ESTHER CINGSAN LEH HAPPY BY EVAN.LANGH DO KHUP

1983 kumin Cikha tan 8 Sangnaupang music cithak vei deuh teng Dorcas Teamte’ “TOPA PHAT NI” khui thak ngai dingin Sia Kap Mang (Rev. Kap Khan Mang, USA)te inn ah sun an ngawl zeenin ka diang phei zel uh hi. Khangno zukham phitphit thei khat ka hih hangin Rev. Zam Cin Khual phuah “AMAU HINNA ITHUAI EI LAWM” cih la ka ngaih ciangin kha mangthang veina khat ka sungah hong kiguang hi. Kha mangthang hong veisak masa penpen la ahi hi.

ZOGAM AH MINTHANG PHA DIAK
Tulai bangin online, Facebook, Youtube, WhatsApp cih bang omlo ahih manin Tape Record (Keeset kici) bek a kingai ahih manin khum ngaungau phadiak se hi. A tek a khang in “Cingsan, Cingsan” kici ngeingai hi. Amah lasiam bek hiloin a mel zong hoih pha mahmah leeulaau se lai hi. 1983 kumin Sia Vial Nang Diamond Jubilee Tonzang khuapi ah nasia takin kibawl hi. Tua pawi ah lasa dingin Dorcas Teamte kisam a, TANGKO BAND (Sia Tua Mung leh a lawmte) tawh zai ziahziah uh hi. Cingsan in a sam tomsak pianin la a sak ciangin a lu hei melmel se hi.

TAPE RECORDER TAM MAHMAH

Tua hun lai-in lakhum theihna pen Keeset bek ahih manin lasa omna lamlam ah 3,4,5,6 band cih bangin Keeset golpipi liang puakin mihau zawdeuhte tai kawikawi uh hi. Cingsante lasakte kikhum ciatin khua tun ciangin kisin pah ziahziah tanghial hi.

CINGSAN DAN KI-UT LUA
Tua hun lai-in khuata lamah numei sam tom cihbang om nailo hi. Cingsan a kimuh khit a kipan nungak ten sam tan ziahziah pah uh a, nu leh pate’ tai thuakin nitak an ngawlh lawh tam mahmah hi. Lasak ciangin zong aw lingsakin lu kilok melmel se hi. Cingsan, Khan Dim, T.S Khai, Lengtong Pauno cihte bangin a minthang vangvang Zomi lasiam cih bang om thei nawn lo hi. Tu hun a-te amasate sangin siam lozaw hituan loin leitung bup lasiam minthangte tawh kitehkak ta ahih man ahi hi. Tua hun lai-in English la khawng zak nading baih lo hi.

PASIAN NASEPNA AH KIMU
Hun bangtan hiam a pai khit ciangin Khitui Gospel Team tawh cialpi bawlna munte ah ka kithuah kha ta uh hi. A lasak ding peuhmah limtakin sin ciatciat ahih manin thupi ka sa mahmah hi. Pawlpi deidan nei loin Pasian minthan nading ahih nak leh thasial loin kipumpiak zo den hi.

HAPPY RESTAURANT
Zomi pen tam nailo ihih manin Zomi Artistte pen i ukna tawh kivak cih om thei nailo mawk hi. Gospel pai loh kal teng innkuan nuntak zon nadingin HAPPY RESTAURANT na kipan a mipi thapiakna ngah mahmah hi. Ko zong Topa min tawh zingsang khat hong vak hi. Ama khut tawh sem ngiat ahih manin thupi mahmah a, lim zungzung hi. Zomite’ khuapi Tedim na pai khak leh HAPPY sai ah sun-an na ne hamtang in maw, na tawldamin na tha zong hong dim kik ding hi.

SHARED BY>>>EVAN.LANGH DO KHUP

Read More

AUNG LA N' SANG ( BURMESE PYTHON ) TANGTHU BY JACOB MUNGTA

Aung La N’ Sang Tangthu:
===================
Leitung ah mipi in, alunglut mahmah Light Heavy Weight Champion kituhna ah ong gualzo, Aung La N’ Sang gualzawhna kamuh ciang, ka angtan pih mahmah aa, ama thu leh aneu lai thu te ka mitkha ah ong suakkik dandan in, ama thu ka theih dan teng ong at khia ingh.

Aung la N sang pen, Kachin gam Mitklyina khuapi (N0.2) ah suak in,aneu lai mah in,a innkuan un Zangkong khuapi ah kituahsuk uh hi.

