LEITUNG BUP ZOMI TE KIANGAH THUZAKSAKNA (GZA MAKAIPI BEHLAPNA, ZOMI NAMNI BAWL DING ZAKSAKNA, KAWLGAM BUP MILIP KISIMNA VAI (CENSUS), MAI GZA MAKAI KHAWMPI A KAH KIM NADING HANTHOTNA)

Kongit Leitung bup aom ZOMI ulenau khempeuh aw,

I Biak Topa Pasian mintawh nakhut honglen in anuai-a thute kong zasak hi.

I. GZA MAKAIPI BEHLAPNAIh theihtek mah bangin GZA Thuzeekpi General Secretary Rev. Dr. Do Kham in hong nusiat vat ciangin cih nading theilo in i geelsa ahi, GZA Makaite kikhopna 2013 November kha in Tedim Khuapi ah ineih ding nangawn inei theikei hi. Ahizongin GZA nasepna pen seploh geelloh a, phamawh ahih manin Yangon aom GZA makai teng leh GZA Makaipi aom thei tengin anuai-a bangin kanaseh uhhi.

General Secretary dingin Associate General Secretary asem Rev. Dr. Do Suan Mung dingin kanaseh uh a, aman zong GZA a itna tawh haksa pipi in hong mang hi.

Associate General Secretary dingin Communication lam leh zum nasep lam asiam leh a thei khinsa Rev. Dr. Go Chin Zam kana seh uh a, aman zong GZA a itna mahtawh hong mang hi. Hih pen GZA in Thubullet leh thumeilet (Constitution and Bye Law) i neihloh hangin leitung bup zat ngei zia zui-in mai March kha a, i neih ding GZA Makaite kikhopna (Tedim) ah kipsak ding hi.

Rev. Dr. Zam Bawi pen OM (Operation Mobilization) ah Director pi hi-a leitung bup nasepna ah makaipi khat leh ZOMI te a it, a panpih den pa ahihi. GZA ah zong sumzon nalam makaipi sem hi. Kizopna Communication (IT leh adangdang) te siam mahmah a, GZA nasepna tampi hong kalsuanpih zo ding, imuan isuan makaipi khat ahihi.

 II. ZOMI NAMNI BAWL DING ZAKSAKNAKumsim kumsim a ibawl den mah bangin tukum (2014) in zong ZOMI NAMNI February 20 ni pen Sangkah nili ni (Thursday) nitawh kituak hi. Tua ni-a bawl ding alem khempeuh in nana bawl in ZOMI te kipuam khatna leh mailam ikalsuanna ah ikhantohna ding thuna nagen in a nasia theithei-in nana bawl dinguh kong zasak hi. A zenzen in tua ni-a bawl ding alemlo munte ah zong akinai pen Nipi (16 or 23) ni-in nana phawk hamtang dingun kong zasak hi. Pasian lo tawh ZOMI te picing ngeilo ding ihih manin Pasian kiangah ZOMI buppi ading thunget ding namang ngilh kha kei un.

III. KAWLGAM BUP MILIP KISIMNA VAI (CENSUS)Nungin Kawlgam bup milip kisimna (census) ciangin Code Number (914) a om adangdang (Others) acihna ah ZOMI citek ni ci-in kong zasak hi. Tu-in zong tuamah kong cikikkik hi. Bang hanghiam cih leh adangdang te pen beh le phung, pau le ham tawh hong kikhen khap suksukna hi-a, tua tungah iden leh minam picing suak ngeilo ding hi hang. I vekpi in kigawm in Code Number (914) ah ZOMI kici tek le hang minampi khat in ding khawm zo ding hihang.

Tua ahih manin i om naciatciat ah i phakzawh tantan i minamte genin itna tawh kipumkhat nading hanciamtek ni. Hih thupen Party khat vai hilo in i minam bup vai ahihi.

IV. MAI GZA MAKAI KHAWMPI A KAH KIM NADING HANTHOTNAI gelsa bangin 2013 November kha sungin GZA makai khawmpi i neih theihloh hangin 2014 March kha 13 pan 16 ciang dong Tedim Khuapi ah neih isawm pen pello in i minam leh GZA na itna uh tawh hamtang bawl in nong kah zawh nading un kong thum phapha hi. Hih vai khempeuh a kicing zaw in Associate General Secretary Rev. Dr. Zam Bawi in a kisam bangin hong zasak toto ding hi.

Itna lianpi tawh,

Rev. Dr. S. Pau Khan En
GZA Makaipi

January 29, 2014

Read More

ZOGAM AKSI ( Dr. Do Kham ading ka zaila ) By JK Kam

By: JK Kam 16.10.2013

V1. Zomi ading, Sianmang ading
Ngalliam salpha lei kiuli dongah,
Gualzote pahtawi, guallelte lamto
Itna deihsakna damtui hong luan.

