ZYA Myanmar Makaite Australia ah ( report )

October 12-27, 2017 sung Australia gam khua 3 (Adelaide, Brisbane, Melbourne) ah ZYA nasep nate pulakna le CD/DVD tawh cimawh dongtuakte huh zawh nading Fund zonna neihna te Topa’n nuamtak in hong gualzawhpih hi.
ZYA ading CD/DVD le huhna sum ngahna te,
1. Adelaide pan - Aus $ 1075
2. Brisbane pan - Aus $ 1855
3. Melbourne pan - Aus $ 3224.35
Total = Aus $ 6154.35

Australia om sung ZYA mintawh kihel khakna
1. Adelaide ah Zomite Khuado kihel thei.
2. Brisbane ah ZYA le ZIB tetawh hun zang
3. Melbourne ah ZAA tawh hun zang tua ban ah ZYA om ding alunggulh khangnote in sazuksa ngiat tawh zintun dawnna saliang hong khaina le vanleng tual ah khakna nuamtak zang khawm
4. ZYA Brisbane thathak lakna neihpih
5. ZYA Melbourne hong ding khia.

Lungdam kohna
* A khuakhua ah Zomite ki it kikhualna le ki nekngaihna tawh an hong nekpih, khuasung hong vakpih le hong lengla akua mahpeuh tung lungdam mahmah na kong pulak uh hi.
* Zin hong tung sak Inntek te
- Adelaide - Pa Pau Mang & Nu Mannu
- Brisbane - Pa Dal & Nu Niangkhek
- Melbourne - Pa Khup Pau & Nu Hauniang te innkuan in Sazuk Sa mah tawh zin hong dawn nate hang in zong lungdam mahmah hi.
* Pawlpi, Biakna vai hi takei le Zomite itna tawh Biakinn hong zangsak, hun hongzang sak Siale Upate tung zong lungdam mahmah hi.

 

 

Shared by Kam Suan Mung

Read More

Ni Lamdang Khat

Zomi tading in ni thupi pawlkhat a om hang in Ni Lamdang tam hetlo hi.  October 24 ni pen Ni Lamdang khat ahi hi. Bhh cih leh ;

1. Zomi minsel party khat ih neih sun ahi ZNC/ZCD party    suahni pen October 24 ni hi. Tukum (2017 kum) 
October 24 ni in kum 29 cingding hita hi.

2. October 24 ni pen UNO ni hi. Hih ni in UN Charter (UNO thukhun) akikipsak ni hi.

3. ZRO' makaih ahi Thautawi Kipawlna nam 8 te' kigawm khopna ahi UPF (United Peoples' Front) te India kumpi tawh October 24 ni in kihona nei ding uh hi. Pawlpi tuamtuam in thungetna tawh a panpihna ding in ZRO in tukha 20 ni in mipi' tung ah cialna nei hi.

ZCD Birthday
Tukum ZCD birthday pen ZCD makaite' omna ahi Naypyitaw ah October 24 ni in kawlgam ulian pawlkhat tawh kibawl ding hi. Hih pawi ah kihel ding in ZCD GSpu Pu Gin Kam Lian leh Pu Pau Lun Ming Thang te'n itna ngaihna takpi hong sam uh ahih man in lungdam in ka angtang mahmah hi. Ahi zong in gelkholhsa vai tampi leh gelkholhloh vai tampi om ahih man in ut mahmah tase leng ka paithei kei hi.
Mai 2018 kum ciang in ZNC/ZCD kum 30 cingta ding ahih man in tua kum 30 cin pawi khiatna neitak leh thupi tak in ih bawlzawh ding thupi ngaihsut huai kasa hi.

UPF Vai
UPF leh India kumpi te' kihona hong thupi mahmah khading hi. ZRO in thupi ngaihsut lua ahih man in mipi te'n thungetna tawh hih kihona apanpihna ding in angen liang uh ahi hi.

Hih kihona pen a 4 veina hita a lungluthuai tektek hi. UPF, India kumpi leh Manipur kumpi tuateng 3 kimu tuah ding ahi hi. UPF in Manipur state sung pan in India thukhun Article 244A bulphuh in State thak khat angetsawm uh ahi hi.
Hih dinmun tan tunna ding pen a kum 10 val bang asawt ahi hi. 

ZRA leh India galkapte 2005 kum lai pekpan in kikap loh tuak ding in langnih thukimna na neithei uh a tua pan abanban in ong pai toto a tu a tan atungta ahi hi.
Zosuan sung ah Mizoram state khat om khin a Pasian' thukimpihna a om leh asawt lo in Manipur state sung pan Zosuan te'n State khat ih ngah ding hi. Mizoram state tawh aleitang kizom ahi hi. Tua state tegel tawh leitang kizom ahi kawlgam sung pan Zomi State khat ngahlai le hang bangzah ta in Zomite ih maban limci ding hiam ?

Gamlimte aki laihlaih hilel a, tulaitak a ih muh ih neih gamlimte zong ki laihlaih lai lel ding hi. Spain gam pan Catalonia gam thak hong piang khia henla Iraq gam pan Kurdistan gamthak hong piang leh tua husa in 2011 kum a Arab Spring dan mah in leitungbup lawh mahmah ding hi. Gam thak tampi piankhiat lawh ding hi.

October 24 ni pen Ni Lamdang bek hilo in Zomite' tangthu ah ni thupi khat hong suak ding hi. Pasian um Zomi te'n ih Pasian pom teetaa ding hihang. Leitung gamlim akikhelsak thei pen Pasian bekmah ahi hi. Hallelujah !

