Zogam ah Mangkang kumpite hong tun' ma ( 1897 ) ma-in zum cih bang omlo ding hi. Zum tawh a kibang pen Hausa, Ukpite inn a upate tawh a kisam bang
leh kisap hunin kamkum lel ding a, zum kah hun cihbang kiciang tan lo kha ding
hi. Mangkang kumpite hong khankhit ciang, zum lam nasem ding, laithei gina ki-om nailo ding ahih manin, zum nasem masate pen, sawltak, lampi nasem, zato nasem,
zum laitaai, laipua cih pawl hi kha ding hi.
Zomite mipi in kumpi nasep khasum san i kipat pen, Leitung Galpi masa a,
Piancit pai-a kipan hi kha ding hi. Piancit pan hong ciah kik ciangin, pawlkhat
Kawlgam galkap sungah kisem suaksak ahih manin Zomi tampi tak mah khasum
sang kumpi nasem kisuak a, tua teng mahin i khuamuhna tampi hong khangsak
hi. Piancit pai ma-in ahih leh, Mangkang kumpite in sangkah ding hong sawl
uh hangin a tamzaw ki-ut lo a, khua hausate' tate kahloh phamawh ( aana ) in
kikahsak kici hi. Tua hun zawh lai theihnopna lungsim om zawdeuh bek tham
loin Mangkang kumpite in zong sangkah, bawda a om peuhmah, mi khat pek thum
ta stipend pia ahih manin mi pawlkhat sang kikah hi.
Leitung Galpi Nihna ( Japan Gal ) hong tun' ciangin lai tawmkhat a thei peuhmah
a vaal om loin, nasep tuamtuam kinei ciatin, khasum sang kumpi nasem tampi
mah i om kipatna ahi hi. Japan Galpi khit ciang galkap sungah kitum ciatin,
Manglai tan nga pan a tung siah a sin ngeipeuhmah a tamzaw, Bu
( Commissioned Officer ) hong suak uh hi. Galkap sunga semte leh mundang
khasum sanna kumpi nasep tuamtuam neite peuhmah in lai thupitna phawk uh
ahih manin, galkap sung pan BU khat ahih naak leh a sanggam a beh sung
pattah huai a om nak leh University ah sangnaupang khat na sik hamtang hi.
Khat bek in a sikzawh kei leh zong, NCO nih leh thum bang kipawlin,
sangnaupang khat na sik uh hi. Civil lam a sem ahih leh, JAT khat, lai-at
khat peuh in, a meltheih khat sangkah na'ng na sik hamtang hi. Hi zaha i
kideih saka, i kihuh diamdiam manin, 1950 pan 1980 dong ciang bang Zogamah Tedim gammi ( Tedim+Tonzang ) University pilna nei leh Kumpi nasem
kitampen pah hi. Col. Van Kulh leh Col. Kap Cung Nung bangin Tedimte ki-et dan, a kihuh dan ettehhuai ci-in a mipihte uh hanthotna-in nei tawntung hi.
Eimi a khang masa uliante'n hong deihsakna uh leh hong pattahna uh bangzah takin lian hiam cih leh, Col. Khen Za Moong leh Col. Put Pa te bangin 2nd
Chin leh 1st Chin ah Battalion Commandar a sep lai uh, Khuado hun ciang
Officer khat leh escort a kicing tawh eimi University sangnaupangte hong
pisak ngiatin, Officer Mess ah hong zindo-in, pahtawina leh hanthotna kam hong
gen uh a, i khuamuhna hong taangzai sak tuam mahmah hi. Tua hunlai kammalin
ci leng, kha muanna hong nei sakin, vision sang hong neisak tuam hi. Tua
bangin kumpi nasemte in, deihsakna hong neih manin khamtung gam mun
khempeuh kawlgam khuapi, khuaneu mun tuamtuamah Tedim Zomi ki-om kim hi.
Col. Kap Cung Nung bang in Tedim Zomite pen, lei sung tole'ng zong om ding
hi, ci-in gengen a, khatvei Bawdwin Mines ah leisung pi 2000 ciang dong a
va-etsuk leh a nasemte Tedim pau vive-in a kiho a zak ciangin, " Ka ci ve leh, leisungah Tedimte om takpi hi " ci, kici hi. Tua bang dan in ei mite , mun kim leh
thanah ( zum ) kimah ki-om ahih manin, mi tampi sang i kah zawh banah, ei mi khualzin gamvakte adingin nuam tuam mahmah hi. I theih ngei lohna, khua ahi zongin, i zum ahih zongin, i pai ciangin, ei mi khat na om leh nuam
tuam mahmah in, i maa pai tuam mahmah hi.
