KAM KUP KHOP NA - DKZA

 

Nam le Gamvai, kei muhzia tawm hong gelh ing. "Kam kupkhopna", cihciang bek hi. Sim suk le cin, na thukim lohna om dinga, dik nasak zong omkha ding hi. Na thukim lohna sungah, na thukimna khat le nih a om leh, nang le kei, 'ki thutuahna khat om', cih theih hi.

GAMVAI - POLITIC
Kei muhna ah, Gamvai pen, Biakna zia tawh en le hang, a kibat kim lohna pawlkhat om ahih man in, Gamvai etzia - political perspective tawh, i et kul hi. Gamvai ah asang pen, Mipi leh gam hi. Mitsuanpi in ineih ding zong amau hipah hi. Mipi leh atenna gam leitang, nuntak khuasak zia phat tuamna leh nopna i bawlna in, Gamvai vaihawmsiam ki ci a, a tua lo lam pen, siamlohna ki cithei hi.

NAMVAI - NATIONALISM
Pau le ham, zia le tong kibang taleh - kibang kei taleh, a teng khawm teng vekpi vai pen, NAMVAI hi. A hih hang namvai ah, thu - namnih in khen huai hi.

1. Minamvai - Ethnic Nationalism: Ngeina, Sisan, Phung le Nam, Pau le Ham ki bang deuh teng hi a, kipaai theilo te hi deuh hi. Biakna ki bang kei zong (RC, Laipian, Buddist), upna aki bang kei zong (Democracy, communism), kipai thei lo hi. Atawpna ah, aki "MUHDAH MAH MAH" phial uh zong, ki taaisan thei ngiat lo, "Innmaisa Nete Vai", cih theih hi.

2. Tangpivai - Civic Nationalism: I Gam ah a teng khawm mipi vekpi huam hi. Kawlgam bang ah hi leh: Kawlte, Behte, Bungsaute cihte a kipan, mi tuam tuam te huam hi. Amau te tawh, i vai neih khem peuh, tangpivai suak hi.

Tunai, ei sung thu piang te ka lungngaih ciang, Ethnic Nationalism Vs Civic Nationalism khen siam lohna, a hi kha diam? (ahkl) Koi zaw thupisak masa ding i hiam, cih mun pan, lungsim ki kelkina piang a hi kha tam ci ing..

NAM ITNA - PATRIOTISM
Minam khat in i pian ciang, i nam ki it hi. Itdan i siam leh i siam bang in, minam picing kisuak in, itdan i siam kei leh, i siam lohzia zui in minam ki tualniam hi. Nam itna namnih in ki khen thei hi.

1. Muhbing Itna - Blind Patriotism: Ei leh ei ki it lua in, mi dang te galbawl in, pawl huai lo, khial taleh dik taleh 'Pom tiltel ning' cih lungsim nei te cih theih hi. Hih lungsim pen, ahoih lam in, zangsiam le hang - Minam tawisang na ding thakhaugh mah mah a hih hang in, zangsiam kei lehang - Minam tualniam ki suak thei hi.

(Kipawlna khat peuh sungah bel, hih lungsim puakzia zat hetloh ding, thupi hi. Ahang in, ciiklua a hih man in, kipawlna khat ciang ading hi leh, 'Gu' suak thei hi.)

2. Muhzai Itna - Constructive Patriotism: Ei leh ei ki it i hih man in, ki deihsak in, i ki kawkkikna khempeuh hih thulu sung ah huam khin kasa hi. Innkuan thusim lah nei ve ve, a hih hang, veng le paam - khua le tui tawh zong lah akisia lo innkuan te dinmun tawh, ki bang sa ing.

Tua dinmun atung, Minam i hih ding, lunggulh ing.

GAMVAI KHINKHAINA - POLITICAL DELIMA
Gamvai i sep ciang, Minam le Gam thupi pen hi, i ci khin hi. Tua huhau in, Minam le Gam phat tuam na ding ahih a leh, ahunzui in, minam tawisang theih na ding lampi a om bang bang zuih ding, akisap hun om thei hi.

Gtn, Aung San in, ama gam le nam phattuam na ding lungulhna tawh British le Japan te ahun zui in, na pawl kawi kawi hi. Tua bang bel "thuman thudik hi kei", a ci zong om a, "asep ding sem hi", a ci zong om ve ve hi. (Nang e bang ci muh na hiam?)

Tua zom ah,
Gam le Nam tawisang nopna tawh, aki phuan kipawlna khat in, Nam le gam ading deihsakluatna tawh a gel thute, amau tup bang in, atangtun loh hun om thei hi. Tua bang hun ciang, "Ko Minam le Gam ading kasep uh hi", ci tentan lo in, 'Minam le Gam thupi zaw' i cihtheih ding zong kisam hi. Tua mun ah 'Langpang te - opposition' te tung hehngawhna le thangpaihna tawh, khawl noplohna om thei hi. Leitung paizia ah, Nam le Gam ading asem te - kipawlnate, avei tak tak te in, khawlhun leh zophun nasiam uh hi.

Gtn, Americante in, Japan te, Bomb akhiat ciang in, thangpaih la a, na do kik tei tei leh, ami te tampi sihlawh ding uh a hih man in, mipi itna tawh, akumpipa uh in, galna veng sak hi. Hunte pai to in, thupiang tangthute aki et kik ciang, Japan te 'meidawi - lau' ki ci lo in, thusau khual uh ei ki ci zaw hi.

Atawpna ah,
Zopaunak leh thugil te lak ah, khanglui te'n, "Luang bei na ding theilo - Akbei na ding thei", "Liim in taaksam - Taak in liim sam", "Zam ngaihlua kisai kham - muizanglua ki peitat", Zawngnek Ngauin thalpuk lawh", "Khitang ciak leh Siallong ciak" cih bang in thu vaikhakna in a neih te i lungngaih kul a...