Sian aw lum bang hong sung in.

Note' itna sung ah

(Mung Laan Thang)

Zangkong

___________________
UPF Sung ah akigawm thautawite

Kuki Revolutionary Army (KRA), Kuki National Front (KNF), United Kuki Liberation Front (UKLF), Kuki Liberation Army (KLA-UPF), Zomi Revolutionary Army (ZRA), Kuki National Front (S), Hmar Peoples’ Conference/ Democratic (HPC-D) and Zou Defence Volunteers (ZDV-UPF).

Read More

သမီးရဲ႕ေမေမ - Sian Neih ( ရွန္းေန )

ၿငိမ္းခ်မ္းေရးဂီတပြဲေတာ္ Level 1 ပဏာမ အသံစစ္ေဆးျခင္း (ကေလးၿမိဳ႕) ပြဲစဥ္ရဲ႕ လက္ေရြးစင္ (၁၀) ဦးထဲက တစ္ဦးျဖစ္တဲ့ ၿပိဳင္ပြဲ၀င္ ရွန္းေန ၏ သီဆိုယွဥ္ၿပိဳင္မႈ 

~~~~~~~~~~~~~~~~~~~~~~~~
သမီးရဲ႕ေမေမ
ေတးေရး - ေကာင္းေကာင္း

Read More

A (9) VEINA ZOSIAM TE ZOGAM AH KUANBAIH TA DING HI ( ZOSIAM GOSPEL MINISTRY )

 A (9) VEINA ZOSIAM TE ZOGAM AH KUANBAIH TA DING HI
Thunget cialna :.

Kum 2008 pan in Zogam ah Kha leh taksa damna bukim apuak den Zosiam Gospel Team te asawtlo in Zogam leh Zomi te tenna khua te ah kuan kik ta ding ahih manin Zomi bup tungah thungetna kongcial uh a, damna leh bukim ipuakna ding thu zong kong zasak uh hi.

Abeisa a kuanna khuate etkikna:
Kum khat in Center nihta in kizang in akim a khua khempeuh ah kizasak ahih manin Center khat ah khua 10 kim panin hongpai thei zel uh hi.
1- Tuimang leh Haiciin Center-2009
2- Thalmual leh Tauleng Center-2010
3- Thuklai leh Limkhai Center-2011
4- Laitui leh Ciau Center -2012
5- Vangteh leh Phaitu Center-2013
6- Suangzang leh Heilei Center-2014
7- Suangsang leh Tuipi Center-2015
8- Dimlo leh Khumnuai Center-2016
9- Tun --- Valvum leh Haupi Center ding-2017.
10- Maikum -- Lamzang leh ?

Kum 8 sungin cina kibawl 21119 pha khin ta hi. Gupna ngahthak pen a list kiciamteh lo a, Topa tungah ki ap hi, ahizongin tampitak mah Topa kiang kitun khin ta hi.

Zosiam nasep pen Veina leh Lainatna tawh nasepna hi a, Siavuan Siamah te akipan akuan mimal khempeuh pen kipumpiakna tawh akuan den ahihi.

Zosiam nasepna sungah mimal , innkuan, pawlpi , khua leh gam tuamtuam pan akihel tam mahmah a, adiak in kumsim in zatui zaha leina ding innteek pan deuh bel omdenden hi.

Zosiam nasepna hangin agah deuhte:
1- Kha damna omden hi.
2- Taksa damna omden hi.
3- Pilna thu kigen a, naupang ten visionthak nei uh hi.
4- Damna thu kigen a khuasungah siangthona omtuam hi.
5- Cina lo pawlpi omlo ahih manin kipumkhatna om hi.
6-Lasiam ten lasa uh a, khuazangbup nosuak mahmah hi.
7- Zosiam te zatui zaha zat leh mundanga te kibanga ahizongin adamna kibang hetlo cih kimu mahmah hi. Banghang hiam cih leh zatui zaha te thupha kipia masa in tuakhit ciangin kizang pan hi.
8- Kamphen kullo in lupna tungleh innphual zangah Siavuan Siamah ten damna thupha puak uh hi.
9- Khuaneu khuata te ah Siavuan Siamah te leh Pasian nasem te kipai ahih manin khuapih te adingin angtan huai mahmah hi.
10- Zogam nasepna sungah kuamah deidan omlo in na kisem ahih manin mikhempeuh in sangthei uh hi.

Valvum Center ding vai:
Valvum khua ading tawh kisai in Sanggampa Gia Khual- Louisville in akhua atui veina lainatna tawh zatui zaha manding ah innteek pandeuh hi.

Haupi Center ding vai:
Haupi khua ading tawh kisai in Haupi khuami gamdang omteng in zatui zaha manding innteek pan deuh uh hi.

Amau nihte tungah lungdamna lian mahmah deuh hi.

Tutunga Zosiam nasepna dingin akihel kha teng:
1- Louisville Zomi te.
2- Austin Zomi te.
3- Grand Rapids Zomi te.
4- Indianpolis Zomi te.
5- Columbus Zomi te.
6- Tulsa Zomi te.
7- Newbern Zomi te.
8- San Antonio Zomi te.
9- Bowling Green Zomi te.
10- Twin Falls Zomi te.
11- Salt Lake City Zomi te.
12. Nashville Zomi te.
13- Owensboro Zomi te.
14-Chicago Zomi te
15- Phoenix Zomi te.
16-Lansing Zomi te
17-Bethel Zomi Baptist Church- Kalaymyo.
18-Des Moines Zomi te
19-Portland Zomi te.
20- Seattle Zomi te.
21- Houston Zomi te.
22- Dallas Zomi te.

Tuni ciang pekkhat peknih akipan akihel kha khuateng hia, mailam ah akihel te ahunzui in kisuah to to ding hi.

Tukum in Valvum leh Haupi Center panin cina mi 2500 peuhmah bawldingin Zosiam ten kiginna kinei hi.

