Kiphat in kipahtawi leng mah na nuamzaw e. Kigensia, kihawmthawh, kimuanglo cih sangin kilamsang, kidomto, kithupibawl leng na nuamzaw thamtham hi. Kei tuahna ciangciang ah hibang cileng ulian, zalian, miliante adingin nak nopzaw ngel ding hiven.
Khatvei ka tuah sunsun a nuam mahmah leh a angtanhuai mahmah khat pen - khoppi lian khat ah thugen dingin hong kisam hi. Kei zong kihawmthawh kawmkawm, ahih hang makaite hong deihsakna leh hong lunggulhna ka nial keei ding lah ka lungnuamlo. Kei naupang hilel ing, kei thugen a mipi mai ah a tamveipi a ding khinsa hikeng (hih ngei ke'ng cihnopna), mipi hong lametna ciangin thulu dinpih zo kei leng bangcih ding ciin ka nialbawl hi. Ahi zongin makaite hong deihsakna leh hong itna ka nialzawhloh ciangin ka dingkhia hi.
A mun ka tun ciangin ka thugen a ngai ding pen kei hong pattah Siate, Upate, Makaite khawng na hi giapguap hi. Ka neu tung pan hong pattah a, ka nung pan hong sawn, na gei pan hong nang hong dal, ka mai ah hong kai in hong tonpihte na om gemgam mawk uh hi. Sangkah in laitan ka neihlawhna zong amauteng hang mah hi a, amau hong thapiaknal leh amau hong thungetpihna, thupha leh deihsakna khempeuh ka tansa ahi hi. Topa in amaute thungetna hong dawngin ka maban khempeuh ka hih theih ciang ka zo thei hi. Hong pattahna mah bangun ka khuamuhna themkhat hong kikhangkhan in ka ngaihsutna hong taangzai zaw a, ka thusatzia leh ka gup ka dal hong kidang hi. Minam a hong bawlpa hong bawlna ka telsemsem a, mihinga ka pian a thupina, piangsakpa deihna ka telzawta hi. Ahi zongin tuate khempeuh ka hamphatlawhna pen kei hong liangpuakte, amaute liangko ah hong tusak a, ka kiatlohna dinga hong khutlette amaute ahi uh hi.
Khoppi hong kipan a, kikhopna sungah mipi hong dim mahmahta hi. Ka thugen kawmin ka khuadak leh ka galmuh kullo in ka mai ah kei hong pattahte na tu dimdiam uh hi. Upate kammal kawm leng khangno ka hih lai, College leh University khawng ka kahlai a ka thudotte, ka kamkuppihte pen kei thugen ngai dingin hong tu dimdiam uh hi. A langkhat pan bel - kei gen ding khempeuh amau hong hilhsa vive ahih manin ka angtanga, ka lungnuam pah hi. Genkhialh a om leh zong ka genkhit ciang hong hilhkik ding uh cih ka thei a, ka lamen a, zong ka deih hi. Ka gen ding khempeuh amau theihloh omlo ding ahih manin kei gen sangin amau gen in ken ngai leng kilawmzaw ding cih bang ka ngaihsun hi. A bangbang hileh amau zong a dinna uh gim dinga, themkhat amau tha dawnpak thei ka hih zong hamphatna lianpi hi in ka tuat ahi hi. Tua bang hamphatna ngah pen nuam a, zong angtanhuai a, zong kilawp huai mahmah hi.
Tua banga mite hong thusim bawl, hong pi bawl uh ciangin nuam a, ahih hangin a nuam hetlo ka sak khat om lai veve hi.
Khoppi sungah mihing min khum bekbek 400 val pha in, tualsung pan kileh a hong siim leh hong kihel pen a tuazah ding khawng mah ahi hi. Mipi tuazah tawh hun zatkhop nuam in kihulum mahmah hi. Gamlum in kimuang mahmah in kuamah kienglo cih ding hi. Ahi zongin a nuamlo khat omlai hi. Annek ciangin mipi minkhumte nekna phual leh thugen siate leh makaite nekna phual a tuamtuak om hi. Mipi nekna lam ah ka siate, ka pate, ka ute, ka makaite, kei hong pattah leh hong domto te om a, kei (tua hun sung ading) siapite leh makaite leh thugente nekna lamah ka kihel hi. Kei bel ann duh pawl ka hih manin ka kamlim a, buhsih leh aksa bei hathat hi! Ahi zongin kiningcing takin an leh sa duh zahzah nek ding kilui zihziah a, sa nam tuamtuam leh mehtui nih leh thum, singgah leh muamkhum nangawn kilui ahih manin Five Stars Hotel a zintung mahmah kibang hi. Niangtui dawn ding omden a, tuilum dawn ding deihzah om in, tuivot zong kicing takin om zihziah hi. Duh peuh gen leng Dahpa Khuang a bang zahphial a kizen Zolia leh Zotaang te in hong lui in hong kipia a, hong kibaklo bek hi in gilkial dangtak om vetlo hi. Zingsang in, sun in nitak kikhop tawp nangawn in nek leh dawn a kicingin kimu kingah den hi.