Pre: tualniam laizomte siing tawh tanbang kimna ding
Lainatna ciktui ih dawnna

V2. Zomi' khantoh nang, lung kihual theih nang
Gam khempeuh zin in hanlung na ciamna,
Milian tawh kipawl, mineu tawh kikhawl
Lamet neilote lampi hong zon sak

Pre: International ah Zomi ading aksipi
Zogam leh Zomi angtanna

Cho: Oc-to-ber 13, Aksipi tual ah kia
Zomi' leitung zin bang liing e, Solkha mial in khim zing
Zomite' Pasian aw, koi laiah om na ham?
Mi thupi tampi hong pian theih nanga kituh khaici hong hi hen!
Zogam Aksi

V3. Lailung na gelna, hanlung na ciamna
Lungsim leh pumpi na gim lua hiam?
Na tongdam ngaihbaang, na sinthu itbaang
Na zia na tongte ngilh ni a om diam?

Pre: Na itna banzal hong thukzo kei si nunge
Ka sak zaila tawh hong pahtawi ning

(Cho)

Bridge: Na hoihna leh na banzal a hawmthawh hi kong
Nang lo a Maciang suan ding kimuang kei lua ung e
"Khang khat adingin lungkim tange" na cih bangin,
Ko nong pattahsa ten na maban na zom ve nung maw...

(Cho)

Ending: ( Ih Zomi' AKSI hi e..., Mikim tung taang,
Ih Zogam AKSI pi e?..., lentual ah kia)4

Note: Dr. Do Kham kivui October 19 ni in ah ZOMI GOSPEL CONCERT USA 2013 a kihel musicians tengin Sa ding hi.

Dah mahmah leh phawk mahmahna tawh
Leitung kiu khat pan itna leh pahtawina luankhia nul...

JK Kam
ZOMI GOSPEL CONCERT USA 2013
Norway

Sent from my iPad

JK Kam
https://www.facebook.com/jk.kam.9

Read More

TUA BEL KEI' KHUAMIAL HI VE'N! BY SIA ZAM KHAT KHAM

Kum li khawng a pha pan naupangno ithuai mahmah khat a nunote' inn ah Sani leh Nipi sung sawm giak hi. A nuno leh a pano ngai mahmah ahih manin nuamsa mahmah hi. A nunote in zong ta lah nei lian nai lo uh ahih manin ngekbawl mahmah uh a, a inn-a a ute a naute tawh a om henhan uh sangin kingekbawl zaw ahih manin nuamsa mahmah hi. Kimawlna "game" tuamtuam khawng kimawlmawl-in nitum khuamial lam nangawn phawk kha lo liang hi.

Lup hun hong tung ta hi. A nuno in a lup nading inndei (khan) khat sung ah lupna a nuam mahmah-in bawlsak hi. Laisiangtho tangthu khat simpih-in khim hi. A ihmut zong suak pian diaidiai tham ta hi. Tua ciangin  nuno in mei sukmitsakin, puanza hoihtak seh a "goodnight kiss" a piak khit teh, "Nuamtak ihmu in aw, zingsang teh kikhawm dingin, tua khit teh "mall" ah hong vakpih ning ei, ci-in vaikhak hi.

Tua khit deuh ciangin a nuno in bang a ci peuhmah hiam, a ihmu thei hiam, cih a lungnuam lo ahih manin a kongkhak tawm khat hong khiankhian-in va vil kik hi. A naupang na ihmu het lo mawkin na kidik damdam-in ka kap niainuai mawk hi.

"A bangci na hia, ke'n a ihmu khin ding hong sa hi ve'ng?" a cih leh,

"Kei khuamial sung ah lau hi ve'ng. Khuamial lua hi ve'n" ci-in dawng kik hi.

"Na inn vuah zong khuamial sung/lak mah a na lup den hi lo maw! Na ihmut ding teh na nu in mei hong sukmitsak den ve," a cih leh,

"Tua bel Kei' khuamial hi ve'n" a cih kawmin kidik kik damdam leuleu hi. 

Ama' khuamial? Ama' khuamial cih bang om ahi tam mataw! Ama' khuamial lauhuai lo-in a nunote' khuamial lauhuai deuh ahi tam! Kibang lo hi'n teh mataw! Kilamdang zek ahi dia?

Ama' khan/inndei sung ah khua a mial zenzen hangin koimun ah bangteng om cih a lotngat luatsa hi. A kimawlpih den naumilimte a koihna thei mahmah a, a sawt nai lo khat-a a nu in a leisak vompino lim khat bang zong a tutsakna mun thei sinsen hi. Tua lo a van neihte zong a omna mun a lotngah luatsa hi-in khua a mial hangin a lungsim-in seh thei hi. Khua a vak cianga a omna mun mah vuah khua a mial hangin om ding uh cih thei hi. A khan/inndei sung ngiat pen a gamtattatna mun ahih manin ama' khan/inndei hi mai a, tua sung ah khua a mial ciangin zong "ama' khuamial" hi mai hi!