"Ka tung sawlkha, vang tang i cih..
Alsi bawm a...vangtang no ee, vangtang no aw ee..
Ka khang ciautui, luanging i cih..
Akaih tam a, luanging no ee.. luanging no aw ee.." ci a, la in a nusiat te zong lungngaih zel kul hi ci in, um ing.

'Ki thutuahna khat' a om leh, na hawm sawn aw..

Deric Kaam AL
5 May 2026 

 Lakna>>>https://www.facebook.com/photo/?fbid=10215489523746489&set=a.3591308076606 

Read More

SAKHI TUINEK IN PAN LENG

 

SAKHI TUINEK IN PAN LENG

Rev. Dr. S. Pau Khan En

Khanglui te-in thu abul patnop ciangun sakhi tuinek in pan leng, 

cithei uh hi. Keizong Zomi Tuiphum Pawlpi sung a ki- itna khau 

i kitol sak khak ciilciilna hong gen nuam kahih man in hih 

kamciin thulu hong zang ka hihi

 

Bangci lawmlawm a Zomite banglam banglam ah kithu tuak 

liailiai a mapang khawm thei lo i hiam? cih keikiapi taldom 

ngiungeu in ka ngaihsun thei zel hi

 

Keipen gam kiukna (politics) lam sem hi lo- in, ka lunggulhgulh

 biakna lam sem ka hihman in biakna kiu pan in atom mahmah 

in ka en nuam hi. Kei mimal khat ngaihsutna agen ding 

ka hi- a, a khial a om hial leh zong keima' mawhpuakna

hi ding hi.

 

I.ABUL KITOLKHIABAIH

Japan gal a kici Leitung Galpi Nihna (WWII) khit 1950 ciang 

Zogam ah Baptist leh Roman Catholic pawl nih bek om in 

Baptist ah hong makai pen Sangmang te leh Sia Thuam Hang, 

Sia Pau Suan Sia Vial Nang, Sia Dam Suan leh Cope topa 

tawh nasem khawm i Sia masa te- uh a hihi. Makai omsun 

tengmah na na kihuan lingling uh a tawm tase le-uh agim 

atawl lam uh theilo zah in nuam nasa mai uh hi.

 

Hih hun laitak mah in Sia S.T. Hau Go Madras pan in M.A (Phil) 

ngah in 1946 kum in ong ciah a, ei! Zomi sung gentakloh a 

Kawlgambup ngiatah zong tuabang degree saang ngah ki tam 

nai hetlo ahihman in gamuk mangkang H. N. C. Stevenson in 

zalianpi pia dingin nana dawntuah pahlian hi.

 

Tuabek hi lo, Yangon Judson College ah Siapi asem Khristian 

Dr.Hla Bu in zong Judson College a Philosophy department ah 

Professor sem dingin nasam lailai hi.

 

Tua tegel sang lo in ama' kipiakna zui in Baptist pawlpi ah 

Pasian nasem dingin hong kipia hi.Ama' honggen ngiat kazak 

ngei khat in " Zingsang khat Tedim biakinn lui gei a mawngkung 

nuai ah Sia Vial Nang in, ko, Japan galsung sangmang te India a, 

a va galtai sung un thu um mite bang isuak zentam ci-a, na 

khalaulau keei unga, tu'n nang pilna hizah tawh nongciah a 

biakna lam nong bawh theih, nuam mahmah hang, ci-in mittui 

luang gilgial in awliing delhdelh in hong gen" ci hi.

 

Tualai a Kawlgam sangmangte Thuzeekpi

Erville Sowards tawh kikum in ama' lunggulh sa a hi, 

Khamtung gambup ading Tuiphumte Kipawlna Zomi 

Baptist Convention 1953 in hongphut khia a, amahmah in 

General Secretary sem in Falam ah om a, a hizong in cidam loh na hangin sauveipi sem zo lo- in 1955 ciangin Tedim gam ah hong 

ciah kik hi.

 

Tedim gam hongciah ciangin pilna i kisap luatlam muhna tawh 

pilna khuk ZOMI BAPTIST ACADEMY hong phuan khia hi. 

Sum mah kisam ahihman in America gam a Baptist thu um 

mite lungsim khoih ding in BURMA NEWS a kici thuki zakna 

ah thuluui ( article) khat at a pilna kisapna teng agen ngelhngelh khitciang in, Where are the helping hands? cih tawh thu khum 

sawn sawn ahih man in mite lungsim khoih tham in a vei ngiat 

nupinu khat bang in hoh ama' gou ( will) pan in tualai sum 

MMK 150,000 na pia zen a, tua hun sum manphat lai hi-in, 

na lianpi a kisem zo lua ding a hi hi A lungtho tampi mah 

zong om lai hi. A hizongin Kawlgam hong tunciang in hih 

sum pen angen te kiang tung lo- in ki belhei sak a, 

ZBC sung a om Association teng (HBA, FBA, KVBA, TBA) 

ah saseh hawm in kihawm sak dihzen hl.

 

Siapa pen anatna khuadam gam tawh kilem lo semsem ahih 

man in khamtung om ding piang theinawn sa lo- in, Mandalay 

University ah Sya va sem hi. Tua lai ah Sya a vasep kawm in i 

La Bu hongtei sak hongpuah sak ding in kiseh hi. Ama' lampan 

haksatna kiphawk sak kha lo- in ei ngaklah bekmah kisuang 

in amah pen bangmah semlo bangin ki ngaihsun in, kikhawl 

sak mai- a; i kizopna khau atol khia leh atolh khia hong suak hiau hi.

