zomi te i maban pen pilna nakpi takin hanciam semsem ding, a hun lap ding, a hun tawh kituak a pilna ong kilaihte delh ding, a hun lap in pilna i neihte zang siam ding... cih bangin thalakna ding tampi hong kibehlap hi. Topa in Zomi te hong makaih dinga tua pilna gam ah pilna tawh i hau dinga, pilna tawh vai kihawm dinga, pilna tawh na kisem ding hi. Pilna tawh inn kilam dinga, pilna tawh innsung kipuah ding hi. Pilna tawh gamsung leh khuasung kipuah dinga, pilna tawh Zomi te in leitung gamdang a khangto sate mah bangin technology leh engineering, medicine leh scientific knowledge kinei dinga, kinei bek hilo in kizangthei ta ding hi. 

Kicim man mahmah lo, a gen Sia Mung lah siam mipi lah kilawp tek ahih manin manpha kisa semsem hi. Mipi lah kikhopna sungah dim mitmet in kitu a, tutna kicinglo ahih manin adang va puak thuah uh hi. Khua tuamtuam pan mi kitungkhawm hi a, khua 62 pan pai teng min kikhum hiphot hi. Zing lam ciang zong hong pai ding lamet neilai hi hang. Zomi kikhopna ahih mah bangin zatep omlo, pau ngawh omlo, kithumang diamdiam, a gamlum omlo in sip dide in thu kingai a, lusu leh ihmu omlo in bil kidawh tek hi. Nop panpan ei cih laitak Siapa in a thugen hong tawp ziau a, pilna deih leh pil a ut, pilna thupi a sa Zomi te adingin tom kisa mahmah hi. Pilna thu kigen peuh leh Zomi te in zanhak in zong a kingai nuam ding na himawk hi. Tua zahta in pilna kideihta a, hamphat huai mahmah in, GZA khawmpi a 2veina a thupina kilang panpan hi. 

Topa in Zomi te hong tonpih dinga pilna gam ah pilna tawh nasem ding leh pilna tawh vaihawm diamdiam dingin hong tungsak hong tunpih pelmawh pah tading hi. 

"Tuunsung khat piang Ciimnuai tate" cih la Zogam Lalpu phuah mipi in dingto in kisa ziahziah a, Thugenpipa Siapa mah in Thupha Piakna tawh kikhawm khempeuh thupha hong piak khit ciangin kham kisa het lo in tuzan hun tawp ka tung uh hi. "Hong dam maw" ci a kikhutlet ziahziah tawh, "Mangpha maw" ci a zing ciang kimu dinga kinohset tawh, Zomi te mah nuamsa hang ei... Zomi hih mah nuam ngaungau teei ei. 

Innpua ka pusuah leh mawk aw...Tedim khuapi tungah tung Solkhapi na taang zihziah ei...lungzuan huai sam ei. Tangval lai zawlhel lai hileh aw, zawlnu te kiang hawh theihloh zan bang hilai leh maw - lungzuan kan in sang sawnsawn si in cia... ci kawmkawm in ka giahna ding leh ka zin ding ka zuan a, ka lunglenna teng zong bei manlo in Solkha taang sung pan innsungah ka lut kha hi...

Zal mangpha ni i tung Solkha vangtang nuai ah

Zal mangpha man ni laizom Zomi lia leh taang aw

Zal mangpha man ni zalna laikhun tung ah

Zal mangpha tawh taikhua na vaal in

Ka phuah tawm pak hi!

(zop lai ding)

Hau Za Cin

Phuitong Liim

www.hauzacin.blogspot.com

He Knows How You Feel

Jesus was angry enough to purge the temple, hungry enough to eat raw grain, distraught enough to weep in public, fun loving enough to be called a drunkard, winsome enough to attract kids, weary enough to sleep in a storm-bounced boat, poor enough to sleep on dirt and borrow a coin for a sermon illustration, radical enough to get kicked out of town, responsible enough to care for his mother, tempted enough to know the smell of Satan, and fearful enough to sweat blood.

He is able to run to the cry of those who are being tempted and tested and tried.

Hebrews 2:18 (AMP)

Whatever you are facing, He knows how you feel.

Read More