Guai aw, ei zong tua naupang tawh kibang kisa lo na hi uh maw? I nuntakna ah dahna kahna zong nawk tek hang. Lungkham mangbatna zong phukha tek hang. Lunglen khuangaihna zong sin kha ngei tek hang. Haksatna leh gentheihna zong a thuak kha lo kuamah om lo hi hang. Ahi zongin thu-um Pasian' tate i hih manin tua "i khualmialte" sung mah ah i Topa' maitang en-in gualzo den zel hi hang. "Sihna lim guam sung na ngawn" i "nawk hangin siatna" i "kihta kei hi." Banghang hiam cih leh, Amah ei tawh hong om khawm ngiat hi. "A molhtum leh a ciangkhut in hong lungmuangsak hi"  (Late 23). Topa om peuh leh khuamial i cihte zong, tua naupang in ama' khan/inndei sunga khuamial a kihtak loh bangin, ei zong kihta lo-in gualzo den hi hang.

Ih Topa pen khuavak laitaka hong ompih Topa ahih mahbangin khualmial hun cianga zong hong nusia ngei lo Topa ahihna i thei hi. Ama'n hong nusia ngei lo-in hong ompih den hi (Matt. 28:20; Heb. 13:5). Isarel mite tung (Thuhilhkikna 31:6) leh Joshua tung ah a kamciam (Joshua 1:5) bangin eite zong hong kamciam khin hi. 

"Ei' khuamial" bel kihta kei hang e maw! Banghang hiam cih leh, tua khuamial i cihte sung mah ah i Topa Zeisu Khazih in hong ompih-in hong nusia ngei peuhmah lo ahih manin khuamial a cihte nangawn i kihtak loh "ei khuamail" hong suak mai hi.

A pongpongin, a peuhmah-in, a limlim a himhim-in, i Topa hong om nak leh khuamial i cihte zong khuavak a suak hi mai lo ahi hiam? Ama' omna ah khuamial cih bang om lo a, Ama' mai ah khuamial leh khuavak i cihte a kibang hi!

Tua ahih leh i nuntakna ah i Topa in hong ompih lohna mun leh hong ompih loh hun a om peuhmah hiam leh? Om lo hi. Tua ahih manin i lau nading thu om lo hi. I kihtak ding om lo hi. Khazih sunga Pasian hong itna tawh hong khen zo ding na khat beek om lopi-in e, ci lo maw? "Khrist hong itna panin eite kua in hong khenkhia zo ding hiam? Lungmanna, haksatna, bawlsiatna, kialna, silh ding kisapna, lauhuaina, namsaute in hong khenkhia zo ding ahi hiam?" (Romans 8:35, ZIV). 

Launa ding om kei! Kihtak ding om kei. Amah um-in muang ni. Hong nusia ngei lo hi. Hong paisan ngei lo hi. Hong ompih den hi.

Topa aw, hong muang kha kei pahpah ung! Hong muang nuam ung. Upna muanna hong guan in.

"Hong um/muang mah ing, Kong up/muanlohna hong huh in" (I believe; help my unbelief!)-Mark 9:24.

Sia Zam Khat  Kham 
https://www.facebook.com/zamkhatkham

Read More

A CIDAM PAWLPI By Rev. Dr. Cin Do Kham

Bang hang hiam nacih uh leh, Khris  in pawlpi' lutang ahih  mah bangin  pasal in a zi'  lutang  ahi  hi. Khris in ama  pumpi' Honpa  ahi  hi. Ahih  hangin  pawlpi  in Khris'  ukna aman'  mah  bangin  zite in zong  a  pasalte  uh  ukna  khempeuh mang ta  uh  hen. Pasal te aw, Khris  in pawlpi  a it  mah  bangin  na zite  uh na it un. Tua  pawlpi  in siangtho-in  mawhsak  om  ahih ciangin, anin  ban'na  omlo, sa tonna  om loin, amel  kilawma om pawlpi, Khris  in   amahmah a kipiak  na dinginah Pasian' thu  tawh  tui-ah  a  sil  khit  ciangin, siangthosak  nadingin tua pawlpi  adingin  ama  pumpi  a  pia  hi. ( Efe  5:23-27 )

THUMASA

Mihing  khat  nuntakna  i  ki-et  ciangin  a  cidam  leh  a  cidam  lo,  i  pianzia 

tawh  kimukhia  thei  pah  hi.  Bang  hang  hiam  i  cih  ciangin  a  cidam  lo  

mi  khat  pen  maitai  zo ngiat  lo  pah  hi.  A  kampau,  a  awsuah  mahmah 

zong  khum  theilo  hi.  A  lungsim  gina  lo  ahih  manin  pumpi  tungah 

silh  leh  teen  a  kipan  kipuah  ding  kin  ngiat lo  hi.  A  sunglam  dam 

lohna   hang  tawh  na  zong  sem  zo  lo  hi.