Kum tampi mun khat a Pasian' na kaseppih i Zomi Pasian nasem masa khat ahi, Rev James Sang Awi thugen khat ka bilkha ah 

gingging lai a, tua in,

"Sia Hau Go tekhawng ZBC Meeting ah hongtu le- uh i khamuan dan! Bangmah gen sese takei le-uh hong tu himhim leh kikha lum mai hi" hongcih pen ka bil ngiat a ka zak a hihi.

 

Amau hileh pawh, " Na sep nop peuhpeuh na ngapngap in 

sem in la, biakna huangsung ah ong ompih hamtang in" ci 

ngelngel ding in ka ngaihsun hi. Pasian nasem ding a hong 

kipia lingliang sam a mataw, en kemcing thei lo khakhong! 

I liim i vaang hipan mahmah a tolh sak khamai !

( I Sam. 4 : 21-22 I'chabod )

Hih i thubulpi pan in atuung apat a,kihuaina, kikhual na om lo in kitolkhia baih lua kha aihciang a, i Pawlpi leh i minam taangthu pen kikhih kipehna sang in kitol khiat na lam vive ah tolhkhia, tolhkhia pahpah i hi khatam, ci giauguau ing.

 

II CILIAP HUAI VE VE

Kongpat phot buangin sau taleh hong zom vet hoh ning. 

Burma Dinity School (MIT) ong Rev. Dr. Kam Khaw Thang in 1957 pawlpan in TBA General Secretary ongsem in 1960 khit Tedim Laisiangtho tei ding in hong kipat ciang in 1960 kum a Insein 

pan a hong ong thak lawmta 4 hongom uh a, kinuam 

mahmah hi. Adang nih in a khua Pawlpi tek ah Pastor sem in, 

khat in Falam Laisiangtho Sang ah Sya sem a, Tedim 

tualsuak Rev.Kai Khaw Thawn in TBA General Secretary 

hong sem in lungdam, thanuam tak in gambup kikal suan hi. 

Tualaitak in thubuai khat hong piang dihdih a, tuapen 

Sia Thang Za Kam thuhilhna a hihi

 

Ataktak in Sia Thang Za Kam bel kha lam nuntakna a tawisang 

nuam (promotion of spirituality)hi zaw hi. Kum 1965 

Taungphila ZBC Kum Thum sim Khawmpi ah hih thu 

pen Agenda thupi khat in so tak in kigen a, MBC te leh 

sangmang te- in, "ZBC te'n hithu bangci muh na hi uh hiam?" 

ci-in adot ciang un, "ZBC pan hepkhiat liang dingzah 

in upna pial hilo hi" (this is not heretical enough to 

excommunicate with the ZBC) ci- uh hi.

 

Ahizongin khua pawlpi pawl khat pan in a sangthei het lo- a 

om ciangin Secretary pa inzong, do acih in do keei leh ut 

mawk uh hi. Doctrine in lah tua zah a, a khial hi lo, cih 

atheih ban ah, ama' sepding pen mido ding hi lo, mihuai 

dinglam hi zaw ahihman in, a tuaci do loh pen GS pa in 

Sya Thang Za Kam pawlpih hi, cih hi den hi. Tua a hihman in 

mihing mah ahi, GS pa Rev. Kai Khaw Thawn in zong, 

"Pawlpih keng kong cihcih hinapi, hong um thei lo na 

hih uh leh thuman akhen Pasian khen dingin LST hong 

nam sak un" ci tagiap hi. Chairman pa in zong, "Nam mah ou leh!" cingam nawn lo hi. A za khempeuh ki ciliap tek a, tawlpi 

khat sung tua meeting bawlna Tedim biakinn lui sungteng, 

sual tung a phim khat kia kiza ding khop, in dai khipkhep hi. 

Ki ciliap a, na kisak pihtek hi.

 

Tuabang teng hi keei sam napi- in adeih lo te'n khauh langpan 

lua uh ahih man in 1965 TBA Kumcin kikhop teh TBA GS pan 

in kikhawl sakta hi.Tha khat thu in Homalin bulphuh Kuki Chin 

Baptist Association te hongpai litlet in amau kiang ah General 

Secretary sem ding in nuikawm litlit in mu aktuah in tuah 

khia hiau uh hi Amau bel hampha uh mataw!

 

Thu hiteng, la hiteng, kong sut detdut ciangin thusia pholhsuah 

nuam a hong gen ka hi het kei hi. Thusia sutsut cih khawng 

a hih theih liai laiteng apeel nuam pa kahihi.Tedim gam 

Khristian te- in i thupha leh i liim i vaang hoh tolhsak baih lua 

khadeuh i keinam, cih kei lungpuak a hong suutsuut ka hihi.

 

Hih hun lai te- in tulai a TTBA, SRBA, ZBA leh TABC, EBC, AG, UPC khempeuh zong TBA i hi khin hi. Banghang a tolhtolh in 

bangcia aliailiai adiamdiam a nungta khawm theilo i hiam? 

cih abul pan a i ki itna khau ( cord of love ) i kitol sak khakna 

thu sakhi tuinek a, apan ka hi hi. Pasian thu ah hi ci mawk i 

hihman in, leitungthu ah zong akua akua in thupha sangin 

mainawt veva ka kisa het kei hi. 

 

I minam cinatna, i tual niamna leh i daubei ki patna mun 

(locus of evil) leh ahang pen hih thusia teng pan a hihi.

PASIAN' na ka seppih ka zahtak mawhloh i sanggam Chin 

maikai te khat in simmawh na leh kona tawh hihet lo- in, 

veitakpi a, hong gen thu khat hiah kong hawmsawn nuam hi.

