Nitak annek khit ciangin Lillehammar khuasunga a om Zomi khempeuh hong paikhawm in Pa Sing te inn ah ka tukhawm uh hi. Pa Singte inn pen dawl nih hi a, a nuai pen nungak tangvalte lupna leh laisimna, tuibuk leh van senna a kicingin a om hi. A dawl tungnungah kahto leng veilam ah anbuk om in a taklam ah lengla dona tutphahnip hoihpipi om hi. A pua a vot hangin innsung pen a vekpi in a lum vive kikoih hi.
Pasian in Zomite hong ompihna lungdamna late sa khawm in la makai Sia JK Kam in hun uk zong hong sem pah a, mimal khat ciat kipulakna leh hih gam tun pan a tuciang dong lungdamna leh phutkhak thu pawlkhat pulak in thugetkhopna hun nuam tak kizang thei hi. Tua khit ciangin theihnop bangbang kidong in ka holimkhawm uh a, zingsang naih lam ciangin ka kikhen uh hi.
Lillehammar ah Zomite hampha ka sakna pawlkhat hong gen leng:
1. Norway kumpi in nasep a neihma siah uh annek ding, inn leh giahna ding, vaksuk vaktohna ah a kisam pak ding sumnen pia in kem a, zato kilak nuamte zong a mawkna in (kumpi in piaksak) kibawlsak hi.
2. Sangkah nuam peuhmah kumpi in sangsap la lo in kahsak a, College kah ciangin zong leitawi pia thei hi.
3. Mehteh mehgah limci in buhtang namtui a, sathau leh singgahte zong limci ahih manin amau zong a mai uh san tiuteu in cidam sisan suah ciat uh hi.
A nuam hun, zanhunte cimlo taka ka zat khit uh ciangin "Cidam in kimuh kik mateng mangpha," ciin ka kikhenbawl uh hi. Pa Sing tapa Tg. Paupi mah in a mawtaw tawh hong kha in vukngo kikhuh ziziai kawm a taitai in ka giahna ding uh Sia JK Kam inn ka tung uh hi. Lupna nuam mahmah ah hong lumsak in, zanpuan sah lo napi lum mahmah se ka silh uh hi. Vukgam a puante a kingat dan a tuampi na hi a, a sah beubau na kisam tuanlo mawk hi. Nuamtaka ihmu in zingsang khuavak dong ka tawldam uh hi. Zingciang khuavak khit ciang Levanger a om ka zi pute ahi Pu Dal Mung te innkuan kiangah hawh ding ka gel uh hi.
Nun Nuam Norway Zinna - 2 Click HERE
Nun Nuam Norway Zinna - 1 Click HERE
Levangar Zinna
Zingsang khuavak ciangin tuilum tawh maiphiat in ka kisil khit uh ciangin Tawi Nuam te nuta in kiallap lim mahmah moh-hen-nga leh niangtui, singgah hong nekpih uh a, gilvah takin meilengkhawlna lam ka zuansuak uh hi. Tawi Nuam te innkuan pen a thu ka zak kikciangin ka khasiat bang suak in, ahih hangin Topa nei minamte i hih manin pa pen a om nawnloh ciang zong hong nusialo Pasian a nei ihih lam hong phawksak hi. Pasian it in mite tawh kikholh nuamsa uh a, tanote in Lai Siangtho kamngah sin tangtang in zin leh leng kamsiam takin hopih tangtang uh hi. Ka mit tawh ka muh tektek meigong innkuan Pasian bel tinten-a a khuasuak om ahih manin amau zong Topa in tua banga lamto ding hi cih ka thugetsakna leh ka kikhakna uh ahi hi.
Gilvahsa in Levangar lam pai ding meileng khawlna ka delhsuk uh a, ka tunzawh uh minit 3 ciangin meileng hong tung pah lian hi. Norway gam meileng leh mawtawte a hun lianlian in tai ahih manin lap kei leng a kik pen ngak phot kul ahi hi. Mite in hun manmanin zang uh ahih manin a hun lap peuhleng nuntak tawldam mahmah, nuam mahmah hi.