PAWLPI   DAM  LOHNA

Pawlpi  i  cih  zong  mihing  pumpi   mah  bangin  cidam  lo  thei  pha  

mahmah  hi.  A  dam  lo  pawlpite  sungah  panmun  kituh  ding  lau  ahih  

manin  mithak  zong  deih  mel  se  lo  uh  hi.   Thungetna  lasakna   lamah 

tha  hat  lo  uh  ahih  manin  Hunzatna  ( sermon )  zong  muibun  

zo  mel  lo  hi. Midangte  tawh  kipawl  kizopna-ah  siam  mel  lo  banah 

amau  bek  mah  hi  kisa, hoih  kisa  hi.

Pumpi  cidam  lo  i  hih  lam  i kitheih  ciang  bekin  zato  zuan  pan  hi  hang.

Mundangte   ah   kum  simin  siavuante  kiangah  kilak  tawntung  uh  hi. Tua

mah  bangin  pawlpi  dinmun  zong   limlangh  bangin  i  ki-et  zelzel  ding 

thupi  mahmah  hi. USA  ah  pawlpi  khat  pen member  5000  pan  900  ah  

kiamsuk  hi. Pasian’ thu  ah a  thahat   khangno  khat  pawlpi   puahphatna  

ah  hong  kipia  ahih  manin   member  9,000 ah  khangto  kik  hi. Tu  laitak  

USA  ah  Protestant  Pawlpi  350,000  om  a,  tua   pawlpite  sung  pan  15% 

pen  cidam  thahat   in,  85%  pen  kiamlam  manawh   hi.

PAWLPI  I  CIH  BANG  HIAM  

Pawlpi  i  cih  pen  a kimuthei  leh  a  kimutheilo  ci-in  Pawlpi  nam  nihin  

kikhen  thei  hi. Topa  Jesu’  lamh  Pawlpi  pen   mimal  ahi  hi. ( Mt  21:12-13, 

Efe 5:23, 29-30, 1Kor 12:12-20,27  Efe 1:22,  Mt  16:18 ). Mihing  kiphasakte’n 

nuailam  bek  enden   uh  ahih  manin  Pasian nasepna  muthei  lo  uh  hi. Ahi

zongin   a  kiniamkhiatte’n  tunglam  bek  en  uh   ahih  manin   Pasian  

nasepna   leh  Pasian  vangliatnate  mu  uh  hi.  USA  a  Pastor  pawl khat  in,  

hih  pawlpi  ah  Tuucing  lianpenpa  Jesu  Khrih   hi-in,  kei  ka  hih  leh  ama

nuai-a  a nasem ka  hi, ci-in  pulak  hi.

Efe 4:12  “ Hih  nasep  tuamtuamte  khempeuh  pen  Pasian’  mi  khempeuh 

in  Khris  adingin   nasemin  Khris  pumpi  a  khan’sak  theih  nading  deihna  

ahi  hi ” acih  mah  bangin  Pasian  nasepna-ah  Pastorte  bek  hi  loin  

thu-um  khempeuh’  tavuan  ahi  hi. I  nuntakna   mah  mah  

tawh  lahkhiatna  pen  Pasian  nasepna  lianpen  ahi  hi.

Tua  bangin  i  nuntak  theihna  pen  muhtheih  pawlpi’  dinmun  man  taktak

ahi  hi.

PAWLPI   KI-ET  DIK   NADING

A  cidam  pawlpi  i  suah  theih  nadingin  a  nuai-a  nam  6  teng tawh  hoih

tak  semin  i  kalsuan  ding  kisam  mahmah   hi.

       1. Thungetna

       2. Midangte  tawh  kilawmtatna

       3. Biakpiakna  ( Praise & Worship )

       4. Gamthak  nasepna  ( Mission )

       5. Pasian  nasepna  cialpi, crusade, camp ( Lungdamna thu genna )

       6. Nungzui  hoih  suahna

Chicago  pawlpi  khat-ah  kum  75  a  pah  Pastor  pa’’n  Pasian  na  a sepna 

kum  35 sung  a  etphat  ciangin “ ka  kisikpen  pen  thu  in Pawlpi  pen  nau

cin  bangin  cingkha  ing " ci  hi.  Pastorte’n  zong  pawlpimite  ngekbawl  luat 

ding  zong hi  khin  lo hi. Tua  banah  Pastor   khangham  lua  omna,  Pastor  a

teek  lua  a  omna  munah  Pawlpi  zong  teek  suah  thei  hi. Khangthak  

Pastorte  zong  kul  leh  kisam  banga  mun  piak  theih   ding  thupi  hi.  Upa 

makaite’n  zong  muhkholhna ( vision ) tawh  kalsuan  theih  ding  kisam  hi. 

Makai  sung  a   cidam  leh  Pawlpi  zong  a cidam  suak  pah  hi.