"Buaina khat peuhpeuh hong omteh no, Tedim lam ten bel 

damsak ding lam ( remedial method ) zang lo- in atkhiat ding 

( surgical method) lam bekbek zang uh teh" hongci hi.

 

Tu aciang beek hi tabuang le ung maw, Van Pasian! Ka tuailai 

te-uh hong siamthak sak in, ka gam uh hong cidam sak ta- in aw!

A nunung bel in maivom maikang ki deidan na (apartheid) hang a gambuai South Africa ah tua hunlai a biakna leh minam makai Archbishop Desmond Tutu thugen, tulmawh kamciin khat tawh 

ka thuluui article khum nuam ing. Tua in,

Understanding the past,

Acting in the present

Building the future.

cih ahihi. 

 

Hih thuluui asim kha khempeuh i biak i paai Tung Pasian in thupha hong pia tahen!

 

Link>>>REV.DR.PAU KHAN EN  

Read More

A SUAKPA AKI PHAWKKHALO SUAH PAWI -LENG TONG PAU NO!

Nidanglai in ah, England gam, London khuapi a ateeng, tangval khatin kum 33. cin'na suahpawi bawl hi.

Nungak tangval lawmlegual tampi in suahpawi hong uap uh ahihmanin anne zune sane in nuamsa mahmah uhi.

Musickhum lahoihnono hongin sa in zankhuamial pan zingkhuavak dongmah, akop akopin, athuang athuangin alaamkhawm hialhial uh ahi hi.

Ahi zongin, tua suahpawi bawl tangval pen, zankimh laitakin vailianpi khat hangin vakkhia pusuak hi. Khuadamlua mahmah ahihmanin kong kikhakkik a, kikalhkik hi.

Suahpawibawl asuakpa inn hong tun'kik ciangin, innsunga ama suahpawi uap a, alaamlaam tengin, ama suahpawi nuamsalua mahmah uh ahihmanin, suahpawibawl asuakpa aomloh lam leh kongkhak kiukiu loklok awngawnga a omlam phawkkha vetlo uh hi. Tuhun banga bell cihte, telefon, mobilefon cihte lah, om nailo hi.

Zingsangkhua avakciangin, suahpawi uap a, zankhua a alaamlaam tengin ciahtading ci in, suahpawi bawlpa baansah nuamin azon' ngeiingaii uh leh, asuakpa na omhetlo mawk hi. Asuakpa omlopi a asuahpawi nuam asa mahmahte ahi uh hi.

Innpualam apusuah uh leh, zankhuavak a kong akihon'lo suahpawibawl asuakpa pen, khuadam khuavot lua mahmah ahihmanin, innpualam kongkhaksiik lenin na dinggawcip, na keugaw khinta hi. Na nanaak nawnlo mawk hi.

Hihpawi pen, ''ASUAKPA AKI PHAWK KHALO SUAH PAWI" ahi hi.

Atelsiamdingin Topa'n thupha hongpiakim ၾကက္သားဟင္း။

Ka lungdam.

Munkhai'pa.

Read More

A KILEEK KIM TAWIKHAINA

wiki 

(Lungdamna Aw Lom 3, Hawm 3 March 15, 1978 laimai 1 leh 4 pan a kiteikhia)

“Topa in tawi khaina man lo a zangte mudah a, tawi khaina man a zangte tungah lungkim hi” ci-in Paunak 11 sungah Pasian thu i mu hi. Sum zuak sum leite in a man lo tawi khaina a zat uh Topa in mudah ahih leh, Ama thu tawh kisaia a man lo, a kileek kimlo thuhilhna pen nasia takin mudah zawtham lai ding hi. Tua a hih manin sawltakte, siate leh pawlpi makaite in kidawma i gamtat theih na’ngin a lunghihmawh huai diak thu pawl khat kikum ni.

Lai Siangtho hilhna a buppi-a ngaihsun masa lo-a kammal khat hiam, mun khat hiam bek bulphuha nei ahi zong, tua thu bek siksan a neih khak ding kidophuai hi. Sawltak Paul thuhilhna ahi upna hangah hehpihna tawh gupna ngah thu (Ef 2:8) i hilh ciangin Jesuh thuhilhna ahi gamtatna hoih om lo upna neih khak ding a lauhuaina thu zong kiphawkmawh bawl khak ding hi lo hi. Tham lo in Ef. 2:8 i sim khit ciangin din’ khawl pah lo-in 2:10 zong sim suk lai leeng gamtat hoih a gamta thei lo leitung mite in gamtat hoih i gamtat theih na’ngin Jesuh Khrih sungah hong kigumkhia, hong kipiangthaksak a hihna i tel pah ding hi.

Gupkhiat sa ahi, a piangthak, Jesuh nungzui a kici ei Khristiante in Mat. 22:37 sung thu siksan a, Pasian it ding, Pasian thu bek ngaihsun ding. Pasian tungah ki-ap ding cih thu bek gena nei-a, mihing it ding, mihing thu lunghihmawh ding thu gen mang pen zong a dahhuai thu hi thei hi. Tua bek mei letin 1 Joh. 4:20 thu lawng kha ngei kei leeng thu hilhna kicing lo hong suak thei ding hi. Tham lo-in Mat.22:37 pen thukham masa pen leh a lian pen hi cih i theih zawh ciangin tang 39 sim leeng, “Na pumpi na it bangin na lawmte (mihingte) zong na it in, a cihna thukham nihna in tua a masa thukham tawh kibang hi,” ci lian hi. Jesuh in a kibang hi a cih nungsang e’n zong a kibanga i san ding hi ding hi.