Nungkum in mitlimlang power nei te mal 800 kipua pen cing zolo ahih manin tutung in mal 1000 puakdingiin kigeel hi. Mittang 1000 apuaksawm ihihi. Mittang khat adingin $ 2 ta abei ahihi. Cina mi khat bawlna dingin $ 3 dan a kingaihsun ahihi.
Damna khaici tuh nuam lai iom leh itna kongpi kihong lai hi.

A (9) Veina Zosiam Trip ah apaiding lamet teng:

1- Rev. Pau Khan Khai.
2- Pu Pau Lun- Chin State Health Minister.
3- Pa Mungpu- ZYA GS.
4- Dr.Thang - Dental Consultant , Kalay.
5- Dr. Kam Hon Khai- Medical.
6- Dr. Piang- Medical.
7-Dr. Muan - Dental.
8- Simah Dimta- Nurse.
9- Siamah Lun- Nurse
10- Siamah Kimno- Nurse.
11-Rev.Lo Kap
12- Sia Peter Khai-
13- Siia David Mangno
14- Lasiam Kimboih.
15- Lasiam Muanpi.
16- Lasiam- Kimtawng.
17- Pa Do Cin Thang.
18- Pa SK Gin Pau
19- Sia Sawmpu.
20- Tuangpi- Video/ Camera.
21- Pa Khupboih-
22- Siamah Mangngek.
23- Siamah Lianseuh.
24-Pa Lo Suan Mung.
25-Siamah Niangsen.
26-

Zosiam pai masak laiin khe tawh kipai ngekngek a,ahizongin tu in Zosiam team sungah mawtaw zattheih ding Topan hong omsak ahih manin kilungdam mahmah ta hi.
Mawtaw zatding anei te:

1- Rev. Pau Khan Khai
2- Dr.Thang
3- Minister Pau Lun
4- Pa Mungpu
5- Pa Do Cin Thang
6- Pa SK Gin Pau
7- Pa Khupboih
8- Sia Sawmpu

Dec 13 ,2017 nitak in Zosiam team khempeuh Zosiam Zumpi Kalaymyo ah kituah dinga, Bethel Zomi Baptist Church Biakinnpi pan in khahkhiatna omding hi. Thungetna ah hongphawk ciat un.

Dec 14-15 - Valvum Center hiding a,
Dec 16-17 - Haupi Center hiding hi.

Zosiam adingin mapang sa khempeuh tungah lungdamna lian mahmaha, tutungin mapang ding khempeuh te tungah zong lungdamna iko khol hi.

Thapiakna, thungetsakna leh neihsa lamsa akipan tha leh ngal tawh Zogam leh Zomi te adingin imapanna Zosiam ahihi.

Kha leh taksa damna ding Khaici tuh khempeuh te tungah Topa in ei mimal , innkuan , pawlpi leh gamsungah damna bukim hongtung sak tahen.

Lungdamna leh Lunggulhna tawh,

Rev. Pau Khan Khai.
Zosiam Gospel Ministry.
Oct 16,2017.
Phone: 502-291-1948.
zosiamgospel@gmail.com

Read More

Into Your Soul ( own-tune ) Instrumental Music Performed by a Zomi Guitarist: Kumpu7

Into Your Soul ( own-tune ) Instrmental Music ( HD )

Kimpu7 

Khua Do Festival 2017

ZIOKC

Oct 14th, 2017 ( sat ) 

Oklahoma City, Oklahoma 

USA

Youtube Link>>>kathelnah

Read More

Naupang Pat-tah Zia Ding Tawm Khat - Ciin Hawm Cing

 
Naupang pat-tah zia ding tawm khat nong nget na bg un ong post khia ingh.....hih na ngaih na tungtwn in Tate apantah siam Nu le Pa ahi dg in ih biak Pasian in thupha ong pia kimciat ta hen....lungdm!

Shared by>>>Ciin Hawm Cing

Read More

DONGHU ( Mawtaw accident ) CONCERT OM DING

Zomi guitar festival committee makaih na tawh Zogam dongtuak ( mawtaw accident )
te hehnep na leh donghu dong na concert ki bawl ding.

A mun: Agape AG Church
A ni : Oct 19th, 2017 ( thu )
A hun : 7pm-10pm

Lasa	Guitarist
Thawnkham VC Mang Cingpi Cin Pi Jerry Kap Nianghpi	Deihpi Lampi Kimthang Aung Aung Thangno Tawipu Ginpi

Share by>>> Zen Lian

Read More

Tulsa ah Zeisu Movie Thak Lahna Om ding

 

  " ZEISU ZOMI KAMPAU "
ci in Zeisu Movie thank lahna om ding hi.
Amun : ORU - Christ Chapel ( Tulsa, OK , USA )
Ani : Nov 5th, 2017 ( Sun )
Ahun : 5:30 Pm ( CDT )
Lutman: Akhonkhawng ( manlakloh ) 

Hih Zeisu movie pen Jesus film production te makaih na tawh
a kibawl ding hi.
A NEW LANGUAGE OF THE JESUS FILM

Shared by>>> Sia.Thang Boih

Read More

DIANG IN - ZOMI CHRISTIAN ASSEMBLY ( Official Music Video with Lyrics )

Diang In (Get Up - Planetshakers)
Album - Jesuh Kicing
Lalet - Rev.Pau Sian Mung
Zomi Christian Assembly


Key: F (Dm)
Verse 1
Ka husan simin Nang kongphat ding
Ka sepleh ka bawlna peuh
Ka hih theihna tengtawh
Kong Phat ding tualo bangdang omkei

Pre-Chorus
Ih lungsim khempeuh pumkhat in gawmkhawm in
Lamin diangin, Topa minphatna pia ni

Chorus
Ih vekpi in Diangin, A mah Phat ni
Ih vekpi in Lamin, Diangin ih phat ding
Ih vekpi in Diangin Suakta takin, Topa Phat ni

Bridge
Nang…Nang Na khempeuh kongpia hi
Nang...Nang
Nisim-in ka nun-na
Nang...Nang
Na khempeuh Nang a hi
Nang…Nang...Cho:

