kathelnah

A ( 2 ) VEI NA GZA KHAWMPI , TEDIM

10:08:00 PM GZA, INNPI, KAWLGAM, KHUA, KIPAWL NA TUAMTUAM, THUTHANG, TUAMTUAM, ZOMI No comments

REV. DR . PUM ZA THANG TOMBING@ZBCMTULSA , NISUH NI PI ( AUDIO )

2:01:00 PM INNPI, KAWLGAM, KHUA, TUAMTUAM, ZBCM, ZOMI, ZOMI MP3 No comments

Ni Suh Nipi ( Palm Sunday )
Rev. Dr. Pum Za Tombing
Zbcm-Tulsa Church, Tulsa , OK
USA
13th April 2014

BIAKNA LE MINAM KIKHEN THEILO!

9:46:00 PM ARTICLES, INNPI, KAWLGAM, KHUA, TUAMTUAM, ZOMI No comments

Editorial (Zolai Zunna - ZCLS, khol 25, Hawm 110, January - February 2014)
Editor Rev. Lian Khen Pau
Joint Editor Rev. Job Nang Khua Thawng

Kum 2014 in,
Kawlgam Khristiante adingin kum 100 lom 3na hun thak sungah ih lut kum
hi a, Khristian Pawlpi kimin Lungdamko in thu a ngen Pawlpi hi ding,
ci-in Pasian' hong tonpihna sate tugnah lungdam koin mailam ading
Pasian hong deihna bang hiam ci-in kanin thu a ngen ih hi hi.

Zomi te minam ading Pasian hong deihna bang hiam ci-in kanin thu a
ngen ih hi hi. Zomite minam picing khat ih hihna "lai" hi a, Zolai
Simbu ih neih Kum 100 cin lungdamkohna Pawipi i khaam khinzo hi. Zomi
te Kum 100 lom 2na hunthak sungah a lut ih hita hi. Lai tawh i minam a
tawisangte i suah nadingin pawlpi ciatpan vaipuak lain mimal kim
laisim ding tha kipia ni. Zolai Simbu Kum 100cin lungdamkoh thu
tangkonate (thu pusuahte) zuih ding i hanciam ciat ding hi. Khuahun
luanzia zui-in laigelhzia le kammal zatzia zong puahtuakte i puah toto
ding hi.

Kawlgam adingin i minam hihna kipulak kim cileng zong a kikhial lo
ding kum hi. UN tawh kopin Kawlgam kumpi in March 30-10 April, 2014
sung Kawlgam bup mi phazah kisimna neih dingin hong geel uh hi. I
hihna bang kipulak kim cihna hi.

Topa Jesuh in zong ahihna bang mite le a nungzuite'n a theih ding deih
ahih manin "Mite in mihing' Tapa kei kua hi hong ci uh hiam?" "note in
kei kua hi hong ci na hi uh hiam?" ci-in dotna na bawl hi. Matt. 16:
13. Jesuh pen ahihna midangte'n a theih ding a thupisak mah bangin
Zomi te zong Zomi hing cih i kitheih ding hong deih hi. Amau hihna
zong a thupi ahihna i kipsak ding hi.

Biakna le minam kikhen thei lo hi. Ahi zongin minam in biakna nuai nen
theilo a, biakna sungah minam nungta hi. Minam i cih ciangin Politic
party naingngaanzi party a gen nuam ihi kei hi. Tangtawng pek pan ei
le ei Zomi a kici i hi hi. Zomi cih pen i hihna ahi hi. Biakna in
minam pai thei lo ahih manin Rev. (ST Hau Go) hun sungin Zomi Baptist
Convention ci-in Pasian in thupha tawh henkhawm hi.

Lai nasepna twah kizui in 1980 kum in ZOMI mah bulphuh in ZOMI
CHRISTIAN LITERATURE SOCIETY ci-in Zomi makai masate'n kipawlna na
pankhia uh hi,.

Kawlgam kikhelna zui-in i hihna lenkip a, minam dangte tungah thupha a
hi dingin Pasian tungah lungdamko in thungen ciat ni.

KAWLGAM LEH MUALGAM "GENUINE FEDERAL SYSTEM " CIH KAMMAL KINIALNA OM!

9:34:00 PM INNPI, KHUA, THUTHANG, TUAMTUAM, ZO KHUP, ZOMI No comments

April 5-6 ni UNFC leh USDP kiho uh a, alangnin vua thului uh enkhawm uh hi. Ahihhangin USDP in Revolutionary Armed Ethnic Groups cih kammal leh Genuine Federal System cih kammal 2 pom hamsa ahihmanin, ni 2 kiho beh uh a kithukimna aham ( single text) khat bel suahkhia zo uh cih kiza hi.April 5-8 sawt lawh hi.

Hih aham ( draft) pen apawltek vuah ciahpih kik ding uh a, tua khit ciang May kha sungin UNFC leh USDP tukhawm kik ding uh ci hi.

Mualgam UNFC leh Kawlgam UDSP te tutan, gambup kikapkhawlna ( Nationwide Ceasefire) a ding kithutuahna, ngahzo nailo uh hi.

May kha ciang khatvei tukhawm kik ding uh a, fedral leh galkap lam tawh kisai kiho lai ding uh ci hi.

Nationawide Ceasefire kithukimna ah, Mualgam te'n ceasefire khutpi mek zawh kha 3 sunga political dialoque pan ding, tua dailoque ah federal vai gen ding ci uh a, tua pen Myanmar USDP leh Army in hamsa sa niloh uh ahihi.

Myanmar in Genuine Federal cih kammal mahmah kihta uh a, Myanmar Armyte thinktank pawl ahi Egress te puaisar kammal ahi " Power Sharing leh Resource Sharing" cih hong tahtah uh ahihi.

May kha ah Nationwide Ceasefire khupi amek zawh uh leh, Political Dialoque om dinga tua ah USDP-NLD-UNFC ci in , kihona hong om kha thei ding hi.

Ceasefire leh political framework ding bek zong hizah sawt ahihmanin, political dialoque pen hisang sawt zaw lai ding hi.Panglong kithukimna daan hong neih kik uh leh zong, parliament ah USDP tamzaw ahihmanin, 2015 khit a hong kah dingte lam-etna tawh, ahun kizekaisak tek ding ahihmanin, vaisiang pak theilo ding a, vai khempeuh 2015 khit a hong kah dingte kingak tek leh kilawm ahihi.

May kha kihokikna ah Ceasefire kithukimna sungah Genuine Federal System cih kammal akiguang zawh kei leh, may kihona zong,tua nangawn kikhinto thei lai ding ahihi.

Nungdeuh in Myanmar Election Commission Chair Tin Aye in, 2015 Election pen kum bei kuan December khong in kibawl zo pan ding ci hi.

Mi khempeuh in 2015 kiteelna khitlam mitsuan ta uh ahihmanin, 2015 masiah sung bel huih vive tawh , hong ki vikvik ding uh cih kimu khol thei ta hi.

Zo Khup

http://zokhup.blogspot.com

TEDIM AH OMLO

6:21:00 PM ARTICLES, DR. HAU ZA CIN, INNPI, KAWLGAM, KHUA, TUAMTUAM, ZOMI No comments

Tedim a nopna tampi i gen khin a, tu in a nopzawk semna ding zong tampi
kibawl theilai hi cih ka muhna tawm kong gen nuam leuleu hi. Tedim ah a om
tampi om a, a omlo zong na om veve hi. A omte a omlo dinga hoih zong
pawlkhat om a, a omlo tampi a om dinga hoih zong na om veve hi. Khavak nuaia
Thangmual lam pan a suk len vanleng ging dudute bel a gin ngaihlua kei in
ahi zongin khuapi etlawmsak, a khu a nusiatte zong et dingin etlawm mahmah
hi. Nidang ciang Zomi te tuanna dinga a lengleng uh ahih hangin tu laitak a
kito etet zong hiphot mai hi.

Thukizakna Laidal Hawm Omlo: Khuapi khat dingin nisim thukizakna a om ding

tawh kibang napi na omlo bilbel hi. Lamka ah ka zin ciang zingsang simin
Zolai tawh kigelh Thukizakna Lai (Newspaper) i thawhma in inn kongbiangah na
kikoihsak a, zing nisuak nilum awi kawm, niangtui dawn kawm in kisim a,
leitung mun tuamtuam ah tua bang thu piang hi, Lamka khuasung leh khua kim
ah tua bang thu piang hi cih kigelh hi. Tua bang a om ding ka sak leh Tedim
ah na omlo in, nilum awi kawma niangtui dawn bek na hi ziau in, a kimlo khat
om hileh kilawm cih bangin kihi hiauhuau. Ni 4 ka taam sungin Thukizakna lah
kisimlo, radio lah kingai lo, TV lah kienlo, internet lah kienlo... ka
lawmte in gamdangah tua ni 4 sungin thu tampi na theih behlap ding uh a,
thuthak tampi na zak behlap ding uh a maw ciin ka lung hong nuam mello hi.
Leitung thu piang theilo in khuasung, tualsung thupiang thei kei leng upate
in 'bil vuh loh' a cih uh kibang baih mahmah leh kilawm. I khangual
kiban lah diak leh kilawm sa ing. Nau min khawng puak damdam in i phuak
hang i thutheih, i thuzak nisim, naisim, hun sim in i behlap kei a, ei
bualna teng bek ah i bualbual leh i theihloh lam zong a theilo thei ding
kihi mawk hi. Mite in a theih lam uh zong a theilo ding kihi lai hi. Tua
ahih manin Thukizakna laidal kihawm omlo pen nuam kei. Om leh nuamzaw in um
ing.

Cope Topa om laiin Tedim Thukizakna na hawm a, tua banga kihawm bangzah a om
tam ka thei kei hi. Biakinn kimin zong ei pawl sunga thupiang teng,
khuasunga thupiang theih dinga kilawmte, gampua a thupiang theih dinga
kilawmte gelha nipini sim a hawm dingin hoih kasa hi. Ko, Mizogam khawngah
khuasung pawlpi khempeuh, khangno kipawlna, numei kipawlna cihte in a kinei
khin hi in Nipini zingsang bang thukizakna laidal sim ding tam zawzen hi.

Vasa omlo: Khual i zin ciang khua tuamtuam ah i pai a khuasung ah vasa
khawng na ham ciauciau leh a nop dan tuam se hi. Khuasung singkung tung
khawngah vasa na bawm henla, tua khawng en kawm, a ham khawng uh za kawmkawm
leng a nuam mahmah khat hi. Ahi zongin tu tung pen Phuitong a pak nawnloh
man maw, ahih kei leh theikha leh suangzute a pak loh laitak ahih man maw,
khuasung ah vasa ka mu kei hi. Khua kim ah zong vasa leng zaizai cih bang ka
mu kei mawk hi. Khuasung ah singkung a kisuanlo hi peuhmahlo napi vasa ham
ciauciau khawng kiza lo a, vasa leng diamdiam khawng kimulo cih pen bang
hang ahi tam aw ciin ka ngaihsun hi. Naupangte muh ding, hoihsak ding vasa
tawm khat bek khuasung ah a om theihna dingin bangci vaihawm theih ding
hiam? I Zomi vaphual zong khuasung khawngah hong leng dada phial mai leh
phamawh se hiam?