Meileng hong tun ciangin Sia JK Kam leh Tg. Singpi, Pa Sing te in ka vante uh meileng sungah hong domtohsak uh a, ka lutsuak pah uh hi. Minit thum zawh ciangin meileng kikhin pah a, tutna zong ka ngah nai kei uh hi. Mi na dim bilbel ahih manin compartment tuamtuam ah ka lut pheiphei uh hi. Mikang tangval nih leh nungak a hoih hiuhiau khat tawh ka tukhawm uh a, a melhoih ahih manin ka mu nuam bilbel uh hi!
Vukngo vive kimu in lui guam leh mualte, singkung leh innte, lamdunga meivakkhau khuam te nangawn vukngo in tuamcip ahih manin pak viatvuat a, muhnopsa in ka khuadakdak hi. Lamgei ah singkung omna nuai deuhte ah Sazuk leh Sakhi gamta lai khawng kimu zeuhzeuh hi. Vomkang (Polar Bear) ka mu tam ciin ka khuadak kawikawi leh Lillehammar leh Levangar kikal ah ka mu vet kei hi. Nai 6 sung meileng ka tuan khit uh ciangin vukngo na sah deuhdeuh a, leilu lam tawh kinai mahmahta ahih manin mual leh guam zong na zangtam zaw deuhta hi. Levangar tunma in Zomi khat leh nih omna khua pawlkhat Otta, Dombas, Oppdall, cihte ka nawkto uh a, lamgei mualtungah mite vuk tungah kitolh ziahziah in nungak tangval vuktunga tolhna ciampek saupipi pua ngawngngnawng uh hi. Kval leh Melhus khuate ka khen khit uh a sawtlo in Trondheim khua ka tung uh hi. Trondheim meilengtual pen tuipi gei hi a, meileng pan pusuak leng tuipi kimu pah in tembaw hoih nono tampi na kigual diudeu hi.
Trondheim ah ka tun uh ciangin lamet zah val a thupi in Pu Dal Mung Guite te pata (Siam), Pa Kimpupa leh Pa Dongsan te in hong dawn uh a lamdang bang kasa liang uh hi. A mawtaw uh tawh hong vakpih in Nidaros Cathedral biakinn kum 900 val a upa hong etpih uh hi. Hih biakinn pen Norway kumpi lui Saint Olav kiphumna han tungah kilam hi a, kum 200 val bang ciangin kizo pan hi. Biakinn kimteng vuk in khuh zihziah ahih manin hanmual neu cikcik kiphutte zong vuk in khuhcip phial hi. Biakinn ah kiteng mopawi bawl om ahih manin a sung kilut theilo a, ahi zongin a pua lam ah maan kizaih in ka manlah keei uh hi. Norway ngeina tawh kizem nungak leh tangval honpi khat hong pai in lapawl sa zuaizuai uh ka muh ciang, "Zomite bek a ngeina it leh zuun hi kei ei, midangte in zong amau ngeina na thupibawl uh ei," ka ci hi. Tua pan pai phei in Old Town Bridge leipi ka en leuleu uh a, 1685 AD a kilam singtawh kibawl lei hi.
Nu Nemboih Zomi in amau inn ah nitak ann lim mahmah - sa namkim, mehteh mehgah leh singgah namtuamtuam tawh ka vekpi un hong nekpih a, a tanu lah maitai in ngaihhuai mahmah uh hi. Holimna hun tomno leh thungetna hunte zangkhawm in nai khat leh a lang bang a kitai lai ding khua Levangar lam zuanin Pu Dal Mung te pata (Siam) tawh ka dingkhia leuleu uh hi. Levangar ka tun uh ciangin zan nai 10 valta a, zankhuamial nuai ah khuadak leng vuk bekbek pak phiupheu hi. Inn ka tun uh ciangin a zi Pi Khawl leh a tapa neuzaw Lian in hong dawn in coffee dawn khit ciang ka lum uh hi.
Lillehammar ah ka taam ni uh Ni suak pen lamdang ka sa a, Ni pen leitaw lam South ah a suak mawk hi. Leitung langkhat i tunglam ah Norway gam om ahih manin Ni suak zong leitaw lam ah suak a, mualpang khat pan hong suak in mualpang langkhat ah tumkik ziau hi.