Aung La te unau 5 pha uh aa, a u pen nungak khat USA sangkah , khat veivei ong ciahpak bek hi-in, amin nangawn tel nawn keng, a u pasal , Gum San pen, USA Kachin kipawlna makai pi sem in, VOA News khawng ah ong suak theizel khat hi. Tua khit teh, ama tungah a u pasal khat mah, Khun Lar leh anuai ah numei khat Moparlo cih teng hi.

A Pa, U TU’ AUNG pen, suangbawl mihau mahmah khat hi. Zangkong khuapi ah aten uh ciangin, a nu Daw Nang Bo nasep ding in, Nmai Hka Dringking Water Co. Ltd, khat hong nei uh aa, Zangkong khuabup ah Tuisiang zuak Company tampi lak ah aminthang leh akizel mahmah pawl ah ong kihel uh hi. Tua a Company uh ah, ih Zomi gamdang pai ding, Passport ngak kawm in mi pawlkhat in kisem ngeingai hi. Kei zong, 1999 kum kiim, Malaysia pai ding Passport ngak kawm in, tawlkhat sung,kasem ngei hi.

Ni khat, Deek te khat, kei sang’ agolzaw tham khat in, ong phin thapai ahihman in, migi nuam pipi, ut lo pipi in, ka kilai uh aa, kisuang hetlo, mawh hetlo ka hihman in kazial gawp leh kazo dikdek hi. Ka kilaipih pa ka nuai ah atuk laitak, ka gei aa leisek tang tawh alu khensuk ding ka kithawi leh, Aung La u pa, Gum San in ka u aw, hehpihna tawh khawlphot in,ong cih teh ka khawl aa, ka kisik mahmah hi. Tua ka kilai lai-tak un, Aung La leh asanggam nu Moparlo in, kagei uh pan ong en gigi uh hi.

Aung la pen, aneu lai in, a thudik mahmah, a nunnem mahmah khat ahihi. Ama tung aa a u pasal Khunlar (Bangkok ah a pa’ Hotel Manager sem ci) ahih leh mi phengphi mahmah khat hi-in, pasal no om mawh, mi amuh pepeuh suisim, tumsim zel in, kilai khawng uk mahmah aa, anau Aung La kiangah kilai dingin, to thei zeel hi. 

Aung La in nop mawh asak mahmah teh, khatveivei kilaipih zel thei hi. Khatvei Tuisiang bawlna, Company phualpi ah, nasem te vaan ding in, U TU AUNG tawh khuasung aa a inn uh, KhyiMyint Daing pan ka pai uh hi. Ko pen,Mawtaw maibuk ah tu in, amau unau mawtaw nung, ah tu uh hi. Lam tawntung ah mawtaw kiling vanvan, ong kilok ziahziah hi. Ka pai nading uh ka tun uh teh, tuaksuk in, mawtaw nung ka et uh leh, lawm te unau kilai gim lua,san teta keei uh hi. A Pa in tua ni bel, gawtna nase’ tak pia pah hi.

A pa pen, suangbawl mihau khat hi-in, Inn ah tam om man mel lo, a nu Daw Nang Bo in, inn vai, Company vai khempeuh asai ahihi. Daw Nang Bo pen, mi lungsim hoih mahmah khat hi-in, nasem minam za sagih val lak ah, Zomi a om sunsun te ong angvan’ mahmah hi. 

U’ Tu Aung pen, Kachin Baptist Church (Minikong)ah kikhawm in, Daw Nang Bo pen, Seventh-day Adventist Church (Alone) ah a ta teng tawh kikhawm uh hi.
Ahizong in, Daw Nang Bo leh atate in, kha khat ah khat vei bang, Kachin Baptist Church (Minikong)ah va kikhawm zel uh hi. 

Aung La te pen, Zangkong aten cil uh aa kipan, Zangkong International sangah kah uh ahihman in, Mangpau bel, aneu tung aa kipan, a pau ziahziah khin sa uh ahihi.
Lamdang ka sak khat ah bel, Aung La pen, aneu lai aa athu dik mahmah khat hi-in, agol teh, kilai lam ong lunglut citciat zong, amah athei ngei te ading in,alamdang leh a upmawh huai hetlo khat ahihi.

A u Pa Khun Lar bel, kilai uk lua ahihman in, ka theih sunsun , tupdan, daldan, suihdan,viikdan tawm khat ka hilh lai in, Aung La pen lunglut mel lo aa ong gal 
et hithiat lel hi. Tuni in, Kawlgam bup angtang sak, Leitung in Kawlgam ong theih lawh ciang dong tun zo ahihman in, genzawh loh zah in, ka angtan pih mahmah hi.