THUKHUPNA

Topa  Jesu  in  zong  “ Ka Pawlpi  ka  lamding “ ( Mt 16:18 ) na ci hi. Pawlpi  

pen  mi  tampi  tak  in  aituam  ngaihsut  kha hi hang.  Pawlpi  phuan 

( Founder ) kituh  thei  hi hang. Tu  hun  ciangin   Pastor  hi  napi  Pastor  

lungtang  pua  lo, Upa  hi  napi  Upa  lungtang  pua  lo, Evangelist  hi napi 

Evangelist  lungtang  pua  lo mi  tampi  ki-om  ta  hi. Tua  ahih  manin  i 

Pawlpi  sungah  Jesu   lianbel  sak  lehang  a  cidam  Pawlpi  suak  ding  hi  hang.

Kong  it  sanggam  aw,  i  dinmun  kisittel  pha pha  a,  a cidam  Pawlpi  i  suah 

theih  nadingin   Topa’n  thupha  hong  pia  ciat  ta  hen!

Read More

KUA' TA NA HI HIAM CIH KIPHAWK DEN IN!

Sia   Zam  Khat  Kham 

Inn pan gamla simsim ah college kah dinga kuankhia ding tangvalno khat thu ka za kha ngei hi. Tua ni zingsang annek ma thungetna ah a pa in ama ading thungetsak khin hi. A paina peuh ah Pasian in a kepsak nading, pilna a zonna ah a lawhcin nading—a pa' thungetna kicing mahmah hi.

Inn pan paikhia taktak dinga a kithawi dingin a pa in thu pawlkhat hilh lai ding cih lam-en a, a kigingsa-in om hi. A pa in bangmah gen beh nawn lo-in a tapa liangko tungah a khut taklam nga-in a maitang itna tawh et ngiungeu-in, " Kua ta na hi hiam cih kiphawk den in," ci-in kam vaikhak hi.

A pa in tuateng bek hi lo-in thu pawlkkhat genbeh zek leh a hoih tam? Um kei mawk ing! Tua tangvalno pa in tua zingsanga a pa' kammal a khantawnin mangngilh lo hi. Na khatpeuh a hih ding ciang, thu khatpeuh a khensat ding ciangain a pa' kammal phawk den hi. "Kua ta hi mawk ka hi hiam? Hih na hih bangin hih leng a kilawm ding hiam? Hih vai hih bangin semin bawl leng a kilawm ding hiam?"

Eite zong i pa' inn pan a gamla sim zek-a khualzin-a om Vantunga om i pa' tate i hi hi. "Eite, Pasian tate cih-a i om nadingin Pasian in eite tunga hong sunleet itna lian mahmah si! Ei lah tua mah i hi hi. Leitung in eite hong theih lohna amah a theih loh hang ahi hi," ci-in sawltak John in hong hilh hi (I John 3:1, ZIV). 

Hi takpi hi ve'n! Eite Pasian' tate hi takpi hi ve hang! Lamdang lua hi, hong hehpihna! Piandang lua hi, hong itna! cihcih ding sim loh om kei mataw!

I pa in lai hong khaknate sung ah, Laisiangtho sung ah, eite kua tate i hi hiam cih i kiphawk ding hong hilh den hi. "Ahang in, hun khat lai-in note khuamial na hi uh a, ahi hangin tu-in Topa sungah khuavak na hi uh hi. Khuavak tate bangi na nungta un" (Ephesians 5:8, ZIV) ci-in hong hilh hi. I Topa ngiat in, "Tua mahbangin na gamtatna hoihte uh a muh ciangin vantunga om na Pa uh a phat nadingun na khuavak uh mite mai ah na tangsak un," ci-in hong hilh ngiat hi (Matt. 5:16).

I Pa' inn tawh a kigamla zek hih leitung ah i nuntak sungin bangci bangin i gamta hiam? Vantung a i Pa' "tate" bangin i nungta hiam? I gamta hiam? Kua' ta i hi hiam cih i kiphawk den hiam?

Leitunga i innkuan min a dai ding i deih peuhmah kei hi. I nu i pa' min a dai ding zong i kidawm mahmah hi. "Tua' ta, tua' ta hi veh aw" ci-a mite' muk-pik ding zong ki-ut tuan lo tek sam hi. Innkuan min leh nu leh pate' min a khual lo taktak mi tam het lo hi; a tuaci lo mite lah a mi bang het lo hi mai ding hi.

I sangkahna ah, i kimawlna ah, i vaksuk i vaktohna ah, inn ah gam ah, koikoi ah i om zongin i hihna phawk ni—vantunga i Pa' tate i hi hi. "Children of of God-tekna theou) ci-a hong kiciamtehte hi zen hi hang! Vantung leitung na khempeuh a bawl a siam Pa, a nei a kem Pa, "Pa aw" a ci theite hi hang. Tua Pasian' tate hi zen hi hang!

