Cik
ciang Tedim ka mu kik zen tam maw. Ka sangkahna ngei lah hikei, ka
khankhiatna lah hikei, ahi zongin ka mu kik nuam hi... nang e leh?
Zomi
makai tampi banah Zomi mi minthangte (celebrities) tampi tawh kimu kha
ka hih manin ka gen masak ding bang ka theikei liang hi. Zomi lasiam
'Lia Cingsan' ciin ka theih masak leh 'Tg. Pauno' ciin ka theih masakte
tuallenna khua hi cih ka thei hi. Ahi zongin amau nungsang ah lasiam
tampi mah Topa in hong lapsang sakta a, nakpi takin Zomi a hong bawlpa
tungah i
lungdam hi. Pasian lasa ci leng lasiam Sia Tuamung te, Sia Lam Cin te,
Sia Do Kham te, Sia TS Khai te, Sia Kap Mang te... cih bangin a min uh
kigen khin pak zolo hi. Zomi te hong lamto Topa tungah ka lungdam hi.
Singapore
ah lasiam Thawn Kham hong zin in lasiam Cingsan tawh hong kithuah uh a,
nung kum nih 2012 Zomi Nam Ni hi. Kei adingin Zomi lasiam Thawn Kham in
lasa ding cih pen ka lawp mahmah leh ka ngaklah mahmah hi a, amah zong
ka muh nailoh ahih manin ka muhnop khat ahi hi. Tua mah bangin lasiam
Sianu Cingsan zong ka muh ngeisa, Lamka ah 1993 May kha in ka muhsa ahih
hang ka muhkik nop mahmah ahi hi. Tua ka muh laiin Hong Kong movie star
te bangin a sam a pang tomsak in a nung sausak a, a talsam kiil sak hi.
CBA Missions khawmpi ah a unau un la hongsa uh a, amau Bangalore ah Lai
Siangtho sangkah sangkhawl sung hong ciah uh ahi hi. Lasiam Thawn Kham
pen en mu nuama i ngaklah mahmah laitak ka gei a tute in, 'U Thawn Kham
khawng i muhmuhsa hilel e, hong tung nailo maw' ci ziau uh in, kei
adingin bel ka muh ngei nailoh ahih manin a mu nuam mahmah himai ing.
Hong tun taktak ciang lah ka geia te gen bangin amah zong Zomi mah na hi
in, USA ka zin laia ama lasak ka deih mahmah uh "pianna vangkhua" a cih
la:
Sum zong pai zong zinsuk zintoh khuapi sungah ka om a,
Anlim anpha ka nek hang Inn hoih lo hoih nei in
Khuapi sungah omdan khawldan nuntakziate cimtak ing,
Kilbang khanna vangkhua mu bang ngai ing e....
http://www.youtube.com/watch?v=ZxCWZmEQ7nM
hong
sak ciang bang zong ei mah khat bang na himai e. Khual i zin ciang
mawtaw tawh i paipai a, mawtaw tun nawnloh ciang khe tawh i pai a,
khuanawl i tun ciang naupang vasa vai khedap bulhlo a saili leh
thungkuah tawh a diangdiangte mah na bangin na Zomi mahmah hi. Ahi
zongin kei adingin Zomi lasiam te thupi in pahtakhuai kasa a, ka it a,
ka zahtak hi.
Tutung GZA Khawmpi 2veina ah zong Zomi lasiam tampi hong kihel
thei ahih manin nakpi takin lungdam huai kasa hi. Zogam Lapu Sia T.S. Khai in, "Zogam Vontawi Taang pa ka hi"
cihla hong sak ciang bang Zomi leh Zogam itna hong khanglosak kik hi.
Zogam leitang ngahkik mateng khawllo e, Zogam vontawi lia leh taang te!
