TS.KHAI VEH NA - Pu Pu Thang

2017 kum January kha ni 10 ni nitak nai 8:00 pm in Zogam la kungpu TS
Khai kava veh thei uh hi. US pan hong ciahpak ahi Zomi Innkuan OKC lutangpi
Pu Khaipi te nupa  tawh kava veh uh hi.
Upmawh sang na zawmzaw ahih man in kagen ding ka thei pak kei aa
dingkawmsa in ka en hi. Pu Khaipi bel agei ah tusuk hi.
Hong en gega ahih man in akhoite' kiang ah "Thangboi hi naci o alung a
noptuam khak leh" kaci hi. Hong enen lai hi. Pu Khaipi in "Thangboi hi ei.
Kei leilum Khaipi hi'ng" ci hi. A maipuak tawm hong kikhel hi.

Pu Khaipi in asangkah lai vua a bawlung suihna khawng uh agen teh a aw
hong suak in hong nui hi. Tuakhit teh akhut hong khak ahih man in akhut ka let leh "Thangboi ka  kyay zuu shin (ေက်းဇူးရွင္) nong phak nuam siing e" ci'n hong kapkhia
dapdap hi. (Bang hang in kyay zuu shin in hong ciamteh hiam bel kathei kei hi. Ka

huhzawh luatna zong ka thei kei hi. Ahi zong in tuabang aa hong ciapteh pen
ka khan sung in ka angtan mahmah thu khat hong suak hi.)

"Kap peuhmah kei o. Zomi te'n nang' tung ah leiba tampi hong nei ung
ei. Tangthu tampi gelh cei. Kum tulkhat nungta leng zong nang' gelhzah gelh
zokei nung ei." Ka cih khit teh apum tung ah ka khut nga in thu kangetna ah:

"Santuipi aphelkhap Pasian, suangtum sung pan tui aphulsak Pasian,
Hezekiah ii nungtakna akhatsak Pasian in hih na tapa' nuntakna nong
khatsakna ding in sihna pan hong tankhia Topa Zeisu' Min tawh kong ngen hi"
Ka cih leh nakpi takpi "Amen" hongcih kazak teh ka tha hong dimtuam
hi. Bhh cih leh TS Khai ih cih pen:

- amah leh amah Taang Thang Sian Khai kici ngiat hi. ZOMUS member card bawl
  ka kipat lai un na tuaci khum in hong cingiat hi.
  Acih ding mah hi. Salai leh Taang buai kipatna ama' tungtawn pan ahi
  hi. Mite' valhtum ding a ut ngiatlo Zogam Taangpaal ahi hi.

- "Zogam vontawi taangpaal kahi, kei ka dual ngeilo ... Zogam leitang
   ngahkik mateng khawllo e" cihla phuak in Tahan ah asak leh kawl thukan te'n
   zandelh pah hi.

- Lamka ah "Burma mi" cih thulu tawh mat athuak ciang in:
  "Vang khualai ah melma Burma te ci'n, henkol taang ing laizomte'
  vangkhua lai ah. Lai ah na sa'ng henkol suutding omlo lai ah. Nuih ciam in
  hong lello aw pianpih na laizom hi'ng". Cihla hong phuak khia hi.

- Zomite' bil leh kam ah aluai den ding ahi "Tun sung khat pan piang hi
   ngeingei hang e" cih la aphuak pa hi.

- 2006 kum bul lam in US aa Sia Khai Pau' ii huhna tawh Zangkong ah VCD
  khat zaih ding aa hong paisuk kim lai "Zomi te'n VCD gina nei nailo ih hih
  teh ZOMUS min in bawl mai ni" ci'n kagen uh ciang in thakhat in hong thukim
  lian hi. Zola Live Recording ih neih masak pen hong hipah hi. Ama' aituam
  ding kimlai minam itna tawh avek in belhei ngam hi.

  TS Khai tawh kisai suut ding tam mahmah lai hi. Pasian' la aphuahte
  suut khop tam mahmah lai hi.

 
"Khual zin hong tungphet hong pai kahi. Hong pailai ning ei" cih vaikhak in
  zato pan ka ciahsan phot uh hi.

 Pasian in anuntakna hong khatsakna ding in thunget kul lai ding hi.

  Tutung tu aa zah ciphot ni. Lai nong simsak lungdam ing.

Mung Laan Thang
Zangkong

Read More

KUA TENG IN NUNTAK PIH SAWM - NA PASAL , NA LUTANG BY REV. NGO SUAN THANG ( Asst.Pastor, ZBCM-Tulsa )

1. Na pasal midangte zak in gensia ngei kei in, miten na pasal ong hoihmuh sak kei a leh nang a vang neilo na hi zaw hi.(Hebrew 13:4)

2. Na pasal thupi bawl,Itna nei-in zahtak siam in. Tua hi leh mi dang ten zihoih na hihna ong thei ding uh hi.(Col 3:18)

3. Na pasal na zahtakna na omzia tawh laksiam in, gamtatna leh omzia khawl zia in nupa kal-ah a thupi mahmah lungnopna piangsak hi.(Ephet 5:22-23)

4. Na pasal khembawl in a lungkim na ding in mai-et bawl ken, na simtatna hong theih ciang in a lungsim na mahmah khinkhian thei hi.(Pau 12:4)

5. Na pasal thaneemna midangte tawh tehkak ngei ken. Nang a ding Pasian hong piak hi a, nang tawh kituak ding a Pasian onggelsak ahi hi. (Pau 5:17)

6. Mite lakah na pasal tawngtawng,hawmthawh den ken, nang a ding a gim leh tawl a thuak pen a hih lam phawk tawntung in.(Col 4:6)

7. Na Pasal tawh pumkhat, lungsim khat hi den un. Neihtuam omlo ahun zui, a kisam bangbang kitheihsiamna neihtuak ding a hihi.(Mate19:6;thuhilhna 9:9)

8. Na pasal tungah thusim gengamloh nei kei in, nupa kikalah thu seelsim a omloh man-in kimuanna ong khang semsem ding hi.(Pian27:5-10;39:12-15).