Ahih hangin ka khiatlah mahmah ka lawmte tawh ankuang umkhop ding, ka khuapihte tawh kimuh ding, ka siate, ka upate uh tawh ankuang umkhawm a kikholh ding ka ut pawlkhat kipelh hi. Banghang hiam cih leh amau mipi lak ah ne in koh siapite lak ah ka nek man uh ahi hi. Thukhat ah bel thugente leh khoppi makaite kithuzak mengmeng nading leh siapite a tawldam nading, a hun uh manpha taka a thugen ding uh a kisakkholhna ding hun hoih a hi gige hi. Ahi phial zong in khatvei ka vak kawikawi leh mipi nekna lam ah tutna leh dawhkang tungah pakan leh sikkeu na kigual zeizai a, nopci mahmah hi. Kei zong hih sungah anne nuam ing ka ci lian hi! Ka utna tangtunglo napi ka lungnuam veve hi.
Mipi lam ah buhsih leh sa a kicing in om veve ding hinapi mipi leh adangte annekna phual a kibatloh, a kituamnek ciang i koiteng hiamkhat hong nuam mello in a hawm hiauhuau khat om tawh kibanga, kikhop cianga kimuh simin 'tunkim ni bang' den mawk hi. Kimeltheih nailo, kimu nailo, kithuah nailo tawh kibang den hi. Munkhat ah ne khawm in mun khat ah kitukhawm in kine khawm hileh pumkhat, sakhat i hihna i lungsim ah hong lianzaw tam aw cih ka ngaihsun giugiau hi. Khoppi nuam mahmah napi mipi tawh nakpi taka kikholhna, ankuang umkhop zeizaina omlo ahih manin 'A nuam mahmah a nuam hetlo khat' ahi tam cih khawng ka ngaihsun hi. Christmas zang in sa gilvah taka ne in ahih hang kikholhkhopna (fellowship, lengkhawm, paikhawm) mun ah pailo tawh kibang hi. Mopawi sim in sa gilvah taka ne in biakinn sunga kitenna va muhpihlo cih tawh kibang ka teh hi.
Zomi te minam khangto hat mahmah laitak i hih manin i hun nawk in hong lumlet zangzang ding hi cih ka thei hi. Hun khat laia kizang mahmah 'dan leh ngeina' te hunthak ah hong kilumlet zangzang dinga hong kikheel zangzang ding hi. Nidang in numei in nik teng in pasal in pheituam teng hi. Tuhun ciang numei pasal cih omlo in pheituam kiteng khin a, kizangkop gawp lel hi. Lamdang kisa tuanlo a, a hi ding mah kisa pianta lel hi. Tapa bek in innluahza ngah ding cih kinei a, tuhun ciang tanu zong innluahza a pia ki omta lel hi. Zomi te khang hong kilamdanga, leitung hun kilamdanga, khangthak nuntak hong kilamdang hi. Nek leh dawn zonzia kidanga, omdan khawldan zong kilamdang hi. Kikholh dan kipawl dan zong kilamdang a, 'hibang hita ding maw' cihcih nop om kiukiu thei hi. Liangko kikim ding kigen a, a neu a lian kideidanlo ding, a upa a naupang kideidan lo ding, lutang khat nei ciatciat kizahtak ding cihte hong thang deuhdeuh hi. I tenna leitung a kipei lumletna manglang zaw thamthamta hiam cihnop huai phial hi. A taktak in pilna siamna khanna hangin i nuntakna hih bangin hong kilumlet zangzang ahi hi.
Zomi te zong a khangto gamte bangin a lian a neu, a sia a nungzui, a makai a mipi - a kuamah peuh ankuang khat um khawm, tutna kibang ah tukhawm, khat leh kipahtawi tuah, kithupi bawl tuahtek, kidomto, kilamsang tuah ciat dinmun lam nawhsa in manawh a pai, tai, diang ihih manin ei maia taite delhpha pah ni. Ei nunga hong delhte in bel hong delhpha pahlo thei hi. A nuam lam manawh a lampai ihih manin tangtak, hattak, manlangtak, khawllo a pai-a a nuamzaw sem gam i tun mateng hahkat dingin a kuamah peuh i kizawn ahi hi. Topa in zong hong awi ding ahih manin tua nunnuam gam i tung khin pah ding hi.
Atup thei a khawllo a apai ngiatngiat Sumkuang in a phe zalzal Bilbi sangin a tawp a tun baih zawk mah bangin Zomi te zong gam nuam i manawh mitsuan gige a khawllo a mainawt den dingin Topa in hong awi in thupha hong pia ciatta hen.
Hau Za Cin
Phuitong Liim
Jesus was angry enough to purge the temple, hungry enough to eat raw grain, distraught enough to weep in public, fun loving enough to be called a drunkard, winsome enough to attract kids, weary enough to sleep in a storm-bounced boat, poor enough to sleep on dirt and borrow a coin for a sermon illustration, radical enough to get kicked out of town, responsible enough to care for his mother, tempted enough to know the smell of Satan, and fearful enough to sweat blood.
He is able to run to the cry of those who are being tempted and tested and tried.
Hebrews 2:18 (AMP)
Whatever you are facing, He knows how you feel.
0 coment�rios:
Post a Comment