Salmon ngasa san sihseh leh Voksa emmin namtui veuveu gilvun kikang phitphiat a nek khit ciang Sia JK Kam leh Tg. Paupi mah in "Omlympic Park" hong vakpih dingin hong kithawisak uh hi.
Singapore pan ka puak uh puanlum a sah veve pen vuk gam ah na lum hetlo bilbel hi. Vuk gam ah puansilh ding pen i pumpi tunga cilum a pusuak ding a dal puan-ngat a bit khat a sung ah silh ding, a pualam huihvot in a pailet loh ding puanngat a bit mah a tungah silh ding ahi hi. Puanlum sah ngeina pen huihvot in let ahih manin ci lumsak lo na hi gige hi. Ci tawh a kimat a silh ding a sungsilh khat tungah puanlum huih in a pailetloh puan tungsilh khat silh khit ciang ka khedap uh na kisam lailai hi. Khedap pen Singapore pan khuasung vakna a kizangte vuk tungah taal ziahziah ahih manin vuk tung paina khedap a nuai gial nei, a savun a sah, huihvot in a pailetloh mah na kisam kik hi! Pilna tampi ka vakkhiat ma un ka ngah uh hi.
Puansilh ding ka puakte uh kizang theilo ahih manin Sia JK Kam in ama a hong kawm a, "tang suak un" hong ci lai hi. (Ka paikik uh ciang ka zat ding uh, kempah ung). Khedap ama neihsa om hileh hong piaksawm lai hi! Ka khe uh a kituak omlo ahih manin ka lei uh hong kisamta hi. Sumbuk ah pai in khedap ka et uh leh vuktung paina khedapte na tawm man hetlo in na leitak thei bilbel hi. Leiloh lah a phamawh ahih manin ka lei uh hi. Tua ka bulh uh ciang bel - huiha, nuamlua hita mai. Sunthapai khuasung vuk lak ah zong kidiang ngamta ding na himawk hi. Vuk lak ah vot, khuadam cih hang a vuk lak a kizang puan leh vante zang peuh leng nuamtak in khuadam phawklo in a kinungta thei na himawk hi!
Nun Nuam Norway Zinna - 1>>>Click HERE
Nun Nuam Norway Zinna - 1>>>Click HERE
Niangtui leh Moh Hong Lui Uh
Ka khedap leina sumbuk golpi sungah Pa Sing tanute nih - Lia Huai leh Lia San in nasep hoih mahmah na nei in ka kimukha uh a, a mel uh a hoih ban ah a mai uh tai ahih manin hong nuihsan siusiau uh hi. Zoliate ahi ci mah hi cih khak baih a, ahi zongin amau maitai dan pen lungsim tawng pan hong pai lungdamna maitai hi. "Kimeltheihna, kimuh lungdamna" ciin coffee leh moh a lim, a ham phitphiat, a khumlo, lah nek nuam mahmah hong lui uh a, "Ko anne khin lian hive ung" cih kawmkawm in ka dawn uh leh ka gilvah uh hong nuamsak, zangsak hizaw a, vakna ah tui duh in ki-om nawnlo pah hi.
Olympic Park, Lillehammar Ah
Niangtui leh Coffee dawn khit, puansilh khedap teng a kim dikdek khit ciangin Tg. Paupi leh Sia JK Kam makaihna tawh Olympic Park en dingin Paupi mawtaw tawh ka taito leuleu uh hi. Olympic Park paina ding Sia JK Kam inn pan luigal lam ahih manin khuasunga luipi kanna dinga kidawh leipi ka kan uh a kul hi. Lei gol, saupi khat na om a, ahih hangin tui kimu vetlo hi. Tua luipi pen vuk in khuhcip ahih manin tui kidawk lo a, gunkuang, tembaw zong pai theilo hi. A taktak in a tui khempeuh a khal himai ding hi (a nuai lam bel a khal diam va en tuan sam kei ung :) ). Vuk pak viatvuat kawm ah mawtaw gul taito teuteu in kim leh paam siangtho sitset a, mawtaw sunga aircon hangin a vot lam zong kiphawk lo hi. Leipi kan khit ciang mualtungah lam kawi to ngiungeu a, damdam in mualtung lam ka tungtoto uh hi. Mawtaw a kawi ciangin luipi lam dak suk leng mual leh guam khempeuh vuk vive in khuh ahih manin pak viatvuat hi. Mawtaw lampi a kawi sak ngiungeuna uh a hang pen vuk khuhna lampi pen to lua leh mawtawpei kitaal thei ding ahih man hidingin ka ummawh pong hi.
Mualdawn ka tun toh uh ciangin singkung khempeuh zong a teh hing dihdiah kitam muh lo in vuk mah in na tuamcip khin hi. Neu lai ci pong leng, naupang lai a khua Murlen ah kikhop ciang Vuk Mual Panin cih la ka sak zelte uh ka mitkha ah ka mu a, a taktak a vuk mual mu ngei ngeilo in tua la ka saksak uh khawng tun a takpi in a mu hipan hel zen veng e maw ka ci hi.
Olympic Park lutsukna ding ciangah Paupi in a mawtaw tawh hong kha a, mawtaw pai theih tawp ahih manin a mawtaw tawh aman mualnuai lam ah hong ngak dingin a kilehsuk kik hi. Ko mi 3, Sia JK Kam, kei leh ka zi Cingpi in Olympick Park a tungvum pan ka tuansuk uh hi. Olympic Park lutsukna ding ah inn sitai mahmah khat na kilam a, tawlngakna ding ahi hi. Lawplua lel ka hih manun ka vel se kei uh hi!