Singkung Gol Omlo: Khua mual pan ka khuadak a, khuasung pan ka khuadak a, a
gal mual, a pam mual, a khang mualte ka et kawikawi hangin singkung gam mang
hoihtak ka mu het kei hi. Tedim leh a kim a mualte kolh dekdek in kiak them
cikcik po lai sama, a po sunsun zong kihal tum hileh kilawm takin lohal
sulnung bangin mangvom leh leivom ka galmuh hi. Koi ah i singkung po teng om
mang khin hiam? Koi ah i gammang tulak teng vatmai khin, banga zang khin ihi
hiam? I gam i kep kei leh i gamsung bek in thuaklo dinga nang leh kei in
huih siangtho a kicing takin ngah kei leng natna kibehlap dinga, i cidamna
thahatna zong kiam ding hi. I khantolo tuam dinga, i thatang zong a hat ding
zah in hatlo ding hi. I nek ding singkung lopa pan anteh meh lim nono tampi
kingah thei hi, tuate om kei leh sumbuk pan saphuklai tawh a kitunsa meh leh
sathau te i tam nek dinga, tuate in hong 'khek' sak mahmah dinga 'manta
kungah i kah thei' pah ding hi. Tua ahih manin kim leh pam,
gamsung puah ding, kep ding Zomi khempeuh tavuan, mawhpuak, sep ding, pello
a sepding khat ahi hi. Khuapi sung pan khuanawl gam Km 2 tan ciang bang
singkung kuamah in phuk phalloh cih bangin kham theih hileh maw; mipi in
zong tua bang deih hang ciin gen theih a om tam ci ing e.

(zop lai ding)
Hau Za Cin

Phuitong Liim
http://www.hauzacin.blogspot.com/

He Knows How You Feel
Jesus was angry enough to purge the temple, hungry enough to eat raw grain,
distraught enough to weep in public, fun loving enough to be called a
drunkard, winsome enough to attract kids, weary enough to sleep in a
storm-bounced boat, poor enough to sleep on dirt and borrow a coin for a
sermon illustration, radical enough to get kicked out of town, responsible
enough to care for his mother, tempted enough to know the smell of Satan,
and fearful enough to sweat blood.

He is able to run to the cry of those who are being tempted and tested and
tried.
Hebrews 2:18 (AMP)

Whatever you are facing, He knows how you feel.

SOLKHA TANG NUAI AH TEDIM KHUAPI - 13

7:33:00 PM ARTICLES, DR ZAM KHAT KHAM, INNPI, KAWLGAM, KHUA, TUAMTUAM, ZOMI No comments

Tedim ka nusiat ni ding zingkhua hong vakzo ahih manin ka van teng ka domkhia a, ka ciahna ding mawtaw nai 6am a hong tung ding ngak in innkatau ah ka khuadak uh hi. Tonsim leh Tonzang lamkabom lampi gei lian ah meiphual kisep in kuang luahluah a, a gei ah mei awi mi 7 ding khawng kiho lulu uh hi. Zotaang Bus khawlna leh ngakna mun ahih manin amau Zotaang Bus tawh Kawlpi pai ding hi in ka um hi. A sawtlo in Tonsim lam pan mawtaw hong tung ziahziah a, van a khop teek un pua in a tungah mite tuang venvan lai hi! A mawtaw nungzangguh kham tak in ka um hi. A pei bang kipei valval zolo in kipei diakdiak leh kilawm kasa hi. Zogam mualtung vui leh buan lak ah hong tungtung thei cih pen a lamdang hi a, mihing sangin thahatzaw ahihna kimu mahmah hi. A sawtlo in Tedim khuasung lam pan Kawlpi lam zuanin ekleiza (fertilizers) pua mawtawpi nih hong tai phei leuleu a, a mawtaw mei vak pempam in hong ging phei dapdap hi. Zotaang Bus ngakte lah a mei uh tum deuhdeuh in khua lah vak siang deuhdeuh ta ahih manin ko tuanna ding ka mawtaw uh zong hong tung phei pah dingin ka lamen uh hi.

Mawtaw ngak kawmkawm mah in hong kha dingte tawh ka khuadak uh a, khua vak siangpianta cih ciangin iPhone 4S lakhia in camera tawh maan ka zaih kawikawi a, khuasung lamdung ka ciahsan pah ding ka zaih kawm in GZA Khawmpi a puankhai (banner) zong ka mu kawikawi hi.

Lamgei a suanggawina mawtawpi leh inn hoihnono te hong kidawk siang mahmah ta cih ciangin ka mawtaw tuanna ding uh hong tungin ka van teng uh ka guang pah uh hi. Kawlpi pana sun nai 11:00 a lengkhia ding vanleng delh nuam ka hih manun nai 6:00am a pai ding pen nai 6:10am bang hong himan ta a, ka lungsim in ka kinawh pian mahmahta hi. Hong kha khempeuh te tawh khut kilen in, thungetna leh lungdam kohna tawh ka kikhak khit uh ciangin mawtaw hingsak in ka dingkhia pah uh hi.

Leilum Sikha Mulo: Leilum khua ka taitoh laitak un ka mawtaw uh a mai zawlpi kitansa, zan a bawl uh pen kho lo, kiplo in kiliing luapluap zel ahih manin ka mawtaw hawl uh Pa Kap in, "Bawl pak ni" ciin hong khawlpih a, workshop neipa zong na zingtho lian, a lawmnu zong innkatau ah zing zuntha na dingto lian, a maiphiat laitak, a tapa innsungah mei gei ah mei-awi in a tu bilbel ka tuakto uh hi. Pa Kap leh workshop neipa in ka mawtaw uh bawl a, "A sawt diam?" ka cih leh "Sawt lo ding," ciin hong dawng hi. Nai khat dektak hong sawtto in nai 7:00am pawl in ka taikhia kik thei pan uh hi. Tua sungin bel inntekte ningzu um mei geia kitung 'tuk nih bel' acihte uh, a inn bang ah kisuang "914: ZOMI", Sailing, Hei, Thangmual dawna zing nisuak laitak, leh ka tuanna uh Pa Khai mawtaw tawh maan kila man ka hih manin ka lungkim, ka nuam veve hi. Ahi zongin nai 9:30am peuhmah in Kawlpi kitungnuam ahih manin nawhsa a taai kul sa in ka tun manloh ding uh lau kawm, lah cih theih dang om tuanlo in ka patau sim mahmah hi. Vanleng lap kei leng ka vai tampi kipelh dinga, vai tampi sai kik kul ding ahih manin lungsim thungetna tampi ka nei hi.

Pasian huhna tawh leilum sikha lah mulo, a thawm lah zalo, a ham lah zalo ka hih manun muizang takin ka mainawt thei zel thei uh hi! Lampi ah suanghuum kiphah phei zihziah ahih manin Sezang khuakhung to khawng ziiit ciin ka tai theilel uh hi. Vasate zong zingtho tung ahih manun lamgei khawngah lengsuk lengto nailo in lamgei a singkung khawngah tu hithiat lai uh a, khuadam, khuavot pian ahih manin amau zong tangngawh ngamlo uh hiding hi. Zomi te teen cilna Ciimnuai paina lam Saizang lamkabom khawng ka tai kheng vangvang uh ciang ngaihsutna hong tuam hanhan sam hi. Pai kik cianga ka muhnop gam, ka zuihnop lampi ahi hi. Dimpi khua khung phei khawng ah khuamui kai ciuceu in a khang kuamsung khawng meii kaai ciciai in khua kidak theilo a, pat pho mah bangin na pak viatvuat a, zangtam bangin na kizalh didia hi. Sozang tun toh ding ciang luidung ah tui dawna vak kiaukiau Luivavom leh Lailen te na tawn keetkeet uh hi. Mawtaw lampi bawla nasem lamgei a giakte zong na zingthota uh a, lamgei ah tui keu tawh suak in a ha peuh na nawt zangzang uh hi. A zi te uh zong a giak pawl om a, naungek khawng zong om in kap vangvang hi. Anhuanna meikhu lah a giahna uh sikdaalpek leh tuipuan kikhuhna kawm pan hong zamto ngeingai hi.

Thangdung ah Maan Kila: Sozang ka tun uh ciangin khuasung ah vanzuak leh lamgei ah van kizuak kigualto zeizai a, mawtaw khawlsak in a lei man bel ka hi kei uh hi. Vok leh Kel leh ak khawng zong vak khia in lamgei ah pai laanlaan uh hi. Khuasung - lamsak lamkhangah inn kilam ahih manin khuapi sunga inn kikal a mawtaw tawh vak mah tawh kibanga, to tai zalzal in a khuakhung ka tungto pah uh hi. Khuamual ka suah uh ciangin zingni suak in Thangmual dung teng na sawi kap hihiai in phalbi lai nisuak bangin na neem dildial a, hong lungzuanhuai mahmah hi. A mual lah singkung po lo in kiak leh tuallo bek na eng dihdiah hi.

Sozang khua pen nitumna lam mualpangah om ahih manin nisuak in kap pah lo a, amau khua pan nisuak mu dingin mualtung kikahto in Kawlpi lam tuaksuk nadingin mualdung kantan in a lehlam ah kituaksuk deudeu hi. Mualtung ka tuntoh lian uh ciangin mawtaw khawlsak in "Hih lai peuhmah maan kizaih kei leng kisik ding hi hang" ciin ka kumkhia uh hi. Mualdung saupi va zui phei in hoihsa lua ka hih manin nakpi ka awnggawp hi. A gal bang kithawn zezen in ging vangvang sam hi. Ahi zongin huihvot nung hat lua vangvang ahih manin sawt ka om ut kei uh hi. Maan kizaih mengmeng in lopa hing dipdep leh kiak no mikmekte zingsang tui tawmtawm pia kawikawi in ka paisan kik uh a, a mualdawn zong ka ento uh a, ahi zongin ka kahto man kei uh hi. Pai kik cianga dingin ka koih mai hi.

Ngeisok pakkang mu khata!: Thangdung hoihna maimit suan pheiphei in ka khuadak kawmkawm uh a, singkungte hoih in pakkungte zong hoih mahmah hi. Ngeisok paksan leh pakkang zong na pak phei kawkawi ahih manin a kigengen ngeisok pakkang a mu ka hita hi! A maan bek ah ka muh pen tuni 18 March 2014 ni in a takpi in ka mittang tektek tawh Zogam mualhoih pen dungah ka muta hi. Topa ei dingin hoih mah si!! Lampi lah coal tar (suangmeihol tuivom) kizut phei khinta, Kawlpi dong, ahih manin mawtaw lah kisiing nawn seselo, lampi lah gol zaw ahih manin kinawhtai theita hi.

Akluai ah bawngnawi khum haipi khat dawnin ka khawl uh a, ankam limci mahmah lom 7 ka lei khit uh ciang sumkhek laklawh ahih manin thawhbat tuun thum ka behlap vet a, Kawlpi zuan in ka taai kik vangvang uh hi. Lamgei ah Sial, Bawng, leh ak te na gamta leihleih uh ahih manin Zomi te khua hi cih kitel mahmah hi. Tai suksuk in lampi ah Kawlpi pan hong taito Zotaang Bus leh adangdangte ka tuak panpan ta uh a, "Haimual Mawtaw" te zong ka tuak suksukta uh hi.

Taingen tungsuk in Zogam leh Zomi khuate nusia suksuk in Kawlpi ka naih suk deuhdeuh uh a, lampi ah suanghum sunga nasemte lah nasep kipan dingin mei na sem panpan uh a, nasep na ding tu leh temte na lakhia in na mabung panpan uh hi. Pelh suk mengmeng in Zogam huihsiang lah kinusia deuhdeuh a, nisuak lah sa pianpianta ahih manin ihmut suak simsim hi. Lamgei a vaupak kang zeizai leh kuangkuah pak san hilhialte leh suaklu kung pote ka et suksuk kawm in paknamsia (a pak nuaiin namh leng mit pan khitui luangsak ziahziah) pak khawng zong ka mu suksuk hi. Ka deihzah in vasa ham tam zaklo ka hih manin ka lung bel nuam mello hi. Vasa te ihmut lah hun hinawnlo, singkung lopa a tam hang singgah a bop dinguh omlo a vasa zusa tamlo hiam, ahih kei leh kivai kibeng mangkhinta hiam cih hong ngaihsunsak hi.