Zeisu Khazih i upna tawh Pasian' tate i hih manin tua Pasian innkuan sunga om mite' pianzia leh zatziate zong i nuntakna ah a kimuh theih ding thupi mahmah ding hi. Itna cihte, hehpihna cihte, mawhna kimaisakna cihte, khat leh khat kithuak siamna cihte, thumanna cihte, cihtakna cihte!

Leitunga nu leh pate' tate in a pianna uh a nu leh a pate lam khat teiiteii maw, "vunhawk phial-in maw" a sut hamtang mah bangun, Zeisu Khazih upna tungtawna Pasian ta ahi eite in zong i Pa Pasian leh i Honpa leh i Upa Zeisu i sutna a om buang hiam? Koi mun ah i sun hiam? Mite'n sun hong sa uh hiam? Hong mu thei uh hiam? Midangte tawh i kilamdanna limlim a om peuhmah maw leh? Kua u sun hiam? Kua ta na hi hiam cih na kiphawk den hiam?

Ni simin, Khasiangtho vangliatna tawh, Zeisu Khazih a sun semsem dingin hong kilam-en hi gige hi. Ni kum leh tu kum i kilamdan zekna a om hiam? A beisa kum sawm lai peuh tawh i kibangbang mawk hiam? Leitung nate peuh thupisa semsem mai a midangte tawh i kilamdan mel kei leh bel dahhuai mahmah ding hi. Kua ta na hi hiam cih na kiphawk den hiam? A it thei zaw, a hehpih thei zaw, a lungduai zaw, a migi zaw, a thuman zaw, a thutak zaw, a muanhuai zaw a siangtho zaw dingin Pasian in hong deih hi.

Kua na i hi hiam cih i kiphawk den ding thupi mahmah ding hi. Kei leh kei a kithuhilh hi'ng, nang zong Pasian in tua bang dingin hong deih lam na kiphawk in. Topa'n thupha hong pia hen! 

Sia Zam Khat Kham 
fb:https://www.facebook.com/zamkhatkham

Read More

#7. PASIAN TA KA HI ZO

Key: E

Pasian  ta  Jesuh  Khazih  ka  up  ka  san  ciangin, 

Pasian  ta  cihna   ka  ngahzo,

Satan  I  ta  pan  Pasian  ta  ka  hi  zo, 

Kei  tangin  hong  thuaksak  ka  To  Jesuh  hangin. 

          Pasian  ta  ka  hizo,  Topa  ka  phat  den  ding, 

          Leitung  mite'n  hong  theihpihloh  hang

          Vanmite  sak  theihloh  sisan  man  phatna  la

          Vantung  kham  khua  sungah  zong  hih  la  kasa  ding. 

 Hotkhiatna  om  kei  leh, sing  tung'h  thah  ding  ka  hi.

Singlamteh  mi  mawh  sih  na'ng  hi. 

Ahih  hang  Jesuh  Khazih'  kei  tang  dingin  hong  si, 

Kei  tang  ding  hong  thuak  sak  Jesu'n  singlamteh  tung. 

Ka  mawhna  a  tam  hang, Jesuh  ka  up  ciangin, 

Asi  in  ka  mawhna  sawp  siang. 

Kei  septheih  omlo, hong  hehpihna  hangin, 

Tua  sisan  hang  mawh  neipi  midik  ka  tang  ta. 

Hehpihna'n  upna  tawh  gupna  kangah  khin  zo, 

Tawntung  mun  ding  ka  nei  zota, 

Leitung  mi'n  theilo, a  lam dang  tatna  thu, 

A  tawntung  Topa  min  phat  na'ng  la  ngaih  ka  nei  ta. 

Read More

#20 SI NAWNLO DING

Key: E 

Lawp  gige  ing  zingsang  khat  peuh  ciang 

Gabriel  pengkul  um  ke'n  za  ning, 

Sinawnlo  ding  ka  khanlawh  ciang 

It  huai  tanpa  mu  ding   ka  dawnteh

Lungdam  awng  in  lei  nusia  ning 

          ( Sinawnlo  ding )Zingsang  khat  peuh  ciang 

          ( Ka khanlawh ciang )  Suang  manph   kizem 

          ( Lungdam  si ning )  Minthanna   gamah, 

          ( Vantung khuapi ah ) Hih  thu  sutsut  ning

          A  khang  a  khang  a  tatsa  mite  tawh  

          Amah  bia  in  phat  khawm  ta  ding, 

          Sinawnlo  ding  ka  khanlawh  ciang. 