Sia Khai in a lasak siam manin sum leh pai ngah ziahziah ahih manin lasa
dinga a sam Lengtong Kam Khen bangin haza phial hiam aw ciamnuih kik in
mipi kinui zaizai hi (amau kimaingap dante a enghuai mahmah kizopna ahi
hi)! Lengtong Kam Khen in zong hong zom pah in "Zogam Cowboy"
cih la hong awi ziahziah a, USA pan hong puak Cowboy lukhu khu napi
amah zong a Sakol hong kenglo hi! Sia Khual in a sakol ding leh a pistol
ding puaklo ci napi amah pumpi mahmah va hawh in aman zong hong pua
tuanlo ahih ciang Sia Khual a mawhsak hang a mawhsak thei hinawnlo
hi :). Tua bek hilo in,
Theibang sena zu bang ka mom laiin,
Ka nun luaisung hong vei diaidiai na tual,
Ka vangkhuatual hong zuankik ing
Mimbang pianna dimtui vangkhua kilbang khanna, lenna
Ka vangkhuatual hong zuankik ing
cih
la hong sa in hong kihuang deudeu a, siam lah siam, a pumpi zong lah
kihuang zo, huihnung lua hiam huih in mutpuk dekdek zel... nuam, biltai;
Zomi lasiamte in hong awi zo mahmah uh hi.
Zogam lambu Pu Vum Nang in zong, "Tuun sung khat pan piang hi ngeingei hang e"
cih la hong sa ziahziah a, khangthak lasiam khempeuh pahtawi in va
dinpih uh a, nak nop hiven. Zomi hih mah angtan huai zungzung hi.
Gamdang tung Zomi te in zong a car tungvuah hawng in khual a zin uh
ciangin Zomi lasiamte la hong in ngai ziahziah uh a, nuamtuam mahmah hi.
Lamka pan hong pai B. Muan Ngaihte in zong Zogam ngaihla hong sa in
mipi in khutbeng ziahziah a Sianu Cingsan bang kidek zolo in stage
tungah va kahto in tha vapia bek hilo in va sakpih ziahziah a, 'sak mi
khang mi cih om nawnlo in Zomi te lasa khawm, tui dawn khawm, kikhawl
khawm hita hang cih hong musak hi.
ZOMUS thuvaanpi Sia Lianpi @ Taang Lungtup in zong ZOGAM NUAM
(http://www.youtube.com/watch?v=WGKiJuwVtaY&index=2&list=PL12EA0CBDAC84FBAF)
cih la hong sa in, mipi in khutbeng in kisakpih ziahziah hi. Inngua
hahlo gamgua hah kei ni...ka sisan laih thei kei ning, ka minam laih
thei kei ning ciin hong awi hiauhiau tanghial in mipi lungsim hong zo in
tu laitak i dinmun tawh kituaklua ahih manin mipi kipakta mahmah in
letsong kipuak ziahziah hi. Lasiam Cingpi, Lasiam Sannuam, lasiam thak
tampi Kawlpi pan hong paito leh khuasung pante in zong Zogam ngaih la sa
ziahziah uh a, a kizepna uh lah etlawm, a lasak uh lah ngaih hi.
"Topa laptoh Zomi te" cih Zomi lasiam Kapno
in a sak bang ciang Siate Rev. Dr. Gin Khan Khual nangawn zong kidek zo
nawnlo hi. Rev. Dr. Go Chin Zam, Rev. Pau Khan Khai, Rev. Dr.Do Suan
Mung, Prof. Dr. C. Thang Za Tuan leh ulian tampi zong kidek zo nawnlo in
mipi mai ah khutlam in kilamziahziah a, kei nangawn zong ka lungsim
hong lawnglua ahih manin ka lamkhia kha mawk hi. Khamite in 'kha in
nasem' a cih uh pen tutungin hong tung takpi himawk hi. Pasian in Zomite
hong laptoh manin tuni a kitung hi a, tuni hun bang a kizang hi cih
kiphawk lua ahih manin mipi bek hilo makaite khempeuh zong a laamlo omlo
hi. Tua nitak mahmah GZA Khawmpi nitak concert hun ah kiphawk pen
dingin ka um hi. Tua zaha kha hong kibuak om nawnlo hi. Sia Do Kham tanu
Mary Kham in zong a pa la deih NISIM IN
NITHAK HI A cih hong sa a, lung hong lengsak in lungsim hong lawng
mahmah hi. Anau Joshua Kham tawh hong laam in mipi etnop ding hong kilak
ziahziah uh a, tua banga lamsiam Zomi sungah i omlam kimu a nuam kisa
in khut kibeng ziahziah hi.