Levangar Vakna
Zingsang khuavak ciangin Nipini ahih manin inntekte kuamah nasem kuanlo uh a, kikhop lah nitak lam ahih manin zingsang kiallap nek khit ciangin ka vakkhia uh hi. Pu Dal Mung sangkahna ka pai uh leh vuk bekbek na dim a, a gal pan ka en uh hi. Tuipi pangah ka pai suk uh leh vatawt leh vasa tuamtuam na om a, votsa lo uh ahi tam ka ci hi. Tuipi dawk leh lui kimatna khat ahih manin a tui a lim hiam ciin ka ciap leh al piatpuat hi. A sak ah paito leuleu in Tuibualna Phualpi (Swimming Pool) na om a, Olympic om cianga tuibual kidemna dingin zong a kizang thei zaha kibawl ahi hi.
Tuibualna pan lei thupi khat a kuum viauvuau khat omna hong etpih a, a gal ah mualtung kahna kahlei kidawh kigalmuh thei a, tuipi gei ah tembawneu khawl zihziah hi. Tua lui langkhat pen a lamdang mahmah khat hi. A lui pen Tuipi tawh kizom ahih manin zingsang lamin tui to luan a, nitak lam ciang tui suk luan kik hi. Zogam a Meitei gun sanga lianzaw ding tui to luan, suk luan kilaih cih mawk pen a lamdang veve hi!!
Nek leh dawn ah amau buh na huan nawn mello in mikang an, moh leh sa, anteh leh singgahtui cih khawng na limzat khinta uh ahih manin ei buhsih mah a cite adingin a thak khat hong suak hi. Pau zong English zanglo in Norway pau zang uh a, "Lungdam" a cih bek uh zong "Ka lungdamna a tul a sim hi" acihna dingun 'tulvei ka lungdam' cizaw uh hi; lungdam luat genna kammal zang uh hi. [Tusen Takk = A thousand thank yous = Lungdam mahmah hi].
Levangar ah Pu Dal Mung in kumpi luite inn thupi, kimuhkhopna munpi, galsimna phual leh a sihna phual uh a kikemcingte hong etpih a, mite in a mi masate uh, a hunluite na ciamteh, na pibawl mahmah uh hi maw cih hong phawksak hi. Vukngo tungah khe tawh ka vak sim in Pu Dal Mung tapa Siam leh Lian in kei pen vuk tungah hong sawnpai nuam in hong bawhvat zel uh a, tua pen vukgam omte ommaih dan hi cih ka phawk hi. Amau bel vuk tungah kibual in kikhuk ziahziah uh a, ko bel ka khedap uh a taal nak leh kuamah sawnpaih kullo in a kibual pahpah ka hi uh hi!
Norway ah naupang suaktung zong ni khat in innpua ah nai 2 sungta pho uh, omsak uh ci tazen hi. Tua pen khuavot a do zawh na ding ci uh hi. Sangkah ciangin zong naupangte vuk tungah nai 2 sung pelmawh a kimawl ding uh ahi hi. A puante uh vuk bang, puang phiupheu in amau phamawh sa seselo in kitolh ziahziah lel uh hi.
Hibang mite tatzia, kampau, khuahunte va mu thei ka hih manin ka lungdam mahmah hi.
Tusen takk, lungdam mahmah, a thousand thank yous...
(zop lai ding)
Phuitong Liim
Jesus was angry enough to purge the temple, hungry enough to eat raw grain, distraught enough to weep in public, fun loving enough to be called a drunkard, winsome enough to attract kids, weary enough to sleep in a storm-bounced boat, poor enough to sleep on dirt and borrow a coin for a sermon illustration, radical enough to get kicked out of town, responsible enough to care for his mother, tempted enough to know the smell of Satan, and fearful enough to sweat blood.
He is able to run to the cry of those who are being tempted and tested and tried.
Hebrews 2:18 (AMP)
Whatever you are facing, He knows how you feel.
__._,_.___
0 coment�rios:
Post a Comment