Yangon Mipi Lungphona Le Zomite

28.2.2021(Sun) ni-in Tedim Christian College ah a (18)Veina Sangtuahpawi suakta takin ka bawl sim uh hi. Hun man ciangin vaikin om a hih manin ka ciahkhia pah hi. Baho lane ka pusuak phei lian ciangin meikhu bomb hong ki lawn a, ka vei lam ah Palik te, ka tak lamah Mipi te in lampi khak in ki gal kap ziahziah uh hi. "Ka sih kum tung a paikhia ka hi ta ve maw" ci-in mawtaw hekna tungah ka lu kun suk in thu ka ngen hi.

Tua laitak in Zomi Dialkhai(flag) tawi khangno te ka gal muh hi. Tua te lam ah ka zuan to hi. Tua te in hong gensak ciangin Mipi Makai khat in lampi hong bawlsak a ka suakta mialmial hi.

Tua Zomi khangno te ka nung kan ciangin Yangon Zomi Siamsin te hi a, mi (30) val pha uh hi. A lungpho zawh uh kha khat val ta a, Zomi kipawlna leh mimal a hi zongin panpihna omlo in a mau veiina bek uh tawh nisim in a kuan ngiat uh a hihi. (Hakha khangno te bang LBC Pawlpi in sunsiah leh van kisam teng pia uh a, CDM lut te gamdang a omte kidongin kumpi khasum sang a tamzaw pia uh kici hi. Falam khangno te zong pawlpi leh mihau te in tawsawn in mi tam mahmah uh hi. Kachin khangno te bang a minam makai te un nisim in tha vapia uh a, a mi haute in a kisap bangbang huh ziahziah uh hi.)

Lungpho Zomi Khangno te-in angsung ding ngaihsut in neilo in lawp mahmah uh hi. March 3, 2021(Wed) ni-in Kyaukmyaing-Tamwe lam Multi-Ethnic Protest Marching ah Zomi tangin na ki hel uh a, Palik galkap te in a kapgawp khit ciangin a tai zolo te na man uh hi. Tua lai ah Zolia Hau Deih Kim(Yangon University, Qualify)na matsak uh a, Insein thongah khum suak uh hi. Sanggamnu Kimkim pen Suangpi khuami hi a, Pa Cin Khan En Do Pau tanu a hihi. Tuni dong inn pan an leh tui puak uh a, suahtak sak ding hun khan toto uh hi.(Guih theih kham theih zuak ci pong mawk uh hi).

Tuamah bangin Shan gam, Lashio khuapi ah Pasian nasem Pastor Luai Za Go@Gopu zong February 9, 2021(Tue) ni-in lungphona pan man uh a, mi nam dangteng suakta sak nakpi in Gopu pen mask bulh lo cihtawh thong ah khumsuak uh hi. Sya Gopu pen Thalmual khuami, pu Pum Suan tapa hi a, a zi leh a taneu khat pen tuni dong khitui naptui tawh a pa uh inn ciah ding ngak in om hi. A huh a van ding a mipih te omlo hi.

Zomi Kipawlna tuamtuam, party te leh minam makai te-in hih galhang Zomi te hong phawk sak un. Mun tuantuam pan CDM huhna vaihawm pawl in zong hih Lia Kimkim leh Pastor Gopu te zong hong huh sak un ci-in ka lainatna kong taangko hi.

A cing omlo tuu bangin Zosuan Vontawi te khua-ngaih huai mahmah hi.

Genkhialh a om leh hong maisak un.

Mipi Lungtup Tanngtung ta hen !!!

အ​ေရး​ေတာ္ပုံ​ေအာင္ရမည္။

Shared by>>>Kham Suumpi

Read More

TONZANG AH MIPI THUNGET KHOP NA KI NEI TCF MAKAIH NA TAWH.

Tonzang Christian Fellowship makaih natawh mipi thungetkhopna

25 Feb.2021 (Thu)

08:00-10:00 AM ( ချင်းရွှေပြည်ရှေ့)

Lai Siangtho simna Rev. Thang Suan Kim (VMBC) in IIKhang.7:14 sungah 

“Ka gam uh hong damsak In” cih simna a neih khit ciangin 

Ptr. Tuan Sian Pau (SDA mission) in hun-ap thungetna nei in 

mipi thungetna hunnuam tak kipan thei hi.

“Ei lam ah Pasian hong om leh kua in i lang pang zo ding” cih biakna 

la mipi in dinsa in saziahziah uh a, Pasian muangna hong khangsak 

semsem sak uh hi.

Rev. Thang Suan Kim (TCF secretary) in, Late 136 kidawng a simna makaih a,

i khuahun tawh kituak kasa mahmah hi. Hih dan mipi te kidawng a Lai Siangtho

simna in leitung thon in kilawm zong ka sa mahmah hi. 