By, Jacob Mungta

Read More

LEITUNG GAMVAI KHUAHUN KOI AH BY BOB TUANGPI

Leitung Gamvai Khuanhun Koi Ah

Leitung galpi nihna 1945 kum teh gal hong veng a, tua hun pan kipan leitung gamliante in leitung gamvai ki-ukna thak ( The Liberal World Order) cih tawh hong makaih uhhi. Tua hun pek pan gam tuamtuamte in mipi deihna tawh ki-ukna ( Democracy) tawh hong kimaikaih uh aa lamzang mahmah uhhi. Gamvai pilna akiva Immanuel Kant in " Democracy gamkhat leh gamkhat kigalneih ngeilo hi" cih athuthuuk muh agenkhiat mah bangin Democracy gamte kitalsikna omlo ban ah leitung ah kilemna leh daihna hong omto zawdeuh pah hi.

Mipi thuneihna ki-ukna ( Democracy) ih cih tak ciangin tua sung ah peello akihel gambup ah thukhun kizahtakna ( rule of law), gambup thuneihnapi pen gamsung mipitung pan hong pai hi cih ngaihsut zahtakna, gamsung mite mihing hihna satanh ahuu ding thukhunte kizatna ( human rights/citizen rights protection) gammi khat ciat in gam uk ding makaite teel theihna ( right to vote/right to elect), gammi hihna tawh teelcing hih theihna ( right to be elected), gambup ki-ukna thumungpi thumte atuamtek suaktatak kizatna ( separation of power), gambup phualpi thuneihna ciangtanin gamkee tuamtuamte tawh thuneihna hawmna ( division of power/power sharing), suaktatak sumlei sumzuakna ( free market economy) leh gammite in neih leh lamh neihtheihna ( property rights) cih bang thute ultungsakin leitung galpi nihna khit teh England leh America gamte in makaih aa leitung danthak ( the liberal world order) tawh leitungbuppi hong kipeipih uhhi.

Tua leitung danthak atawsawn dingin leitungbup kipawlna tuamtuam ahi United Nations Organization ( UNO), leitung sumlei sumzuakna lapsang nang leitungbup sumkholna phualpi ( World Bank), leitungbup gam tuamtuam van kizuaktuah aa summan kepbitna ding phualpi ( International Monetary Fund) leh leitung gambup sumbawl kipawlna phualpi ( World Trade Organization) cihte hong phuankhia uhhi. Tua bang leitung Democracy gamlianpite in nasiatak pan hong laak uh ciang'n 1989 tak teh Democracy ii kidempih agalpi Soviet Union leitang hong kidenna'n tua hun pan leitung gamliante suah leh tum lungsim kigaldona ( cold war) hong bei-in Democracy gamte' ngimna tup leh sawmte hong lamzang mahmah hi.

Tua bang kawmkal ah leitungbup in 2008 kum teh sumlei sumzuakna ah dongtuahna lianpi ( great recession) akituah khit kum zalom 21st century kipat phet in Democracy ki-ukna tawtolh hong kipan pah aa tua hun pan kipan tuni ciang minam aangsung khualna ( national interest) leh mimal makai khat makaihna tung ah kingakna ( populism) in nitumna gamte ban ah nisuahna gamte ah munluah hong kipan pahlian hi. Tua bang ziakin leitung luanzia danthak ( the liberal world order) in koilam manawh ding hiam cih akician thu omnawnlo hi.

Leitung gamlian tuamtuamte in amau' minam leh gam aangsung khual nading ultunsakna ( nationalism) hong kipan khia uhhi. Tuni leuleu ciangin leitung ii etteh leh zahtak pen leitung ah Democracy ki-ukna lawhcing pen USA gam nangawn ah USA gam bek mah masak ding ( First American Policy) tawh President Donald Trump hun teh amau'gam ading aangsung khual masakna hong ultungsak pha mahmah uhhi.

Tua bang leitung gamkhat ciat in aangsung khualna ( national interest & national security) ultungsakna hangin gamkhat leh gamkhat galvai leh sumlei sumzuakna ah kidemna hong khauhpai tetek hi. Tukum sung USA gam bang in galvai ading asumzat uh pen US$ 716 billion zeek uh aa, hong tung ding 2020 ciangin US$ 750 billion zeek ding geelna nei uhhi. Tua mah bangin Sengam/China in zongh kumsimin galvai ah asumzeek uh khanto tetek uhhi.

