Ka nau uh Nu Piang Ngaih Don(Kum 24, Dimpi-Gualnam) in sum leh pai zong in a
paina Singapore gam pan deih loh pen sihna 26/7/2016 ni-in hon tuak a, a
luanghawm Kawlgam hong kipua ding a cih ciangin Yangon ah sanggam, khuapih
tuipih ka tam loh uh ziakin kua mah zong genngam kum ngam lo-in ka om uh hi. A
hi zongin Zomi makai te in gam leh nam veina taktawh hong mapan pih uh a, va-
ak tangin vaphual tang a cih bangin sih nua-ah ka ki angtang mahmah uh hi.
Amasa belbel ah Singapore a om Zomi makai te leh mimal tungah genzawh loh
lungdamna kon ko uh hi. Luangphaam in hun leh vai thempeuh ah hon buaipih bek
hilo in, a hunhun in sum leh pai bei-in thu leh la nong zaksak manun lungdam
mahmah hi. Piang Ngaih Don vai-ah khitui naptui tawh sep ding bawl ding mel
theilo in ka om laitak un, vai lianpi ahih lam hon telsak in Zomi bup bek
thamlo, Kawlgam bup nangawn tawh ki meemat thu ahih lam hon phawksak a, August
ni 8 nitak in Yangon “OM” zum ah meeting a bawl Zomi National Council (Dr.
August 13 ni-in a luanghawm Yangon hong tun ciangin Zopuan silh in
Vanleengtual ah hangsan takin Vinyl tawh a dawn Zomi kipawlna tuamtuam leh
mimal thempeuh tungah lungdamna kong ko nuam uh hi. Ka phawk pak uh ah Global
Zomi Alliance in mipi zuih theih ding Bus khat, ZNC leh Gualnam Innkuan-Yangon
in zopuan leh puan laisan tawh si luang hong tuamsak uh a, ki sap bangbang in
hong dinpih ngiat Zomi Congress for Democracy, Phulava Lungtuak, Tedim
Association, Yangon Zomi RC Pawlpi makaite leh Midea tuamtuam te zong I biak
Pasian in gam leh minam a dingin hong zang semsem ta hen!!!
Kipawlna min kipuasak lo ahih manin a mimal in ka lungdam diakna uh ah Yangon
vaidawnna hun tom bawlna ah Chairman hong sepsak Rev. Dr. Go Cin Zam, thu hong
ngetsak Father Dominic Langh( Professor), Gualnam beh lutang Pa Kham Suan
Mung, Prof. C. Thang Za Tuan, Paakual hong pia Nu Daw Don, thukan lampan Daw
Ma Khin Lay( J Donut te kiangah hong gensak in vaidawn teng moh kicing takin
hong pia a, mal 280 bei ci hi), leh gamla pi pan hong pai Zomi a it mimal
khempeuh tungah genzawh loh lungdamna kong ko uh hi. Tuani in N’ Okala Lampi
pan Air Force huangsung kikal Zomi te mawtaw vive ki gual to zihziah a, kumpi
u lian luangpua hong kisa hi. Lungdam in angtang mahmah ung.
Vanleng tual pan siluang mawtaw tawh hong dawntuah lian in Zomi te phualpi
Kawlpi(Kalay Myo) dong hong puaksak Sih/Nat Donghu Pawl( Dr. Kyaw Thu) te,
Pawlpi ngeina tawh hehnep/thunget na ding Biak inn hong kawm bek hilo in hun
hong bawlsak Mingalardone St. Edward’s Catholic Church leh Father Blasius Aung
Htun te tungah zong kam tawh gen zawh loh lungdamna kong ko uh hi. Tuani-in
Vanleeng tual nisa/guahzu nuai ah thagui thatang bek hi peuh mah lo-in
sihgalna sumgtang Kyats 500,000 val ki ngah hi. Sazian khum te ciapteh khak
teng hi a, gawm nailoh zong tampi pha ding a hihi.
Zomi te ki-itna, kikhualna leh ki pumkhatna a pholak dingin I biak Pasian in
ka sanggamnu uh hong zatsak hi ci-in ka dahna tenguh mailam khamuanna nong
suaksak uh hi. Ki pumkhatna a deih Pasian in eite laizangah hong om a, mundang
ah guah zuzu ta leh vaidawn te’ omna ah guah zusak lo hi. Lampi ah mawtaw zong
nawngkaina omlo in Kawlpi ah Zomi tul tampi te in na dawn uh hi. Kawlpi ah
zankhat taam in, Tedim khuapi pan Dimpi Khua ah Itna masuan mipih tampi in na
zui in na tung khin hi. August 17(Wed) nitak in a lamkiatna Dimpi RC Pawlpi
ngeina tawh hanmual a tang ding hita hi. Jerusalem ah Topa Zeisu a lut ciangin
lano tung tuang a mipi in na dawn hi. Lano in puanphah tung tawn hi. Zomi
tungah tuangin Singapore pan hong ciah Lia Piang Ngaih Don in gumpa Zeisu
tungah, “ Zomi in ka pian khak nuam lua ing” ci pelmawh ding hi.
PS: Kicin lahna te hong thei siam un. Kumpi gam nih kikal thu hi a, vai tun
vaiciah gen kholh theih omlo hi. August 13 ni sun tawntung Airport Custom
office sungah omcip in phone hong set khempeuh kong dawng thei kei hi. Hih lai
tawh a ki gelh lo mimal gimna/tawlna khempeuh I biak Pasian a tamzaw kaan in
hong thuk kik ta hen!!!
Pa Zam Za Thawn
Yangon Innteek
“Give praise to the LORD, proclaim his name; make known among the nations what
he has done; and proclaim that his name is exalted ”
Isaiah 12:4