Kawlpi khua kidawk in lamsak lamkhanga kisuan Dolsing kungte zong a nah uh keu in pulh diahdiah a, ko zong Kawlzang ka tungsuk hiaihiai uh hi. Lampi ah Nahtang khil 4 lei in zuntha in ka khawlpak uh a, zingsang nai 8:45am hita hi. Nai 9:30am a Kawlpi vanlengtual tungman ding hanciam ka hih manun Zogam leh zanggam kigamgi ka tunsuk uh ciangin nai 9:05am hita a, Kawlpi University kongmai ka tungsuk uh a, taisuak in Singunau, Tahan, Kawlpi, ka tun uh ciangin zingsang nai 9:30am sat nailo hi!

Tedim Leilum pan nai 7am a ka kipat khiat uh zingsang nai 9:30am in Kawlpi vanlengtual a tungsuk ka himawk uh hi.

Vanlengtual delhsuak ding, vanteng ap dingin tua khit ciang vakkhia kik ding ciin ka sawm uh leh Leipi lei ah galkap a dimin na kigual uh a, tua lampi tot phallo in a nawllam pek ah ka pelh uh hong kul hi. Ulian khat pai ding ahih manin tua lei ah kuamah paiding a phallo na hi uh a, ka ciahkik lam uh ciang na kihongta hi. Ka pelh kawm un ka sunghpa Pa Cin Lian Thang Valte leh a tanu Mawmawi 7months Kawlpi Zatopi ah cina a lumcip ka va veh a, amau gimpian uh ahih manin oxygen khawng na kithuah liapluap hi. Kawlpi Zato ka hawh ding laitak un Sagaing leh Maguai Division ah Health Director in zato en in a pai laitak ahih manin galkap tampi mah in lampi na khaktan leuleu a, zato sung nangawn hong lutsak lo taleuleu uh hi! Huiha!! Gamdang khawngah uliante zato a pai hang cinate ading, mipi adingin a dongkholh in omlo mah hiven maw cihcih bek in om hi.

Vanleng lap lua liang leuleu: Ka tuanna dinguh vanleng Air Bagan pen ka ticket tungah sun 11:00am in Kawlpi - Zangkong leng dingin kigelh hi; tua man mah a zingtunga Tedim pan Kawlpi a delh ka hi uh hi. Ahi zongin Kawlpi vanlengtual ka tun uh ciangin a nasemte zong na tung nailo uh hi. Kongcingpa in, "Nasemte zong hong tung nailo a, noh tuanna ding vanleng bel hong tung pak nailo ding hi," hong cihsan ziau hi! Kileh kik in Lia Muangnu tunna pite kiangah ka khawl uh hi. Kawlpi khuapi hausapa Kawlpi Mayor pa inn pan Air Bagan office hong hopihsak uh a, ka vanleng uh nitak lam 12:30 P.M. ciang hong tu ding, tua zawh nai khat 1:30 PM in lengkhia kik pan ding ciin hong gen uh hi. Vanleng lap lua ka hizen uh hi. Vanlengsung ka lut taktak uh ciang ka tuanpihte un zong Tedim pan hong delh uh na hi a, amau bel vanleng tun hunding thei uh ahih manin zingann nek khit nai 9am pawlin Tedim pan hong paisuk pan uh hi.

Theihlohna gam ah bel gamtat dan a kikhial thei mah himawk ei, ahi zongin a hun lapa pai hamtang pen kikhiallo hizaw.

Sia Do Kham zi leh tate tawh tuang khawm: Ka gelkholh uh zong hilo, ka kiciam uh zong hilo, Sia Do Kham zi Add leh a tanu Mary, a tapa Joshua tawh ka tuangkhawm kha uh hi. Vanleng ngakna sung ka lut uh ciangin amau zong hong lut uh a, "Eh! Noh lah na himawk vua," ciin ka kikhutlet keei uh hi. Sia Peter Mangmu, Sia Do Kham naupa tawh hi in nuamtak in ka kithuah thei vua, Mandalay ah vanleng khekna ah nai 3 sung mah vanlengtual ah coffee dawn kawm, anne khawm thei ka hih manun ka nuam mahmah hi. USA pek pan GZA Khawmpi delh a hong leng vangvang uh hi a, gim mahmah, tawl mahmah, ihmut zong cim manlo in a kileh pah thethu uh hi. A tate sangkah lai ahih manin a tuate mah delh kik kul in a ciahpah uh hi a, lunglenna leh khuangaihna tampi a om hangin Topa in hong gualzawhpih hi. Tedim ah GZA Khawmpi sungin lasakna, thugenna leh laamna cihte hong nei thei uh a, gam thupi a om cih mah hong picingzaw in inn lama om Zomi te mah kinehno zaw hi. Khatvei bek Tedim ah ankuang kiumkhoppih man leh ka cihcih pen Mandalay vanlengtual ah hong lem bilbel ahih manin 'Topa Gelna Mah Hoihzaw' ciin ka lungdam mahmah hi. Cidam takin ka paikhawm uh a, Zangkong vanlengtual pan amau dawnte tawh a kimuh dong uh ka kithuah thei uh hi.

Ka lamet hetloh Japan ka zin laia Nu Haukhek te inn ah ka kimuhpih Zolai sin Tg. Thang Hau Lian @ Kosei pen Tedim hong zinto in GZA Khawmpi hong siimto a, amah hong tonpih Lianpi tawh zong hun nuamtak ka zang thei uh hi. Zomi te khawmpi hong uap, hong siim kha Japan pan Zokam pau thei, Zolai gelh thei Japan mi khat nei hihang cih mangngilh kei ni. Amah zong a PhD na zo a, zi na nei in, nasep na nei a, tu in zong Zogam ah banglam khantohna semkhawm ding i hiam ciin ngaihsutna hong a nei ahi hi. Ei thupi ikisak mahmah laitak in zong mite in zawng hong sa mahmah, hong pattah nuam lai mahmah hi, cih hong phawksak hi. Tua in Zomi te dinmun pen kikimlo hi, cih hong lak hi. Amah tawh, Sia Do Kham innkuante tawh Kawlpi pan Mandalay, Zangkong ciang ka tonkhawm thei uh a, hun nuam ka zang thei hi.

Zangkong vanlengtual ah Asia Pacific Region ah Tchoukball Federation ah Vice-President a sem Pa Do Khan Khup, Myanmar Football League ah kimawl Chin United ah zong Chief Executive Officer a sem in hong nadawn a, cidam takin ka pai lam zong hong dawn khin, tuan ka ciahlam zong hong dawn leuleu hi. Ka tunna ah hong kha in ka kisap a om hiam ciin hong donga, ka lungdam mahmah hi. Zomi khempeuh in itheih dingin a sawtlo in amau tchoukball team te Singapore ah Asia Pacific Region kidemna ah hong pai ding uh hi. Thungetna ah phawk ni. Gualzawhna bek hilo in Topa makaihna leh lamlahna tawh a kalsuan theih nading un. [Tchoukball banghiam cih na theihnop leh: http://www.youtube.com/watch?v=D0VWFK8PGWQ]

Zangkong ah zan khat giak in cidam in Singapore ka tungkik hi. Ka kuanlam sangin ka ciahlam lungdamna leh thupha tampi, ngaihsutna thak tampi tawh ka ciah hi.

Thukhupna: Zogam khuapi Tedim a mu bek ka hi kei a, a ngaihkuaisa in a ciahsan ka hi hi. Tedim nopna leh a khuasung kidawh dan a nopci ka muhte hampha ka kisa hi. Khaliik laitak, khavak laitakin va zin kha sese ka hih manin zong ka hamphatna hong behlap hi. Zomi vive na om in, Zokam vive kipau in, Zola vive kisa a, Zogam huihkhi hong langin Zogam pan piang anteh mehteh mehgahte ka va ne hi. Zomi van lui, Zomi ngeina vante va mu in Zomi tangthu sungah a mangngeilo ding sanginn, zato inn, tualpi, biakinn, mun leh mual te ka va sikkha hi. Zomi ulian tampi tawh kimu in kithuah in kikhawl in ka va tukhawm kha a, angtang leh hampha ka kisa semsem hi. Zomi te nekzonna pawlkhat va mu in zingvai nitakvai hawmzia te ka va mu a, khantohna in hong pelhlo hi cih ka tel sinsen hi. A tamzaw khanglai leh khangnote khua ah omlo in mundang, gamdangah lengkhia khin ahi maitam aw ka ci hi. Khangno a tamzaw pen numei lam hizaw pian hi. Gen ding tampi omlai...

Gen zawhloh lungdamna leh phawk kikkik ding hunpha leh hunnuam va zang kha ka hih manin ka lungdam ngiat hi.

Gelhgelh ni cileng bei paklo ding ahih manin mailamah thulu tuamtuam tawh zomkik zaw ni. Ka lungdam.

Z = Zomite hanlungciam, khangto diam!

Topa in hihciang hong tonpih hi.

Hau Za Cin

Phuitong Liim

http://www.hauzacin.blogspot.com/

He Knows How You Feel

Jesus was angry enough to purge the temple, hungry enough to eat raw grain, distraught enough to weep in public, fun loving enough to be called a drunkard, winsome enough to attract kids, weary enough to sleep in a storm-bounced boat, poor enough to sleep on dirt and borrow a coin for a sermon illustration, radical enough to get kicked out of town, responsible enough to care for his mother, tempted enough to know the smell of Satan, and fearful enough to sweat blood.

He is able to run to the cry of those who are being tempted and tested and tried.

Hebrews 2:18 (AMP)

Whatever you are facing, He knows how you feel.

SOLKHA TANG NUAI AH TEDIM KHUAPI - 12

7:30:00 PM ARTICLES, DR. HAU ZA CIN, INNPI, KAWLGAM, KHUA, TUAMTUAM, ZOMI No comments

Nitak khuazing ma in physician Dr. Thomas Sian Za Kham hong hawh in "Glimpse of Zomi Animism In Retrospect" cih ama laibu gelh hong piakhong hi. Amah pen Tedim ah zato siam a kigen hi in, laisiam leh mipil in a kiciamteh ahi hi. A pilna pen a nasep cina damna dingin a bawl bek hilo in Zomi te upna lui, Zomi te biakna tawh kisai zong limtak in na kan uh hi cih kimu hi. Ama'n a thupatna ah, "Zomi pen i minam min dik hi in, i pu i pa khang pek pan Zomi ciin a kiciamteh minam hi hang," ciin na gelh pah hi. Tuma kum 90 kiim pek a vasano lengcil a mu khinsa khat in Zomi thu leh Zomi vai tel mahmah a, tuni a Zomi vai khempeuh tawh kituak ahihna limtak gen hi. Zomi i hihna pen tunai a i kicih tawm hi peuhmah lo in nidang pekpek, i pupa hun pek pan i kicihsa leh i hihna dik leh maan ahi hi. Mite hong theihna sang eima kicihna 'khumzaw' 'zaknopzaw' hi ciin Dr. Kham in zong na ciamteh hi. Kei zong tua mah ka ci hi.

