Makai Thusinna khat ah ka kihel khakna ah hih bangin hong gen uh hi. Makai na suah lian ciang na sep masak ding thu nam nga om pah hi. Tuate sungah na khantawna na mangngilh nawnloh ding thute kiphum hi. Tuate a banban in semkhia in zangkhia zeekkhia thei peuh lecin na makaih sepna ah na mavang semsem dinga tavuan lianzaw na let ciangin zong na silah kei ding hi, ci uh hi.
Tuhun khang pen makai sep a baih het nawnloh hun hi. Mi khempeuh in manlang takin leitung thupiang khat peuh internet tungtawn pan, TV leh thukizakna, kihopihna vanzatte tung panin na za mengmengta uh hi. Tua ahih manin a hunlapa thukhentatna na neih theih kei a, a hun lapa na sep man kei leh na makaihna hamsa zawkan lai hi. Bang hang hiam cih leh mite in thukhentatna la baihlua in thu makhelhlua lecin a kisam thu khempeuh kaikhawm manlo na hih manin na zeekkikna ah kicing zolo a, thu kaihkhawm ziakai in khentat hak lecin lah thuthak piangkik manin thului suak man zel ahih manin a ziakai suak leuleu hi. Tua ahih manin a hun lap ding, a thu kicing ding, thuthak hong piang taleh na thu paipih luilo a kizang thei ding ahih kisam hi. Tua ahih manin a manlang thei pen a a kisam khempeuh kan, thei, kaikhawm a sep khiat mengmeng ding hun hong tungta hi. Tua banga sep theihna in nang hong tawsawn thudotpite leh na seppih mipite khempeuh in hong muanna a khanna leh a kipna ahi hi. Tua bang hih theihna dinga hong panpih thei thu nam nga i gen ding hi.
1. Mipi Kisap Thei Masa Pen in: Makai khat in a sep masak penpen ding pen a sep ding khempeuh sep pah zangzang hilo in a seppih ding makaite, thudotpite, makaite in bang kisam a, bang lunggulh pen uh hiam cih theih ding ahi hi. A deih uh a hoih leh a hoihna kuppih a a sepzia ding genpih a lawpna a lungtang vuah guan ding ahi hi. A deih uh sanga hoihzaw na theih leh tuate zong amaute kiangah na gena na telsak mahmah ding leh a lawpna ding vua na kuppih siam kisam leuleu hi. A hoihzaw na theih kei leh zong na seppih, na mipite sung pan a hoih, a kip, a kimang ding bang septheih om hiam ciin dong in kanin theihsawm in na theih ciang bangci sep ding cihte na geeltoh pih ding ahi hi. Makai cih pen mainawt dinga kipan, a madawka hong kikoih himawk ahih manin na sep sung khempeuh mi tampi (a tam theipen) hamphatna dinga nasem na hi cih kithei in tua bang a sem thei, a sem nuam, a lunglut leh a lawp khempeuh tawh kipawla na sep ding ahi hi. Tua ahih manin hong lunglutpihlo, na hoih sep ding a theilo, thei taleh a sem nuamlo, a lehtat, a langpan lungsim leh pumpi peuhmah na nasep hong nawngkaisakloh ding a thupi penpen ahi hi. Tua ahih manin na seppih ding na tel ciangin zong na pilvang pah ding ahi hi. Na pawl ding mi na neih kim dimdiam leh nang adingin a manpha galkap muanhuai hi ding uh hi.
2. Na Seppihte Tel in: Vai khatpeuh ah semkhawm ding, geelkhawm ding, diangkhawm ding na hih manin na seppihte tel cihtak in tel masa in. Amau ngaihsut leh amau deihna, a lunggulh leh a deih uh bang hi hiam ciin tel sawm hamtang in. Tua bang na tel khit ciang bangci seppih lecin taangzai a bangci seppih lecin manlang ding, mainawt ding, lamzang ding cih na tel pah ding hi. Amau lawpna zong na khansak ban ah nang tawh sepkhop a na nung hong thuap uh zong nuamsa ding uh hi. Na makaihzia ding na theih khit ban ah amau thu ngaihsutzia leh thu paipih nopzia, thumuhzia leh a kalsuan ngei zel dan uh na tel semsem dinga, a nuntakna vuah bang thupisa, bang thupisalo cih nangawn na thei pah ding hi. Mihing pen i tup i sawm a kibat nak leh tua lam tawna lampai khop hamsa nawnlo hi.