Socialist kumpi hun sungin, khualzin gamvakna, vanleng, meileng, tembaw letmat
ngah na'ngin , kumpi nasem khat ii M.O. beelin ahi zongin, kimeltheihna
tuamtuam tawh ama' min mahmahin M.O. nei-in ahi zongin, kumpi nasemte
hangin noptuamna tampi kingah hi.
Khatvei bang Kawlpi vanleng tual kipuahin, Twin Otter vanleng, mi 18 bek tuan theihnate bek pai ahih manin, Mandalay-kalay vanleng ah Kumpi nasem thupi
mahmahte bek hong pai ding hi, kici ahih manin, Kawlpi vanleng tualah
mipite'n a ngak niuniau uh leh a masa penin sum leng, mi khat ahi U Piang
Kam hong pusuak hi. U Piang Kam in, tua vanleng a zuih theih nadingin, kimeltheihna tuamtuam a zang veve zongin, a piantheihna na'ngin, kumpi
nasem M.O. khat nei kha ngelngel ding hi. Tua hun lai-in, vankham taktak lah
ahi khollo, a pualam mite'n pua leh lah, a kiman thei veve van pawlkhat bang,
kumpi nasemte' huhna tawh a kipua tampi om hi. I kawlgam sung takpi
nangawn, a pualam mite'n tamsim pua leh, thuneite'n matsak ngiau thei ahih
manin Kumpi nasemte mah kibeel hi. Van neu nono pawl khatte zong a pua dingin, kumpi nasem khualzinte mah kicial a, a kilawm zah tawh
kiguai ahih manin, kinop tuampih kim ciat hi.
Tu-a i gensa mah bangin hunkhat lai-in, ei mite, galkap sung ahi zongin, zum tuamtuam leh mun tuamtuamah i om manin, i minam bup in kinop tuampih
hi. Kum 1970 leh 1980 hun pawl ciangin, sangkahna-ah sum bei, ann-nek
tuidawn man tam bei ahih manin, kumpi nasem khasum sangte in, a sanggam,
a meltheihte pilna sin na'ng kisik zo nawn lo hi. Sumleeng mi tampi,
a cithei i om hangin, sangnaupang khat tungah a beizah leh, khualzin vial
khata a met zah ding a etkaak ciangin huh taak a sa lo tampi om hi.
Tua banah laitan nei sunsunte'n zong kumpi nasemte khasum leh, sumleengte sumzatna a etkak ciang kuamah kumpi nasem ki-ut nawn lo hi.
Kum 1970 ciangciang a, kumpi nasem kipante lah tu'n a kum cingta
khangthakte lah thu tuamtuam hangin, Kumpi nasem ki-om nawnlo
ahih manin khang kibansam ta hi hang.
Tu-a kipanin i hanciam kik phial zongin, khang khat sung peuhmah kithanem ta ding hi. Tu hunin, khamtung gamah Thantlangte leh Matupite in sangkah
hanciamin, kihuh diamdiam uh hi. A sawt loin , Kumpi nasep mun khempeuh
hong luah tading uh hi.
A beisa hunin zum kim phialah Kumpi nasem i om kimna pen, hanciam taka sangkah ding kihuh a, i kipanpih man hi. Bangzahin sang i kah nuam
zongin hong pantah ding, i minam a vei sangsia om kei leh hizahin kikhangto
lo ding hi. Leitung galpi nihna, Japan gal a bei khit phet, kum 1945 kimin
Tedim khua-ah tua hun laitaka upa vaihawm makaite' vaihawm siamna tawh
Private Manglai tan sagih sang kihong hi. Tua sangah Siapi Gin Kho Thang,
Sia Zel Khaw Pau, Sia Vung Suan leh Sia Khup Za Vung-te in amau mailam
ding suplawhin, i gam leh i minam a itna uh tawh sangsia hong sem uh hi.
Tuate pawl in university ah sang hong zop ciangin, Sia Khup Za Cin,
Sia Neng Khen Thang, Sia Gin Za Tuang, Sia Kam Cin Thang, Sia Thang Za Khen, Sia Hau Vung Thang, Sia Siam Khaw Lian, Sia Gen Do leh Sia Dal Za Khup-te in,
deihsakna tawh hong sep uh banah, Aizawl panin a minthang mahmah Siapi Sang Lian leh Siam Mal Sawm-te kila-in, sang minthang khat hong suak a,
i hamphatna lianpi khat hong piang hi.