Mitphiat  kalsungin   pumthak  nei  ning 

Pasian  a  minthang   den  ta  hen 

Sinawnlo  ding  ka  khanlawh  ciang, 

Tua  khuapi  ka  zuat  toh  tak  ciangin 

Dahna  teng  mangpha  khak  ning  ke'n  

Sinawnlo  ding  ka  khanlawh  ciang

A  ki  tansa   minam  khempeuh  tawh  

Vantung  hoihna  ke'n  velvel  ning 

Sinawnlo  ding  ka  khan  lawh  ciang  

Tuidam  luanna  singkung  sem  gei-eh 

Khawlna  ding  mun  ke'n  kamu  ding, 

Sinawnlo  ding  ka  khawnlawh  ciang

Read More

#19 VA BANG KA LENG DING

Key: E

Topa  Zeisu'n  hih  bang  thugen, 
Manlang  in  kong  paikik  ding  hi. 
Mi  siangtho  te  hong  pi  ding  in
Thu  um  misi  te  thoto  ding 
Mitphiat  kalsungin  kikhel  ding 
Kham  innpi  sungah  va  bang  in  leng  to  ding. 

          Va  bang  in  kei  ka  leng  ding  hi
          Nisuah  nitum  sak  leh  khang  pan
          Thu  um  mite  ki   kaikhawm  ding 
          Kham  innpi  ah  vabang  in  leng  to  ding 

Jerusalem  kham  khua  thak  ah
Vantung  mite  ki  kaikhawm  in
Thu  im  mite  tawh  kimu  ding, ( Halelujah ) 4
Lungdam  kipak  in  Pasian  phat  ding

Kham  innpi  ah  kei  ka  tung  ding
Topa'n  khitui  hong  nul  sak  ding 
Nat  na  satna  te  om  nawnlo  ( Hallelujah z) 4
Lung dam  kipak  in  Pasian  phat  den  ding 

Read More

#18 NANG OM NA PEUH

Key: G

Topa  nang  om  na peuh  ah,  ka  kha  in zong  nuam  sa hi. 
Vul  in kun  ka  kha  kun  cih  om  ngei  lo 
Zing  dai   momlai   pak  palh  bang lung  tai 
et  lawm  nuih mai  in
Nang  om  na  peuh  ka  kha  in  nuam  sa  hi. 
       
          Nang  om  na  peuh   ka  kha  in  nuam  sa  hi
          Sun  le  zan  a  tawntung  in. 
          Kei  kha  muanna  nang  na  hi. 

Topa  nang  om  na  peuh  ah  lungnop  suahtakna  om  hi. 
Huatna, enna,  kitot  na  om  ngei  lo 
Sun  kim  ka  lunggulh  pen  nang,  zangciang  ka  zalmang   na  hi, Nang  om  na  peuh  ka  kha  in  nuam  sa  hi. 

Topa  nang  om  na  peuh  ah,  lawmhoih  khat  nei  gige   in, 
Nang  ma  sung  lo  bukna   ding  dang  omlo  hi. 
Sep  na  peuhah  lung  kim  na  hei  na  peuh  ah  mai  tai  na, 
Nang  om  na  peuh  ka  kha  in  nuam  sa  hi. 

Ka  gumpa  le  ka  Topa, ka  belh  suangpi   nang  na   hi
Nisim  hongliah  hongdal  ka  suangpi  aw.
Cimawh  meigong  tagahte  a  ding  lawm  hoih  pen  na  hi. 
Nang  om  na  peuh  ka  kha  in  nuamsa  hi. 

Read More

#17 TOPA BANG ZAHNA LIAN

Key: E

Tunglam  ka  ettoh  leh  van  dumpi  ka  mu  a, 

Mualdawn  meeiluumkai-te  vanmong  bang  ka  mu  a, 

Ahih  hang  ka  muh  nailoh, genzawhloh  in  tam  a, 

Hih  thu  ka  ngaihsut  ciang, Topa  bangzah  na  lian, 

          Tua  hi  a,  Topa  aw  kong  phat  hi

          Na  hihna  bangin  hong  phat  ning

          Na  khempeuhte  na  khut  sung

          A  patna  leh  a  tawpna  Vanglian  khut  in  len

          Hih  thu  ka  ngaihsut  ciang  Topa  bangzah                 na  lian

Hih  leitung  bangmah  lo  tungah  a  kaisak  hi. 

Sun  in  ni  zan  in  kha  aksi  te  tang  sak  hi. 

Amaute  a  hun  zui  in  ki  hei  diamdiam  uh  hi, 

Hih  thu  ka  ngaihsut  ciang   Topa  bangzah  na  lian. 

Vantung  vannuai  mun  khempeuh  ah  nang  na  om  hi. 

Tuipi  thuk  sung  nangawnah  zong  na  ki  zel  hi. 

Na  thu  sung  na  koihsate  damdam  nong  musak  a, 

Hih  thu  ka  ngaihsut  ciang ,  Topa  bangzah  na  lian. 

Read More

#16 TOPA AW KA LUNGDAM HI

Key: G 

Van  leh  lei  piangsak  Pasian 
Ni  leh  kha  piang  sak  Pasian
Ka  nuntakna  a  hong  bawl  ka  Pasian
Nitaang  leh  guahtui  hong  pia,tuk  ciangin  an hong  la  sak, 
Na  vangliatna  kong  phat  hi  ka  Pasian. 
   