9. Na pasal thapia inla awkhum kamkhum tawh hopih den in, a lungnuam in akhan ong sau tuam ding hi.(Pau 31:26)

10. Thusia, thu hoihlo, khasiatna na neih ciangin na pasal ninkholna in zang kha ken.Pasalte lungsim natna in a pumpi uh zawngkhalsak thei hi.(Pau14:1)

11. Na pasal teekin tumbang a vuai ciang in na itna kiamsak ngeikei in. A ithuai a ngaihbaang in ngaih sun tawntung in.A hatna, a hoihna, leh a hih theihna kempeuh piakhia in nang leh na tate a ding nasem a hihi.(Pau 5:19)

12. Na pasal na it mah bangin na teeknu,na teekpa leh a sanggam laizom teng zahtak siam in.Mi khempeuhin ama vawh nam khaici mah at kik hi.(Gal 6:5-7)

13. Na pasal pen leitungah na nuntak lai teng ama aa ding bek hi den in. Midang pia sawn ken.Tua hi leh mawhna in bangmah ong cih zolo ding hi.(Mt 5:28,Solomonla 2:16)

14. Na hih theihloh na hih zawhloh a om ciangin na pasal tungah hangsan takin pulak ngam in. Tua na genna hang in na pasalin na kicinlohnate honghuh hong theikhia ding hi.(Ephet 5:30-33).

15. Na pasal tawh hunnuam zangh khawm unla, Pasian kammal simin thungen khawm zel un. Midikte thungetna in vanglian a, na lian tampi sem zo hi. (James 5:16)

16. A hih theih leh na pasal tawh kino zel, ciamnuih khawng gen khawm zelzel un. Mai taiina in lungnuamsak a, lungkhamna in maigum sak hi.(Pau 15:13,30)

17. Na pasal kiang ah U aw thupi lua teh, nang na om ciang ka lungmuang cici lel in. Na pasal in innsung nuam hongsa ding a innkuan nuam na suak ding uh hi.(Pau 31:27-29)

18. Anhuan mehbawl na siam kei zongin na pasal tungah nang bang duh, bang ci bawl ding cih dong tangtang in. A lim kei zongin na pasal lungkimin a gil vah lel ding hi.(Pau 31:11)

19. Na khat peuhpeuhah lungkim takin na pasal tungah lungdam ko zelzel in. Lungdamkohna pen Pasian deih biakpiakna ahi hi.(Late 107:1)

20. Na pasal,na tate,na innkuan leh navai khempeuh Pasian ap tawntung in. Amah muang in amah in hong sem ding hi.(Late37:5;Pau22:6)

Read More

WWE Monday Night Raw ( 1/9/17 )

Read More

CINGKHUP LE NGAMBAWM TANGTHU ( the legend of cingkhup and ngambawm )

Nidanglai-in a kithutuak mahmah lawmta nih om uh-a, lo peuh a kilawm thei zel uh hi. Ni khat ni ciangin anih un pasal a nei tuak uh hi. Lamdangtakin a gilnat uleh a sung vua nautat a kituak hi. Amau zong lamdangsa-in kikum uh a, "Lawm aw, i naute numei tuak a hih uh leh kizawl sakin, pasal tuak ahih uh leh zong kizawl sak ni. Numei leh pasal ahih uleh kitengsak ni" ci-in a kiciam uh hi. Nau hong neihtuak ciangun khat numei, khat pasal hong hi-a a pasal Ngam Bawm phuakin a numei Cing Khup a phuak uh hi.

Anau neih nungun zong lawmtate kingaihna beituanlo-in lo khawng akilawm den lai uh hi. Lamdang takin naungek tegel a gilkial hun u leh a kah hun bang a kituak theizel hi. Nauluai khat-a asial khop ciangun a kah uh dai a, asial tuam ciangun a kapzel uh hi. Asa uh akisukkhak peuhleh cingh uh-a kep zong kullo hi. Khangto zelin hong tual taithei ta uh a, kimawl khawmin kithuah den uh hi. Ataksa uh akhan' tawh kizui-in akingaihna uh zong khang-a, nungak tangval hong hih ciangun, a nute bangin nasep silbawlna-ah kilawmin singnuai gammualah akithuah den uh hi.


Nikhat, Ngam Bawm' pa sabetna-ah tuahsia-in hong si a, Ngam Bawm tagah suak hi. Apa' sihnungin zawng hiaihiai uh a, puansilh nikteen kisia-in gentheitakin Ngam Bawm anu tawh khosa uh hi. Himah leh Cing Khup leh Ngam Bawm kingaihna bel kiamtuanlo-in khang zaw hi. Tua ciangin Cing Khup' nu a lungkia-in, Cing Khup a tai theizel hi. A nu'n a taitai ciangin Cing Khup in Ngam Bawm a itna lian semsem a; atawpna ciangin Cing Khup' nu-le-pate in khua dang-ah a pemkhiat pih uh hi. Himahleh itna in gamla leh nai theilo-in Ngam Bawm azu aham thuakin singnuai gammual tawnin Cing Khup heelin va kuan den hi. Lampi a thelnah lakkhawngah a khawl ciangin singkung peuhah kahin la asa zel hi.

“Amual in hong hal kamkei mual in hal
Hal zolo e Zawl Cing ngai ing e,
A tui in hal ciautui in hong hal
Halzo lo e Zawl Cing ngai ing e”

Vang kingaihna hangin nikhat melmuhloh zong a kum kivei bang ahih manin Cing Khup leh Ngam Bawm om zolo tuak uh a, apasal zaw Ngam Bawm, Cing Khupte' innah ava lengla hi.