I Pasian in zong hong thukimpih mahmah dingin lamen ing.

Rev. Fr. Robert Kam Hau (St.F.X Catholic Church) in Lai Siangtho tuntawnin

thapiakna mipi te in thangah mahmah uh hi. 

(Sermon: a kicingin khatvei hong suak sak kik nung)

‘Nang’ ahing Topa, na aw za zo ing’ hong nai sak in Thupha Topa aw, 

cih mipi in dinsa in sa ziahziah uh a, Pasian i kiangah om lian bang dingin 

mipi lungsim hong lawng mahmah hi.

Mipi te kiniamkhiat in khukdinna tawh Topa’ hong hilh thungetna 

(The Lord’s Prayer) lungsim kikhatin thungetna nei uh a, i Topa Zeisu 

bang i gei ah a om lian ding bang sak zo uh hi.

Mipi thungetna Rev. Kap Khan Mung (EBC) in makaih in: Mawhmai na ding 

(Rev. Suan Cin Zam @ AG Section, Kawlgam mipi deih kumpi in hong makaih 

nading (Rev. En Khua Thawng @ GAG, Leitungbup Covid 19 natna pan 

suahtak nading (Rev. Pau Suan Dal @RAG, Tonzang gam ading 

(Pastor Kham Lian Dal @ ZAG cih bang thulu tuamtuam tawh Pastor te’n 

thungetna mipi tawh a dawldawl in nei uh a, 

khitui tawh a misiangtho te kikona in mipi lungsim hongla mahmah hi.

Thungetna a khawkkhawk in neih khit ciang ‘A sangna lam kakahto hi’ cih mipi in 

dinsa in sa ziahziah uh hi. Hihla in mipi lungsim sukha kasa mahmah hi.

Rev. Suan Khup (UPC) in hunzawh lungdamkohna thungetna a neih khit 

ciangin Phatnala mipi in sa ziahziah in khutzak thupha piakna 

Rev. Kam Lian Pau (ZBC) in nei-in hun nuam tak Topa in gualzawhpih ahi hi. 

Topa aw, ‘ka gam uh hong dam sak ta in’ Amen.

Lungdamkohna:

1. Sound Sytem leh tutna hong zangsak Catholic (RC)Pawlpi te tung

2. Keybord hong zangsak ZAG pawlpi te tung

3. Keybord leh la hong makaih sak khangno te tung

4. Omna khawlnading hong vaihawmpih Sia Kap Mung leh Pa Khualpi sai te tung

5. Tuivotkhum a lim mahmah hong pia Pa Khualpi (Mualpi Sai) leh a innkuan te tung

6. Meiset le a tui phaltak in hong zangsak Sia Kap Mung le a innkuan te tung

7. Pastor te An hong vak Nini@Pa Khup family sai tetung

8. Foto Video hong zaihsak te tung

8. Hih bangin vai hong hawm TCF te tung

Pasian A Minthang semsem tahen. 

Amen

Rev. Thang Suan Kim

TCF, Tonzang

Shared by>>>Sia Kimpu

Read More

PA THANG KHAN MANG (SIANMANG’ HAWMTEL, NIANGBAWI PIANNA PA) MUALLIAM

Kong it U Mang aw, tawldam takin Pa kiangah ciah ta cih ka zak ciangin Leah San Nuam @ Niangbawi leh na innkuanpih khempeuh tawh a kibangin hong ngai-in ka dah mahmah uh hi. 

Topa sawlna tawh Zomite tangthu ah a mang ngei nawnlo ding SIANMANG’ HAWMTEL movie bawlna ah a kihel dingin na tanu kong ngen a, Topa Pasian leh kei nong itna hangin paulap zong seloin nong phal hi. Topa Jesu a taisan kha, Zomi tampi takin na tanu hangin Topa kiang zuan kik thei uh hi. Tua bang tanu khat a nei himawk lo nahiam  U Mang aw, lungnuam takin na pai in maw.

NO INNKUAN HANGIN ZOMITE KA ANGTANG UH HI.

U Mang aw, Tulsa a om Far East Mission Church ah “Lianu’ kah la, Hong maisak zel in aw” cih la ka zaih laitak un i tanu San in Zomite khangnote veina tawh khitui tampi luangin hong kah ciangin Director, Camera man a kipan biakinn sunga om khempeuh kikap mawk hi. 

Movie nasep khawl photin khundin sukin Zomite sungah lamkhial a om loh nadingin khitui tawh thu kingen ciat hi.