Tedim khuasung khe tawh ka vak ciang bang phawk ka hiam cih leh ka sangkah laiin khua lam ah mawtaw lampi cih zong om ngeilo, a om sunsun zong Jeep pai theihna dinga kibawl lampi neu cikcik hi a, vuikhu mahmah hi. Vuikhu taleh lamzik themkhat zangtam peuh leh kizuinuam hamtang se hi. Zuih den dingin lah lampi sau ahih manin a tomna lampi mah kitawnzaw hi. Mihing i hih manin i thagim ding mah kiphallo in a nuamzaw, a manlangzaw mah kizui hamtang hi. Tuzana Tedim khuasung lamzikpi ka zuih pen a nuamzaw zui hituanlo in a lampi om mah a zui ka hipah hi. Khataang a am, a khialah leh zingciang ciahkhia leng khatang sangin electric tang kitammuhzaw ding a, solkha taang kimu nawnlo ding cih ka it man hi. Solkha tang ah huihsiang dik a vak hialhial a nop dan ka theihsa hi.

Ihmut hun dong lampi ka zuih kawmkawm un meltheih pawlkhat kiangah ka bang uh a, inn sung zong a pua lam tawh teh theih hilo in siangtho in sual te keuhkeuh vive kiphah hi. Tedim ah kibawltawm lenggahzu (grape juice) khawng ka dawn uh a, TV en in, video khawng zong ka en thei uh hi. Khuasung meivak pen electric kipialo ahih manin solar energy vive na de zaw uh a, solar power tawh TV, fridge, annhuanna cih bang kizang zaw hi. Tua ahih manin mun nuam, khuanuam a hihna ding a kisam lai bel mei kicing taka zat ding a om kiphamawh lai hi. Lamgei a kikoih tawm lampi lak meivakte zong khuasung makai hanciam pawl in amau hanciam tawmna tawh a koih uh hi a, lamkawi a tamzaw khempeuh ah kikoih in mawtaw hawlte adingin phatuam mahmah hi. Ko vak zan in bel lampi dung khempeuh ah meivak kisamlo ahih manin tua meivak pheleplep te kisamlua lo a, lawmte in datmei (torch light) a puakte uh zong a kizatna ding tam mello hi.

Zan lup hun mahmahta cih ciang ka ciah pan uh a, inn ka tun uh ciang ko hong mangpha khak nuam hong hawhte tawh tawlpi khat ka tu leuleu uh hi. Holimlim in thunuam gen in ka nui zaizai uh a, inn venga nungak hel a tangval nui lalate zong ka galzak thei zel uh hi.

Lupma in ka van teng uh guang kik in, kithawi in ka om laitak un, inntek Nu Ciin leh Sia Mungpi (Rev. Vungh Suan Mung) te in ka puak dingin Belawi Tang hai 20 tak hong pia venvan a, lungdam si, lah ka van tam ahih manin pua khin zolo ding ka hih manin hai 12 khawng bek ka guang thei hi. Topa in amau hong itna leh deihsakna, hong zindona te uh a zah tampi in thupha tawh na vukkik ta hen.

Ka van teng ka kithawi khit ciang inntekte tawh mangpha kikhak in, lukun in Topa tungah hih ciang hong tunpihna lungdam ko in, a zingsang ciang nai 6am a Kawlpi zuan dingin ka lungsim heita a, ihmu dingin ka lukham tungah ka lu ka nga suk hi. Topa in hong tonpihna, hong muhsak Tedim khuapi leh ka Zomi pihte, ka muh ngeinailoh mual leh guam leh singkungte, ka khanna khua mah banga huihsiang a nunna khua nuam leh vuikhu pheupheu tawmkhat a kisikkhaknate, khataang ah lia leh taang lungkihual taka vak khawm diamdiam te, leitung hoihna kicingsak pak hoih leh singkung lopate leh, hun nuam ka zatte khempeuh lungngai kawmkawm in ka mit ka si diaidiai a, ka phawkkhak loh a om kha tam ciin ka ngaihsutsut laitak, ka khanlawh vat leh zingsang nai 5:05am na satta a, kei zong Kawlpi vanleng nai 11:00 AM a hongtu ding, tua tuang ding delh dingin ka kithawi pah hong kulta hi. Thoto in zingsang nai 6 a hong pui ding mawtaw hong tunma in ka maiphiat in, ka ha nawt in, ka kihahsiang a, solkhapi zong a tum dingin mualdawn ah na tu veuvau ta ahih manin "Mangpha" ciin hong kha ahi tam ka ci hi. Khuavak kician nailo a, phalvak hipan ahih manin huihnung hiauhiau kawm ah vasa ham kiza kiaukiau a, pengpelepte zong hong khanglo pah tading hi cih ka lamen hi.

(zop lai ding)

Hau Za Cin

Phuitong Liim

www.hauzacin.blogspot.com

He Knows How You Feel

He is able to run to the cry of those who are being tempted and tested and tried.

Hebrews 2:18 (AMP)

Whatever you are facing, He knows how you feel.

SOLKHA TANG NUAI AH TEDIM KHUAPI - 11

7:28:00 PM ARTICLES, DR. HAU ZA CIN, INNPI, KAWLGAM, KHUA, TUAMTUAM, ZOMI No comments

Zomi a hong bawl Pasian tungah lungdam ko tawntung ni. Banghang hiam cih leh i Pasian pen eite tungah hoih a, a bawl minamte kem in a hu hi. A khangto ding minam peuhmah in langpanna a phulsuak kul a, langpanna, lehdona, minsiatsaknopna cihte a palsuak zawh kei leh minam lian leh minam picing suak ngeilo hi. A kul leh zong - a kul banga semin a khantohna ding a sep kul hi.

Pasian in Zomi te hong it ahih manin nek ding a kicin loh laitak in zong hong puksi saklo a, hong kihuai ta kei leh Ama khut hat in hong huai hi. Hong minsia sak nuam, hong gal bawl te mai ah an hong lui in nuamtak in hong nesak a, hong lamto in lungmuanna leh lungdamna hong pia hi. Zomi te in midang siatna dingin a sem hetlo minam ihi hi. Minam dangte nangawn a it a, a kem, a puah, a lamto te i hi a, i nektaang, i neih ding taang, i ngah ding taang nangawn a pia ngamte i hi hi. Tuate Topa in thei ahih manin Zomi te lungsim ah itna hong guan a, tawldam mahmah hi. Mite siatna dingin geelna hoihlo, lungsim sia tawh sem ding cihbang a neilo minam i hih manin Zomi ka hih ka angtang mahmah hi.

Hih lai ka gelh laitak in leitungbup ah Zomi te adingin hunpha hong kihong a kisimna ah ZOMI ciin gelh theihna ding hunpha hong kipia hi. Minam khat banga hong bawlpa in minam a i din ding hong deih in hong khual a, hong huai in hong hu hi. Tua manin hih bang hunpha nang leh kei Pasian itna a ngah taklo nangawn in 'hehpihna tawh' (by grace and grace alone) i ngah hi. Pasian ziakai ngeilo a, Pasian in a hun lap a, Pasian in 'a hun cingta hi' acih ciangin sem lel hi. Piangsak lel hi. Pasian in a piangsak nate kuamah in dal zolo hi. Dal sawm taleh lehvat ahih manin Pasian lang ah kuamah pangzolo a, Zomi te lam ah Pasian pang tawntung hi. Pasian in 'hi hen' ci peuh leh leitung kumpi hat pen Egypt kumpi Pharoah nangawn in ama huangsungah sila sem likliakte nangawn lencip zolo, lencip theilo hi. Pasian hih hipeuh leh 'lamdang si e, lamdang si e' cih tawh kilumlet ziauziau lel hi. Pasian hih hi peuh a guk gamtatte nangawn in kiselcip zolo in a lungsim vua ngaihsutna ginalo leh sepna ginalote nangawn pholhkhiatsak in mite muh dingin mite mai ah lak hi. Pasian mai ah a kiselcip thei khat zong omlo ahih manin thudik, thumaan, truth pen hong kilang veve dinga nitumma in Pasian in thudik hong mu sak ding hi.

Hih lai ka gelh laitak in Tedim ah thupiang khat om hi cih kaza hi. Zomi te khuapi ah hih banga hong gamta ngam, hong kiphasak ngam, hong sem ngamte Zomi te in manlang tak in i khuapi pan i hawlkhiat ding, i delh mang ding ahi hi. A sem mimalte kua hi a, a hihte kuate hiam cih Zomi khempeuh in i theih ciat dingin a min uh pulak in a mel uh pholak ding a kisam leh a peelmawh ahi hi. Zomi te hong langpang ding leh hong linglawng sak dingin hong kipante khempeuh Zomi te in dal kei leh kua in dal ding ahi hiam; Zomi khempeuh in nakpi takin i dal ding ahi hi. Pasian in thei a, Pasian muang in kal i suan dinga, Pasian in hong kem in Zomi hong langpangte mai ah hong gualzawhpih ding hi. Zomi te in a hunhun in i sep ding kisam hi. Topa hatna tawh i sem dinga, Topa tha muangin hong langpangte khempeuh mai ah gualzawhna mualsuang i phut ding hi. A kigen ngei ka zak thu khat pen: Mikang gam ah innkuan khat in gul a khawi uh leh a gol ciangin a nu leh pa vakkhiat kalin a tano te khat khatin na mang zel uh hi. A thu a theih uh ciang tua gulpi in a valh zel ana hi hi, kici hi.

Khuasung vak kawikawi, cina veh: Zomi te pen a ki it leh a kihuai, a kiveh, nopni dahni ah a kidelh vanvante hi hang. Ka seppih te innkuan leitung natna cidamlohna hanga thungetna ah ka phawk dente uh ka hun neih bangbangin delh in ka va veh a, kikhop nangawn ziakai in cina vehin ka taai hi. Zomi sisan sunga itna omsa hanga ka kalsuanna pen ka minphatnop man hilo hi. Ka min deih man hilo hi. Ka kithukhualsak tawm man leh a kilawm ding ka sep hilo hi. Mite hong pahtak ding leh mite lungdamna dinga a sem zong ka hi kei hi. Zomi ka hih manin Zomi a hong bawlpa in Zomi te ngeina ah a omsaksa a zangkhia bek ka hi lel hi. Zomi ka hih mana ka sep ding a sem ka hilel a, ka sep manin kei mimal minphatna zong omlo a, kei mimal phattuamna zong om tuanlo in kei mimal thupina zong kibehlap tuanlo hi. Zomi hihna, Zomi ngeina a zuun hilel ka hih manin Zomi khempeuh sep ding tavuan (Zomi National Duty) khat a sem ka hi lel hi. Nang zong Zomi ngeina na zat ciangin nang minphatna hilo in na minam hihna a kem na hilel a, Zomi a zuun a kem a puah na hilel hi. Tua pen mihing khata i pian khit ciang i pianna minam tung ah i seploh a phamawh 'duty' ahi hi.

Kum 50 Pha Hai Tawh Tui Dawn: BC 4050 Capt. Kai Za Dal, 2nd Chin Rifles, Burma in a zat ngei maan hai (glass cup) tawh 17 March 2014 nitakin tui ka va dawn kha hi. Pu Capt. Kai Za Dal pen Pa Pau Khan Khup, Singapore i pianna pa hi a, galkap sungah aksi thum suang bu a sem a pension ahi hi. Zomi sungah Vanleng Hawl Colonel Pau Khan Thang te inn tawh kizom lian in Lawibual Veng ah inn a nei uh ahi hi. Ka va hawh nitak in Captain pa vanzat lui teng ka mu a - namsau khat, galkap singkuang, niangtui hawpna maan hai, a maan uh leh vanzat pawlkhat - thupi sa in kum tampi a kikem van manpha hi ciin ka ciamteh hi. Minphatna tawh a ngah Silver Sword bang a pai leh a bul khawng Silver vive tawh kibawl hi in, a namsau zong a hiam mahmah lai ahi hi. Minphatna tawh hibang a ngah Zomi sungah bangzah a om tam maw ciin ka ngaihsun hi. A singkuang tungah "BC 4050 Captain Kai Za Dal" ciin kigelh ahih manin hih bang vanlui manpha a kikem pen mailam ah Zomi te in thupi kisa semsem ding hi cih ka um hi. Glass Cup pan tui dawn zong a tui a lim tuam liang tawh kibang hi. A taktak in bel a tui a limna a kibang hi a, a tui hai thupi kisa in min nei ahih manin a limzaw bangin a kingaihsun tawm ahi hi. Mihing pen laphuakpa khat in, "It lehang a mel hoih, mudah leng a mel sia" a cih bang ahih hun tampi om hi. Maan hai pen kum 50 val upa khin cih thei kei leng i tui dawn zong a ngeina bangin kidawn suk ziau ding ahi hi. Inntekte ann hong huan, Sialsa leh aksa, Voksa leh ankam, mehteh mehgah te a limna bel gen kipan vet dah ni; Singapore ka tun kik ciang ka gilkial sim in ka mitkha ah hong kilang pahpah!