Cing Khup nu'n, "Hong hawh nawn dah mai in Cing Khup' gentheih ding deih ke'ng." ci-in zawn ko gawp hi. Ngam Bawm ciah a, Cing Khup' nu'n, "Ngam Bawm tagah genthei ahih lam theilo na hiam? Sithuaisa-in, tawpsan in" ci a atai Ngam Bawm in na za sim hi. Tua bang thu a zak ciangin Ngam Bawm lungliap leh duangvulin a hehtha peuh suakin Cing Khup nu' a cina mai leh cih bang khawng peuh ngaihsunin a khasiatna la a sa hi:

"Cing Khup nu’ tongsuah siahkun a ka ngaih,
Cing Khup tawh laitawi ton lo aw e.
Ka luankhi'n tuibang hong tuum hi e,
Cing Khup na tun in na tun lungmawl in sanggah lua hong ci"

"Sanggah muantu-ah va bual leng e,
Laukha selo aw omlai tang thei leng,
Na tun sung nekin neinuam ing e."

Cing Khup' nu'n nak kham lua ahih manin dainawl peuhah akithuah uh hong kulta a; atawpna ciangin amaugel' ki-itna khuakim khuapam-ah thangin mite in hehpih mahmah uh a, a kiteen theih ding uh a deihsak mahmah uh hi. Gamlak khawngah vakin lasa-in kumkhen hun kikhekte, huihkhi laang leh vasa hamte'n a lungzuan uh phawngin sing leh lopa banga kihekkhawm ding bang a lunggulh uh hi.

"Cing Khup leh Ngam Bawm liangvai lua sang e,
Gamah tangnah silhpuan in nei e.
Cing Khup leh Ngam Bawm liangvailua sang e,
Puanbang pomna'n leibang lel ve vua,

Cinghim khimin zing hong zialkhawm hen aw,
Banzal naangbang hong henkhawm hen aw.
Cing Khup ka ngaih manin tuanglam i tungah,
Khawkhang phaikhin sem e vuang ngel-ngel.

A singzing nuai-ah tangnah lam nuai-ah,
Zawlcing sialbang giahpih nuam ing e,
Thangvan ging dimdim laikhun thawn cia,
Puanbang pomna'n leibang lel ve vua"

Cing Khup leh Ngam Bawm in a lungsim uhah ngaihsunsunin, a tawpna ciangin Cing Khup in, "Ka nu leh ka pa va hopih himhim ning in, bang agen uh hiam?" ci-in zahtak maizum zong khual zo nawnlo-in a itna uh atangtun sak nadingin Ngam Bawm in Cing Khup' nu leh pa ava hopih hi. Cing Khup' nu'n na ko gawp kik ahih manin zum leh daiteng thuakin khasia-in hong ciah kika:

"Ka tun va dong aw Ka zua va dong aw,
Khuakhal tuibang kei hong la ve aw,
Na tun va biang e Na zua va biang e,
Khuakhal tuibang lakna nailo e,"

Tua bangin a zawn a ngauna uh tawh a nun a koko ciangin Ngam Bawm in nuamsa nawnlo banah a lungkia-in a inn vuah a hawh nuam nawn kei hi. Tua banga, a kimuh nawnloh uh ciangin Cing Khup a lungleng mahmah hi. Ni khat ni ciangin Cing Khup a ci hong na a, a thoihthoih hangin a dam tuan kei hi. Atawpna ciangin beidong kisa-in anu-le-pa'n, "Cing Khup a dam sak thei a om leh, nu hi leh kizawl sak ding, pa hi leh kiteng sak ding" ci-in a gen uh hi. Ngam Bawm in tua thu a zak phetin avahawh pah vingveng a, Cing Khup in amel amuh lian tak ciangin hong halh hiaihiai a hong damsiang ta hi.

A damsiang ciangin Cing Khup' nu-le-pa'n a tanu uh Ngam Bawm tawh akiteengsak nuam tuan kei hi. Ngam Bawm hehlua-in, Cing Khup' nu agawt danin kinei-in Cing Khup' lu zaang a samzang khat botkhia-in Ngazamlui pangah suang a delhsak hi. Tua ciangin Cing Khup a cina-in hong gim semsem-a, a nini-in gim hiaihiai hi. Cing Khup gim semsem cih Ngam Bawm in a theih ciangin va delh pah vingveng a, ava muhleh a upmawhna sangin na gim zaw hi. Luigei a, a samzang koih bulh kikleh dam ding cih ngaihsunin ala dingin va kuanpah hi. Himahleh tui na khanga, a samzang na taimang khin ahihmanin mu zolo hi. Tupi heipi tawh asing asuang teng kalin lumlet mah leh a mu zo tuan kei hi. Cing Khup lah ani ani-in kiam hiaihiai ahihmanin atawpna ciangin hong si ta hi. Ngam Bawm dah luan ahih manin la a sasa hi.

"Cing Khup ka ngaih aw sen a ka ngaih aw
Khupching ka ngaih kulsin tang ta e,

Ka siallum pan tang kawlhei liang a bat
Cing sesul sabang ka zuimawhe,

Atui sukin luang damdiai- in luange
Cing aw vaibang na tham na hie,"

Cing Khup hong sih hial ciangin Ngam Bawm lungzuang mahmah a, mawh kisa, a kisuan lah tawh a khasiat tawh inn-ah kikulkhumin sigalin zong va pailo hi. Cing Khup' kha in khenglah lua-a, Ngam Bawm a muhloh ciangin kikhangsak a hankuang-ah a luang kita zolo hi. Sivui dingte beidongin "Ngam Bawm a omloh man hinteh, va sam un" ci-in ava sam uh hi. Ngam Bawm hongpai ngei a Cing Khup' luang kiangah, "Cing aw, kineusak mai in, hi ci ding mah hihang, khasialo-in pai mai in" a cih leh siluang hong neu hiaihiai-in hankuang sungah hong ta hi. Vui ding a hong kisak uleh hankhukah hong kita kei leuleu hi. Ngam Bawm in, "Cing aw, kineusak mai in, hi ci ding mah hihang, khasialo-in pai mai in" hong cih kikleh a luang hong neu hiaihiai kikin hankhukah a vuithei uh hi. A vui zawh un Ngam Bawm in Cing Khup' han tungah Zozam a vasuan hi.