Pasian thu bul bawl nuam kisa in, ‘Mi in khomun bek tawh nungta lo hi. Pasian kam sung pan pusuak thu khempeuh tawh a nungta hi,” (Mat. 4:4) thu i gen ciangin khomun a kici an nek tui dawn pen Jesuh in a thusim lo zaha muut khak ding baih hi. Izipt gam pan Israelte Kanaan zuan a a pai laitak uh a, vantung pana nek ding manna a khiat Topa in a mite adingin an nek tuidawn a lunghihmawh Pasian ahi hi. Leitung an nek tuidawn bek lunghihmawh pen a nei a, vantung nuntakna thu thusim lote hilhna tawh kisai in Jesuh in a gen dawimangpa khemna a thuhna hi zaw hi. “Tunia ka kham khop ding uh an hong pia in,” ci-in thu na ngen un ci-a a nungzuite thu a hilh, an nek ding hong deihsak pha mahmah, gilkial a om mi 5000-te nek ding ngasa leh khomun a vaihawmsak tantan migi Jesuh in an ngawla puksi dingin hong deihsak bang zia-a teci pan khak ding hi lo hi.

A tawntung a ding kha nuntakna pen khang khat bek ding ahi leitung pumpi nuntakna sangin thupi zaw hi cih thu i gen ciangin Jesuh pen kha bek it-a pumpi it lo zaha lah khak theih hi. Tua mah bangin kha leh pumpi in nuntakna bup sungah nuntakna nam tuamtuam nih ahihna thu i gen ciangin kha leh pumpi pen a kisai kha lo hiam a kikhen tuam vilvel zaha kipehna nei lo zaha hilh khak zong a ol mahmah khat ahi hi. Pumpi leh kha pen kisai kha tuah mahmah zaw tham ahih manin na pumpi hiang khat ahi na khut tawh mi na na guksak a, na kam tawh mi na hosiata, na khe tawh mite simmawhna tawh na pek zanzan leh tua na pumpi gamtatnate in na kha nuntakna tawh hong kisai mahmah zaw tham ding hi. Hih leitung ah na pumpi gamtatna in hong tung lai ding vantung a na kha nuntak na’ng tawh tua zaha kisai ahih chiangin kha leh pumpi tuam khen a thu hilh khak ding zong kingaihsut ding hi. Pasian Lungdamna thu a kicinna inah hih leitung nuntakna a kipan sih zawh cianga vantung nuntakna donga zat theih ding thu hi a, na kha bek hi lo-in na nuntakna buppi, na hinna buppi tawh hong it hi cih thu na phawk ciangin Pasian itna in bangzahta’n lian a, za a, thuk ahi hiam cih hong ngaihsun sak ding hi.

Pasian gupkhiatna in mipum khat khat bek tawh kisaia gen a, gambup a ding leh mi nam adingin gupna thu, hotkhiatna thu in khiatna nei lo banga kihilhna in zong a man lo thuhilhna khat hi thei hi. Gam sung leh gam bupa mawhna leh khialhnate khempeuh pen mi pum khat leh khat bek mawhna leh khialhna pana hong kipan khin kikeuh banga ngaihsut khak theih hi. Ahi zongin Lai Siangtho in mawhna pana kisik dinga a sap mite pen mi khat khat lak ten’ ziau ziau a kisik ding a ci bek hi loin mi nam bup khat, leitung bup in zong mawhna leh a khialhna nei hi ci-in tuate khempeuh zong a kisik dingin leh kikheel dingin deih hi. Mi khat khat pen mawh hi cih zong a man mah hi. (Rom 3:23)

Ahih hangin mawhna inah mi pum khat khialhna leh mawhna bek bang zia a ngaihsun a, a siangtho lo an nek tui dawn, a siangtho lo kimawlna a kipan numei pasal mawhna leh khialhna te bek khialhna leh mawhna sa kha-a mi nam kideidanna, leitunga zawnna ngaunate leh gam sung ki ukna sunga thuman lohnate thudon loh khak pen Khristiante ading a kicing hi lo ding hi. Thuciam Lui sung i et ciangin Pasian in mi pum khat bek gum lo-in a nam buppi a a gupna a huhna leh mi pum khat bek gimna pia lo-a a gam bup nam bup-a gimna a piakna mun tampi om hi. Sodom leh Gomorrah pen a vekun gimna kipia hi. Nineveh khua ah Jonah in thu a hilh lai in mi pum khat bek kisik dingin ci lo-in a khua buppi a kisik dingin ci hi.

Mat. 28:19 sungah Jesuh in mi pum khempeuhte nungzui suak dingin a cihna i muh mah bangin mi pum khat bek hi lo, mi nam in zong thukhenna thuak ding hi ci-in a genna Mat 25:31-46 kimu hi. Tua hi-a mi pum leh gam kikhen thei lo-in mi pum khat kigawmkhawm, kipawlkhawm a om i hi (Rom 13, 1 Pi 2, Ef 5 & 6). Mi pum khat bek nuntakna pen Pasian thu in a gen sak khakna bangin gam sung thu leh nuntakna ziate Khristiante in thudon kul lo ding ngaihsutna leh tuate suk khak leh lawn khak pen a siang lo zaha kihilhna om thei a hih manin dahhuai hi. Hih thu tawh kisai-in Billy Graham in “Jesuh in suahkikna thu khut lang khatah tawi-in a lang khatah tui hai khat tawi dingin hong hilh hi. Na dang khempeuh tawh gam sung haksatna leh thuman lohnate zong i lunghihmawh ding ahi hi. Lungdamna thu pen tangpi tangta nuntakna tawh kisai hi cih thu ka hanciam tawntung hi. Gam sung haksatna thute thudon lo-a om kha Khristian pen dahhuai hi” ci ngei hi.