Youtube link ( share by ) >>>Zomi Christian Assembly
FB link ( share by ) >>>Zomi Christian Assembly

Read More

Tuciang World Cup ( 2018Russia ) a qualify khinsa gam 23 te...

1.Russia

2.Brazil

3.Iran

4.Japan

5.South Korea

6.Saudi Arabia

7.Mexico

8.Belgium

9.Germany

10.England

11.Poland

12.Costa Rica

13.Nigeria

14.Egypt

15.Iceland ( leitung tuankhia WC kihel masak pen kum )

16.Serbia

17.Spain

18.France

19.Portugal

20.Panama ( leitung tuankhia WC kihel masak pen kum )

21.Argentina ( messi om lo hileh tukum kihel zolo maikha ding )

22.Uruguay

23.Colombia

Read More

HAICIIN KIKAPNA ( 2009 )

Thupatna
Nidang lai in Zomite kawlgam galkap sung ah galhang sahang in hong kiciamteh a ulian milian asuak zong tampi ih om ngei hi. Ahiding mah zong ahi hi. Bhh cih leh kawlte' minam galkap ahi BIA pen 1941 kum teh piang pan hi. Zomite'n tua mapek apaisa kum 47 ahi 1894 kum pek pan a kipan Chin Hills Battalion mintawh mikangte' pattahna nuai ah hoihtak phatak galkap dan asin khin sate ih hi hi. Tua ahih man in kawlte' khutnuai nangawn ah galkapmang (General) dong asuak ih om ngei hi. General Tuang Za Khai (L) hi. Amau bel mikangte' hunlai in galkap ulian asuakzo omlo uh hi. Tuni dong kawlte galsiam in kigen nailo hi.

Ahi zong in tua Zomi galhang sahang a minthang te'n a galdona sadona te uh lai in na gelh ngeilo mawk uh ahih man in ih Zolai tawh galdona thu om nailo hi. A om sunsun pen mi a akigenkik hi a tu a pen bel a galdo lak a kihel khat i gelh ngiat ahih man in lunglut huai in lungdam huai zong kasa hi.

Hih Haiciin kikapna pen 2009 kum February kha ni 5 ni a thupiang ahi hi. Tua hun laitak in India te' i a 13 na kumpi nihna (Vice President) ahi Dr. M. Hamid Ansari (2007 - 2012 kikal sem) kawlgam azin laitak hi. February ni 5 - 8 sung kawlgam ahawh laitak ahi hi. Haiciin ah kikapna apian ni lian in tualaitak a kawlgam kumpi ahi Than Shwe tawh akimuh ni lian uh ahi hi. India ulian te kawlgam hong zin sial un (tuni dong) kawl kumpi te'n kawlgam ah meitei singnuaimi omlo ciden keei uh ahih man in a omlam uh lahna a kikap ahi hi.

Hih Zogam galkap ZRA leh meitei galkap PLA te Haiciin ah akikapna thu uh tua hunlai in internet tung ah hong genkhia masa penpen Malaysia a om Haiciin khuami Pu En Khan Pau ahi hi. Ama' hong suahsakna anuai a bang hi.

From: En Khan Pau <pauhaiciin@gmail.com>
Subject: Haiciin Khua ah ki Kaptuah....
To: "
Date: Thursday, February 5, 2009, 2:16 AM

To,

Dear- HaituiLaizom,

Tuni ( 05-Feb-2009 ,Thu ) in Ih Khua Haiciin ah, ZRA te leh Meitei te ki kap kha uh cih thu thak hi a, Pasian thupha hang tawh tuciang2, thu ki zak na ah a Liam a bai, a si a mang zen om kha loban  ah, Inn leh lo zong nak kap khak lua cih ki za nai lo zen sam hi.

Meitei te 30 bang pha ding ci uh a, Z te bang zah hiam cih gen cianna om thei nai lohi. 
A Mun pen Koveng Sang Innveng lam deuh teng hi a,
Pi CinMual leh DotciangMual ki kal teng dan hih tuak deuh hi.

A ki kaptuah hunsung uh Nai 3 sung bang sawt ci uh a, Tuahun sung in Khuasung mi khempeuh kua mah Inn ah om ngam lo in, Khuataw lam ah ki tai mang
vek a, Thauging a daih deuh ciang in tawm2 in ki lut kik ngam pan ci uh hi.

A hun pen zing sang nai ( 10:00 AM ) pawl khawng aki pan dan hih tuak hi. 
Tua hun sung teng Ph line ki hopih thei lo a tu in Hand Phone
te a hizong InnPhone te ahi zong angei bang kik ta hi.

Thauging pen tawm lo in,ki nawh mah2 a,thautang tam ki kap khiat tuak mah2 a, a mun
lam neh deuh pawl khat in a pai2 na vuah thautang hawm ki mu thei hi ci uh hi.

A Kuamah peuh in Inn lam a om te a ding in thu nget na tawh phawkciat ni....Mailam ah hih bang thuhoih lo ih Khuasung ah ong tun nawn loh nang in thunget na tawh dalciat ni......A kua mah peuh in ih Innkuanpih ciat uh zong hopih ciat lenghoih ding hi.

A thucing zaw leh a ki cian zaw a thei te in zong nong beh lap toh ding uh ong zawn ing.
A kuamapeuh Topa thupha........

Pauhaiciin,
KL,Malay

Hih Haiciin kikapna ah akihel ZRA te amakaih khat ahi Pu Zogam Galngam in anuai a bang in gen hi.

Haiciin Kikapna
By: Zogam Galngam