Hollywood pan a hong pai Tschka Moran in “Hollywood Actress minthang tampi tawh kithuah kha ing, Hollywood nangawn ah Director in ‘Kap in’ a cih ciang a kap ziau thei om lo hi” ci-in amah nangawn a la khiatna thei lopi-in kap hi. 

Tua bang tanu khat a nei na hi hi U Mang aw lungnuam takin na pai in maw.

Shared by>>>>Evan.Langh Do Khup

Read More

LENGTONG PAUNO LEH LENGTONGTE THU - SIA.DO KHUP

Tuzingin Lengtong Pauno in hong nusia cih i za a i dah mahmah ciat hi. 

Amah pen lasiam bek hiloin lakam tawh laphuah siam khat hi a, 

ka zahtak mahmah khat ahi hi. 

Amah i theihna pen LIA LEH TANGTE’ “LENGTONG” lakhuite pan ahi hi.

LENGTONG MUSIC GROUP HONG PIANNA

Lengtong cih min pen Zomi ten nih kinei a, khat pen i tangthu sunga a mel 

hoih mahmah “Leng Tong Hoih” nungaknu hi a, a khat pen “Lengtongpak” 

kici daitung khawng a zam pak hoih namkhat ahi hi.

1977 kimin Pasian mizat Rev. Hau Lian Kham tungtawnin khangno tampitak

kikhel uh hi. Tua sung pan Tg. Sua Mang, Tg. Zam Thang (Rev. Zam Thang,

Grace AG, Yangon) Tg. Lam Cinte unau leh khangno pawlkhat biakinn ah la 

sin music sinin om den pah uh a, Tedim khangno music siam masate ahi pah uh hi.

1978 kim panin Tg. Sua Mang in Bass tumin ama naute Tg. Pau Thawn in Drum, 

Tg. Go Hau in Lead tumin amau unau in LENGTONGHOIH music group 

phuan masa uh a, Tg. Tuangpu in Rhythm tum zel hi.

TEDIM AH DRUM A OM THEIHNA THU

Tedim ah AG pawlpi in music tawh Pasian phatna zang masa pen uh a, Tedim

khangno tampi-in music siam lawh uh hi. Sia Lianbawi (Rev.Gin Za Lian, Agape) 

leh Tg. Sua Mang Drum lei dingin Aizawl paito uh a, Tedim ah Drum om masa 

pen suak hi.

Tua khit ciangin Tg. Suamang, Tg. Pau Mung leh Tg. Lianpute Lamka paitoin

New Lamka a, Sia Mangtate Drum hong puasuk uh a, Lengtong music groupte 

drum hong suak hi.

1980 kum Sia Lianbawi vaihawmna tawh AG pawlpi in Grand Pianno khat Ks.10,000 

tawh lei uh a, Tedim ah pianno om masa hipah hi.

TEDIM KHUAPI AH STAGE SHOW KIBAWL

Tedim khuapi sungah ni thupi a kiciamteh nite ciangin stage show (concert) 

bawl zel uh hi. Tua hun lai a Lengtonghoih ah lasa masate;

1. Tg. Sua Mang

2. Tg. Lengtong Kam Khen

3. Tg. Lengtong Go Lian

4. Tg. Cia Khai

5. Tg. Paupi (Si)

6. Tg. Khaipi (Pum Za Khai) (USA)

7. Tg. Eng Khual (Pyidawtha)

8. Tg. Kai Za Tuang (Si)

NUMEI LASATE

1. Lia Luan San (Suamang’ zi) (Si)

2. Lia Zam Cing

3. Lia Sawsuai

4. Lia Thianpui

5. Lia Dimtoih (Lamsiam,Tedim)

6. Lia Cing Hau (Lamsiam, USA)

7. Bo Sing Za Nang (Lam' hilh)

8. Pa Van Kim (Thu leh la vaihawm)

LENGTONGHOIH PAN LENGTONG KICIHNA THU

Tedim ah pawi bawl ding ciangin kumpi phalna nget kul a, Kawllai zat kul hi. 

Tua lai a Tedim press ten Kawllai “Hoih” cih khetna laimal neilo uh 

ahih manin “LENGTONG” cih min tawh phalna ngen uh a, 

tua panin “LENGTONG” a kici suak ahi hi.

LENGTONG SERIES TE HONG PIANNA THU

Zomi leh Zogam zong vei mahmah Tg. Sua Mang in amau music group min 

tawh series khat bawlkhiat zawh nading hanciam den hi. 1981 kum ciangin tua 

lunggulhna a tangtun nadingin Pu Pum Kap (Lasiam Zamnu’ Pa) in gam leh 

minam a veina tawh a sum a paai bei teng na sik ahih manin LENGTONG SERIES 

a banbanin hong piang toto hi. Tua LENGTONG khui sungah lasa dingin Tg. Suamang 

in tuni a hong nusia i it mahmah Tg. Pauno na zawn ahih manin LENGTONG PAUNO 

ci-in i theih masakna hong suak hi. 