Solkha Tang Nuai Ah Tedim Lamdung: Ka ciah ding nizan uh hita! Tung solkhapi lah taang pha semsem, lungzuan huai phial hi. Nidang in khangno cil, tangval lai in khuadangah khawmpi khawng kisim, i muh ngei hetloh nungak khawng kimu, hoih kisa, lah kihopih nuam, kihopih ban mello, kihopih nading hun tam kingahlo, Nipini kitung, Nipi nitak kikhop tawp ciang a hun hong bei ziau... a zing ciang kiciah ding hita, tua zan a i lungsim a hi giugiau pen nak thuakhak hiven! Tua nungak hoih i sak khawng va kimuhpih nuam taleng amau zong a khuapihte khawng tawh hun na zang uh, midang khawng tawh na kiho uh, na kikhawl uh; i theih kikkik leh mi lawmngaih khawng na hizaw lai!! Solkha tang nuai ah kua theihpihloh lungzuan sial in kivak dawidawi thei... Kua theih loh in en na thuak mahmah cih bang e...(no zong tua bang na hi tam uh maw, theisam keng e)...

GZA Khawmpi a 2veina lah nitak Sia Rev. Dr. Gin Khan Khual in Zomi i hihna leh Zomi a hong bawl Pasian gelsiamna a thupina leh Zomi hih a angtanhuaina cihte a gen khit ciang Zomi lasiam te in Zogam leh Zomi itna ngaihna la hong sa ziahziah uh a, mipi khutbeng in kilam ziahziah a, cimlo tak, am tak, khialah pipi in a kitawp khin ahi hi. Zan khatang lah vak pha semsem, FBBC&S kong mai pan Lawibawl lampi tuaksuk leng miksi vak nangawn kimu thei phial dingin khuavak a, khapi taang a, Zomi naupang kikhawm te lah puanza leh puanlum tawh kitun in inn lam zuanin ciah hialhial uh, kizui damdam uh a, nupi leh papi te zong a khut vua datmei a tawi uh khatveivei kapvak zeuhzeuh in kizui uh a, a nunglam bek uh kimuta a, mi khempeuh inn lam zuanin ciah zangzangta uh hi. Zolia leh Zotaang bel sep ding sen ding, hih ding a omlaite semin thanuam takin diang ziahziah uh a, den ciang Solkha tang nuai ah itna sinthu kihilh in lamdung khavak ah hong kizui damdam ding uh a, bangzah in Zogam leh Zomi khuapi etlawm sak ding uh hiam cih ka ngaihsun ban kei hi.

A tom in ci leng a tawpni hita ahih manin mi khempeuh in a inn lam uh zuan a, zing cianga a ciah khia pah ding kei nangawn adingin hong lungzuan huai mahmah hi. Lungzuan behlap dingin Thangmual dawn pan kikhop tunga datmei bang hong vaksuk lela Tung Solkhapi zong vanlai tungta in i lutung san pan hong taan suk hihiai a, a vak no mikmek in nungakte muk ah muksanza a kilawm zah lian a kinuh, a mai vuah a kilawm zah liana powder a kinuh uh bangin puang phiupheu a, ngaihsutna sau vaksak mahmah hi. Zomi laphuaksiam lengtong Pauno te in 'Solkhapi' la lungzuang taka na phuak thei uh i cih pen a mun ah om uh ahih man na hikawm hi. Tua zaha khataang nuam bel mun dangah kimu hetlo mah hi. Tedim pen khuavot pian, lah votlua lo, huih siangtho sak lian ding khawngin vot a, khavak zong a liah ding omlo in vaak tuam se hi.

Ka ciah ding nitak hita ahih manin Tedim khuasung khavak ah zan khat ciangciang kei zong vakkhia dih ning e ciin ka diangkhia hi! Lawibual pan khe tawh vakkhia in lamdung ka zui uh a, Zolengthe lam zuanin ka pai pheiphei uh hi. Lampi bawlna suang sik mawtaw golpipi te leh suanghum kisung ding lamgei a kisung viatvuatte cih loh muh ding om mello a, khuasung vak bel kipelh ziahziah in Zola khawng kisa ziahziah hi. Huih lah siangtho in vot hiauhiau a, inn te lah a tung sikkang vive ahih manin a lui pian hangin mial lua lo hi. Inn umna singpekte zong hoih in etlawm mahmah a, to thei mahmah ding hi. Vak pheiphei in nuam kasa semsem a, lampi khempeuh lah suanghum kisung khin in a behlapna ding a suanghum kisungte tung khawngah ka tuang pheiphei uh hi. Tua laitak in lawmte khat motor cycle tawh hong tai vauvau a, "Koi ah pai ding?" ciin hong dong a, "Solkha taang am" ciin ka dawng ziau uh hi.

Tangval lai hi in cih simsim nu tawh lamzui hile'ng bangzah takin a nuamzaw lai tam!

Lawmte in hong kha nuam a hong hawhsawm ahih manun inn lam zuanin amau motor cycle nungah ko zong inn lam zuanin ka kilehkik uh a, inn ah holim in Tedim ka zin ka kisiklohna khawng ka hilhhilh pong hi. Ka paikik ut thu leh Tonzang, Cikha, Tuithang, Kaptel, Lennupa leh a dang tampi ka hawh utlai thu ka gen pihpih hi. Nong zin nak leh na utnana ah hong zinpih thei ning, nong zin ding hong hilh khol peuh lecin kei zong na ki-awngsak ning, ciin hong vaikhak a, kei zong ka paikik hun ding ka lawp semsem hi. Ka paikik hun ding mitsuan in ka om laitakin tua nitak Solkha tang a hoihna nangawn ka mangngilh kha man liang hi...

Topa bawl ni leh kha te, van ah aksi te nakpi in etlawm in hoih si e...

(zop lai ding)

Hau Za Cin

Phuitong Liim

www.hauzacin.blogspot.com

He Knows How You Feel

He is able to run to the cry of those who are being tempted and tested and tried.

Hebrews 2:18 (AMP)

Whatever you are facing, He knows how you feel.

SOLKHA TANG NUAI AH TEDIM KHUAPI - 10

7:26:00 PM ARTICLES, DR. HAU ZA CIN, INNPI, KHUA, KIPAWL NA TUAMTUAM, TUAMTUAM, ZOMI No comments

Tedim khuasung pen lampi a kibawl laitak ahih hangin motor cycle (India lam ah Bike kici zaw) pen na tam mahmah in numeino kum 10 khawng pha pan inteh cih dingte nangawn in a break nangawn sik banlo in ding gegaw in tuanga taipih veuveu mawk uh hi. Limtak in ngaihsun leng bel kidophuai zaw mawk hi. Khuaneuzaw, mawtaw lampi a golzaw a omnailohna lam pan zong mite bike tawh hong kikhawh zaza in khuapi sung ah lampi na golzaw deuh ahih manin hat tai zaw kaan uh hi. Limtak ngaihsun kik leng bel 'mihing i lungmuan ciang tuahsiatna tawh kinai hi' cih bangin nuam i sak luat laitak i siatna ding kidawmlo in omkhak theih a, tuahsiat ding baihzaw thei hi. Tua manin kidop mahmah tek ding a kisam hi. Mawtaw pen mihing tha tawh a pai hilo in leisung pan kitokhia tui thanei tawh a kihal, a meikuang khauhlua a kikhawh vava ahih manin kidop theih bangbanga kidop huai mahmah kasa hi.

Inn lamte in hong muang mahmah uh hi: Gamdang om Zomite pen innlam a om innkuanpihte, u leh nau leh beh leh phung, khua leh tui leh minam in hong muang mahmah, hong it mahmah, hong ngai ngaungau uh hi, cih mangngilh kei ni. Hong muandan uh pen 'nisim antang in thu na ngen un' cile uh cin zong hong mang ding uh a, anne lo takpi in nang adingin thu hong ngetsak ding uh a, anngawl in puksi ngam ding uh hi. Tua zah in hong muang in hong it in hong ngai uh a, hong phawk mahmah uh hi cih mangngilh kei ni. Hong mu nuam mahmah, hong hopih nuam mahmah, na aw uh za nuam mahmah, na meel uh mu nuam mahmah, na nasep uh thei nuam, na cidam uh hiam, damkei uh hiam cih thei nuam mahmah hi. Tua ahih manin na innlamte uh tawh na kizopna uh nakpi takin na 'kipsak' na khosak, na hoihsak un. A tuabangte thupha saan leh a tuabanglote thupha saan kibanglo dingin ka um hi. Zong dik takpi dingin ka um hi. Itna, phawkna, ngaihna, lainatna, deihsakna, khualna, huaina, angvanna, etc cihte na khahsuah kha peuhmah kei un. Tuate na khahsuah uh leh a piangding, a gah omlo in a huut ding mihing gelna tampi hong piang kha ding hi. Tua manin inn lam tawh kizopna khau na tatsak het kei tapeuh un.

Tu in zong na inn lam uh hopih in na aw zasak in thuhoih thupha puak unla, a hoih na theih uh leh hilh in, a sia na theih uh leh kidawm dingin vaikhak unla, a sephuai a om leh sepdingin tawsawn un. Kisik hethetlo ding hi uhteh. Lai Siangtho sunga Paunak bangin hong gahpha mahmah dinga, ahihlote a hong gahpha deksuailo ding hi.

Papi khat ka hopih khak bang, a tate khat Australia ah om, adangte pawlkhat USA ah om hi. A tate in 'ak na khawi in' ci in khawi pah hi. Na nasem kei in, na kitawldamsak in cii, semlo pah, tawldam theithei a om hi. Inn ding na kitawm in, taihinn dawl tuazah na lam in ci...kipat sawmsawmta hi. A zaina, a dung, a vai tuazah a cihte zong gamdanga om a tate gen dan bangbangin hih linlian hi. Khatzong pelemsak lo hi. Tua zah in na nu leh na pa in hong muang, hong thusim in, hong it uh a, hong ngai mahmah in hong it ngaungau uh a, hong phawkvanvan uh hi. Hong itna uh thukkiklo in om kei in, na thukkik theih lai in!

Zomi sungah nahoih sem a sihpih ngam donga pang ngam sangin a hoihlo lam sema minsia giapgiap ngam khawng i omloh manin i minam hong khangto ding hi. Ruth banga mohoih a minthangte a kipahtawi mah bangin 'nung leh ma' khena, sutuah a, a kitawngsakte zong i omloh manin mi hampha i suak ding hi. I khua i tui puah in zuun in kem in i khual bangin i innkuan, i u leh nau sung zong i puah ding a, 'inn gua hah masa' i hih nak leh gam gua zong kihah khawm hamtang ding hi. Tuate i thupha ding ahi hi. Tua ahih manin tulai leitung thu kizak ziauziau a baihna ah a hoih i theihte kizak pahpah in kihilh pahpah in kipiasawn pahpah ni. I khua ah innhoih lam in i khua ah lohoih nei in, i khua ah sumbuk gol bawl leng i khua a nuamsa hi ding a, i khua in a noptuampih hipah ding hi.