1967 kuma America Kumpi in “Zawn’na Gal Do Ding” (War on Poverty) cih thu kikupna Washington khuapi-ah a pai lai-in mi tampite in a mawhsakna thu pen Billy Graham in a thuh kikna-ah mi zawngte leh ci mawhte kep ding don ding thu Lai Siangtho sung mun 175-ah om ahih ciangin zawn’na langpan’ dingin Lai Siangtho in hong hilhna lian khat hi ci hi. “Na khut taklamah Lai Siangtho tawi-in na vei lamah leitung thukizakna (newspaper) tawi leteh Pasian nasep zia ding na tel pan ding hi” ci-in gen ngei hi. Pasian thu aipeng noptuamna ding sa i hih manin angsung thei Khristian tampi ki-om kha-in “Kei siangtho peuh leng hih leitung bup gam bup pen a nit hang phamawh sa ke’ng” ci bang pianin mi tampite i nuntak manin i kingaihsut phat ding kul hi.

“Leitung” kici kammal telkhialhna in zong a dahhuai khat hi. Vantung thu leitung thu, Pasian thu deih kisa-a leitung thu leh leitung nuntakna thu khat peuhpeuh nasim lo hiam, a kihhuaia seh khit hiam zong man lo kha ding hi. Leitung nuntakna sunga gamtatna man lote genna in “leitung” cih mah a om manin kitel khial thei hi. Pasian in leitung ita a Tapa hong pai sak zaw tham a hih ngaihsunin, dawimangpa bek i piak bawl tawntung ding hi lo hi. Pasian deihlohna tawh kituak genna leitung leh a deihna tawh kituak genna leitung kammal omnate lim takin Lai Siangtho ah kan ding kisam hi. “Wheaton Declaration of 1966” kici sungah “Lai Siangtho cihna tawh kituak zia lo bang pi-in leitung pan pumpi kituam bawla i om sawmna bangin leitung haksatna leh kisapnate pha takin i sem thei kei hi” ci hi. Leitung a ding ci i hihna tuat pha ni (Mat. 5:13).

Tu huna Pasian thu gupna thu i san cianga i khialhna lian khat in Jesuh Khrih pen mawhna khialhna sung pana hong honkhia thei ciang bekin sangin Kumpi Topa ahihna i sang kei hi. A sia lamin gen leng, Jesuh pen i cihmawhna pan hong hon ding bek-a deiha, a thu zuih ding, a ukna man ding leh thudot ding a sang nuam lo i suak hi. Hong hotkhiatna pen hong uk nop man leh a deihna i zuih theih na’nga a hong honkhia hi zaw hi. Ama’n hong hotkhiat ciangin ama huhna tawh ama deihna zuih theihna thu hong guan hi. Tua pen Kha Siangtho nasepna hi. A tak takin Jesuh pen mi pum khat tung bek ah vaihawmna ana nei hi lo-in leitung leh vantung a ana khempeuh a neipa hi (Mat. 28:18). Na khempeuh ama piansak ahi hi (Joh. 1.3). Kumpi tokhomte, uknate, a sang bel nate leh vangliatna khempeuh zong ama piansak hi a, amahmah in uk hi (Kol. 1:15-20). Tua hi-a gupna deihna pen a kipiangsak nate khempeuh in suahtakna a ngah na’ng ahi hi (Rom 8.19-22). Mihingte pian’thakna ding bek hi lo-in na khempeuh in a thak a suah na’ng thu pen Lungdamna Thu ahi hi (Mang 21:5).

Read More

ZOMI AKSIPI KHAT IN ONG NUSIA - RIP SIA GIN SIAN PAU@GS PAU

 Sia Gin Sian, Mangpha!

John D. Rockefeller, Jimmy Carter, Billy Graham, cihte nang Kam pan hi ka zak, Sia aw.

Tonzang AG biakinn ah nong tentan piakna pan thute manpha takin na zui kha ing. 

Ki sik kil kel keng.

Ka lungdamna lian mahmah.

John 3:16 siksan den, Sia Kham Bawi cihtakna teng gen den a thugenna ah, Khangnote vei mahmah, pilna nei, pilna ul tung sak, a zuau gen kil kel lo, a aw hut suak vet lo a thu gen zom veve lai a khauh lungtang a nei siapa hi. 

Tung Tuang ah tentan ong piak aa ka theih hi mangngilh kei ing.

Nong paisan vat teh Pasian thu tawh kihehnepna ahih sam hang ne kha zeek kha man kei lua lawmlawm cei Sia.

U.S. ong pai man zen le teh maw na cici zen mah hi veng.

Lai uk leh na thuhilhna za kha te in ong mang ngilh ngei ngei kei nung ei Sia.

Zahtakna ong pia ing ei Sia.

Na tung ah lungdam ing ei Sia.

Nunpi

November 16, 2020

Huih Siangtho nuam tak in a dik ta hi cei. Sya GS Pau

MIT Ciimnuai innkuan in zong ong phawk mah'' di hi ung.

Article kong ngetuh ciang lawp tak in ong sang lungdam ong koh zaw liang Syapa, ei lak kul het lo in koi ah ong pia ding ka hiam ci' ong piak ding kal ngak lah in a lawp mah'' Syapa,

Nang na om nawn loh hg nong piak thului te in ka lungsim uh ah nungta tawntung ding hi.

Lawp takin a na nasep sak Topa' Khamlukhu tawh lawptak in ong dawn ding hi cih lam en ung.

Mangpha.....