Haichiin Kikapna vai pen akician in ong gen ning ei, sanggam te aw,

Haichiin ah PLA te mi 35 full arms,l leh double arms (avui atang gina tak) 
sitset in lut uh cih kiza ahihman in hihte pawl hong maingal le uh 
asawt teh poi mahmah kha ding hi cih ki ngaihsun ahihman in makai te'n 
plan (gelna) hong bawl uh hi.
Thu akikan sak ciangin meitei te kuamah duty zong om selo uh a, 
nuam tak a om hilhial lel uh cih kithei khia hi.

 Hih meitei te notkhia ding in ZRA te mi 15 Operations commander pa'n sam in, amau te Mt. Sinai Hq (ZRA phualpi khat) kiim a khua khat a, Training zo tung te field practical kuan dan a post kihong thak ahi hi.

Suangdawh khua atun un nitak nai 9:30pm bang gingta hi, tua pan in nai 10:00pm in Haichiin khua manawh in kuan uh a, mission pen bel Lingthuk a ambush bawl ding in ni 3 kiim khawng ngak ding cih hi.

Aihhang in Lingthuk khua pelhna dingin Haiciin khua tot kul veve hi, zingsang nai 5 ma in Haichiin khua gei kitung khinta hi, tua pan in thu kikan a, mi kava etkhiatsak uh ciangin kua mah duty omlo uh, khualai ah om uh, a sap uh ahi i Zomi te' inn building khat ah giak uh cih kitel mahmah hi.

Akhua pamlam ah ambush bawl ding in group khat School omna lam ah kisawl phei a, tua ten ambush na mun ding a tun ciang un, messege pia ding uh a, mualtung biakinn a om ten kap ziau dingin, lampi a taikawm sa a kap a lut ding pawl zong kisep khinta uh hi.
Nai 7 bang ging ding hita, lo kuan pawl khenkhat te kuan ta uh a, amukha pawl omta uh a tua te mipi bangmah cilo ding; lo kuan suak dingin thu kipia hi.

Operations commander India a om pen kiang ah akap dingdan thu akizak sak ciangin, tua dan in hihkei un, ambush ding mah in kithawi zaw un ci, tua ban ah khua ah mi enkhia ding a akisawl ciang in, khuamite'n sangkahte lutsak phot ni; ih tua cih kei leh numei naupang liam gawp ding ahi c'in ngetna hong bawl uh ciang un tawm khat ki lungngai phot hi.

Meitei te kap man a i Zomi pih te in a thuak ding bel kingaisun ngam hetlo ahihman in plan (gelna) kikhek thak a, biakinn tung vum a omte kisam khia a, ambush ding a na pang te thu lah set(walkie talkie) ah kiman nawn lo ahihteh amau tawh kithuzaak sawm in amau lam kizuan kik thak hi, khua khanglam ah kipai a, gamlak a singkeu gingte bang nak ngaih lua mahmah ahih man in, damtak in kal kisuan khiankhian hi.

Nai 7 sat ding hita a Wireless set tawh kam kisang thei ta hi. Ahihhang in PLA te'n athu na thei ta uh a ana ki withdraw (nungkin) ding in kithawi uh hi, ambush ding a tute' kiang lampan mi nih pai masa uha tua te'n meitei te nungkin ding na mukha lian uh a, ZRA khat in akap leh athau suaklo sese hi. Ahih hangin PLA te'n akap kik ma in bomb paih man bilbel hi.

Thau masa agin ma in lawm te' kiang a zuatsawm te pawl leh PLA te ki sutuah khadektak uh a, phiit/faifuk(whistle) tawh kisam uh a, tua pan ki pheng kap pah hiau uh hi.

Kikap kipan hita, ZRA te mi atamzaw pen lingthuk lampi lam ah om uh a, mi thum school (sang) tunga tang ah om uh hi

Tua hun in Meitei te tawh aw kisang kawm in nasia tak in kikap ziahziah a, amau ei Zomi te MEHPOK MEHPOK ci in hong tawng uh a, En amau NGARI peuh kicih san zel hi. PLA te lau a naupang kap bang in akap dapdap bang zong om uh a a commander pa uh in lau lo a pang dinga sawl in a han loiloi khawng zong kiza hi.

ZRA commander pen in tua lampi lam a omte kiangah khua lut dingin hong tai unla, lamsak lamkhang lam kap kawm sa in hong diang phei un ci'n thupia a, amau zong thalawp tak in hong diang phei pah uh a, Zogam Tangval hong kuan ungei, No meitei te milim biate, Ko Zomi te anungta Pasian a bia te hi ung ei c'in kiko ziah ziah kawm in hong tai phei uh a thau zong hong kap phei ziahziah uh hi.

Tua laitak in School sak a Mualtung a om te'n van lam ngat in thau na lawnlawn uh hi. Deihna bulpi bel akhua lam pan a hong leh um khak ding uh kilau ahihman hi.

Hong lut pheite pawl a khua hong tung dekta uha lam kawina mun a po mawngkung pan in meitei te mi nih in thakhat a ding kawm in na brass (kap) mawk uh ahih man in ZRA te zong lam pam leh lei lak bawh pah lian uh hi. Tua mun pan ma hong sawn theilo uh cih akitheih ciangin mualtung a om ZRA te khat kumsuk in mawngkung omna lam va brass (kapzak) suk hi.