Tua ahih manin Zomi leh Zogam khantohna dingin nang leh kei in mawhpuak lianpi i nei hi, cih mangngilh ngei kei ni. Tun in sep kei leh zingciang kisem kha nawnlo thei hi. Nang sanga sem theizaw, nangsanga pilzaw, nang sanga hih theizaw, nang sanga hauzaw leh nang sanga mite muanzawk khat hong khang ziau thei a, nang na val ziau kha ding hi. Tua manin na sep theih laitak in kipan inla, zuun in, puah pah in.

Ka lunggulhna leh ka zinna pan ka muh kong koh pak ahi hi. Tampi gen ding omlai...nidang ciang zom lai ni. Sial khawi ding, bawng khawi ding, ak khawi ding, etc leh gam halloh ding, gam kep ding, singkung lopa it in kem ding, huan bawl in mehteh mehgah ne ding, sumbuk bawl in van hoih van manpha zuak ding cihte gen khin manlo ding hi hang. Nek leh dawn a baihsa a nek ziau dinga kibawl kizuakte ki tamnek lua hiam khangthakte in a nu leh pa cia pha nawnlo in 'khek' thei mahmah hi. Minam khangto te a ta, a tute gol semsem hi. Nek leh dawn hoih in sum leh pai khanga, mite zong gol semsem hi. Gen ding tam, ngaihsut ding tam, i hih theihna khat ah kipan pah lel ni.

Zomi te ki itna thu - Pa Vial Khan Dai in Siapi Smith Ngulh Za Thawng Sagawh Va Siim: Zomi te pen a ki it venvente hi hang cih ka va mu a, ka khawmpi siim tawh kituak ka sa mahmah hi. Siapi Smith Thawng pen a min ka zakzak hang amah ka muhcilna hi. Ka zanna ah, amah a thei tel mahmahte in a genna ah, a kiniamkhiat, a heh ngeilo pasal, a lungduai leh a lungnem, a pil mahmah ahih hang a kiphasaklo, a lungtom lam a kimu ngeilo Zomi pasal hi ciin kiciamteh hi. Tua banga mihoih leh migi, mi lungduai leh mikholh nuam (mi khempeuh tawh kikhawl thei pahpah) ka muh tam nai hetlo hi. Tutung Zomi Khawmpi ah kimu thei in thungai khawm, a thugen zong za kha ka hih manin hampha ka kisa mahmah hi.

Tua bek hilo in, a pano, Pu Dai in amah vaitunna leh thupha piakna in voktalpi khat gawh a, anne dingin GZA Khawmpi a pai makaiteng sam zihziah hi. Kei zong 'Hausa ziak in kuangzawn ban' a kicih bangin Khawmpi siim khat ka hihna tawh, leh meltheih ahihna tawh hong sam kha uh a, ka va kihel thei hi. Pa Dai pen a pension ma-in compounder hi a, khua tuamtuam ah Medical Doctor om nailoh na ah cidamna lam khempeuh a sem ngei ahi hi. Japan Gal hun khawng pek pan a sep hi in tu in bel tawlnga ta a, a zi Pi Ngai tawh, a tate a tute tawh om khawm in teeng khawm uh a, lungnuam takin om uh hi.

Voktal khat bek kigo hinapi a huan dan a tuamtuam - zo huan, mang huan, cih bang a tuamtuam in nasia tak limtak in na huan uh gilvun kikang piupeu in ka ne uh hi. Vokngoi sungah 'taangman thun' ka nek patna hi!

Zongeina hon khat temtat, meisem, meimut, singkung kah, cihte ka gennop hang hun hong sau lua ding ahih manin tam gen nawn kei ni in, ka facebook ah a maan suang khin ing.

EBC Biakinn, Myoma ah thugen: Ka lamet ngam hetloh in Evangelical Baptist Convention biakinn ah Nipini zingsang kikhop thugenna hun hong kipia a, lamdang bang kasa liang hi. Kikhawm pen biakinn sung dim zihziah a 420 pan 450 kikal pha ding hi ciin hong gen uh hi. Tuazah a tam mipi mai ah ka khatvei thugenna ding ahih manin ka kihta sim pian hi. Ahi zongin thungen in Topa tungah ka ap a, thugen ding saupi a kigingkhol ngeilopa in nai khat val, minute 75 bang thu ka gen kha mawk hi. Siapi Rev. Dr. Do Suan Mung te kikhopna pawlpi hi in Sia Rev. Nang Lian Kap in Senior Pastor a sepna pawlpi ahi hi. Zomi lasiam Sianu Cingsan te pawlpi hi a, cidamna lam medical Doctor Sian Za Kham te pawlpi ahi hi. Kikhop nuam in mipi zong lusu om peuhmah lo a, khiatna nei mello a khutbet ziahziah cihte om hetlo hi. Picing takin khutbet taak mahmah te bek beng uh a, a kullopi in Hallelujah ciin zong kiko mawkmawk lo uh hi. A cihtaakte ah lah kidam hetlo in ci ziahziah uh ahih manin pawlpi gina leh pawlpi picing khat hi cih a kilatna ahi hi. Cihnopna ah kikhopna pawlkhat ah khutbet taak mello khawngah zong a kilawmsakna cih bangin khut kibeng mawkmawk a, thupi hetlo in limtak ngaihsun leng bel a haivai hizaw phial hi. Tedim khua a pawlpi liante ah tua bang omlo, mulo ka hih manin picing leh a khangto pawlpi hi cih kitel kasa a, Pasian thu leh Lai Siangtho thu tawh limtak kalsuan in pawlpi mite zong kipantah hi cih mipi gamtat luhek pan kitheithei hi. Tua bang mun thupi ah ka kikhop khak pen hampha ka kisa takpi hi.

Kikhop tawp ciangin Siate leh Makaite in niangtui hong dawnpih in, hong tutpih uh a, hong kikholhpih in 'zu kong lup uh hi' ciin Zongeina bangin hong vaitun hong thupi bawl uh hi. Tua bang ka tam tuah hetloh ahih manin angtang ka kisa a, hampha zong ka kisa mahmah hi. Leitung level ah tua bang gamtatna pen Zomi te in a zang ziahziah ta kihi mawk hi. Zomite nasia lua hi hang ciin mikang gam a khangto masate gamtat dan a kizangthei himawk in ei zong a khangto hi hang cih a kilatna hipah hi.

Zolai ah i sin, i siamnel mahmah kammal, Z - Zomi te hanlungciam khangto diam! cih pen a kitungtung hita hi. Zomi te Pasian huhna tawh i tunna ciangciang, i muhna ciangciang, i theihna ciangciangah a kilawm in kigamta thei, a hoihzaw tawh kilamto thei, a kilawmzaw nuntakzia i theih leh kizangthei pah hi. Tua pen i Zolai sin a gah i lawhna, Sianmang banzaal zong ahi hi. A kiphasak dingte i hi kei a, hong huaina khempeuh hanga lungdam koko dingte i hizaw hi. Topa in hong huailo hileh eite bang i suak zentam. Topa ei adingin hoih mah si e!

Topa hoihna sinsin, mumu ni in Ama hong piak thuphate zong simsim ni. A lungdam Zomi te thupha ngah minam ihi hi. Topa hoihna sin unla, hoih hi, ciin thei un...

(zop lai ding)

Hau Za Cin

Phuitong Liim

www.hauzacin.blogspot.com

He Knows How You Feel

He is able to run to the cry of those who are being tempted and tested and tried.

Hebrews 2:18 (AMP)

Whatever you are facing, He knows how you feel.

SOLKHA TANG NUAI AH TEDIM KHUAPI - 9

7:25:00 PM ARTICLES, DR. HAU ZA CIN, INNPI, KAWLGAM, KHUA, TUAMTUAM, ZOMI No comments

Zokam tawh Lai Siangtho sanginn ahi Timothy Bible College and Seminary ah April 14, 2014 ciangin a 7veina Lukhunelkai Khukna nei ding uh a, tua hun ah Zomi leh Zogam ah a piang ngeilo America panin mikangte honkhat hong paito in Lukhunelkai khuksakna va neihpih ding uh hi. Nidang in Zogam ah gamdang mi peuhmah lut theilo a, tuhun ciang Kawlgam kihong ta, gam hoihta, a ut peuh kizin theita hi. Zogam sungah ka zin laiin Japan a ka lawmpa khat zong hong zinto a, nuamsa mahmah hi. A zi zong hong zinpih sawm lai hi. Nung kum in zong Sia Harvester Khai tawh Kawlpi ah ka kimuh un aman USA pan a lawmpa Mr. Adam hong zinpih a, Zogam va hawhpih thei hi. Zogam leh leitung zong kimeltheih semsemta in Zogam zong naungek bang hileh mi theiin, nui theiin, lam hong pai thei dinga, hong khang hanhan in hong picing pahta ding hi. Tulaitak bel Bethlehem ah Joseph leh Mary te min khum dingin a zin laitak tawh kibang hi. A sawtloin min khumna kipan ding hi. Na innkuanpih te kiangah na min, na suah ni cihte na hilh khinta hiam?

Pasian in Zomite hong huaina a gen nuam ihi hi.

Siangsawn Mun Hawhna: Tedim khuapi pan galkhua dak leng Siangsawn khua kimu ziziai a, gam nuam mahmah, mualbo hoih mahmah ah kimu zihziah a, i muhcil limlim pan nakpi takin pai ut huaiin va hawh ut huai sak se hi. Sia Rev. Nang Lian Kap tawh ama sanginn pan anne dinga hong zawn, Shillong ah ka sangkahpih Kimpi te kiang ka delh ma un, "Siangsawn na mu ta hiam, hong hawhpih ning," hong ci a, kei zong ka ut giugiau leh ka gen ngamloh pen ama mawtaw tawh hong paipih vingveng in a mawtaw hoih lua mahmah ahih manin lampi kuak a om hang zong phamawh sa vetlo in sik phei ziauziau a ka tung pah uh hi. Zomi te tuanna dinga Japan te bawl mawtaw te pen khamtungah zong i sawlna peuh ah thumang tak in pai ziahziah lel hi. Japan te vante nangawn in Zomite thu mang mahmah uh hi :)

Siangsawn khua ka tunni uh 15 March 2014 niin kongkhak cingpa na omlo a, ka mawtaw uh tawh ka lutsuak pah uh hi. Khuasung ka lut suak uh leh khualai ah Pu Pau Cin Hau maan leh a zi maan na kisuang a, tua mualsuang gei ah singkungpi khat kiposak in tua tungah vasa nam cin na tuangsak uh hi. Hong vakpih pak Sia Haupu in hong genna ah tua singkung pen Pu Pau Cin Hau in singkung nuai khat ah tu in a om laitak in a singkung tungah vasa namcih in nuamsa in om uh hi cih a lahna lim singkung kibawl hi ci hi. A sak ah paito in mualtungah 'khuadakna innkhum' khat kibawl tungah kahtoh ding ka sawm uh hangin nisa lua pian ahih manin ka kah kei kik uh hi. Tua mualbo pan zong khuadak leng gamlapi kimuin khuamui kai ziziai a, lungzuan huai in Zogam mual leh guam kimu ziziai hi. Thangdung leh Valvum lam khuate kigalmuh thei a, Ngennung leh Sezang, cihte zong kimu thei hi.