#MIT Ciimnuai Innkuan

Shared by>>>Lamh

LAILAM AKSIPI KHAT KIA

Zomi te aa ding Pasian thu lam ahi zong, Leitung thulam ahi zong imit avak theih nading lai tampi honggelh sak ahi Sia Gin Sian Pau (GS Pau) in tuni Kawlgam nai 8:30am pawl in Yangon pan hong nusia ahih man in Zingsol tanu te zong adah akap tetawh kibang in idah mahmah hi.

Sia GS Pau pen Zingsol Journal bawllai ahi zong, Magazine bawllai ahi zong thu manpha tampi tak Zomi te aa ding honggelh sakzel khat ahih ban ah Zomi te Thukizak na lam ah i khantoh theih nading ahan ciam mahmah leh alunggulh mahmah khat ahi hi.

Zomi te sung pan lailam ah Aksipi khat in hong mualliap san leuleu hi.

#Zingsol Tanute

Shared by>>>ZINGSOL   

Itna leh dahna lian mahmah hi.

Zomi te sung ah laigelh na tawh mit hong vaksak mit hong keuhsak i it leh i muan i pahtak mahmah Sia #Gin_Sian_Pau in hong paisan ta mawk ei.

Kei mimal aituam in nasa ngaungau mai ing.

hunnuam tak zangkhawm in lailam leh thu tuamtuam mailam ah bangci leng khangto semsem ding cih gelna te thu khum manlo a, ZOMI Aksipi khat hongkia hi cei Sia. RIP

Na khekhap leh na lungtupte khangthakten ka zopzawh nading un i pa angpan thu hong ngetsak in maw Sia.

•Ana nasep Pasian' ading pahtak huai nahih na

•Tate ading Pahoih na hihna

•Khangual mai ah tate mai zumsaklo na hihna

•Angkawi ading limbelh phungcing na hihna

•Ci leh namte ading lamlak khuavak na hih na

•Tangte' tung a tang'

Ngalliamte tung a Ngalliam na hih na

*Khang sawn ten hong et teh ding hi ung.

-Sia pa pumpi in hong paisan hang, pilna tampi hong sunsiah lai ahih manin hong nutsiat pilnate phungvuh in sisak lo ding hi hang.

-Lai gelh siampa a sih hangin a gelh laimalte nungta paisuak ding hi.

-Laimal thupi a sa Siapa tangtawn dongin laimal hoih suak ding hi.

It in pammaih salua in i phal nailoh hang Amah anei Pa in lata ahih man in ahampha hizaw hi a dah kap mikim Topa'n hong hehnem hen.

Itna tawh

PauThang

------------------------------------------------------------

Sia Gin Sian Pau @GS Pau Kammal hoih tampi' lak ah tawm enpak ni

#KITAM_KITAWM

Lasiam kitam,

Pasian phat kitawm

A piangthak kitam,

A kikhel kitawm

A khami kitam,

Jesu a suun kitawm

Khristian kitam,

Jesu' nungzui kitawm

Mihau leh milian kitam,

U leh nau a khual kitawm

Gam leh lei a it kitam,

Gam leh lei a puah kitawm

Thugen siam kitam,

A gen bangin a nungta kitawm

Laisiangtho sangkah kitam,

Pasian' sapna ngah kitawm

Mipil leh misiam kitam,

Na lian pipi asem khia kitawm

Pasian nasem kitam,

Pasian' sathau nilh kitawm

By, #GS_PAU

Shared by>>>Pau Thang

Read More

100 Questions Ki Behlap ( 128 ah ) Civics Test

*US gammi suah na ding a kisam kal tawpna interview a hi hi. 

*Tuma ciangciang ah 100 questions cileng a ki sawh-kha khempeuh in 

  ki thei pah lel hi. 

*A hi zong in kumthak  a pat dotna za pan in za leh nihgiat ah

  kikah to hi. 

*Interview teh zong nidang in dotna guk ong kidong masa hi.

*A guk in ih theih leh dotna (speaking) lam pang zo ki ciamteh hi.

*Tun a thak kikhel na ah dotna sawmnih ong kidong ding hi. 

 

*Sawm le nih na theih leh a zo in ong kisang pan ding.

  ( a rate kibang, 60 % theih leh a zo a ki ciamteh ) 

*Dotna zong sawm nih mah ong kidong tektek ding.

 Cihnop ah sawm le nih ciang na theih khit hang in 

 sawmnih a cin dong ong ki dong teitei ding cihna hi. 

*Hih behlap/kikhel na pen tukum dec nikhat khit a pat kizang to pah ding a hi hi. 

*A hi zong in kumtam khin ta ding nuamtuam ki gelsak.

 US ah a om zawh kum sawmnih pha khin in ama kum sawmguk le nga val 

 ta ding dotna sawm ah guk ciang a theih leh a zo in kisang ding hi. 

*Tukum 2020 Nov kha bei madong a lui kizang lai ding hi. 

  A lui na kisap leh hiah>>>NA MEK IN

*Hih kikhel na pen USICS zumpi pan in Nov 13th, 2020 in ong pulak

 khiat uh ahi hi. 

Read More

TEDIM, TONZANG , CIKHA LE KHAI KAM BY LIAN TUANG 2020

Tedim, Tonzang, Cikha le Khai Kam

-Innkuan -20192

-Mimal – 131523

-Khua- 221

-Kumpi nasem-3668

-Sumbuk sai 692

-Poverty rate 58% (2017 Survey, UNDP, World Bank )

-Antang, ci, sathau,be, aksa, ngasa…, nek le dawn banah nisim vanzat khempeuh kawlpi kibulphuh hi.

-March 23 a kipan nasep maban khempeuh khawl in nuntak kizong thei nawnlo hi.

-Sum le pai muhna nasep silbawl a lem loh hangin Mipi le mipi kihuh in, kipawlna, biakna, mimal hanciamna le kumpi panpihnate tawh tu ciangciang etlawm takin kipaipai liamliam hi.