PLA te'n asak vuah mi om cih atheih uh ciangun thau leh bomb tawh kap to ta uh hi, pan zawhloh ding khop in thautang bekbek guah zuk bangin zu zuahzuah hi. Athautang zat te uh zong nih vei a puak te hilai hi. Akap khiat ciang un puak a, mun khat akhak ciang in puak kik leuleu hi. Bomb tampi tawh zong khuasung lampan leh lampi lam pan in kap ziahziah lai uh ahih man in singkung dawn te ah abomb uh puak ziahziah hi.

Lampi lam ate'n lah ma hong sawn theilo, mualtung a omte lah aki heptoh uh kul ta..tua hun ah meitei te mi 3 khuasung lam a ki withdraw (nungkin) kimu a zigzag (a kawi zikzek) in tai uh hi, mualtung a omte'n tua te ban kap uh a, mi innnuai a alut dong uh kimu hi.

Damdam in thauging hong dai a, kizong tuah in Lingthuk lampi ah khualbuk khat ah ZRA te kisutuah in, amau zong mangta/kihemkhia ta ahihciang un ci in kuanlam a totlohna lam ah pai ding in ka kithukim uha, lui khat zuisuk suk in Singngat a ana om Zomi mi 3 omte kiangah lampi ong hilhna dingin ka ngen uh hi. Lui dung zui in ka paipai uh a India gam a khua ka tun uh ciang un nitak nai 10:00 pm hita hi.

Pasian in Zomite a ompih dan leh Pasian a nei Minam ihihdan tua ni a kipan katel sinsen hi.

* Meitei te mi 35 full arms (avui atang tawh kidim sitset) pen ei Zomite mi 15 bek, van (thau) tawi mi 12 khawng hilel ding hi.

* Khua lam a lut dinga hong taiphei lai un meitei te'n ana kap na uah, ih cadre (galkap) khat athau magazine (thautang bawm) kha vang kha, adang khat a bag rucksack (thung ip) ataklam liang a agui kap tan uh, Mualtung a omte belh ding Singkung a lian om vetlo ahihhang galte' bomb te'n amau mun kha ngei lo, khat in apam ua singkung gei kha in abomb hu bek in zap kha.

* Meitei te pen thautang, thau, bomb bukim mahmah uh, thautang khat na kap a na panmun na laih pah kei leh bomb in hong deng ziahziah ding hi.

*Anungta Pasian a nei Zomi te pen Pasian in ompih den ahihman in galvan bek hilou in, ikikona husa nangawn in zong nasem mawk hi.

I mipih Zomi te asih a liam khak ding uh ki khual lo hizen leh Meitei te tampi si ding uh hi, ahihhang in Meitei makai pa' omna Zomi te zong gal banga ki ngaihsun lo in, itna tawh aki et man in amah buaina ding bangmah akigel lo ahi hi. Tua hikei leh khuavak ma a khuasung ah kikapna piang khin ding hi.

ZRA te'n Pasian ki muang mahmah a, Thautang khat i nei zong in i gal te kidelh ngam hi. Tua mahmah hi hong lauhna pipen uh.

ZRA in na khatpeuh a sep kuan ciangin lungsim saupi nei a, i khua te ah va om zo den ding, va vengbit zo den ding ihih vet kei leh na vasep pen saupi poi pha hi. Mipi in thuak thei a hausa in zong thuak ding ban ah amipi te mahmah zong kawl galkap te'n bawlsia gawp thei lai hi.

Tua ahih man in mipi' thuakding khualna tawh adiak in kawlgam lam ah ki gamtang mengmeng nuamlo hi.

Tu'n sung khat pan piang hi ngeingei hang e laizom Zomi teng aw.

Galsiam sasiam nam Zosuan tateng in ih siamna gawmtuah thei in zatsiam hileng sim leitung ah kuama' ta in hong nang zolo ding hi.

Zogam Galkap ZRA damsawt hen !

Note' itna sung ah

Mung Laan Thang

Zangkong

Read More

A Lianbel Siampipa Pope Francis Bawl Missa Biakpiakna Yangon ah kihel theih nang thu kikupna leh khen satna

Ani : 19.9.2017 (Tuesday)
Ahun : Zingsang (10:00 -11:30)
Amun : Siadawhuang
Meeting Kah teng:
(1) Fr. Peter Thawng Mung
(2) Fr. Stephen Mang Lian Tuang
(3) Fr. Titus Zam Lian Pau
(4) Fr. Domininic Thang Suan Langh
(5) Fr. Joseph Pau Kap Mung
(6) Fr. Joseph Thang Nen Zo Mung
(7) Fr. Timothy Thang Do Cin
(8) Fr. Andrew Thang Ngaih Lian
(9) Fr. Joseph Pau Lian Kham
(10) Fr. Paul Lang Muan Lian
(11) Sr. Francisca Ciang Ngaih Lian
(12) Sia William Kam Khen Pau
(13) Sia Bernard Thawng Sian Lian
(14) Margaret No Ngaih Lian
(15) Veronica Niang Hawm Cing
(16) Felix Lian Thawn Kim

Hun uk (Moderator)
Hih Meeting hun sung tengin Fr. Joseph Zo Mung in hun uk (Moderator) hong sem in a nuai aa bangin hun zatna ki nei hi.
Kipat thungetna : Fr. Peter Thawng Mung