(*Lengtong khui a lasate music tumte pen a khui tungah om khin ahih manin gelh nawn lo*)

LENGTONG PAUNO LEH LAKAM

Lengtong pauno pen lasak siam bek hiloin laphuah zong siam mahmah a, 

numei naupang theih dingin lapau tawh la dawng tampi a phuah mah 

bangin Zomite ngeina kep nadingin lakam ngiat tawh a phuah zong 

dawng tampitak om hi.

LAPAU

La pau i cih dingin a khiatna ngaihsut kul loin a kitel pahpah ding a kiphuak namte 

hi a, ahi zongin pau zat tangpi i tualpau kammalte bel hisam lo hi. 

La dingin a kilawm kammal zatzia deuh om a, tua dan a zang siamte' laphuahte 

ngaih deuh se hi. Tua pen lapau kici hi.

LAKAM

Lakam i cih bel a khiatna a ngaihsut kulte ahi hi. A gentehna in i pianna 

Nu leh Pa i gen nop leh Tun leh Zua cih kul hi. Khangluite in Lamal pen 

lakam tawh a phuah bek uh hi loin a la ii thupaipi pen la thusim tawh phuak 

sawnsawn uh hi. A it a ngaih khat uh a gen nuam hi napi-in ni, kha, aksi, vasa, 

singkungte tawh genteh hamtang uh hi. A laphuah pawlkhatte uh pahtakna 

phatna tawh a kibat hangin a khiatna taktak i tel ciangin kiko gawpna nahi gige hi. 

Tuate pen La el, ci uh a, ki-elna, lungkimlohna late ahi hi. Khanglui lapite ah 

lakam lim zat phadiak uh a, gal la, sa la cihte pawlkhat ah lapau zong zang 

pha mahmah leuleu uh hi.

LAPAU SANGIN LAKAM IN HONG BUNZAW HI.

Kha Siangtho neilote in Kha Siangtho thupina a theih se loh mah bangin lakam 

theilote in lakam manphatna thei theilo uh hi. A thu kibang veve pen lapau tawh 

kiphuak late sangin lakam tawh kiphuakte in lakam thei lakam neite 

lungsim tawng dengzaw bunzaw thamtham hi.

LAKAM SUNGAH LAKHA OM HI.

Zomite adingin Pasian in i pu i pate tung pan gamh-in i luah suksuk ding a 

hong piak ahih mah bangin lakam sungah a nungta la ii kha khat om hi. 

Tua pen lakam siam mahmahte bekin a theihtheih a thuak (feel) theih uh 

thu ahi hi. 

Tulai khangnote in tua lakamte siam nawn lo ihih manin i Zolapite leh lakam 

tawh a kiphuak late ii limna leh a thuthuk zia a thei zo nawn lo ihi mawk hi.

Na sungah zu a om kei leh zu kikham theilo a, na sungah Kha Siangtho a om 

kei leh Kha Siangtho limna kithei theilo hi, cih tawh genteh leng kitel pen ding hi. 

Na sungah lakam a om kei leh lakam limna na thei zo kei ding hi.

A MINTHANG VANGVANG MI MASATE

La tawh kisai-in mi masate minthang vangvang deuh se uh hi. Lengtong, 

Sihna kigo zo, Agape cih lakhui a lasate minthang vangvang diak se uh a, amaute in 

Pasian leh Zogam it theihna lungsim hong guan mahmah uh hi. Internet om nailo 

ahih manin leitung a mi minthangte tawh tehkaak nading zong om lo ahih manin 

minthang diak uh zong hikha ding hi. Amaute pen ki-it ngiatin a mi mahmah a 

kimu nuam ngiat himawk hi. Khuata lam bangah “Ken lasiamte mu kha” ci-in a 

kisial liang ka hi uh hi.

LENGTONG PAUNO’ MIN SI LO DING HI.

I it mahmah Lengtong Pauno a pumpi a sih hangin Pasian leh Zomite adingin a 

phuah late, a sak late nungta den ding a, a min si ngeilo ding hi. 

Zomi min tawh nasepna khat peuhpeuh ah thasial lo takin a siamna a 

zang khia den Lengtong Pauno ahi hi.

Tuni in Lengtong Suamang leh Pu Pum Kap-te a kipan a pai khin sa lengtongte i 

phawk a, amau khang a zom ding khangnote tha i pia hi.

Deihsakna tawh;

Khupno

Khuata mipa

Shared by>>>Sia.Do Khup on Jan 7th, 2021 

Read More