Tung Solkha Tang singseng nuai ah
hih banga Zogam ngaih la, Zomi ngaih la kisa in kiawi ziahziah ahih
manin a gei a Phuitong kung pote zong nuamsa in lungdam in na kihuang
deudeu uh a, Zohuihkhi siang zong hong laang hiauhiau in vot hiauhiau a,
ahi zongin guahzu leh meikai cih bang omlo hi. Zomi te nuamsa a kikholh
liailiai uh ciangin a singkung, a lopa leh a huih bek in lungdam in
nuamsa hilo in khuahun leh nisa te in zong a nuam bek takin hong uap uh
hi. Kithutuak diamdiam a nasep khop, kikholh khop a nop dan hong
ciamkholsak a, Zomi te mailam ding a nop ding zia hong theikholsak hi.
Tua ahih manin Zomi te Concert a nuam i sak bangin nasepna vai khempeuh
ah hih bangin nuamsa khawm in mainawt khawm, kipawlkhawm in kuamah
tangpek lo ding hi hang. Pankhawm hatna hi, hatna sungah lawhcinna om a,
lawhcinna ah nopsakna om a, nopsak na ah nuntak nuam kingah hi. Minam
picingte in nuntak nuam a nungta uh hi. Zomi te tua ni ding hong naita
hi.
Nitak
kikhop simin mipi tutna ding kigual ah kita lo in a tamzaw lei lak ah
phek kiphah ah tu uh a, tua tungah tutna a ngahlo te zong phung tung,
mualbo tungah tu in Sia Do Suan Mung sanginn huangsung dim mitmet in
kitu a, kigamlum in kigualnuam a leitung dang kiphawk manlo in 'ei leh
ei lulam' cih bangin eima nopsakna vive tawh hun kizanga, khangkhat
nuntak dingin a hamphat huai hunzat ahi hi. Hih bang hun nuamte cik
ciangin a kizang kik tam maw. Siate leh mipite, khangthak naupangte
adingin a kiciamteh, a kiphawk den ding hunnuam ahi hi.
Hun cing pahpah: Nitak
nai 7pm panin hun zat kipan in mipi lasakna leh lasiamte lasakna ban ah
siate, makaite thugenna tomnono tawh kigual nuam in 'nuam panpan ei' i
cih laitak hun hong cing pahpah in zankim hong naih pahpah a kikhen hun
hong tung pahpah a, khamlo pipi in 'zal mangpha man aw' ciin kikhen hong
kul zel hi. Zan 4 bang zankim ciangciang hun a kizat hangin kuamah in
cimtak cih omlo in khamlo leh khialah takin kiciah zel hi. Hibang hun
nuam cik ciang a ki muk zel tam maw!
'Omkhawm
lai leng nuam lai, hunte'n hong khengta' cih mah bangin zankim dekdek
ciangin giahna laikhun ciat kizuan a zingsang nai 7am mah in kitungkik
a, ihmut kicim mahmah tek hi. A huih sianga, a tui siang a, a mite
lungsim zong siang ahih manin nuamtak a nai 4 sung i ihmut man nak leh
kitawldam manin i tha dim kik man hi. Zogam a nopna tua ahi hi. Khualum
gam Singapore khawngah nai 6 pan nai 8 sung bang i ihmut kei leh
kitawldam man hetlo in kigim mahmah hi. Zogam a nop diakna tua hi.
Zogam
ah mihaute in inn hoih nono lam in, taihinn lam
zong na om zihziah in, a lamlam lai tawh, inn lutna a bawlbawl tawh
nasep pan a khawl (retiree) te in Zogam khuapi mah ah inn lam in tawlnga
uh hi. Tua ahih manin mihau leh mipilte, sum haute, khangthak mipilte
zuunna tawh i Zogam hong paal ding hi. Amau nuam a sa bek hilo in Zomi
lasiamte in zong zaila va awiawi uh hiven, nuamsa mah lo ding maw, mate?
(zop lai ding)
Hau Za Cin
Phuitong Liim
Jesus
was angry enough to purge the temple, hungry enough to eat raw grain,
distraught enough to weep in public, fun loving enough to be called a
drunkard, winsome enough to attract kids, weary enough to sleep in a
storm-bounced boat, poor enough to sleep
on dirt and borrow a coin for a sermon illustration, radical enough to
get kicked out of town, responsible enough to care for his mother,
tempted enough to know the smell of Satan, and fearful enough to sweat
blood.
He is able to run to the cry of those who are being tempted and tested and tried.
Hebrews 2:18 (AMP)
Whatever you are facing, He knows how you feel.
0 coment�rios:
Post a Comment