Hun hongpai zel-a, Cing Khup' nu'n atanu leh Ngam Bawm gawm ding hong sawm hi. Ngam Bawm a bawlsiatleh a tunga abawl dante hong kisikta hi. Ngam Bawm pen Cing Khup' nau Sial Cing ading a zolsawm uh hi. Cing Khup nute' lolai-a mawngsing lianpi sim leh mal sun aka zei-zai ahiang in mual bang khum hial khat a po hi. Cing Khup' nun tua mawngsing Ngam Bawm khiasak a Sial Cing tawh kithuahsak dinga lunggeel hi. Tua dingin Ngam Bawm cialding sawmin naanglom khat tawh kuan-a, a bawldan uh kisuangtakin ava gen ngam kei hi. Atua cihna lamin a nanglom lem khinin a hong ciah kik hi. Anu hong kipan kika, a khausum peh tawh a kuan hi. Aman zong gen ngamloin akhausum tawi apehzawh ciangin hong ciah kik hi. Tua khitciangin ava kuan kik leuleu a, a tawpna-ah a va gen hi. Ngam Bawm in zong na nial samlo-in na mang pah vanglak hi. Inn a tun ciangin Sial Cing sam a "Zing ciangin Ngam Bawm sing khiatna-ah na va zui dinga, lolai khawngah na kipuk khemkhem sak dinga, ahong phot ciangin na na kawi zel ding" ci-in thuhilh sim uh hi. Zingkhua hong vakin, sun-an meh limtak bawlin Sial Cing puasak uh-a, lokuan dingin Ngam Bawm va zawnsak hi. Ngam Bawm gawsem leh thau pua kawm, heipi liangbatin Sial Cing' lolam-ah a zui hi.

Lo hong tung uh-a, Ngam Bawm in mawngsing honkhia hi. A kaa khat sun ma hihkhop-a, tua zawhin a katuamah nahteh phahin tu-a gawsem a tum hi. A lungsim mitkha-ah Cing Khup kia mu-in, anu' deihsakloh danleh, tu a Sial Cing adingin azoldante a ngaihsut ciangin Cing Khup longal midang a om thei kei hi.

"Ka silhpuan tang aw ka kaihdial tang aw,
Ka Sial Cing tawh laitawi ton ve aw.

Silhpuansia nong ci kaihdial sia nong cih,
Nang Sial Cing tawh laitawi tawn lo le'ng,

Cing aw na malnuan na tun lungmawl in,
Pamlo sang singsawl khian ei sawl e.

Ka semgua pan tang kawlhei liangbat ing,
Tulsing lel a khua va thil inge,

A u lah ngai ing anau lah ngai ing,
A milai pen ka ngaih tung nung hi,

Cing aw na laukhan' naubang hong nui-in,
Melmuh dingin thilmun hong leng aw,

Cing aw na laukha mel mu nuam ing e
Khattang koi-ah sawlbang na hei hiam?"

Lungzuangtaka gawsem tum a la hongsak ciangin Cing Khup' kha omtheilo-in musi-in hong lenga; Ngam Bawm' tungah hong lam diaidiai hi. Cing Khup' kha muhtheih a hong len ciangin Ngam Bawm in khenglah mahmah a, ni bang tum ngeikei leh a ci hial hi.

"Thilmum hong leng e Cing aw na laukha,
Khau bang ciahna leibang lel maw'ng e,

Cing aw na laukha tangbang i kholh ni'n,
Tung sunni vaibang thamsawt hen aw,"

Sun-an nekhunin Ngam Bawm an ne dingin singkung pan kum suka, a bulah Sial Cing na kipuk khembawlin pheingo dawk henhanin a lum hi. Ngam Bawm in aphot kawmin, "Mita mi nau hi ci dingin kilawm kei" cihsan lel hi. Sun an nekzawhin sing hiang hong khia kika, agim ciangin a ka thuam a gawmsem la-in la asa zel hi. Cing Khup' kha hong kilak kik zel-a, tua bangin a kithuahthuah uh hi. Nitum dek kuanin singhiang lang khat a khiakik hi. Ciah hong hun ta-a, a lungsim in Sial Cing pen Cing Khup hi zaw leh, ci-in a samsam hi.

"Muikhua zingta e, seinou tam gual aw,
Tunsiang sihkhum bang zuanta ni e,

Cing aw na laukha tangbang ka kholh ni'n,
Tung sun ni vaibang thamsawt hen aw,

Ka tem apai a kuah le'ng ci buang ing,
Zawl Cing ka ma-ah pai leh cinge,

Ka tembang mi tem a om ve diam aw,
Zawl Cing bang mi’ nau a om ve diam,

Vabang hong leng aw damtui tanggual aw,
Sialbang lian leng hei nawnlo ding hi,

Ka siallum pan ing na kawlciang pan ing
Cing sesul sa bang ka zui mawh e,"

Hantung a a Zozam suan zong hong pakta a, Ngam Bawm in Cing Khup' muhloh/lawh loh dingin pammaih sa lua hi. Tua pakte amuh ciangin Cing Khup' melmu bangin a kingaihsun hi.