          Topa  aw  ka  lungdam  hi, 
          Nisim  nong  lungdam  sak  hi,
          Ka  hin'  lai   teng  na  min  ka  phat  den  ding 
          Tumging  tawh  nang  kong  phat  ding 
          Lamna  tawh  nang  kong  phat  ding
          Halelujah  na  minthang  den  ta  hen. 

Tu  ni  in  kei  a  dingin  hun  hoih  hunnuam  hong  kipia, 
Topa'  tung'  lungdamna  ka  ko  ding  hi. 
Lungdam  koh  biakna  pia  in  Topa  ka  pahtawi  ding  hi, 
Ka  hatna  teng  tawh  a  min  ka  phat  ding. 

Khat  veivei  nek  ding  neilo, khat  veivei  silh  ding  neilo, 
Ahi  zong  Topa  hoihna   ka  phawk  hi. 
Van  a  leng  vasate  leh  gamlak  unok  paakte  in 
Ka  nunna  nisim  in  tha  hong  dim  zel. 

Read More

#15 TUU BANG HONG CINGPA

Key: E

Topa  in  kei  hong  cing  tuucing  lianpa  hi,
Ka  nun  sung  bangmah  ka  kisam  kei  ding  hi,
Lonona  mun  tui  kiangah  kei  hong  kha  hi,
Ka  nuntakna  tha  hong  dim  sak  tawntung  hi. 

          Hoihna  leh  hehpihna  in  ka  khan  sung 
          A  tawntung  in  hong  zui  taktak  dinga, 
          Anuam  a  taang  Topa  inn  pha  sungah, 
          Amah  tawh   ka  om  den  ding  hi. 

Sihna  lim  guam  sung  na ngawn  ka  nawk  hangin, 
Hong  cing  ahih  ma'n  siatna  ka  lau  kei  hi, 
A  molhtum  leh  a  ciangkhut  in kei  a  hi, 
A  tawntungin  ka  lungmuanna  ahi  hi. 

Ka  galte  omna  mai  ah  kei  a  dingin, 
Sabuai  phah  in  an  hong  lui  in  hong  vak  hi
Keima  lu  zong  sathau  hong  nilh  sak  den  a, 
Ama  kiangah  bang  ka  ngen  lai  khong  ding  hiam!

Read More

#14 NA THU SUNGAH NUAM SA ING

( Na  thu  sungah  nuamsa  ing ) 2 
Na  thu  sung bek  mah  lam-etna  nei  ing.
Mitte  vaksak  in  lungsim  nuam  sak  hi. 
Na  thu  sungah  Topa  kei  hong  kha  in. 

          Na thu in lam hong lak meivak hi,(Halelu-ah) 
          Ka  pai  na  lampi  khua  hong  vak sak  hi. 
          A  lamdang  nate  ka  muhtheih  nang  in, 
          Na  thu  sungah,  Topa  kei  hong  kha  hi. 

Mihing  te'  nuntakna  in  an  leh  tui  bek  hilo  hi, 
Pasian  kammal  thutak  tawh  nungta  hi, 
Hih  thu  a  theih  nangin  Mana  tawh  vak  hi, 
Sehnel  gamah  Topa  in thuhilh  hi. 

( Topa  a  muang  khempeuh  te ) 2
Zan  a  ihmut  kal  in  hong  cing  ding  hi.
Na  khanlawh  ciang  zong  hong  hopih  ding  hi, 
Na  gamtatzia  ding  zong  hong  hilh  ding  hi. 

Read More

#13 LEIBAT DANG NEINAWN KENG!

Key: G

          Vang  liatna  kangah  khina, 
          Pasian  ta  ka  hih  nung   sang
          Lungdamna  koh  ding  sim  loh, 
          Leibat  dang  ke'n  neinawn  keng. 

Hong  hon  ding  khat  zong  neilo, 
Khitui  luang  ka  om  laitak, 
Ka  khitui  hong  nulsak  a, 
A  ang  sung  kei  hong  pomta.

Natna  in  kei  hong  tuam  in,
Hong  veh  ding  ka  neihloh  lai, 
Thoto  in  na  dam  zo  hi, 
Hong  cih  man  ka  damsiang  ta.

Tu'n  keipawh  patau  nawn  ke'ng, 
Mawh  maisak  pa  nei  zong  ing, 
Mawhna   in  kei  hong  zol  hang, 
Jesuh  hang  gupna  ngah  tang. 

==================================================================

HONG  KOIH  UNG   A  SANG   PEN  MUN  AH!
Key: G
Hong  koih  ung,  a  sang  penpen  mun  ah, 
Nang  in  Siampi  lian  pen  na  hi. 
Hong  koih  ung,  na  khempeuh  sang  a  sang  zaw'n ,
Na  khephung  zuan  in,  nang  kong  bia  ding  uh  hi.  

Read More