Tua pan in paisuk in inn neu cikcik kilamte bang hi ding hiam ciin ka dot uh leh Zomi te ngeina thu leh vante kepna hi ciin hong gen uh a, tuate et ding lunggulh in ka dong uh hi. Amau zong hong pai in Sia Haupu in kong hong honsak hi. Amau pen tua innte a kepna uh pen a mawkna hi a, Zomi Biakna a kem leh a khoi, a zuun hi a, tua nasepna hangin vantung Siangsawn mun ah mun nuam ngah in a kha uh tawldam ding cih upna nei uh hi.

Hih Siangsawn mun ah a lianpen leh thunei pen Sia Mang (Sia Kam Suan Mang) hi a, tuani Kawlpi lam ah na zin ahih manin ka kimu kei uh hi. Amah leh kei hong tonpih Sia Kap te ana kithei mahmah uh a, ahi zongin ka kimu kha kei uh hi.

Siangsawn te in zawng leh sakuh cihte na khawi uh a, "Bang deihna hiam?" ciin ka dot uh leh "Na galte na it un," cih pen - hih zawng leh sakuh te Zomi te an leh lo hong suam, hong neksak, hong gaihsakte hi a, tuate i delh a i kap zelte hi. Tuate khoi in hileng amau a it ihi a, thupha bawl i hi ci uh hi. Tua i sak lam ah Inn saupi, golpi khat kilam a, tua pen biakpiakna inn hi a, ahi zongin amau 'sanginn' cizaw uh hi. Pasian thu kisinsakna ahih manin pilna leh biakna thu sinna 'sanginn' ciin genzaw uh hi. Tua i gei a mualbo tungah inn hoih mahmah khat kilam a a sungah Pu Pau Cin Hau lim leh a zi tawh a lim, amah bek India viceroy Chelmsford (?) in a pahtawina piakna puanpi silh laitak lim zong kikoih a, amah in Kha Siangtho angahna leh siampi a ngahna limte kikoih hi. Zomi inn khat kibawl in a sungah Zomi te van zat khempeuh kikoih a, ek-awng nangawn kibawl in ka neulai (Upate kam kawm pak leng) ka inn uh ka mitkha ah hong kilang vat hi! Sorry!!

Tua pan ciah pheiphei in laibu khat "HISTORY OF PAU CIN HAU'S SIANGSAWN PASIAN RELIGIOUS SECT by Parents and Elders of Siangsawn Model Village, February 2013" hong pia uh a, English in kigelh ahi hi. A kicingin damin hong gen kik nuam ing. A pai khempeuh in amau muh dan genna ding laibu khat (visitors book) na nei uh a, tua ah kei zong, "Thupi in nasep lianpi a sem uh hi. Lai kigelhte English, Kawlpau leh Zolai (Pau Cin Hau lai) leh Zolai (Cope Topa hong bawlsak lai) tawh kigelh leh a paite adingin kitel sem ding hi. Nasep thupi sa ka hih manin lungdam takin Ks. 20,000 (Kawlsum tul sawmnih) tawh ka mapang nuam hi. 15 March 2014. Hau Za Cin, Phuitong Liim," ciin ka gelh hi.

A thu kicing zaw a suut dingin hih Siangsawn vai koih ni.

Ka ciah lam uh ciang lampi ah Sial tampi kituak phei dandan a, Sial te gol in limci thei peuhmah hi. A sa nek ding hikhin lo in, a nawi nek ding, a no suak dingin a kikhawi zong tampi om hi.

Shillong sangkahpih te kiangah anne: Tg. Kimpi ci a ka sap zel pen uh zi na nei in Pa Kimpi na hi ta hi. Zi melhoih mahmah khat na nei in tanu melhoih mahmah khat na nei thak sitset lai hi. A nu Nu Lun pen Sia Rev. Dr. Go Chin Zam i nu tawh unau na hi sawnsawn hi. A pa Pa Kumar pen Pu Chin Sian Thang tawh nasemkhawm hi in Zomi Congress for Democracy ah amah makai khat na hi bek thamlo in ZCD te dialpi (banner) zong amau inn ah kisuang pah hi. Zomi a it leh Zomi te a khual mahmah innkuan hi in, Nu Lun bang meh huan na siam mahmah a, a monu tawh a meh limtak hong huansak in Sia Kap tawh gilvah takin ka ne thei uh hi. Sangkah laia Khangno makai a ka zat uh ahih mah bangin Pa Kimpi pen na kizen mahmah a nasep hoih khat nei in Zomi khua tuamtuam ah zin kawikawi in mite khantohna ding sepna gina tak in mapang hi. Topa in Zogam leh Zomi a ding a sepna te uh thupha hong piaksak in, i gam khantohna hong hisak tapeuh hen. Lungdam mahmah hi.

Gil lah vah, khuahun lah nuam, zing nisuak lah sa lua nailo cih laitak in tuni a thugen dingte in "Zomi leh i maban" cih lam vive gen ding uh ahih manin ko zong annek khit phet in sawt tu man nawnlo in 'ka maban uh' GZA Khawmpi phualpi lam ka delh pah vingveng uh hi...

(zop lai ding)

Hau Za Cin

Phuitong Liim

www.hauzacin.blogspot.com

He Knows How You Feel

He is able to run to the cry of those who are being tempted and tested and tried.

Hebrews 2:18 (AMP)

Whatever you are facing, He knows how you feel.

SOLKHA TANG NUAI AH TEDIM KHUAPI - 8

7:23:00 PM DR. HAU ZA CIN, INNPI, KAWLGAM, KHUA, TUAMTUAM, ZOMI No comments

Nuam taka Zomi te a kikholh ziahziahna Tedim khuapi ah GZA Khawmpi a 2veina sim Zomi ulian tampi zong hong kihel thei hi.

"Zomi om kei" cih thu a gin laitak in "Om mah" ciin laitui laidal tawh a lak thei makai lak pan Pu Chin Sian Thang, Lawyer, President, Zomi Congress for Democracy leh Pu Gin Kam Lian, Secretary, Zomi Congress for Democracy te zong hong kihel thei hi. Lamka pan Zomi Students' Federation President Kap Khan Muan leh Mung Tonsing, MA in Political Science sim laitakte zong hong kihel thei uh hi. Zomi te laibul leh awsuah bul suut a lusu manlo leh minam it Zomi Council pan Dal Sian Pau, PhD (Candidate) zong hong kihel thei a, Zomi Baptist Church, Mizogam, India pan Executive Secretary semsa Rev. Suan Khan Thang zong hong kihel thei hi. Zomi tawh kisai laibu leh thului tampi a sim, a nei, a kem leh a kin Prof. C. Thang Za Tuan, PhD leh a zi Sianu Pastor Cing Khan Lun zong hong kihel thei a, Zomi te pilna thupi sin ding ahih dan a gen bek hilo in pilna muh dan ding leh tuhun pilna zonzia kicing takin hong hilh ziahziah hi.

Missionary te Sulnung Etna: Zomi te kiangah Lungdamna Thu hong puak missionary te pen Tedim hong tun uh ciangin khuasunga mun hoih khat ah huang golpi nei in nasep a kipan uh hi a, kikhopna ding biakinn, amau omna ding inn leh a nasepna ding uh office zong a kilawm khop in a hanciam pah uh hi. Amau pen a khangtosa gam pan hong pai in tuipi tung, huihsung nangawn zui a hong tungte ahih manun inn leh lo bek hilo pilna nangawn a kisam dingte a ngaihsun dimdiam sa ahi uh hi. Mailam kum tampi ding a mu khol khin hi uh a, amau om sung bek ding angaihsun leh a khualte ahi kei uh hi. Tua manin a nasepna uh Zomi te adingin a kiphamawh tampi na gelsak, na bawlsak in, na suktuahsak uh hi.

Cope Memorial Baptist Church (CMBC) ahih kei leh Tedim Biakinnpi ciin zong a kithei pen nasia mahmah a, a sungah ka lut uh leh mihing 800 tut theihna ding tutna kigual diudeu hi. A kisap leh tutna behlap theih dingin om a, a dim mitmet in mihing 1200 val noptakin kitu thei ci uh hi. A mi zong tam, a biakinn zong gol, a huang zong zai in a mun zong khuapi laizang ahih manin khuasung etlawmsak in i muh bek zong tawldamsak pah hi. A huang lutna kongpi tungah COPE CENTENNIAL JUBILEE (1910-2010) "Pasian Zat Minam" cih lianpi in kigelh a, kongpi kilawm tak i pelh lian leh lamtung lamnuai ah Phuitong kung na po zihziah ahih manin Pasian biakinn huangsung bek a kitung hilo in "Phuitong Liim" mun nuam zong a kitung hi mai hi! Tua Biakinn lutna kongpi kilawmtak pen, a khuambul ah Donated by ZOMI INNKUAN, GERMANY ciin kiciamteh hi. Cope sangmangpa hong tun zawh Kum 100 Cin Pawi ah Germany gama om Zomi Innkuante in a piak uh hi cihna hi a, kilawm in ngaihsun siam mahmah uh hi.

Biakinnpi i tun ciangin a kongtual tam zai gol mahmah ahih manin kikhop ni ciangin nopci mahmah in mite kithuah ziahziah ding cih ka ngaihsut ciang a kikhawm kha mite hampha si e maw ka ci hi. Tedim nungak melhoih a biang uh 'apple min eu bang' acihte uh hikhawngah khedap sang tawh kitholh zehzeh leh muhnop in mittai dinga, kikhop zong tangvalte bang lawp tuam mahmah ding hiven maw. Leitung lam pan mi hoihte hampha uh a, a bawlpa zong geel siam ahih manin a bawl mite adingin a kilawm, a lungdamna ding uh a ngaihsutsak siam hipah hi. Biakinn hoih in gol in a mun zong nuam ahih manin a kikhawmte hampha a, mi tuamtuam kim ding hi cih lungsim 'mitkha' pan muhna hi.

Biakinn sak mualtam dakto leng Missionary Cope te nupa omna inn omlai a, a tung sikkang zong a sandup te hi in, a gal pan muhpak danin a tungah vansam khawng zong po in, aksi ek khawng zong kiata hiding tawh kibang hi. A mun ah va phato manlo ka hih manin a sung bangci lian hiam cih ka tel kei a, Zogam ah hun awng hoihtak neia ka zin kik ciangin a sung, a pua hoihtak vel a a taangthu gelh kik ding ka ngaklah hi. A gei a limsing leh phuitong, hiangnu kung leh khuangsuan pak san sihseh pote ka muh ngeisa singkung vive ahih manin ka neulai ka singpuak zelte hong phawksak uh hi.

Biakinn nunglam ah khuadak phei leng Cope Centennial Jubilee Hall a kilam laitak hi in, inn hawmpi khat mah na kidawh zeza a, inn thupi mahmah ahi hi. Hih innpi a kizawh ciangin Zomi te adingin van manpha khat hong hiding a, hong kilimzat mahmah dingin ka um hi. Tua ahih manin hih inn a kilam zawh mengmeng nading kua kut loh in ka lungsim ah ka phawk giugiau hi.