"Ka buktual zang a zozam ka suan in
San in pal ven ngaih in lo mawh e,
Vual in lo thei ka sinlai- ah damtui ata e,"

Hantung a Zozam pak ana kilo theizel hi. Kua lawh hiam cih theinuamin Ngam Bawm in zankhat apang hi. Zanlaitakin sangak khat in hong lo a, Ngam Bawm in thakhatin manin "Bang dia ka Zozam pak na lo na hia?" ci-in a dotleh, "Ka pi Cing Khup' hong sawl hi. Ama adia ka lawhsak hi" ci-in a dawng hi.

Tua phetin "Na pi Cing Khup koi-ah om a hiam? Na gen masiah kong khah kei ding hi," ci-in dong a, sangak in "Cing Khup misi khua-ah om hi, a lampi keen leh kawlse lak ngen ahi hi," ci-in Ngam Bawm ahawh theihloh ding dan ahilh hi.

Tua ciangin, "Tua bang ahih leh pai inla paklo dinga nong kuankik ciangin lam tawntung-ah akmul hong bot in" ci-in Ngam Bawm in sangak a pai sak hi. Acih bangin sangak hong kuan kik ciangin lam tawntungah akmul hong bawt-a, (sangak in ak amat cianga amul a bawh kipatna ahi hi, kici hi). Tua akmulte zui-in Ngam Bawm misi khua a hawh dingin a kuan hi.

Keen leh kawllakah khaugui peuhah luai-in, a tawpna-ah Cing Khupte' khua a va tung hi. Misi khua a innte telhawng khawng a kilam hi-a, Nambawm in innkaa khawng asik ciangin a cim zuazua geuh hi. Cing Khup in Ngam Bawm na ngai mahmah lai-a, hoihtakin na bawl hi. Nitak hong hi-a, HAM a giahna ding a et leh Ngam Bawm in saguh tampi mu a, a khente paikhia-in akhente bicingah siat hi. Zingkalin saguhte mi hong suak uh a, mai hon phiat sauhsauh uh hi. Ngam Bawm in misi khuate hin dan lamdang a sa mahmah hi.

Nikhat misi khuate'n ngabet hong sawm uh a, Cing Khup in Ngam Bawm zong va kuan dingin sawl hi. Luilam zuanlo-in tangdung khawngah pai uh a, mauteh peuh abawm vuah aguang guang uhi. Ngam Bawm in lamdangsa-in a bawm tawphah ding mauteh tamlo tawm khat a koih niangnuang hi. Inn hong tun ciangun Cing Khup in, "Nga nong man uh hia?" ci-in a dot leh Ngam Bawm in, "Bang nga i man dia, taang dung khawngah nga kibeng hi ven." cihsan hi. Cing Khup in bawmtaw a et leh mauteh bang zah hiam khat mu a, "Nga tawm nong pua mah veleh, koi hong em pah dih ning." ci-in mei a honh em leh ngasa bangin a puak hi. Ngam Bawm in a em ciangin lah mauteh keu mah bangin a kangtum vutvut mai hi. Misi khua ate' adingin mauteh pen ngasa ahi mai hi.

Nikhat sabeng dingin a kuan kik leuleu uh hi. Lunggam leh tangngol khawng peuh man uh a, a zawng luailuai uhi. Amau a dingin tuate pen vompi leh sahang ahi hi. Sa huan uh a, khindangah a hang uh hi, salute kongbiang leh bangah a suang uh hi.

Atawpna ciangin Cing Khup in "Ki-it kingai mahmah ta lehang, omkhawm thei nai mahmah lo hi hang. Inn lamah va paiphot inla, na voktal va go in. Asa na nek zawh ciangin lupna tung bichingah teipi leh siat inla, anuai san-ah lum in."ci-in a hilh khit ciangin Ngam Bawm a paisak hi. Ngam Bawm zong ciah pah a, Cing Khup' gen bangin a hihpah takpi hi. Lupna tungah alup laitakin Cing Khup' kha musi-in va lengin teipi va bot khia aa, a dip sun letin, Ngam Bawm si hi. A sihphetin akha uh kigawmkhawmin misi khua a tung pah uh hi.

Telhawng a inn kilamte Ngam Bawm in thupi salua-a, "Hiai innte kua lam ahia?" Ci-in a dot ciangin Cing Khup in, "Tuma nong pai lai a nangma nong lamsak ai ve le, manghilh khin ta na hi maw?" ci-in Cing Khup in nuikawmin a dawng hi. Tua bangin leitungah ki-it kingai mahmah ta le-uh deih bangin a omkhawm thei ngeilo uh hi mah taleh, misi khua-ah bel nuamsa takin tawp ni neilo-in a omkhawm thei ta uh hi.

Read More

A MUIBUN LAI NASEP NA BY REV.JOB. THAWNGNO

                                                      Rev. Job Thawngno
                                               Vandaitui Literature Ministry
                                                      151/16 Tahan, Kalymyo





Thu masa: Tonzang khua ah lungdamna thu a tun zawh
kum za cing ta ahih manin 2005 bei kuanin " Tonzang Evangel Centenary " pawibawl ding thu, magazine laibu tawh mualsuang phuh ding thu le tua laibu sungah hel ding thului " A muibun Lai Nasepna " cih zaksakna leh ngetna lai ka ngah a, ka nuam lua mahmah hi. Manpha mahmah leh thupi lua
mahmah  ding cih zong ka mu khol pah hi. Hong nget uh thului zong kei tawh kituak le a kilawm deuh ahih manin ka lungdam diak hi. Ka hih theih bangin hanciamin kong gelh hi.

Read More

AUSTRALIA KUMPI IN "ZOMI" THEIHPIH TA

Thumasa:

Myanmar Census 2014 result kicing 2017 kum kipat sung hong kipuangkhia ding cih thuging kiza hiauhiauta hi. Tua tawh kitawizawn-in Australia ah Minam min leh Pau adingin “ZOMI” pen Australian Kumpi hong sansak zo ahihlam hong gennuam ing.