A lungdam huai mahmah sawnsawnah, Siapi Gin Kho Thang leh Sia Vul Za Thang-te in, University sang a man uh ciang, i minam leh i gam i lei i itna man
hang mah tawh amau pumpi mailam huntak nopsak na'ng supna thuakin, Tedim
SHS ah Sia hong sem uh hi. Tua banga, itna leh deihsakna takpi tawh hong hilh,
hong pantah siate' khut nuai-a a khangkhia peuhmah a vakvai ki-om khollo hi.
Hih a tungah, sangkah a, pilna sinna leh, kum nasepna thu tampi ikikup hangin,
i deihna bulpi in, Zomi leh kumpi nasep cih thu ahi hi. Gam khat i hih nak leh
kumpi om kul a, kumpi a om nak leh kumpi zum tuamtuam masem mi om kul hi. A tunga i gensa mah bangin , leitung galpi nihna bei zawh pan kum 1980 sung
ciang, min kim leh zum lianah ei mi i kihel kimna pen, pilna i zon masakna,
i hanciamna hang ahi hi. Tu-a bek tham loin Ministry te, Pu Lun Pum te pawl hong khan' ciangin, Zomite tan 10 ong lah tam nailo, a ong sunsun lah college
mah zom nuam ciat ahih manin, GTI sang, JAT sinna, Health Assistant Sang, Veterinary Assistant Sinna, Pyinmana Diploma in Agriculture sinna sangte-ah tan sawm a ong ( pass ) lian loh hang, tan sawm ciang a sin ngeite ong san sak na'ng kumpite tungah na ngen uh ahih manin, ei mi kumpi nasem tampi i om tuam hi.
Tu masiahin, Kawlgam mun tuamtuam leh, galkap sung leh zum tuamtuamte-ah i om kawikawi manin, i phattuamna i thei kim hi.
Tua ahih manin kumpi nasep pen, summet bawl danin ngaihsun loin, ka gam ka lei leh ka mipihte ading phattuamna khatpeuh bawl theih
nading ci-in ngaihsun ciat ni. Ni dangin, innkuan sung khat, beh sung, phung
sung khatah kumpi nasem khasum sang khat i om leh i belh huan hun beita hi. I beh sung i phung sungah kumpi nasem, a mailam lalmet huai mi khat i om
leh, sum leh paai tawh ahi zongin panpih a, i huh huan ding hun hizaw ta hi.
Kawlte in a innkuan sung bangzahin hau-in nuam sa tase leh, khat peuhmah kumpi na semsakin, huh huan zaw uh hi. Tua in, kumpi nasem khat ii
vang leh a thuneihna a deih man ahi hi.
Tu hunin, i nisim nuntak khop na'nga kisam sumbei leh kumpi nasemte khasum pen kinak lamdan lua ahih manin, a kaumah peuh in kumpi nasep ding
kilawp lo hi. Ahi zongin kumpi nasem khat pen, gam ii vang leh, kumpi vang khat tawh ki-om ahih manin kipuuksi tuan sam lo hi. Tuhun ciangin a kuamah
peuh i gam i lei leh i minam ading veina i nei ciat hi. I sal lungsim ngaihsutnate beita a, " Ka nuntakna in, ka gam, ka lei, ka minamte ading phattuamna khat teitei ka bawl zawh nadng " cih ngaihsutna kinei ciat ta hi.
Tua banga i ngaihsutna hoihte a tangtun' theih nadingin, laisim, sangkah pilna zong hanciamin, kumpi nasep mun khat peuhpeuhah i lut zawh nading hanciam
ni. A tawntung kumpi nasep sawm lo a, sumbawlna lam ahi zongin Pasian nasepna lam ahi zongin i sawm leh zong, a tawmpen kum nga sung peuhmah
semlehang, tua tuahkhak-pilna ( experience ) in, i sep i bawlna mun khempeuh ah,
sepdan, omdan, mi tawh kipehna leh kipawl khawmna dan hong theisakin, i ma hong vangsakin, ong gualzo sak tuam taktak ding hi, cih kong hanthawn hi.
( Pu Tual Khaw Mang pen Saizang khua, Pu Thawng Za Khup' ( Pinlong
Agreement Signatory ) tapa upa pen hi. 1960-1998 dong kumpi
na semin, General Adminsitration ( GAD ) Ministry of Home Affairs ah Menzi
( Director ) za tawh pension hi. Ciimnuai Christian Centre ( AG ) Pawlpi
phuanin Pasian nasepna-ah kipumpiakin sem hi. Zangkong khua, Tedim Association ah Chairman sem hi. )