Meeting Bawlna tawh kisai thu genna :
1. Fr. Titus Zam Lian Pau
2. Fr. Joseph Thang Nen Zo Mung
Thu kikupna leh thu khen sat na : Meeting kah teng tung pan
Thu khensatna teng sim kik na : Sia Bernard Thawng Sian Lian
Tawp thungetna : Fr. Fr. Timothy Thang Do Cin
A masa pen in Fr. Peter Thawng Mung in kipat thungetna hong makaih hi. Tua khit ciangin. Tua khitteh Fr. Joseph Zo Mung in Yangon aa Meeting kah na sungpan Pawi sim in pai ding vai, Form fill up ding vai leh bang ci pai ding cih tawh kisai teng hong gen hi. Tua khit ciangin thu kikupna leh khen satna te ki nei hi. Meeting sungpan kensatna teng Sia. Thawng Sian Lian in hong sim khia kik in tua khitteh Fr. Timothy Thang Do Cin ii Makaih na tawh tawp thungetna ki ngen in Meeting ki man sak hi.
Thu genna : Fr. Titus Zam Lian Pau
Fr. Titus Pau in Pope Kawlgam aa hong paina ding vai Yangon aa thu kikupna sunga a kigen thu te sung pan sum don ding tawh kisai thu kikupna khensat na teng a nuai aa bangin hong gen hi.

1) Diocese khat in tengza (10,000,000Ks) ta khia ding

2) Siadaw te khat in tengsawmta (1,000,000 Ks) khia ding

3) Topa te khat in tengnihta (200000 Ks.) khia ding

4) Thuzui mi sum bawl mi hau in a ki ciamteh (…) tengin teng sawmnih ta
      (2,000,000 Ks.)khia ding

5) Name Card ngah na ding Form fill up man mi khat tul khat ta (1000 Ks.) khia ding

6) Pawi sung ah Name Card a nei lo te ki lut sak lo ding, name card a neih hang
     zungim nam mite ki lutsak lo ding

7) Pawi sungah thungip (bag) pua thei lo ding, ih van puak ding tuithawl,
     labu, etc. teng pen Plastic tuipuan a sunga van om teng a ki muthei a
     siangtho te bek tawh pua thei ding

8) Pawi sunga silh ding T-Shirt bawl dingin tua puan pen pawi sim tengin
     lei ding, tua puan silh te bek pawi ah lut thei ding. Tul nga (5000 Ks.)
     kim man ding. Pawi tawh ki sai-in Diocese mi tawh puan thoh thei lo ding

9) September kha (24) ni pan November kha (26) ni dong Sunday Collection
     teng khempeuh puak ding cih thu te leh Pawi vai tawh kisai October
     kha (14-15) nite in a nih veina Meeting om ding cih thu te hong gen hi.
Thu genna: Fr. Joseph Thang Nen Zo Mung
Fr. Joseph Zo Mung in Yangon ah Meeting a kah na pan in Zin tun na ding,
(Form fill up) zia ding leh Yangon ah pawi bawl ding dan tawh ki sai teng, a nuai aa bangin hong gen hi.

1) Pope Francis pen Nov. 27, ni Yangon hong tung ding

2) Nov 28, ni Yangon pan Naypyidaw pai ding

3) Nov 29 ni Yangon (Kyaitkasa) Bawlung kimawlna munah Mipi tawh
     Missa Biakpiakna om ding

4) Nov 30 ni Yangon St. Mary’s Cathedral ah Khangno Missa Biakpiakna om ding,

5) Missa man ciang tua ni mah in Pope pen Yangon pan Bangladesh ah pai ding

6) Yangon Vanleng tualpi panin Nov 27 ni-in Pawlpi min tawh vaidawnna a ki
      sehna om bangin a kisehsa tengin nei ding

7) Nov 28 ni Pope Francis Naypyidaw pai ding, Naypydaw panin Kawlgam
     kumpi mintawh vaidawn na nasia takin ki bawl ding

8) Yangon Diocese pan in zintun na ding mun hong vai hawm sak ding,

9) An nek tui dawn ding khempeuh pen ei leh ei hi ding a hi zongin a mipha zah
     ih ki ciat leh company te tawh ki zop in ih deih dan dan in ki vai kha thei ding

10) Yangon tawh a ki gam la lua lo (Pathein, Pha-ann, Pyay, Mawlamyine,
       Taungngu, Taunggyi, Madalay) cih Diocese pan a pai ding teng pen
       zan Nov. 28 ni zan aa pai ding 29 ni zing tung aa tung ding Pawi ah
       lut suak dingin kikhop man ciang ciah kik ding zan tam lo ding

11) Kuan sung pen a lut baih te in tutna a mai lam a ut nana teel thei ding,
      Pawi ki patma hun nai nih pan in lutna kong teng kikhak ding
      a hih manin lut baih ding ki sam hi cih thu te hong gen hi. 

Tua khitteh ei Kalay Diocese sung pan a pai ding teng zin tun ni ding leh zin ciah ni ding, sum ki don zia ding, Maw taw sap zia ding cih thu te kikupna leh khen satna a nuai aa bangin ki nei hi.
Thu khen sat na teng
1. Parish kim pan Form a ki fill up sa te Kalay Myo Siadaw huang Social
    Communication zum ah a man lang thei thei in puak ding, September