2016 August kha sungin Australian Kumpiten Australia gambup Census hong kaikhawm uh hi. Tua result kicingte pen April 2017 in hong taklang dinguh ci hi.

2016 Census ma in anunungpen Census ahih leh 2011 lai in khat vei na kikaikhawm khinta hi. Tua 2011 Result tungtawnin Australia Kumpi in Australia sunga kizangh kampau thupi tampi sungah “ZOMI” kampau thak zong 15 July 2016 in Language (Lai leh Kam Picing) khatin Code Number (6105) tawh na lut thaksak ta uh hi.

Australian Standard Classification of Languages (ASCL) kici Pau Kizanghtam leh Lai Picing ciaptehna sungah “ZOMI’ lai leh “ZOMI” pau cih hong kiguang khin cihna ahihi.

“ZOMI” Kicitangtang Ciat Tani:

“ZOMI” bekmah zangh leng midangten zong “ZOMI” mah hong ci lelding hi. Mi hong cihding ngak masak ding hilo-a, hong kicih nadingin ei adeihteng leh asangtheitengin i zat masak ding hipah hi.

“ZOMI” cih kammal gawm leh awsuah mahmah pen tulaitak Tedim, Tonzang, Chikha, Kalaymyo leh Tamu khuapite ah ateeng Tedim Chin kici in namdangte leh Kawl Kumpi in hong kiciamteh tengin akideihkim min leh kammal hi cileng kikhial loding hi. Ahizongin hih “ZOMI’ min leh kammal pen i deihzah bangin kuaman kizanghlo, kizumpih ngamlo hi cileng zong kikhiallo ding hi.

“ZOMI” Zatzia Ding Lunggulhna:

Minam (National) min pen “ZOMI” ah kipsak ni. Beh leh Phungte leh “ZOMI” kikimsak khaden kei ni. Ei Phung min khawng peuh khualna leh amanthan ding lauh manin “ZOMI” pen alangpan tampi om hi. Pawlkhatin “ZOMI” omngei kei, Tedim Chin kicih ding hi, letkip ding hi acizong om hi. Gentehna pakin enleng, 1980 ma in Mizoram leh Mizo Tong cih om ngeilo cileng kikhial loding hi. Ahizongin amau tun omsak zota uh hi. Minam min “MIZO” mahin kisam tangtangta in, apau uh zong “MIZO” tong(pau) mah kici hi. Minam min “MIZO” ahihmanin “MIZO” tong mah kicipah hi. Minam min “ZOMI” i kicih leh i pau zong “ZOMI” pau cihding banghang hamsa samawk i hi hiam? Ei sungah kitelsiam mah taleng gamdang miten hong tel zolo uh hi.

Gamdang Australia khawng, USA khawng ah minam min “ZOMI” kipiaciat napin na pau bang ahia?(What language do you speak?) hong kicih ciang atamzaw in “ZOMI” kici ngamlo mawk hi. Pawlkhat in, Zopau, Tedim, Tiddim Chin, khawng peuh kici ziazua mawk hi. Tua hangin Kumpite ciaptehna leh amau muhna ah “ZOMI” cikim leeng khat suak ziau ding kimlai atuamtuam in hong ngaihsuunta uh hi.
Mangkangten hong dot ciang kei “ZOMI” ka hi, ka pau zong “ZOMI” mah hi cih ding hita hi. Ei ngaihsutna ah tua pen ahaivai tawh kibang khading hi, ahizong “ZOMI” kiciten “ZOMI” language mah i pau ding angeina hizel hi. Mizoten Mizo Tong acih tangtang bangin ZO Tong cise lo uh hi.

Laigelh siamte leh Laibu tuamtuam abawl ding ten hih thu nong ngaihsut mahmah dinguh thupi ding hi. Lai Siangtho khawng zong “ZOMI” version mah citangtang zoleng vaisiang ding hi. Tun “ZOKAM”, TEDIM CHIN cih khawngin kiciamteh bialbual mawk hi. Khangthakten “ZOMI” i zatngam giap ding thupi ding hita hi.

Australia gam sung bangah Kumpi nasepna leh Zum tuamtuam ah Mangkang pau atheikhin dingin hong lamen hetlo uh hi. Tua hangin Multicultural Minister Vuankyi bang hong koihsak in, phone set nuam leng zong Kamphensakna (Translation Services) akhongin hong koihsakden uh hi. Tua services te i zat ciang i min lawh leh i pau zatzia kibanglo ahihman in amau zong theilo mawk uh hi.

Gentehna in genleng, NAATI akici The National Accreditation Authority for Translators and Interpreters Kumpi website sung enleng ei “ZOMI” tading mun nih bang(Chin-Tedim leh Zo (Zomi) kici mawk hi. Tua nih pen ei muhna ah kibang himah leh i piakdan leh i lawhdan kibanglo ahihmanin Kumpite ciahptehna hong om hipah hi.

Translation and Interpreting Service kici Kumpite muan mahmah service website ah pen aman/adik lianin hong gelhsak (Zomi a dialect of Chin kici in taklang hi) uh hi. Ahizong Migrant Resource Centre munte ah CHIN-Tedim ciin kikoih leuleu hi.

Mailam-ah I Kalsuan Zia Ding
ZOMI hing cihtangtang ding.

ZOMI language khatin Australia Kumpi in Code (6105) hong piak khit nungsang i kampau (language) i cih i gen ciang zong “ZOMI” mah cita ni.

Hih language code tungtawn in mailam ah Ethnic Radio Program khawngah “ZOMI” language min tawh Slot(hunseh) kingen/kingah thei ding hi.