Tua kawmkal ah Europe gam (28) kipawlna ahi European Union te zongh sumlei sumzuakna ah tuantual/kiamlam manawh tetek ban ah leitung gam tuamtuam pan galtai/gambeelte kimhawm ding vai tawh kisai naakbuai pha mahmah uh aa, agamsung ciat uh galtai gambeel/refugees laak leh laakloh ding vai aciang aciang ah songeingai uhhi.

Tua bek thamlo leitungbup a ut bang ahei hialhial tuma kum khang tampitak ka gam vuah nitum ngeilo aci pheupheu ngei England gam in nungkik ding lah haksa,mainawt ding lah haksa alungziinhuai gamsung buaina tampi atuah laitak hi. European Union gam (28) kipawlna pan pusuak ding maw, omsuak ding (Brexit) cih alangnihtuak sialkhau kisuh cihtak akisuhlaitak uhhi. Tua kawmkal nangawn ah United Kingdom pan inntuan nuam Scotland leh N.Ireland cihte hong phul seuhseuh lai uhhi.

Tua ban ah tulaitak leh mailam leitung sumlei sumzuakna leh galvai ah hong madawk ding kiciamteh BRICS gamte ( Brazil, Russia, India, China, South Africa) in zongh ukna kimakaihna kibanglo leitung gam tuamtuamte nasem khawmin kitawsawn ding cih tawh hong kinaakpat mahmah uhhi.

Hih bilbialte' kawmkal ah leitungbup in atuahkhak ahih leh leitung khuahun siatlam amanawhna ( climate change/global warming), gamliante galvai kidemna, sumlei sumzuakna ah kigaldona ( trade war), leitungah nuclear galvan khiap ding vai, mihing bawl ahilo dongtuahna ( natural disaster) leh huihlak pan galvai sumbawlvai kidona ( cyber attack) cih leitung buainate'hangin leitung gamlian makaite ( G7 - USA, England, Japan, Italy, Germany, Canada, France), UNO, EU gamte, BRICS cihte alungkham mahmah laitak uh ahihi.

Hih bang dan buaina teng in atuah laitakin mailam leitung khuahun kikhelna danthak ( the liberal world order) pawlte' mungtup leitungbup mihing hihna siksan leh leitung gammi hihang cih ngaihsutna ( global citizen) in koiciang hong tunpih in tualo adang ei minam leh gam aangsungkhualna ciat masak ding cih ngaihsutna koi pen in leitung mailam hong makaih ding cih kuamah in akician agenthei tuan kei aa, hun in thu hong gen ding kingak tek ahihi.

Tua hi a, leitung minam khat in Zomi te hong bawl gam leh lei hong pia Vanglian Pasian mitsuan kawmin hih leitung khuahun kikhelna tuihual ah akibual eite in zong leitung minam dang/gam tuamtuamte in aminam leh gam uh mailam ading aangsung khualin akithawi kigin mahmah laitak uh en zongh ih minam aangsung ih khuall hong kul petmah ta hi.

#Bob Tuangpi#
Refs : Global Affairs, Wikipedia

Shared by Bob Tuangpi

Read More

CHRISTIAN CHURCHES TOGETHER- CCT Annual Convocation: ( Oct 2-5,2019 ) Report By-Rev.Dr. Tun C Kap,President- ZBCA)

CHRISTIAN CHURCHES TOGETHER- CCT
Annual Convocation: Oct 2-5,2019
Montgomery, AL. (By-Rev.Dr. Tun C Kap,President- ZBCA)

USA gamsung Christian biakna namkim kipawlna khawmpi;
“Minam kidei danna” (Racism), “ Pasian lim le mel suun a hong ki piangsak” cih thulu tawh kamkupna nasia takin ki nei hi. America gam sungah Sal/sila kizuakna mun lian pen khat hih Montgomery khua a hihi.

1. A ni masa ni in Biakpiakna Greek Orthodox makaihna tawh ki nei aa, Mivom sal a ki zuak a site phawkna ki nei hi. Sun hun in group khen in kikupna ki nei hi. Nitak kikhopna pen Evangelical/Pentecostal makaihna tawh biak piakna ki nei hi .

2. A ni nihna pen mun tuamtuam en in ki pai a ki gim mahmah cih ding hi. Thupi mahmah hi. Zingtung in biakpiakna Catholic makaihna tawh ki nei hi. Ei lam a te tawh ki lamdanna khat nei uh aa tha kangah mahmah hi. Hong pai te pen a tamzaw Archbishop hi uh aa, Bishop le Father te zong om hi. Lungdamna thu( gospel) le gupna thu( Savation) cih pen lim gen mahmah uh hi. Praise & Worship bang hot mahmah hi. Lamdang phial mawk in tha hong ngah sak mahmah hi.