3. Nasepzia khek a kul hiam cih kantel in: Kalsuanna khat peuhpeuh a kizangsa a ban zom ziau leng baih penpen hi. Ahi zongin a hoih pen mah ahi hiam, ahih kei leh a hoihzaw in sepzia, sepdan a om hiam cih kantel masak zong a kul ahi hi. A hoihzaw a om leh a kisam banga khek tohtoh ding a hoih hi a, mi khempeuh in phattuampih ding hi. Ngeina a kisamlo leh a phatuamlo peuhmah a hoihzaw a om nak leh khek toh mengmeng ding a khangto minam leh gamte zat ahih mah bangin tuate zong zat ziahziah lel ding ahi hi. A lui khat na khek ciangin a tel nop, a theih baih, a zuih nuam, a hoih, a manglangzaw a thak khat tawh na khek pah ding ahi hi. Na seppihte bek hilo in na makaih mipi khempeuh in na khekna 'a hang' limtak a tel sitset uh a kisam ahi hi. Mi khempeuh in vaithak khat pen a tel mahmah nak uh leh a mawh zonna ding uh omlo pah ahi hi.
4. Tup leh Ngim Kician Nei Pah in: Leitung mihing khempeuh in tupna thak, ngimna thak neih ding kilunggulh den a, tua bang matutna neih ding kilawp mahmah ciat hi. Mi khempeuh in nisim a a sep ngei, a hih ngei hihhih, sepsep cimtak mahmah hi. Tua ahih manin a thak, a limci zaw, a taangzaizaw, a manglangzaw cih bang a om a, a hoihna a tupna a kibat nak leh zuipah, zangpah in pom pah lel uh hi. Tua ahih manin na tup na ngimna pen na tunna dingin a lampi a kibanglo a lawphuaizaw na totpih theih leh a hoih ahi hi. Tupna thak, ngimna thak, vai thak, thu thak a om kei leh sepngeiteng sep kikkik pen mite in cimtak bek hilo in lawpna kiamsak a, machine (set) tawh kibang hi hang cih lungsim nei nuam mahmah uh hi. Tua ahih manin mipite adinga vai thak, na thak, lawpna thak guat ding pen makaite mawhpuak hi a, tua lampi tawna paipih in a vekpi vua a tunna ding uh ngaihsutpih ding, seppih ding ahi hi. Thudotpite nangawn in "Aw haw" a cih liang ding vai thak neih hamtang ding ahi hi! Makai thupi i cihten a sunmang uh mipite tawh kikum khawm in mipite lunglut sak a, mipi vai suah in mipi hamphatna suaksak uh hi. Tua banga makai theite mipi in it in zong hanciampih uh hi.
5. Banghangin hih ka hiam cih kidong in: Makai khat in a nasep ding bekbek, matut ding bekbek ngaihsunlo in banghang in sem ding, banghang in hih ding cih limtak a ngaihsut den kul hi. Sepzia, bawlzia bel ngaihsut hamsalo a, banghanga hih ding, banghanga sem ding cih pen mailam saupi sukha ahih manin makai khat in lungsim ciimtak tawh a ngaihsut ding ahi hi.
Thukhupna
Makai khat adingin sep nop tampi om den ahih manin koi sem masa ding cih pen a tel hak mahmah ahi hi. Minphat pakna leh lawhcin pakna ngaihsut ahih khak leh a thupi sep masak dingte kimangngilh thei hi. Ahi zongin sep masak dingte theia a kalsuan makai khat in a ciil in a lawhcin pah loh hangin a tawpna ah a lungtup tuibang tungsak veve ding hi.
Hau Za Cin
Phuitong Liim
Jesus was angry enough to purge the temple, hungry enough to eat raw grain, distraught enough to weep in public, fun loving enough to be called a drunkard, winsome enough to attract kids, weary enough to sleep in a storm-bounced boat, poor enough to sleep on dirt and borrow a coin for a sermon illustration, radical enough to get kicked out of town, responsible enough to care for his mother, tempted enough to know the smell of Satan, and fearful enough to sweat blood.
He is able to run to the cry of those who are being tempted and tested and tried.
Hebrews 2:18 (AMP)
Whatever you are facing, He knows how you feel.
0 coment�rios:
Post a Comment