Language code kinei ta ahihmanin nidang ciang “ZOMI” tawh kisai thugenna leh laigelhna tuamtuam, laibu bawlnate ah zong “ZOMI” mah cih i zat ding hita hi. Translation services i zatding ciangin “ZOMI” language hong sapsak un cita ni.

Forms tuamtuam leh Kumpi zum tuamtuam ah minam leh kamapu hong kidotnana ah “ZOMI” zat ding hi. Mailam-ah Census tuamtuam aomkhak leh “ZOMI’ cih akipsa hisak ni.

Australia Khuapi khat ah Zomi Huaiding kipawlna(gentehna Zomi Innkuan) khat bek neih ding hi-a, tua kipawlna pen Biakna Pawlpi tawh kideidan loin tha i piak ding ahi.

Pasian nasemte(Pastors) ahih nak leh minam makai in koih loh ding hi-a, amau pen minam makaite ataingam ding leh asiatnate uh akawk ngam dingin aomding hizaw hi.

Thukhupna:

Australia gam sungah “ZOMI” kiciantakin Kumpi in hong ciamteh khinta cih kilang hi. Language Code hong pia khin ahihmanin tua “ZOMI” Language azangh atamsemsem leh hong taangzai semsem ding hi cihna hi. Lungneu lo takin “ZOMI” dialect ciang hilo-a, Language pikhat ahicih phawkden ni.

Tua ahihmanin namdangten na “ZOMI” pau uh hong sinsak/hilh in acihciang ei khua pau peuh, awkaih neuneu peuh sinsak loding hi hangh. Taangpi zat leh theih ahi Tedim pau pen Tedim Pau cici nawnlo in “ZOMI” pau cita ding hi hangh.

References:

http://www.abs.gov.au
Census Dictionary, 2016
https://www.naati.com.au
(The National Accreditation Authority for Translators and Interpreters)
https://www.tisnational.gov.au/
(Translation and Interpreting Service)

By: Paul Khaipu

Read More

PHATNA LA ( owntune ) DVD - 20th ANNIVERSARY ZCF-CANAAN MALAYSIA

20th Anniversary ZCF-Canaan Malaysia
Phatna La DVD ( owntune ) Coming Soon,...

Vocalists : JK Kam, Khupi , CK.Khai, Cinpi ( Idol ), Rody Za Lien Sing,
               Mungpi ( GZI ) , CS.Sangpi, Piaklian, ZCF-Canaan Youth ,Zolim Group
Composers : JK.Kam , CK.Khai, Paklian, Cinpi ( Idol ),  CS.Sangpi
Musis : FGA ( Yangon ) , Kyaw Khine ( India )

Read More

TEDIM KHUAPI AH FIRST PRIVATE BANK KI HONG TA

Tedim - December 29

Tedim Khuapi ah December 29, 2016 Zingsang nai 8:30 AM hunin First Private Bank honna ki nei a, Tedim Administration Zumpi pan AD Pu Go Suan Khai, Tedim Khuapi sung a Biakna makaite, Hausa leh mipi tampi tak kihel thei uh hi, cih thu kiza hi.

Myanmar gambup a dingin First Private Bank Branch 30 na hi ta hi. Gam sung/gampua sum khakna Western Union zong kizang thei pah ding hi. January kha sung Sum khak na pen a khawnkhong hi ding hi cih zong ki za hi.

Bank nasem vekpi 15 lakah Zomi 13 leh Kawl 2 kihel hi.

Chin State bup ah mipi neih Bank 4 om khin a, Khalkha(Haka) Khuapi ah CB Bank 1, Falam Khuapi ah KBZ 1 leh Tedim Khuapi ah KBZ 1, FPB 1 akigawm 2 cih te ahi hi.

Adress : Kamhau Lampi, Zato lamka, Lawibual Veng, Tedim Khuapi
Phone : 07050218, 07050459, 07050571

 
 
 
 
 

The Tedim Post

Read More

A ( 1 ) VEINA ZAC YOUTH CAMP & CRUSADE

A nai a gamla-aa om #Zomi khempeuh #Itna le #JESUS min tawh k'ong sam uhhi. 

Hong kihel zolodingte'n thungetna tawh hong phawkciat un! 

A lamdang #Khasiangtho Nasepna,  a lamdang #Kha #Khanlawhna lianpi hong tungngiat nading ih #lunggulh mahmah hi. 

#JESUS lianbel hen! 

A minthang,a gamzai semsem hen! 

#HALELUJAH!

ALian Mahmah Gupkhiatna Thu  

Hebru 2:3

Speaker:Sia.Genpu

Date : Dec 29-32, 2016 

Nitaksim : ( 6-9 )pm Crusade  hun 

Zinglam 10am-4pm : Gupkhiatna leh Kha Siangtho thusinna 

Amunding: 

1232 Melrose St 

Bowling Green , KY 42104

NB: Thusin te sun-ann ki vak ding hi. 

Sian' Sawmpi

Read More

BY THE REVERS OF BABYLON ( Zomi Version ) - ESTHER CING SAN

By the rivers of babylon ( Zomi Version )
Esther Cing San

Read More

FALAM AH PRAISE & WORSHIP CONFERENCE OM DING !

27-29 Dec.2016 sungteng in Falam ah Pr.Thangtawng , Pr. Khaipi leh Sia David New te leh Agape Worship Bandte makaih natawh #Praise & #Worship_Conference om ding aa a lungkutte kipai thei hi. 

Puanzong kizuak aa silh 1 ciang Kyats. 5000 tawh kilei thei hi.
Falam ah puan leinuamte
Phone 09 45316 2823 ah kidawp thei hi.