Sun an neek ma in The Legacy Museum en: Mivom te sal a USA ah a ki puak na, Sal aa ki zuakna, thuman lo pi a thahna, innkuan kikhen a sal zuakna cih thu te le lim le audio vive hi aa ih lungsim hong khing dekdak sak hi.

Ka zak ngei sangin a mun ah ka om teh a khasiat huai dan le a hehpih huai dan ka thei zaw tham hi. Mikang mihau khat in Sal 40 val bang nei in News paper ah a min, pasal/numei, a kum, nasep siamdan, thahat na, cih takna , a tun a sanna cih teng gelh sit set in a man zah ($$)tawh suang sitset in a lei nuam ten va lei uh hi. A kha siat huai diak ah innkuan khat sungah a pa pen ki lei nuam leh a zi a ta tawh ki khen in ki zuak hi mawk tazen hi. A zi le a taneu ten a zuak lohna dingin a topa khephung ah kap in ngen ta leh ki zuak veve aa, hingtang aa innkuan kikhen na a hi hi. Mikang biakinn ah mivom te kikhawm thei lo cih te lel pen hong thu neu mahmah hi.

Museum et khit teh Bus tuangin Memorial garden, Sal a si mi te phawkna ding a USA kumpi in a bawl thak Haan ah ni sapi nuai ah pai leuleu in, USA gambup aa a si a min ki thei teng gelh in a ki thei lo te zong phawkna Haan a hihi. Haankuang dan aa ki bawl
4800 val om hi.  Sun an neek sung  in tua lai aa nasem staff ten a thu a
la teng hong gen uh hi.

Nitak nai 4 pan in, ka tunna uh Hotel Embassy suite mai Gun ah pai suk in, Sal ki zuak te Tembaw tawh hong kipuakna Gun a hihi. Thungetna le LST simna ka nei uh aa, “ gonna lay down my burden, down by the riverside” cih la kasa uh hi. Tua lai pan in khua sungah mi 70 val ki zui in  Mivomte’ buai lai aa a totna uh lampi te zui in, lai kisuan na te ah a banban in khawlin, a lai teng khat in a sim khit teh daihna tawh zahtakna pia in thungen, milim ki suanna ( statues) om na lam kabom ah a kim vel in khut ki len in khuapi lai zangah thu ka ngen uh aa, tua khit teh, “ we shall not be moved” cih sa in zahtaakna gamdaihna tawh ka pia uh hi. Martin Luther King Jr in pastor a sepna Dexter Avenue King Memorial Baptist Church ah khe tawh tai 1 val nisa nuai (97 degree F) ah khe tawh ka pai uh hi. Tua lai ah nitak an ne in  MLK Jr’ biakinn ah khua mi te tawh nitak biakpiakna ka nei khawm uh hi.

Hymn sung “ Zion khua ih pai hi,” Pawlpi te a bul in ah ih Topa Jesu hi” cih te ka sa uh aa Hymn bang ih sakloh sawt in inn lam bang ki phawk diai duai hi.

Mikang, mivom nam tuamtuam te ki deidanna pen tu ni dong mah in om lai hi- ei biakna lam pan in bangci sep ding cih te kihan thotna hi aa thupi mahmah hi. Pasian in ama’ lim le mel suun aa (a ki bang aa) hong bawl te hi hangh. “peace, justice, equality” for all ! cih te thubul phuh a hihi.

Mivom te in USA ah a innteek yhrihna ding un luang tampi si in, gen theih haksatna tampi tuak uh hi. Asian te in zong hamphatna a ngshna ding hong phutkhiat sak s mau te mah a hi uh hi. Ei zo mite lamnuam kisial khin sa ah a pai hial hial thei ih hih Hampha ka kisalna hong khang mahmah hi.

Mihing te ki it ni, vun color hang peuh tawh ki pi muh, ki neu muh kei ni. Mel kibang lo mi te zong ki it ki lem thei a hih leh tawm ci-lik bek a pha Zomi te, nam khat, si khat sa khat, pau le ham ki bang te bang hangin ki it lo zenzen ding, ki lang bawl zenzen ding ih hiam cih nakpi tak hong ngaih sun sak hi.

3. A nithum ni zingsang kikhop Historic protestant in ma kaih in, tua khit teh business meeting le panmun kitelna ki nei in hun nuamtak le limci tak in ki zo hi.
Leitungah Lemna, nopna, thu manna, liangko kikimna om ta hen! Amen.

Shared by Rev.Dr. Tun C Kap,President - ZBCA

Read More