-Ahi zongin huhna panpihna tuamtuamte bei toto ta a, buhcim tui zilzel in a huan, bal bek an in a nei innkuan 150 val bang kipha kik leuleu ta hi.( ZCRC konlawh data )

-Myanmar gam dinmun ah Virus vai tawm ong dai pian dan in kingaihsun hi. Tu ta a bat leh mai nipi khit lam ciangin tawmtawm kipusuak thei zaw deuh ding cih kumpite gelna ahi hi.

-Nek le dawn vai pen kumpi lam pan zong kigel sam dinga, ahi zongin a beisa bang mah in a tawm pen kha 6 kha ciang bang khat le khat I ki et loh phamawh lai hamtang ding tawh akibang hi. Tua hi keileh virus sangin gilkial dangtakna tawh ut loh thute, deihloh thute I sin kha zaw sop diam cih khat patauhhuai hi. Tua bang dinmun I tun lohna dingin I hih theihna tek panin ma kipang ciat hi.

- Virus vai ah nakpi takin a kipiakhia siavuan siamahte, kumpi nasemte, kipawlna tuamtuamte thupi sa in zahtakna I pia hi. Tua banah mipih sapihte itna veina lianpi tawh neihsa sum le pai apiakhia ziahziahte hampha sa in zahtakhuai pahtakhuai mahmah I sa hi. Van le na tampi a piakhiate tungah zong genzawh loh in I lung a dam hi.

-Saizang khuate in amau nek tang ding khen veuveu in Kaptel khuate a huh bangin I kipanpihna I kilainatnate I muh ciangin I khuasik mul tho in I khasiat suak hi. Ong nehno sak mahmah a, ahi zongin tua thu mah in nakpi takin ong khamuang sak mahmah hi.

-Virus hangin I tawlngak hun inn I om hun sungin I innkuan, i gam I lei I minam ading a kisam taktak thute bang taktak hiam cih I lung ngaingai dinga, kithutuak diamdiamna tawh COVID-19 i kantan zawh ciangin, I ngaihsut thak le I muh thak thu hoihte siksak in manlang takin kalsuan to pah ding hi hang.


SHARED BY>>>>Lian Tuang

Read More

COVID-19 : Tulsa Zomi Pawlpi Tuamtuam pan VAI THUPI Zaksak Na

EBC TULSA

Sia.Khamno ( FEMC-TULSA ) ZBCA

                     
ZOMI SDA TULSA
FGATULSA

FGATulsa Pawlpi pan Thuzaksakna 

Tulaitak leitungah Aminthang a lauhuai 
Coronavirus natna hangin 
Ih Kumpipa Donald Trump in "National Emergency" Gamsung patau lauhuai thupoimawh hong taangkokhiat natawh kizui-in Mi 10 val kikaikhawm/Kikhawlkhawm thei loding a cih mah bangin Thu kikhelna a omkik masiah Pawlpi nasepna te Friday Homecell Saturday Anntan thunget Sunday Kikhopna te Khawlphot/Neihloh phot dingin hoih kisa hi. 

Yangon pan Siapipa Sia Mungtawng hunzat nate Sunday Zomi hun Zingsang nai 10:00am in Online pan hong kikhah ding hi. 

Kawlhun aa te Sunday Kawlhun Nai 2:00pm in Online pan in hong kikhah ding hi. Ih Topa Pasian in hong hehpih henla Hih Coronavirus natna Leitung maitang panin Amanlang in Topa'n honghepkhiat sak mengmeng nangin Thunget natawh mapang tek ni. 

Pawlpi mite A neupen pan A lianpen dong Ih nasepna tek ah Ih inntek ahIh Topa Pasian in hong ompih hen la bittak in hongkem tek tahen. 

>>Topa Jehovah Shalom 
Nopna/daihna 

>>Topa Jehovah Rapha 
Damna damlo mimalkim tungah hongtung tahen.
Amen!

Tonu Maria Siangtho Lungtang Pawlpi 

Dear Thuzui Nu le Pa, U le Naute
COVID-19 Natna hangin tu laitak lunggim a, dipkua patau in, ih om laitak mah in ih Upna tawh kalsuan a, Pasian’ hong itna le hong hehpihnate phawk tawntung in tha la tek ni.

COVID-19 Natna hangin lungkham sinkham a, buaina tuamtuamte gunmei bangin hong khang in, hong tuam a, hong umcih laitak in, Hih bang thusia lasia te a om na in, Pasian’ omlohna, Pasian in hong taisan cihna hi zenzen lo in, Eite tawh hong omkhawm tawntung Pasian ahih na, a hong kilang semsem ding a hi zaw hi. ‘The presence of problems is not the absence of God’ ki ci zaw hi.

Tua ahih manin, Thungetna, Pumpi kidekna le A hoih a pha bawlna ahi, Thupha bawlnate tawh Pasian kiangah zuan in, eite tawh a hong omkhawm tawntung ih biak Pasian’ lim le vaang sungah lungmuanna le kha muanna nei ciat ni.

Zingciang a kipan in Hua-Hun (Zehtan Hun) sung 
Friday Nitak sial 07: 00 pm in Missa le Singlamteh Lamzuihna ih Parish Facebook Page pan in LIVE hong ki khah ding hi.

Nipi Ni in zong Zingsang Nai 09:30 am in Thungetna kipan ding a, Thungetna le Missa Biakpiaknate pen Ih Parish Facebook Page pan in LIVE in hong ki khah ding hi, ci-in Thuhoih, Thupha hong puak ing!

Topa Pasian eite khempeuh Hong om pih tawntung ta hen!
Christu Topa sungah
Topa Kimpu

Read More