Amun Falam Town Hall

A hun 10:00 Am - 03:00PM
06:00 PM - 09:00 PM
Ani 27-29/12/2016

Contact
09 45316 2823 ( Jesica )
09 440807048 ( David )
09 259153955 ( Puia )

by Tedim Times - တီးတိန္တိုင္းမ္

Read More

TAULENG KHUABUP IN LUNGDAMBAWL PAWIPI BAWLKHAWM DING

Tauleng khuazangbup in Carol singing leh Christmas pawipi te khuazangbup ( Tuiphum , RC leh AG ) teng kigawm in zangkhawmding cih khentatna nei uhhi. Khuazang bup aitangin USA pan Pa Nang Khan Khai te innkuan in ankuangluina neidingin geelna nei uh hi.

Hihbangin Pawlpi kim kipawlkhawm a, Lungdambawl pawipi leh zanvahna khempeuh kipawlkhop theihna pen Tauleng khua kisat zawh kum 101 sungah akhatveina ahihi.

Sunday kikhop bel tamvei pitak khuazangbup in akizang khawm denden ahihi.
Late 133.
Lungdamna lianpi tawh.

Sia.Pau Khai
Dec 20.

Read More

CHRISTMAS WORSHIP NIGHT - HALLELUJAH WORSHIP CENTER YANGON

Christmas Worship Night 2016 !!
December 23rd
6:30 pm to 9:00 pm
Myanmar National Theatre !

ဒီဇင္ဘာလ ၂၃ ရက္ေန႔မွာ
Christmas Worship Night ရွိမွာျဖစ္ပါတယ္!

၂၀၁၆ ခုႏွစ္တြက္ ေနာက္ဆံုးျပဳလုပ္မယ့္ worship night လဲ
ျဖစ္ပါတယ္ !
ဒါေၾကာင့္ အားလံုး လက္လြတ္မခံပဲ အတူတကြ အားရပါးရ ခ်ီးမြမ္းကိုးကြယ္ဖို႔ ဖိတ္ေခၚပါတယ္ !!

ေနရာကေတာ့ ..ၿမိဳမေက်ာင္းလမ္းမွာရွိတဲ့
" အမ်ိဳးသားကဇာတ္ရံု " မွာ ျဖစ္ၿပီး
ည ၆:၃၀ အတိမွာ စမွာျဖစ္ပါတယ္ !

မိတ္ေဆြသူငယ္ခ်င္းမ်ားကိုလဲ ေခၚလာေပးပါ !

( အျပန္ကားမ်ား စီစဥ္ထားပါသည္ )
by HWC-YGN PAGE

Read More

SUNDAY SERVICE : HALLELUJAH WORSHIP CENTER -YGN

HWC Sunday Worship Service !
18/12/2016
3:00 pm to 5:00 pm
YMCA , 4th Floor !!

You All Are Invited !!

BY HWC-YGN PAGE

Read More

TONZANG KHUAPI AH MIPI ZAT DING ZUUNBUK ( public restroom ) OM TA!

 Tonzang khuapi ah Mipi ading Zunbuk omta!

                                   Tu aa pen a masa hi in hg ki bawl lailai dg hi.

A piakhia - Pa Pau Sian Suum te innkuan ( USA ) 

Asemkhia - Sunshine Group ( Tonzang )        

Reporter>>>Thang Lek

Read More

DAHNA PULAKNA : MANGPHA TG.KHAM SUAN MANG ( Hatlang beh ) KUM 56

Zomi Innkuan USA, Inc.

Executive Committee

Date December 16, 2016

Dahna Pulakna : Mangpha Tg. Kham Suan Mang (Hatlang beh) kum 56

USA gam, Indiana State, Indianapolis khuapi ateng Tg. Kham Suan Mang Kum 56 (Hatlang beh) in abeisa December 11, 2016 ni 11:30AM hunin Indianapolis khuapi sunga Zato khat ahi St. francis Zatopi panin Lungtang sihui damlohna hangtawh mual ong liamsanta cihthu izakmanin Zomi Innkuan USA kipawlna in nakpitakin kidahpih, ki lainatpih hi.

Tg. Kham Mang pen Zogam, Tonzang uksung, Mualkawi Khuami Hatlang beh Pa Kai Za Khen (Late) leh Pi Vung Za Cing (Late) ten Ta 10 naneihna lakah amahpen a 6 na ahihi. Nuntakhuasakna anuamzawding lunggulhna tawh abeisa 2007 kumin USA  ongtung ahihi.

Tg. Kham Mang pen USA leitang tunga ongnusia Zomi khat ahihnatawh kizui-in Zomi sungah unau sanggam khat, sihkhat sakhat hihna hanga lainatpihna lahna in Zomi Innkuan USA kipawlna in Paakkual khattawh Mangpha khakna kinei ding hi.

I it mahmah Tg. Kham Mang tawh a nunungpen hunzatkhopding pen ongtungding December 18, 2016 (Sunday) ni-in Singleton Mortuary Funeral Home, 7602 Madison Ave, Indianapolis, IN 46227 ah 10:00AM ~ 11:00AM kikal hunsungin luang etnahun/ Visiting hun hidinga 11:00AM ~ 12:30PM kikalsungin tuamun mahah Zomi SDA Church of Indianapolis te makaihna tawh a nunungpen hehnep hunbawlna kineidinga tua khitciangin Mount Pleasant Cemetery, 734 N. Morgantown Rd, Greenwood, IN 46142 ah vuina daitansakna kinei tosuak ding hi.

I it mahmah Tg. Mang Mang ongnusiatna hanga adah akap, alunglengkhuangai pianpih sanggam laizomteng, khuapihtuipih tanaumeltheih akuamapeuh tungah ibiak Vanglian Pasian khasiangthoin ong hehnepsak henla aluang khituite ong nulsakin, lungnoptawldamna ongguatsak kimciat tahen cih Zomi Innkuan USA kipawlna in thu kongngetpih uhhi.

Dahpihna lianpitawh,

Executive Committee

Zomi Innkuan USA, Inc.

December 16, 2016

Read More