Ka paisuk ma un mawtaw tung pan ka tuak khit uh sawtlo in vuk tungah a lum nuam tawh, a kibual nuam tawh, a diang nuam tawh, khut tawh vuk a lawngnuam tawh, vuk lak ah khekhap a dawksak nuam a khedap nuai tawh nakpi a sik giapgiap tawh...nop ei, nop ei...
Olympic Park ka lutsuk uh ciangin vuktung a kitaalte, tai kidemte, kitolh ziahziahte gamtatna honpi khat ka mu pah uh a, siam hile'ng a nak nop ding dan lungsim in a bawlbawl hi. A suk velval vuk tung kitolhna luzangsip ah ka om laitak un ka khuadak suk uh leh a nuai lam pek ah Tg. Paupi mawtaw kang a tai valval ka mu a, aman Olympic Park a nuailam pan luttohna mawtaw khawlna ah a mawtaw a koih hi. A khe tawh hong paito ka mu uh a, ko zong a lu lam lam ka pai suk uh hi hi. Kigalmuh hangin a mi khuttumcia khawng bek in a kimu hi a, Km 2 phial a kigamla ding hi. A kitolhna bekbek zong meter 1710 a sau ahi hi.
A lu pan siksan kibawl ah damdam in khe tawh ka tuaksuk uh a, vuk in khuhcip ahih manin a nal mahmah hi. Cingpi khat vei tuk in ahih hang a madawk a pai Sia JK Kam in a nuailam pan na man thei hi. Tolhsuak in kia suk suak hile hang Km 1 khat bang a kitolhsuak thei dinga ahih manin lauhuai veve hi. A nopna mah in lungsim zo ahih manin kidawm takin ka paisuksuk uh a, a zangtam deuhna mun ka tun uh ciang vuk tungah ka kitolh gawp sam uh hi! A lauhuailua lo ciangah bel ka hangsan mahmah uh hi. Vuk tungah ki gamtang ngeilo ahih manin ka kidop uh ahi ding mah ahi hi. Sia JK Kam bel hangsan mahmahta in vuk tungah pai ziahziah, kitolh ngam lel hi. Ko zong ka pai kik uh ciang tuadan hanciam ding!!
Olympic Park sungah Olympic Meivakpi phung tungah ka kahto uh a, maan ka kizaih huh hi. A endikte etna pawlkhat ka kah uh a, a sangna lam bel ka paikik uh cianga dingin ka siit phot uh hi. Nai khat bang vuk tungah ka bual khit uh ciangin mai vun zong hong ham heha pian a, naptui bang a luang nuam hileh kilawm cih bangin i nakngek hong vot pian ahih manin maan lak theih zah lah kila khin, Tg. Paupi mawtaw tawh ka ciahkik uh hi.
English te laigelh siam John Keats in, "A thing of beauty is a joy forever," ci hi. Hih mun hoih muhkhakte in khantawn hong lungdamsam, hong lungnuamsak ding na hi gige a, tun zong tua mun mitkha a kilat ciang lungsim hong tawldam sak, lungnopsak lai hi.
Salmon Ngasa Pum Golpi Hong Nekpih Uh
Lillehammar ah om Zomi innkuante in nitak ciang Pa Sing te inn ah tutkhawmna leh kikholhna nei ding ciin hong deihsak uh ahih manin koh zong tua lam manawh dingin ka pai kawmkawm uh hi. Pa Sing te inn ka phakma un Pa Lang te inn ah ka bang phei uh a, Pa Lang pen lawm Sia Lianpi Tanglungtup u na hi hi. Pa Lang te inn ah singgah leh a vot khawng dawn in tomvei ka holim uh a, amau inn golpi sungah nuamtak in a teng hit-hiat uh a, sual khempeuh zong puanpi carpet kiphah in vuikhu cih bang omlo, khebuan nangawn omlo ahih manin Norway pen a nun nuam gam hi, cih kitel kasa semsem hi.
Tua pan nitak annekna ding leh kimuhkhopna ding Pa Kam Khan Sing Sukte te inn ah ka paisuk uh hi. Pa Sing te inn a dawl nih pha inn golpi khat hi a, tutphahnip sofa kicing taka kikoih zihziah tungah ka tu uh hi. Inntek nu Nu Cing in dawn ding hong pia pah in kimuhcil ahih hangin a kithei ngeingei sa ka bang uh hi. Pa Sing tate numei 2 in nasep nei khin in khat sangkah lai a, a tapa in Engineer kah in gualnuam mahmah uh hi.
Nitak an hong nekpih uh a, Salmon golpi khat Aluminium foil tawh tuam in a emmin uh hong nekpih uh a, limlua ahih manin gilpi leh sakhau cih tawh a kine himai hi. Tua zah a gol Salmon pum ka nek cilna ahih banah limtak a ki-emmin ahih manin a sa ciil in, a tui zong ciil a, a helpih antehte zong hong nel vetlo hi. Tu bangin gilkial ciang kiphawk kha, mitkha ah kilang vatvat thei hi. Cik ciang nun nuam Norway a kipai kik kha tam maw!
(zop lai ding)
Hau Za Cin
Phuitong Liim
Jesus was angry enough to purge the temple, hungry enough to eat raw grain, distraught enough to weep in public, fun loving enough to be called a drunkard, winsome enough to attract kids, weary enough to sleep in a storm-bounced boat, poor enough to sleep on dirt and borrow a coin for a sermon illustration, radical enough to get kicked out of town, responsible enough to care for his mother, tempted enough to know the smell of Satan, and fearful enough to sweat blood.
He is able to run to the cry of those who are being tempted and tested and tried.
Hebrews 2:18 (AMP)
Whatever you are facing, He knows how you feel.
__._,_.___
0 coment�rios:
Post a Comment