    kha bei ma- in puak kim zo leng hoih ding hi. Oct kha ni (10) ni pen
    a nunung pen pen in ki sang lai ding a, tua ni khit ciang a ki
    puak te ki sang nawn lo ding hi.

2. Kum (7) tung siah a pha mi khempeuh in Form fill up ding. Form fill up
     man mi khat in sum (1000ks) tul khat ta khia ding.

3. Form fill up mi peuh mah in a Parish Priest (topa) kiangah form a ap ni-in
    (a) A mah leh a mah in pai ding maw, Diocese vaihawm na tawh pai
          ding cih kitel sak masa ding
(b) Diocese vaihawm na ih cih caingin a diak diak in Zin tun ni leh
       zin ciah ni ding, mawtaw kawm zia ding, sum ki don zah ding cih
       te leh zin tun na ding cih te a thupi pen in kikum hi.
(c) Kalay Diocese teng a ki theih na dingin Nu mei leh Pasal Zodial(Ngawngawh)
      bawl ding khat ciang tul nih (2000 Ks.) ta man ding

4. Diocese vai hawm na tawh a pai ding mi peuhmah in Parish Priest
     te kiangah form up ni-in hih a nuai aa bangin sum pia pah ding.
     Kalay to Yangon (maw taw sap ciah leh kuan aa ding) sum (25000 x 2) = 50000 Ks,
     Yangon myo sung pawi pai nang mawtaw sap = 15000 Ks, Form fill
     up man = 1000 Ks, Zodial man = 2000 Ks. A vekpi in a ki gawm = 68000 Ks.
     Pawi puan lei na ding leh An nek man pen ei leh ei tek hi ding, ih deih
     bang bang lei theih dingin hong ki vai hawm sak ding hi.

4. Diocese vaihawmna tawh a pai ding te khempeuh pen ei ii omna
     Parish tek pan Kalay Myo ciang ei leh ei in Parish vaihawmna tawh pai ding.

5. Kalay myo Siadaw huangah November kha 27 ni zing sang nai 11:00
    lian in mi vekpi ki tuah ding, tua khit teh ih tuan na ding Mawtaw
    tutna Number te mesawk ding, ih ngah number mun ciat ah tut mun la ding

6. Kalay Myo Siadaw huang pan in sun hun 12:00 a sat ciangin Ih
    vekpi in Kawlpi pan pai ding. Yangon pan Khangno Missa a mankhit
    ciang November 30 ni nitak lam nai 5:00 pm in Kalaymyo ah ciah kik ding

7. November kha 28 ni zing sang Yangon ki tung ding aa, Mawtaw tawh
    zin tung na ding ah ki pai suak pah ding hi. Zing tung nang a senpi
    khit ciangin a hun lem dan tawh ki zui-in Pawi bawlna ding mun
    ah mawtaw tawh ki pai pah ding hi. 29 ni zing sang nai 8:00
    pan in Gate ki khak ta ding a hih manin Nov. 28 nitak in lut khol leng
    lem zaw thei ding hi. Tua pen a hun zui-in ki gel lai ding hi.

8. Nov. 29 ni-in ki khopna hun a man khit ciang ih letmat te mang sak
     lo ding, Nov. 30 ni-in Khangno te Missa, St. Mary Biakinn pi
     ah ki zang thei lai kha ding hi.

9. Nov. 30 ni pen sun pawlin Khangno te Missa man ding a hih manin Pope
    ii Bawl Missa Biakpiakna tawh kisai vai teng khempeuh a
    man ding hi ta hi. Missa Man ciangin zin tun na ah ki ciah kik ding a,
    ki thawi pah in nitak nai 5:00 kim pawl in Kawlpi lam zuan in
    Lungnuam takin ki ciah kik ding hi.

NB : Mawtaw ciah leh kuan in a zui ding te peuh mah in ih pai ma in ki cian takin ih theih kholh kul ding hi. An pen ni khat nek nih ta ne leng Nov 27 nek khat, Nov. 28 nek nih, Nov. 29 nek nih, Nov. 30 nek nih, 1Dec. nek khat hi leh a ciil nuam te aa ding in An nek (8) tawh Yangon leh Kawlpi ki kal ciah leh kuan ki cing thei ding hi. An nek khat a tawm pen 1000 Ks in zong ki lei thei a hih manin an nek man tul sawm (10000 Ks.) ki ging leng ki khom mah mah ding hi. Pawi puan lei na ding tawh sum tul (5000 Ks.) tawh hi leh a vekpi in a bei hamtang ding (83,000 Ks) hi. Tua a hih manin sum (90000 Ks.) a nei te a dingin Pawi sim pai tak mah mah hi. R.C.M Pawlpi bek hi lo in Lei tung bup in zong Pope ii bawl Missa Biakpiakna ah kihel khak ding thupi a sak mah mah uh a hih manin ih hun neih lai sung tengin ngaih sun pha pha in Yangon ah Pawisim in ih pai zawh nang hanciam ciat ni.
Hih Pawipi tawh kisai in dotnop tuam tuam a om leh Kalay Diocese Social Communication Director Fr. Joseph Thang Nen Zo Mung tungah hih Phone no. 09456992154 tawh ki dong thei hi.

Thu ciamteh,
Sia Bernard Thawng Sian Lian
Fr. Peter Thawng Mung
Chancellor of Kalay Diocese,
Kalay Myo.

Share by>>>Radio Veritas Asia Tedim Chin Service

Read More