Biakinn phaitam khanglam ah inn dum deda khat na om a, inn saupi hi a, Sia Mungpi in, "Hih pen Tedim Baptist Association Headquarter hi" ciin hong gen hi. A gei ah khuangsuan pak (kuangkuah pak aci zong om) san a hoih mahmah kungkhat na po a, TBA Zumpi kilawmsak mahmah hi. Ko khua Murlen lam ah hileh Tuklo leh Baibek vasa te in a pakzu bawm in kihuang deudeu ding uh hi, ciin ka lungsim in ka ngaihsun hi. A pam khuadak phei lai leng Biakinn limlang tawh a kilam khat a gamla lua lo ah kidawk a, tua pen EBC Biakinn, Myoma veng a pen ahi hi. A khanglam daksuk leng inn tampi kimu suk in khuasung pen pak ziaizuai a, taihinn kilamthak leh sikkang inn kilamthak pen gal muh ding na om kawikawi hi. CMBC Biakinn huangsungah zong singtak, limsing, phuitong, hiangsing cih bangte na om zihziah ahih manin a mun votsak in, huihsiang kidik thei a, khuadakna lah nuam, khuasung laizang tak lah hilai ahih manin hih mun pen 'centre' mahmah mawk hi ciin ka ciamteh hi.

A biakinn kong a dak kikhai velval leh a gei a ciamtehna, phawkna mualsuang tuamtuam kiphutte sim khin manlo ding ka hih manin ciin maan ka zaih a, tu'n hih lai ka gelh laitak in zong ka sim khin naikei hi. Den ciang na sim ning ei!

Tedim Theological College, Tedim ah Hawhna: Gamdang pan a kiza vangvang khat pen TTC Sanginn hi. Kumlui in Rev. Pau Kam, Principal, TTC pen Singapore ah hong zin in ZIS ah thugen hi. A thugen ka ngaih ciangin siapa pen Zokam a siam mahmah leh a kiva mahmah hi cih ka mu hi. Zokam a siam bek hilo in lakam, lapau, paunak leh Zomi te thuciin tuamtuam a zang siam, a kamgenna ah a guang siamsiam mah hi cih ka mu hi. Tua in Zokam leh Zolai a siam dan ding hong musak hi. A ciah ciangin Sial pawlkhat Christmas cianga kigo ding a kikhih lileih te facebook ah hong suaksak a, mitkha ah Zogam hong musak in facebook sung khempeuh Zogim hong namsak a, Zomi hih hong angtangsak mahmah hi. Tua ahih manin Tedim ka zin ciang ama nasepna leh sanginn muhsak hamtang ding ciin ka ngaihsun hi. Ahi zongin amah ka hilhkhol kei uh a, a bu ah phawngto ding ciin Sia Mungpi tawh a motor cycle ah kipua in ka taito uh hi.

Tedim Zatopi (Tedim General hospital) ka pelh toh uh ciang Phuitong kung golpipi na om kawikawi a, a gah na min kiukiau in na san lihliah kawikawi hi. Lamphei ka tun uh ciangin a pam a singkung kawm ah lampi kisial phei ka tot uh leh Sia Pau Kam te sanginn TTC na om a, a inn gol lua khollo in lam 30 a sau, lam 10 a zai khawng hidingin ka ummawh hi. A inntual ah Volley Ball betna ding mun nuam om hi. A pam ah tuikhuk, guahtui kholna leh zunbuk, ekbuk cihte om a, a huang sung khempeuh ah singkung kisuan in hing dipdep a cidam huai in huihsiang kingah ding cih kimuthei hi. Sanginn bel dawl nih hi in a tung leh a nuai om a, a tung ka kahto man kei uh a, a nuai bel tohlet pan ka dak uh leh tutphah leh suanglaipi hoih mawhlo na om zihziah a, a pua lam pan et sangin a sungah vanzat kicing gawp cih ding hi. A huangsung gol in hoih a, a huang nuai ah Missionary sangmang Cope Topa te inn kimu thei a, CMBC zong a kimu thei hi.

Tua pan mualtung ah ka kahtoh uh leh mualvum pan khuadak leng India lam khawng kigalmuh phial a lungzuan huai keei sam hi. Tuithang Gun leh a kim a khuate kimu thei a, ahi zongin khuamei kai ahih manin kician mello hi. Tua mualvum lian ah bang kawlte sanginn kibawl a, a kim ate buah thilthel himah leh amau a pen sum tam deuh ahi tam maw na zol zawdeuh hi. Tedim khua tektek zong khuahun kibanglo - khat tungah ni a sat lai in khat tungah guahzu hileh kilawm kasa hi. Ahi zongin laigei a kawl numeite zuntha a puanteen phalh zeizai a om a, lamgei hiing sak heha te bel paktat huai sa kei ing! A nuih uh ciang a kamsan uh kimu hehaw lai!!

Missionary Zogam Tangval Tg. Vungh Khan Kham sulnung: Tua pan dingkhia kik in Zokam ngiat tawh kisin Lai Siangtho sanginn ah hawh dingin ka pai khia leuleu uh hi. Ka paina lampi vuah Zomi tangval lak ah Pasian nasepna ah a lutang a phum ngiat Tg. Vungh Khan Kham naunu Nu Suan Ngaih Cing inn ka tung uh a, amah zong inn ah a om tawh kituak lian ahih manin a inn sungah lut in a tangval thahat laitak amah a bawlpa nasepna dingin kipia in a lutang nangawn va phum in a nuntakna a bei dongin Pasian nasem in a kalsuan pa sulnung tampi ka va mu thei hi. Inn sungah a kituiphumna, a missionary kuanna a Zomi pih Kanpalet te kiang ah a hawhna, a sep lai cihte maan tawh ka va mu hi. A innkuan un a maan lak nunung pen uh mel bang hoih in tangval lai hi a, Zomi khempeuh in i it ban ah a innkuanpihte in zong it mahmah ding cih ka ngaihsut ciang ka koiteng hiam hong nuamlo dek hi. Pasian adinga kalsuan ngam Zogam tangval bangzah i omlai tam maw, tu laitak in? A kivuina luang tungah a vuipa Pastor in a khut a laptoh laitak maan bang ka muh ciangin ka dip hong kua hanhan a, Shillong sangkah lai a 'missionary' cih la ah - Vungh Khan Kham, Ngai Za Siam, Bual Cung, etc cihte la tawh ka sak zel uh ka phawk velval hi.

Topa in ama sisan hangin Zomi te thupha tampi, i theihloh kal in zong, hong pia thamtham ding ahih manin Ama' adingin a nuntakna a bei dongin a pia Zomi tangvalpa hangin mihampha hilo ka hi hiam ka ci hi. Kei hong vakpih a, ama motor cycle tawh hong pua kawikawi Sia Mungpi zong Zogam khanlawhna dinga Lungdamna Thu puak a kanpalet leh Mindat khawngah na pai ngei khat hi in, a tangval lai hun tampi Pasian gam adingin a piakhia pa ana hi hi. Tua a sep gimna te guaksuak hetlo in tu in zong tukha March 10, 2014 in Lailo khua a Tedim Baptist Convention Kum Thum Kihal Khoppi ah General Secretary dingin kitel hi. Topa in Sia Mungpi nuntakna Ama gam zaina dingin hong zatsak semsemta hen.

ZOLAI tawh kisin Lai Siangtho Sanginn: Zolai ngiat tawh Lai Siangtho degree picing taka a sinsak Timothy Bible College and Seminary ah hawh dingin ka taisuk u hi. A mun ka tun uh ciangin sangnaupangte in innka tual ah volley ball na beng ngeingai uh a, pawlkhat in nilum awi in na tu lileih uh hi. Numeite in puansawp in na nui leihleih uh a, pasal pawlkhat in Guitar hoih khat tawh zaila na awiawi uh hi. Ko zong a kongpi gei a Thawhbat kung pelh to in a gei ah motor cycle koih in Timothy Bible College and Seminary cih kigelh tawh maan ka kizaih pah uh hi. A taklam nisuahna lam ah IN GOD WE TRUST (PASIAN A MUANGTE IHI HI, EITE IN PASIAN I MUANG HI) cih na kisuang a, tua mahmah in ka tawl hong damsak hanhan hi. Zomi te in Pasian a muang minamte ihi hi cihna in ngaihsun ka hih manin ka lung hong nuam hanhan hi. Pasian muanga kalsuan peuhmah a tasam kuamah omlo a, a lawhcinglo zong omlo hi.

Sangnaupangte ka hopih uh leh ka Zomi Baptist Church (ZBC) uh pan Evangelist uh Pa Thang Lian Go zong na om a, ka khuavengte uh Vapar khua pan zong Tg. Mung (?) na om hi. Ka pawlpi mite nih ka muh ciangin hih sanginn pen ka pawlpi upate in zong 'kahna taak' sa hi cih a theih uh ciang kahsak pan uh hi cih ka tel manin sanginn hoih hi cih ka theisiampah hi. Ahang pen ko ZBC te in pawlpi mite Lai Siangtho sangkahna ding pen 'khat peuhpeuh ah' ka sawl kei uh hi. A kiphasak bel hilo in, a deihteel zong hilo in, a kah veve uh a a kitheihpih Lai Siangtho sanginn (recognised institution) bek ah kahsak ding ka cih uh ahi hi. Sangnaupangte giahna ka lut a, kei sangkah lai a lupna te sangin nakpi takin hoihzaw ahih manin hampha uh kasa hi. Annbuk zong ka lut a, annekna kuang leh tutphah te hoihzaw in siangtho zaw a, bel te zong siangthozaw in, sikkeute tungah zong tho leh ganhing a leng naunau muh ding om vetlo hi. Tuibuk leh kisil buk, puansawpna leh zunbuk cihte zong ka etsak khin a, Zomi leh Zogam adingin hih sanga hoihzaw a nei om nai tuanlo dingin ka um hi.

Sangkah nuam, Lai Siangtho sin nuam, Zolai tawh pilna ngah nuamte adingin hih sang pen delh tak hi, cih ka mu hi.

Principal Sia Rev. Nang Lian Kap in a genna ah Zomi te in i Zolai tawh Pasian thu i sin pen Pasian kammal leh a deihna, a thubul kitel zo lua hi; tua manin Zolai tawh Pasian thusin pen English tawh tel mello a sangkah sangin Zolai tawh a kigen bangbang tel sitset a sangkah pen theihna khangin Pasian thuthuk kitheihlawh zaw hi ci hi. Ka um mah hi. Tel mello a English khawng i hih bualbual sangin tel sitset in Zolai tawh pilna thu sin leng kikhangzaw ding hi. I theih zong kitel zaw dinga, i theihna zong dau tuanlo ding hi. Tua manin Zolai tawh laibu tampi gelh ding thupi mahmah a, Zokam tawh thucin thutang i gen i kikup ding zong thupi sem hi ci hi.

Zolai gelhsiamte leh Zolai a ukte, a theite, a kinte in mipi kisap zah in Zolai kiluikhia zolo lai hi cih hong phawksak hi. Tua manin hanciam kul hi. English leh pau dang a theite in zong i theihsa paute tung pan pilna theihna la in Zolai Zokam tawh i mipihte adingin i luikhiat mengmeng ding a thupi khat hi cih hong phawksak hi.

Zomi leh Zogam hong khangto dinga, Zolai leh Zokam in mai hong nawt in tualsung gamsung hong zeel dinga, hong bawlpa i Pasian thu leh a ngaihsutna gil te Zolai Zokam tawh Zomi te in i sut ziahziah dinga, i Pasian thu theihna hong kibehlap bek hilo in eite hong bawlpa mahmah i theihna hong khang dinga, hong huaina, hong kepna leh hong laptohna te i tel semsem dinga, Amah i itna zong hong khang semsem ding hi. Tua ahih manin Zomi a hong bawl Pasian i mangngilh loh ding, vai khempeuh ah Amah i koh ding, Amah i belh ding, Amah i theihsak ding ahi hi.

Topa in Zomi te hong huai denta hen.

(zop lai ding)

Hau Za Cin

Phuitong Liim

www.hauzacin.blogspot.com

He Knows How You Feel

He is able to run to the cry of those who are being tempted and tested and tried.

Hebrews 2:18 (AMP)

Whatever you are facing, He knows how you feel.